Ontopolwa 21

Mbela otu na okukala hatu itadhele sha?

OKWIITADHA otashi ti shike? Mbela owu shi shoka tashi ti?— Nandi ku pe oshiholelwa. Mbela owa kambadhala nale okuninga sha shoka kuu shi nawa okuninga? Otashi vulika wa li wa kambadhala okuthanga etanga. Nenge tashi vulika wa li wa kambadhala okunuka eyale. Mbela opu na gumwe a li e ku yolo e te ku lombwele kutya ota vulu okuthanga etanga nenge okunuka eyale e ku vule?— Omuntu ngoka okwa li ti itadha.

Mbela oto kala wu uvite ngiini ngele yalwe taya ningi ngawo? Mbela oto kala wu uvite nawa?— Mbela oto dhiladhila kutya yalwe otaya kala yu uvite ngiini ngele to itadha?— Mbela oshi li nawa okulombwela gulwe kutya ngoye owu mu vule moshinima shontumba?— Mbela Jehova okwa hokwa aantu mboka haya ningi ngawo?—

Omulongi Omunene okwa li e shi aantu mboka ya li yi iwete ye li nawa ye vule yalwe. Oya li hayi itadha e taya kala ya dhina kehe gumwe. Onkee ano, esiku limwe Jesus okwa li e ya hokololele ehokololo opo e yu ulukile kutya okwiitadha okwa puka. Natu ka pulakene kulyo.

Ehokololo olya li tali popi kombinga yOmufarisayi nomufendelithi. Aafarisayi oya li aalongi yelongelokalunga mboka ya li yi ishi uuyuuki ye vule yalwe. Omufarisayi ngoka a popiwa mehokololo lyaJesus okwa li a yi kotempeli yaKalunga muJerusalem a ka galikane.

Jesus okwa ti kutya omufendelithi gumwe naye okwa li wo a yi kotempeli hoka a ka galikane. Aantu oyendji kaya li ye hole aafendelithi. Oya li haya kala yu uvite kutya aafendelithi ohaye ya nyokoma. Muushili wo wene aafendelithi oyendji kaya li aluhe haya longo pauyuuki.

Omufarisayi gumwe sho a li potempeli okwa li a galikana Kalunga ta ti: ‘Kalunga, otandi ku hambelele, oshoka ngame kandi shi omulunde ngaashi aantu yalwe. Ihandi nyokoma aantu noihandi ningi iinima iiwinayi. Ngame inandi fa omufendelithi ngono. Ngame omuyuuki. Ohandi idhilike iikulya omasiku gaali moshiwike kehe, opo ndi kale ndi na ethimbo olindji lyoku ku dhiladhila. Ohandi gandja oshitimulongo kotempeli shomwaayihe mbyoka nde yi likola.’ Omufarisayi okwa li ta dhiladhila kutya ye oku li lela nawa e vule yalwe, hasho mbela?— Shika okwa li wo e shi lombwele Kalunga.

Ihe omufendelithi ye ka li ngaaka. Ka li nokuli a ligamene kegulu sho a li ta galikana. Okwa li a thikama kokule a sizimana. Omufendelithi okwa li i iyela ombedhi omolwomayono ge, nokwa li i idhenge montulo omolwokunika oluhodhi. Ka li a kambadhala okulombwela Kalunga kutya ye oku li nawa e vule yalwe. Pehala lyaashono, okwa li a galikana a ti: “Kalunga, sila ndje ohenda, ongame omulunde!”

Mbela oto dhiladhila kutya oguni po gwomaalumentu mbaka yaali a li a hokiwa kuKalunga? Mbela Omufarisayi ngoka a li ta dhiladhila kutya ye omuyuuki e vule yalwe? Nenge omufendelithi ngoka a li i iyela ombedhi omolwomayono ge?—

Jesus okwa ti kutya omufendelithi oye a li a hokiwa kuKalunga. Omolwashike mbela? Jesus okwe shi yelitha a ti: ‘Oshoka ngoka ti imonikitha a fa e li nawa e vule yalwe, ota shonopekwa. Ihe ngoka ti ishonopeke ota nenepekwa.’—Lukas 18:9-14.

Oshiilongomwa shini Jesus a li a longo aantu mehokololo lye?— Okwa li a longo aantu kutya osha puka okudhiladhila kutya otu li nawa tu vule yalwe. Mbela owa li nale wi ihumbata momukalo gwa tya ngaaka?— Natu tale koshiholelwa shomuyapostoli Petrus.

Sho Jesus a lombwele aayapostoli ye kutya yo ayehe otaye ke mu thiga po ngele a kwatwa, Petrus okwa li i inomo a ti: ‘Nando ayehe oye ku thige po, ngame itandi ke ku thiga po.’ Ihe Petrus okwa li a puka. Okwa li i iyinekela unene ye mwene. Konima yethimbo okwa ka thiga po Jesus. Ihe nonando ongaaka, okwe ke mu galukila, ngaashi tatu ki ilonga montopolwa onti-30 yembo ndika.—Mateus 26:31-33.

Natu tale oshiholelwa shimwe shopethimbo lyetu. Otashi vulika ngoye nomunasikola omukweni mu pulwe omapulo gontumba kosikola. Ongiini ngele omapulo agehe ngoka oto vulu oku ga yamukula meendelelo, ihe omunasikola omukweni ita vulu oku ga yamukula meendelelo? Oho kala wu uvite nawa sho wu shi omayamukulo gago. Ihe mbela otashi ka kala ngaa shu uka okwiiyelekanitha naangoka ihaa vulu okuyamukula meendelelo?— Mbela oshi li ngaa mondjila okwiimonikitha wu shi oshindji wu vule mukweni?—

Omufarisayi osho a li a ningi ngaaka. Okwa li i itadha kutya ye oku li nawa e vule omufendelithi. Ihe Omulongi Omunene okwa ti kutya shoka Omufarisayi a li a ninga kasha li shu uka. Oshoshili kutya omuntu gumwe otashi vulika a ninge oshinima shontumba nawa e vule mukwawo. Ihe shika itashi ti kutya oku li nawa lela e vule mukwawo.

Onkee ano, ngele otu shi oshindji tu vule mukwetu, mbela oshi li nawa okwiitadha?— Dhiladhila kwaashino. Mbela otse yene twa shita uuluyi wetu?— Aawe, Kalunga oye a shita uuluyi wakehe gumwe gwomutse. Iinima oyindji mbyoka tu shi, otwe yi ilonga kuyalwe. Otashi vulika twe yi lesha membo lyontumba. Nenge tashi vulika twe yi lombwelwa kugumwe. Nokuli ngele otwa ningi oshinima shontumba kutse yene, mbela otwe shi ningi ngiini?— Eeno, otwa longitha uuluyi mboka twa pewa kuKalunga.

Ngele omuntu okwa longo sha nuudhiginini, nena oshi li nawa okupopya sha shoka tashi mu uvitha nawa. Mu lombwela kutya owa nyanyukilwa shoka a ninga. Otashi vulika nokuli wu mu kwathele wu mu ulukile nkene e na oku shi ninga nawa shi vulithe mpoka. Shoka osho nangoye to ka kala wa hala aantu ye ku ningile, hasho mbela?—

Aantu yamwe oye na oonkondo ye vule yalwe. Ongiini ngele ngoye owu na oonkondo wu vule omumwanyoko omumati nenge omukadhona? Mbela owu na okwiitadha molwadho?— Aawe, hasho nando. Iikulya mbyoka hatu li oyo ye tu kwathela tu kale tu na oonkondo. Kalunga haye mbela he tu pitithile etango nohe tu lokithile omvula nakehe shimwe sha pumbiwa opo tu vule okumona iikulya, hasho mbela?— Onkee ano, Kalunga oye tu na okupandula omolwoonkondo ndhoka tu na.—Iilonga 14:16,17.

Kapu na gumwe gwomutse e hole okuuva omuntu ti itadha, hasho mbela?— Natu dhimbulukwe oohapu dhaJesus ndhoka tadhi ti: “Shoka mwa hala aantu ye mu ningile, osho ya ningileni wo.” Ngele tatu ningi ngaaka, itatu ka kala nando twa fa Omufarisayi ngoka a li i itadha ngaashi sha hokololwa mehokololo lyOmulongi Omunene.—Lukas 6:31.

Oshikando shimwe omulumentu gumwe oku ulile Jesus kutya omwaanawa. Mbela Omulongi Omunene okwa li a ti: ‘Eeno, ngame omwaanawa?’ —Aawe. Pehala lyaashono, okwa ti: “Kaku na nando omuntu omwaanawa, oKalunga awike.” (Markus 10:18) Nokuli nonando Omulongi Omunene okwa li a gwanenena, ka li i itadha. Pehala lyaashono, okwa li a gandja esimano alihe kuHe, Jehova.

Mbela opu na gumwe ngoka tatu vulu okwiitadhela?— Eeno, opu na. Otatu vulu okwiitadhela Omushiti gwetu, Jehova Kalunga. Ngele tatu tala etango ewanawa tali ka ningina nenge iinima yilwe iikumithi meshito, otatu vulu okulombwela gumwe tatu ti: ‘Jehova Kalunga ketu omukumithi oye a shita iinima mbika.” Natu kale aluhe twi ilongekidha okupopya kombinga yiinima iiwanawa noonkondo mbyoka Jehova a ninga nale naambyoka ta ka ninga monakuyiwa.

Lesha shoka Omanyolo taga ti kombinga yokwiitadha e to ilongo nkene tu na okuyanda okwiitadha: Omayeletumbulo 16:5, 18; Jeremia 9:23, 24; 1 Aakorinto 4:7 nosho wo 13:4.

[Ethano pepandja 113]

Omolwashike Kalunga a li a hokwa omufendelithi, ihe ka li a hokwa Omufarisayi?

[Ethano pepandja 115]

Mbela otashi ti kutya owu li nawa wu vule yalwe, molwaashoka owala wu shi oshindji wu ya vule?

[Ethano pepandja 115]

Omolwashike sha puka okwiitadha omolwoonkondo ndhoka tu na dhi vule dhayalwe?

[Ethano pepandja 116]

Okamati haka otaki itadhele shike?