Ou na ngoo “oupuna puKalunga”?
‘Hano osho osho tashi ningilwa ou te lilikolele emona, ye ke na oupuna puKalunga.’ — LUKAS 12:21.
1, 2. (a) Ovanhu ohava ningi omaliyambo ashike? (b) Ovakriste ova taalela eshongo lilipi?
OMALWEENDO oku ka konga omaliko okwa kala taa dana onghandangala mondjokonona yovanhu. Pashihopaenenwa, oshingoli osho sha li sha monika muAustralia, South Africa, Kanada nosho yo mOilongo yaHangana mefelemido eti-19, osha li sha ningifa ovanhu va fiye po omaumbo avo nosho yo ovaholike vavo tava di koilongo yokokule opo va ka konge oupuna koilongo ya tya ngaho oko inava enda nande onale. Omafimbo amwe okwa li hashi kala sha nyika oshiponga okuya koilongo oko. Doshili, ovanhu vahapu ohava ningi eenghendabala da mana mo odo tadi dulu okutula eemwenyo davo moshiponga nohava ningi omaliyambo opo ve limonene omaliko oo va hala.
2 Nonande ovanhu kunena ihava i momalweendo va ka konge omaliko, ohava longo noudiinini opo va kale ve na ouxupilo. Ndele kashi fi oshinima shipu monghalelo ei yoinima, molwaashi ohashi pula efimbo lihapu nohashi lolokifa. Omunhu ota dulu okukala te lipula unene shi na sha noikulya, noikutu nosho yo onhele yokukala ndele ta efa po oinima oyo ya fimanenena ile e i dimbwe nokuli. (Ovaroma 14:17) MuLukas 12:16-21, Jesus okwa yandja efaneko ile eyele olo tali yelifa nawa oikala yovanhu ya tya ngaho.
3. Hokolola pauxupi efaneko laJesus olo li li muLukas 12:16-21.
3 Jesus okwa yandja efaneko laye pomhito opo a li a popya shi na sha nokulungamena olwisho, olo twa kundafana moule moshitukulwa sha tetekela. Konima eshi a londwela shi na sha nolwisho, okwa li a popya shi na sha nomulumenhu oshipuna oo a li ina wanenwa komaanda oo a li e yadi oilya ndele te a hanauna po nokutunga po amwe manene opo a tuvikile mo oilya yaye oyo ya li ihapu neenghono. Eshi a li ta diladila kutya ota ka tulumukwa nokuhafela onghalamwenyo youdjeko, Kalunga okwa li e mu lombwela kutya ota ka fya, noinima aishe oyo a li a likola otai ka ninga po yaumwe e lili. Opo nee Jesus okwa weda ko a ti: “Hano osho ou te lilikolele emona, ye ke na oupuna puKalunga, ta ningwa.” (Lukas 12:21) Oshilihongomwa shilipi hatu lihongo meyele olo? Ongahelipi hatu dulu okutula moilonga oshilihongomwa osho monghalamwenyo yetu?
Omulumenhu oo a li e na oupyakadi
4. Omulumenhu oo a hokololwa mefaneko laJesus okwa li omulumenhu a tya ngahelipi?
4 Efaneko olo Jesus a li a yandja ola shiivika nawa moilongo ihapu. Jesus okwa li a hovela okuhokolola efaneko olo a ti: “Epya loshipuna shonhumba ola dala nawa.” Jesus ka li a popya kutya omulumenhu oo okwa li a likola omaliko okupitila mokukengelela ile shihe li paveta, sha hala okutya, ka li omunhu mwii. Okutala kwaasho Jesus a popya shi na sha nomulumenhu oshipuna, oshi li pandunge okudiladila kutya omulumenhu oo a hokololwa meyele laJesus okwa li a longa noudiinini. Ndele oshi li wetikile kutya omulumenhu oo okwa li a ninga eemhangela nokwe lilongekidila onakwiiwa, tashi dulika a li ta diladila shi na sha nonghalonawa youkwaneumbo waye. Onghee, pataleko lounyuni, omulumenhu oo okwa li a longa noudiinini nokwa wanifa po oinakuwanifwa yaye.
5. Omulumenhu womeyele laJesus okwa li e na oupyakadi washike?
5 Kashi na nee mbudi kutya omulumenhu womeyele laJesus okwa li a likola oupuna waye ngahelipi, Jesus okwa ti kutya omulumenhu oo okwa li oshipuna, sha hala okutya, okwa li e na nale oiniwe yopamaliko ihapu. Ndele ngaashi Jesus eshi popya, omulumenhu oo okwa li e na oupyakadi. Epya laye ola li la dja oilya ihapu neenghono. Mbela okwa li e na okuninga po shike?
6. Ovapiya vaKalunga vahapu ove na okuninga omatokolo elipi kunena?
6 Ovapiya vaJehova vahapu kunena ohava kala monghalo ya faafana naayo yomulumenhu oo oshipuna. Ovakriste vashili ohava kendabala okukala ovanailonga ovanashili novadiinini. (Ovakolossi 3:22, 23) Kutya nee ove li ovanailonga vavamwe ile ove na eengeshefa davo vene, ohava pondola nohava kala ve na ounghulungu muhapu. Ngeenge pa holoka eemhito dokuyelwa moilonga ile eemhito dokungeshefa da wedwa po, ove na okuninga omatokolo. Mbela ove na okutambula ko eendodo odo ile eemhito dokungeshefa odo opo va mone oimaliwa ihapu? Ovanyasha vahapu vEendombwedi ohave shi endifa nawa mofikola. Oshidjemo, ohava pewa eendjabi ile oimaliwa yokulihongifa opo va ka mone ehongo la wedwa po koiputudilo ya fimana. Mbela ove na ashike okuhopaenena vamwe ndele tava dimine eemhito da tya ngaho?
7. Omulumenhu womeyele laJesus okwa li a ungaunga ngahelipi noupyakadi waye?
7 Mefaneko laJesus, omulumenhu oshipuna okwa li a ninga po shike eshi epya laye la dja oilya ihapu nokali e na apa te i tuvikile? Okwa li a tokola a hanaune po omaanda aye oo a li e na noku tunge po omaanda amwe manene opo a tuvikile mo oilya yaye ihapuihapu. Okwa ti: “Handi lombwele omwenyo wange: Omwenyo, owa tuvikililwa oipalwifa ihapu yomido dihapu, tulumukwa nee, lya, nwa, ove u nyakukwe.” Osho otashi ulike kutya omhangela yaye oya li ye mu ningifa a kale e wete a amenwa nokwa wanenwa. — Lukas 12:19.
Omolwashike Kalunga a li a ula omulumenhu oshipuna “elai”?
8. Omulumenhu womeyele laJesus okwa li a dimbwa oshinima sha fimanenena shilipi?
8 Ngaashi Jesus a hokolola, omhangela yoshipuna kaya li tai dulu okwaamena omwenyo washo, nonande oya li tai monika ya fa tai ke shi pondola. Oshipuna osha li sha dimbwa okuninga oshinima sha fimanenena, sha hala okutya, okulonga ehalo laKalunga. Omulumenhu oo okwa li ashike ta diladila kombinga yaye mwene, nghee ta ka tulumukwa, ta ka lya, ta ka nwa nokunyakukwa. Okwa li a diladila kutya molwaashi oku na “oipalwifa ihapu” ota ka kala yo nomwenyo ‘omido dihapu.’ Ndele mupya munene, oinima kaya li ya enda ngaashi a li a hala. “Omwenyo womunhu ihau xupifwa kouhapu weliko laye,” ngaashi naanaa Jesus e shi popya nale. Oufiku oo tuu oo, oinima aishe oyo omulumenhu oo a li e liongelela oya li ya xula po ombadilila, molwaashi Kalunga okwa li e mu lombwela a ti: “Elai ove, oufiku tuu ou wonena omwenyo woye oto u kufwa, hano aishe ei we i likola otai ningi yalyelye?” — Lukas 12:20.
9. Omolwashike omulumenhu womeyele laJesus a li a ulwa elai?
9 Paife natu ka tale koshitwa sha fimanenena sheyele laJesus, kutya omolwashike Kalunga a li a ula omulumenhu oshipuna elai. O-Exegetical Dictionary of the New Testament oya yelifa ya ti kutya oshitya shOshigreka elai “otashi ti alushe omunhu oo ehe na owino.” Emboitya olo tuu olo otali popi kutya Kalunga okwa popiwa ta longifa oshitya elai opo a ulike kutya “eemhangela domulumenhu oshipuna di na sha nonakwiiwa itadi ka pondola.” Oshitya osho itashi ulike komunhu oo ehe na eendunge, ndele okwaao “ta anye okudimina kutya okwa pumbwa ekwafo laKalunga.” Ehokololo laJesus li na sha nomulumenhu oshipuna otali tu dimbulukifa eendjovo odo a ka lombwela Ovakriste vomefelemudo lotete vomeongalo laLaodikea, muAsia Linini, a ti: “Ove to ti: Aame oshipuna, heeno, nda punapala, ndi he na eshi nda pumbwa, ndele ku shi shii, nokutya oove epongo, omukwanaluhepo, omupofi, u li hamuhele.” — Ehololo 3:17.
10. Omolwashike okukala ‘noipalwifa ihapu’ inashi hala okutya omunhu ota ka kala ‘nomido dihapu’?
10 Otu na okudilonga keyele olo. Mbela nafye otashi dulika tu kale twa fa omulumenhu womeyele laJesus, hatu longo noudiinini opo tu kale tu na “oipalwifa ihapu” ndele hatu dopa okuninga osho tashi tu kwafele tu kale tu na etimaumbwile lokukala ‘nomido dihapu’? (Johannes 3:16; 17:3) Ombibeli oya ti: “Emona itali kwafa sha mefiku loupyuhandu,” ‘naau te lineekele oupuna waye, ota ka punduka.’ (Omayeletumbulo 11:4, 28) Nomolwaasho Jesus okwa weda ko keyele ekumaido laxuuninwa a ti: “Hano osho ou te lilikolele emona, ye ke na oupuna puKalunga, ta ningwa.” — Lukas 12:21.
11. Omolwashike okukala twe lineekela momaliko kuhe na ekwafo la sha?
11 Eshi Jesus a popya a ti kutya ‘hano osho ta ningwa’ okwa li a hala okutya osho sha ningilwa omulumenhu oshipuna womeyele laye otashi ka ningilwa yo ovo ve lineekela filufilu moinima yopamaliko. Inashi puka naanaa ‘okulilikolela emona,’ ndele oupyakadi okukala tuhe na “oupuna puKalunga.” Jakob okwa yandja elondwelo la faafana naalo laJesus eshi a ti: “Pwilikineni nye ava hamu ti: Nena ile mongula otwa hala tu ye koshilando shonhumba noshongadi, tu kale ko omudo umwe, tu shingife fye tu likole — nye ava mu he nowino waashi tashi ningwa ko mongula.” Ovanhu ovo ova li ve na okutya shike? “Ponhele [yaasho] ngeno ohamu ti: Omwene ngenge e shi hala ndee tu nomwenyo, ohatu ka ninga eshi ile shinya.” (Jakob 4:13-15) Kashi na nee mbudi kutya omunhu oku na oupuna u fike peni, aishe otai ka kala yongaho okuninga shapo e na oupuna puKalunga. Ndele mbela okukala noupuna puKalunga otashi ti shike?
Nghee omunhu ta dulu okukala e na oupuna puKalunga
12. Oshike tashi dulu oku tu ningifa tu kale tu na oupuna puKalunga?
12 Ngaashi Jesus a popya, okukala noupuna puKalunga otaku yelekanifwa nokulituvikilila omamona. Jesus okwa li ta ti kutya katu na okukala hatu yandje elitulemo lihapu kokulikola omamona ile kokukala hatu hafele oiniwe yetu. Ponhele yaasho, otu na okulongifa oiniwe yetu mokuxwepopaleka ekwatafano letu naJehova. Ngeenge otwa ningi ngaho ohatu ka kala noupuna puKalunga. Omolwashike mbela taku dulu okutiwa ngaho? Omolwaashi ote ke tu nangeka noupuna muhapu. Ombibeli otai ti: “Enangeko noupuna lOmwene, olo tali likolifa, noshilonga shidjuu itashi wedele ko sha.” — Omayeletumbulo 10:22.
13. Omeityo lilipi enangeko noupuna laJehova ‘hali likolifa’?
13 Ngeenge Jehova ta nangeke noupuna oshiwana shaye, ohe shi nangeke noupuna monghedi ya denga mbada. (Jakob 1:17) Pashihopaenenwa, eshi Jehova a li a pa Ovaisrael edu, ola li li “yadi omashini nomaadi eenyiki.” Nonande edu laEgipti nalo ola li li yadi omashini nomaadi eenyiki, edu olo Jehova a li a pa Ovaisrael ola li la yooloka ko kedu laEgipti omolwoshinima shonhumba sha fimanenena. Moses okwa li a lombwela Ovaisrael a ti: “Edu tali kalelwa noshisho kOmwene Kalunga koye.” Eendjovo odo oda li tadi ulike kutya Ovaisrael ova li tava ka kala va hepuluka molwaashi Jehova okwa li te ke va fila oshisho. Ovaisrael ova li tava ka nangekwa noupuna munene kuJehova nokuhafela onghedi yokukalamwenyo i dule yoiwana aishe oyo ya li ye va dingilila, ngeenge ova kala ovadiinini kuye. Doshili, enangeko noupuna laJehova “olo tali likolifa.” — Numeri 16:13; Deuteronomion 4:5-8; 11:8-15.
14. Ovo ve na oupuna puKalunga ove na oufembanghenda ulipi?
14 Outumbulilo okukala ‘noupuna puKalunga’ owa tolokwa yo taku ti okukala “oshipuna koshipala shaKalunga.” (OB-1986) Ovo ve li oipuna ohave lipula luhapu shi na sha nanghee ovanhu vakwao have va tale ko. Naasho luhapu ohashi limonikila monghedi yavo yokukalamwenyo. Ohava kala va hala okufuula ovanhu vakwao, sha hala okutya, ove na ‘oifulalala yokukalamwenyo’ ngaashi Ombibeli tai ti. (1 Johannes 2:16) Mepingafano naasho, ovo ve na oupuna puKalunga ova hokiwa kuye, ohe va ulikile olune inali longelwa, nove na ekwatafano lopofingo naye. Molwaashi ove na oufembanghenda wa tya ngaho, ohashi va etele ehafo nove udite va amenwa, onghalo oyo itai dulu nandenande okweetifwa koinima yopamaliko. (Jesaja 40:11) Ndele mbela otu na nee okuninga shike opo tu kale tu na oupuna puKalunga?
Oipuna pataleko laKalunga
15. Otu na okukala hatu ningi shike opo tu kale tu na oupuna puKalunga?
15 Meyele laJesus, omulumenhu oshipuna okwa li a ninga eemhangela nokwa li a longa noudiinini opo a punapale, nomolwaasho a li a ulwa elai. Onghee hano, opo tu kale tu na oupuna puKalunga otu na okukendabala okulonga noudiinini nokukala hatu kufa ombinga pauyadi moilonga oyo ya fimana shili notai ti sha kuKalunga. Imwe yomoilonga oyo oyoyo Jesus e tu lombwela tu ninge, eshi a ti: “Indeni hano ka ningeni ovanhu aveshe ovalongwa vange.” (Mateus 28:19) Ngeenge ohatu longifa efimbo letu, eenghono detu nosho yo ounghulungu wetu moilonga yokuudifa Ouhamba nokuninga ovanhu ovahongwa ndele haku lipunapaleka, ohatu lituvikilile omamona. Ovo hava ningi ngaho ohava mono omanangeko noupuna manene opamhepo, ngaashi hatu ke shi tala moimoniwa ei hatu ka kundafana paife. — Omayeletumbulo 19:17.
16, 17. Oimoniwa ilipi oyo tai ulike onghedi yokukalamwenyo oyo tai ningifa omunhu a kale e na oupuna puKalunga?
16 Konakona oshimoniwa shomulumenhu umwe Omukriste wokoshilongo shokOushilo. Okwa li e na oilonga hai futu nawa yokupangela eekombiyuta. Ndele nande ongaho, oilonga yaye oya li hai pula efimbo lihapu neenghono, naasho osha li she mu ningifa a kale e udite a nghundipala pamhepo. Ponhele yokutwikila noilonga yaye, okwa ka efa po oilonga oyo ndele ta hovele ongeshefa yoaishikilima oyo a li ha landifa momapandavanda opo a dule okukala nefimbo la wana okufila oshisho eemhumbwe daye dopamhepo nosho yo oinakuwanifwa yaye yopamhepo. Ovo va li nale ovalongi pamwe naye ova li have mu sheke, ndele mbela oinima oye ke mu endela ngahelipi? Okwa ti: “Onda li handi mono oimaliwa ihapu shi dulife eshi nda li handi longo neekombiyuta. Onda li nda hafa neenghono, molwaashi kanda li ndi na oisho nomalipulo oo nda li handi etelwa koilonga yange yonale. Ndele osho sha fimanenena oshosho kutya ondi udite nda ehena popepi elela naJehova.” Elunduluko olo a li a ninga ola li le mu kwafela a ye moukalele wefimbo liyadi, nopaife ota longo koshitaimbelewa shEendombwedi daJehova moshilongo shambulavo. Enangeko noupuna laJehova “olo tali likolifa” shili.
17 Oshihopaenenwa shimwe oshi na sha nomukainhu wonhumba oo a kulila moukwaneumbo oo wa lenga neenghono ehongo. Okwa li e lihonga kounivesiti moFransa moMeksiko nomuSwitzerland nokwa li ta ka kala e na oilonga iwa. Okwa ti: “Onda li nda pondola, onda li nda fimana nonda li nda pewa omaufembanghenda e likalekelwa, ndele nande ongaho, kanda li nda mbilipalelwa nandenande.” Ndele eshi e lihonga kombinga yaJehova, okwa ti: “Eshi nda ninga exumokomesho lopamhepo, onda li nda hala okwaalulila Jehova ouwa oo a ningila nge, naasho osha li sha kwafela nge ndi mone kutya ondi na okukatuka onghatu ilipi, ndi mu longele ndi li omulongi wefimbo liyadi.” Okwa li a fiya po oilonga yaye, nokonima yefimbo lixupi okwa li a ninginifwa. Oule womido 20 da pita okwa kala ta longo nehafo moukalele wefimbo liyadi. Okwa ti: “Ovanhu vamwe otava diladila kutya ohandi hepifa oshipewa shange, ndele ove wete kutya onda hafa nova fimaneka omafinamhango oo haa wilike onghalamwenyo yange. Keshe efiku ohandi ilikana kuJehova a kwafe nge ndi kale omulininipiki opo ndi kale nda hokiwa kuye.”
18. Ngaashi Paulus, ongahelipi hatu dulu okukala noupuna puKalunga?
18 Saul, oo a ka ninga omuyapostoli Paulus, okwa li e na omhito yokutumbala nokupunapala moulikumwe wovanhu wopefimbo laye. Ndele nande ongaho, okwa ka shanga a ti: “Oinima aishe, eshi nde i shaameka nokushiiva Kristus Jesus Omwene wange, handi i tale oyo oshiponga.” (Ovafilippi 3:7, 8) Omamona oo Paulus a li a mona okupitila muKristus oku dule omamona aeshe oo taa dulu okulikolwa mounyuni. Sha faafana, ngeenge otwa efa po omalalakano a kanghamena kohole yokulihola mwene ndele hatu lalakanene onghalamwenyo yometilokalunga, ohatu ka kala tu na oupuna puKalunga. Eendjovo daKalunga otadi tu shilipaleke tadi ti: “Ondjabi yelininipiko noyokutila Omwene oyo oupuna nefimano nomwenyo.” — Omayeletumbulo 22:4.
Oto nyamukula ngahelipi?
• Omulumenhu womeyele laJesus okwa li e na oupyakadi washike?
• Omolwashike omulumenhu womeyele laJesus a li a ulwa elai?
• Okukala noupuna puKalunga otashi ti shike?
• Ongahelipi hatu dulu okukala noupuna puKalunga?
[Efano pepandja 30]
“Enangeko noupuna lOmwene, olo tali likolifa”