Ontopolwa 16

Oshike sha simanenena monkalamwenyo yoye?

OKWA li ku na omulumentu gumwe ngoka a li e ya kuJesus esiku limwe. Okwa li e shi kutya Jesus omunongo, onkee ano, okwa ti kuye: ‘Muhongi, lombwela mumwameme omukuluntu, a topole nangame yimwe yomiinima mbyoka e na.’ Omulumentu ngoka okwa li ta dhiladhila kutya naye oku na okukala e na yimwe yomiinima mbyoka.

Mbela ando ongoye wa li Jesus, ando owa ti shike?— Jesus okwa mono kutya omulumentu nguno oku na uupyakadhi. Ihe uupyakadhi we kawa li wu na ko nasha niinima mbyoka yi niwe kumumwayina. Owa li owala kutya ka li e shi shoka sha simanenena monkalamwenyo.

Natu dhiladhile kombinga yaashika. Mbela oshike shi na okukala sha simanenena kutse? Mbela okukala tu na iidhanitho iiwanawa, oonguwo oompe nenge iinima yilwe ya fa mpoka?— Aawe, opu na oshinima shimwe sha simanenena. Shika osho oshiilongomwa shoka Jesus a li a hala oku tu longa. Onkee ano, okwa li a hokolola ehokololo lyomulumentu ngoka a li a dhimbwa Kalunga. Mbela owa hala oku li uva?—

Omulumentu nguka okwa li e na eliko olindji. Okwa li e na epya niigandhi oyindji. Iilya ayihe mbyoka a li a kunu oya li ya vala nawa. Iigandhi ye oya li yu udha noka li e na mpoka ta pungula iilya ye. Mbela okwa li ta ka ninga po shike? Ano okwi ipopile a ti: ‘Otandi ka hanagula po iigandhi yandje e tandi tungu yilwe iinene. Moka omo tandi ka pungula iilya yandje ayihe niinima yandje ayihe.’

Omulumentu nguka omuyamba okwa li ta dhiladhila kutya oshi li pandunge okuninga ngawo. Okwa li ta dhiladhila kutya oshi li pandunge okwiipungulila iinima oyindji. Okwi ipopile a ti: ‘Ondi ipungulila iinima oyindji. Itandi ka kala nda pumbwa sha methimbo lyoomvula odhindji. Onkee ano, ngashingeyi onda thuwa, otandi ka lya nokunwa notandi ki inyanyudha.’ Ihe opwa li pu na oshinima shimwe sha puka momadhiladhilo gomulumentu nguka omuyamba. Mbela owu shi kutya oshike?— Okwa li ta dhiladhila owala kombinga ye mwene nokombinga yuuwanawa we. Okwa li a dhimbwa Kalunga.

Onkee ano, Kalunga okwa lombwele omuyamba a ti: ‘Goya ngoye! Uusiku wonena oto si. Nena iinima ayihe mbika we yi ilikolele otayi ningi ya lye?’ Mbela omulumentu nguka omuyamba okwa li ngaa ta vulu okulongitha iinima mbino ngele a si?— Aawe, oya li tayi ka ninga po yagulwe. Jesus okwa ti: “Shika osho tashi ka ningilwa ngoka ti igongelele omaliko, ye kee shi omuyamba koshipala shaKalunga.”—Lukas 12:13-21.

Ondi inekela kutya ino hala okukala wa fa omulumentu ngoka omuyamba, hasho mbela?— Elalakano lye monkalamwenyo olya li owala okulalakanena omaliko, ihe shoka osha puka. Okwa li a kala aluhe a hala oshindji. Ihe ka li “omuyamba koshipala shaKalunga.”

Aantu oyendji oya fa omulumentu nguka omuyamba. Ohaya kala aluhe ya hala oshindji. Ihe shino otashi vulu oku ye etela uupyakadhi uunene. Pashiholelwa, owu na iidhanitho, hasho mbela?— Yimwe yomiidhanitho mbyono wu na oyini? Lombwela ndje.— Ongiini ngele gumwe gwomookuume koye oku na etanga, okapopitha nenge yimwe yomiidhanitho mbyono ngoye kuu na? Mbela otashi ka kala ngaa shi li mondjila okukambadhala okukondjitha aavali yoye ye ku landele oshidhanitho shimwe ishewe shono wa mona shi li kukuume koye?—

Otashi vulika omathimbo gamwe iidhanitho yi kale tayi monika ya fa ya simana unene. Ihe mbela oshike hashi yi ningilwa konima yethimbo?— Ohayi kulupa. Ohashi vulika yi teke e to kala inoo yi hala we nokuli. Dhoshili, owu na oshinima shono shi na ongushu onene shi vulithe iidhanitho. Mbela owu shi kutya oshike?—

Osho omwenyo gwoye. Omwenyo gwoye ogwa simana unene molwaashoka ngele ku gu na, ito vulu okuninga sha. Ihe omwenyo gwoye ogwi ikolelela mokulonga shoka tashi nyanyudha Kalunga, hasho mbela?— Onkee ano, inatu kala twa fa omulumentu ngwiyaka omuyamba egoya ngoka a li a dhimbwa Kalunga.

Aanona hayo owala hashi vulika ya ninge iinima kaayi li pandunge ngaashi omulumentu ngoka omuyamba. Aakuluntu oyendji nayo ohashi vulika ya ninge iinima kaayi li pandunge. Yamwe yomuyo ohaya kala ya hala iinima oyindji yi vulithe pwaambyono ye na. Otashi vulika ya kale ye na iikulya ya gwana, oonguwo nehala lyokukala. Ihe ohaya kala ya hala oshindji. Ohaya kala ya hala oonguwo odhindji. Ohaya kala ya hala omagumbo omanene. Iinima mbino ohayi kotha iimaliwa. Onkee ano, ohaya longo nuudhigini opo ya mone iimaliwa oyindji. Mpoka ngaa pu thike okumona iimaliwa oyindji, opo ngaa pu thike okukala ye yi hala.

Aakuluntu yamwe ohaya kala yi ipyakidhila noonkondo nelalakano lyokumona iimaliwa oyindji e taya kala kaaye na ethimbo lyokukala nuukwanegumbo wawo. Ihaya kala wo ye na ethimbo lyokulongela Kalunga. Mbela iimaliwa yawo otayi vulu ngaa oku ya kaleka nomwenyo?— Aawe, itayi vulu. Mbela iimaliwa yawo mbyoka otaya vulu ngaa oku yi longitha ngele ya si?— Aawe. Shika osho molwaashoka oonakusa kaye na shoka taya vulu okuninga.—Omuuvithi 9:5,10.

Mbela shika osha hala okutya osha puka okukala wu na iimaliwa?— Aawe. Iimaliwa oyo hatu landa nayo iikulya noonguwo. Ombiimbeli otayi ti kutya iimaliwa oyo egameno. (Omuuvithi 7:12) Ihe ngele otwa kala tu hole iimaliwa otatu ka ya muupyakadhi. Otatu ka kala twa fa omulumentu omuyamba egoya ngono a li i ipungulile omaliko, ihe ka li omuyamba koshipala shaKalunga.

Mbela otashi ti ngiini okukala omuyamba koshipala shaKalunga?— Otashi ti okupititha Kalunga komeho mokukalamwenyo kwetu. Aantu yamwe ohaya ti kutya oyi itaala muKalunga. Ohaya dhiladhila kutya okwiitaala oko owala kwa pumbiwa. Ihe mbela oye li ngaa lela aayamba koshipala shaKalunga?— Aawe, oya fa owala omulumentu omuyamba ngoka a dhimbwa Kalunga.

Jesus ka li nando a dhimbwa He gwomegulu. Ka li a kambadhala okwiilikolela iimaliwa oyindji. Ka li wo e na iinima yopamaliko oyindji. Jesus okwa li e shi shoka sha simanenena monkalamwenyo. Mbela owu shi kutya osho shike?— Osho okukala omuyamba koshipala shaKalunga.

Lombwela ndje kutya ongiini tatu vulu okukala aayamba koshipala shaKalunga?— Otatu vulu okukala aayamba koshipala shaKalunga mokulonga shoka tashi mu nyanyudha. Jesus okwa ti: “Ngame otandi longo aluhe shoka she mu opalela.” (Johannes 8:29) Kalunga oha kala a nyanyukwa uuna tatu longo shoka a hala tu longe. Ngashingeyi lombwela ndje kutya iinima yini to vulu okulonga opo wu nyanyudhe Kalunga?— Eeno, oto vulu okukala ho lesha Ombiimbeli, okuya kokugongala kwopaKriste, okugalikana kuKalunga nokukwathela yalwe yi ilonge kombinga ye. Mbyoka oyo iinima ya simanenena monkalamwenyo.

Molwaashoka Jesus okwa li omuyamba koshipala shaJehova, Jehova okwa li e mu sile oshimpwiyu. Okwa pe Jesus ondjambi yokukala nomwenyo sigo aluhe. Ngele otwa kala twa fa Jesus, Jehova ota kala e tu hole noku tu sila wo oshimpwiyu. Onkee ano, natu kale twa fa Jesus noinatu kala nando twa fa omulumentu omuyamba ngoka a dhimbwa Kalunga.

Mpaka otapu landula gamwe gomOmanyolo gOmbiimbeli ngoka tagu ulike nkene tatu vulu okukala tu na etaloko li li nawa lyiinima yopamaliko: Omayeletumbulo 23:4; 28:20; 1 Timoteus 6:6-10 nosho wo Aahebeli 13:5.

[Ethano pepandja 87]

Mbela omulumentu nguka okwa li e na uupyakadhi washike?

[Ethano pepandja 88]

Mbela omulumentu nguka omuyamba ota dhiladhila shike?

[Ethano pepandja 89]

Oshike shono wu na shi na ongushu shi vulithe iidhanitho?

[Omathano pepandja 91]

Mbela okanona hano otaka ningi shike shoka sha simanenena?