Ontopolwa 23

Omolwashike aantu haye ehama?

MBELA owu shi gumwe ngoka te ehama?— Otashi vulika nangoye ho ehama omathimbo gamwe. Otashi vulika wu kwatwe kekunku nenge wu ehame mepunda. Aantu yamwe ohashi vulika ya kale taye ehama unene. Itaaya vulu nokuli okuthikama ngele kapu na ngoka te ya kwathele. Olundji shika ohashi ningwa ngele aantu ya kulupa noonkondo.

Kehe gumwe ohe ehama omathimbo gamwe. Mbela owu shi kutya omolwashike aantu haye ehama, haya kulupa nohaya si?— Esiku limwe omulumentu ngoka a li ihee ende okwa li e etwa kuJesus, na Jesus okwa li u ulike kutya omolwashike aantu haye ehama nohaya si. Nandi ku lombwele kombinga yaashoka.

Jesus okwa li a talele po megumbo limwe mondoolopa popepi nEfuta lyaGalilea. Engathithi lyaantu olye ya kuye. Aantu oyendjiyendji oye ya mondunda moka mwa li Jesus naamboka ya li pondje kaya li taya vulu okuya mo. Kapwa li nokuli omuntu ta vulu okuya popepi nosheelo shegumbo. Nonando ongawo, aantu oya kala taye ya. Ongundu yaalumentu oya li ye eta omulumentu ngoka a li e na uuvu wombanda nokwa li nokuli ihee ende. Okwa li a humbatwa kontala kaalumentu ye li yane.

Mbela owu shi shi kutya omolwashike ya li ya hala okweeta omulumentu ngoka te ehama puJesus?— Oya li ye na eitaalo kutya Jesus ota vulu oku mu kwathela. Oya li yi itaala kutya Jesus ota vulu oku mu aludha. Mbela owu shi kutya ongiini ya li ya fala omulumentu nguka oshilema puJesus nonando megumbo omwa li mu na aantu oyendji?—

Ethano ndyoka wu wete mpaka otali ulike nkene ya li ye shi ningi. Tango, oya tumbile omulumentu ngoka kombanda yondunda ndjoka ya li ye elekana. Oya ningi ombululu onene kombanda yondunda ndjoka. Hugunina oya kulukithile omulumentu ngoka nontala ye mondunda okupitila mombululu. Aalumentu mbaka kaya li tuu ye na eitaalo!

Aantu ayehe megumbo oya li ya kumwa sho ya mono shoka sha li tashi ningwa. Omulumentu ngoka a sa ombanda okwa kulukithilwa mokati kawo. Mbela Jesus okwa li a geya sho a mono shoka aalumentu mbaka ya li ya ningi?— Aawe, hasho nando. Jesus okwa li a nyanyukwa mokumona kutya aalumentu mboka oye na eitaalo. Okwa lombwele omusilombanda ngoka a ti: ‘Oondjo dhoye odha dhimwa po.’

Aantu yamwe oya li taya dhiladhila kutya kashi li mondjila Jesus a tye ngaaka. Oya li taya dhiladhila kutya Jesus ita vulu okudhima po oondjo. Onkee ano, opo e yu ulukile kutya ota vulu okudhima po shili oondjo, Jesus okwa li a lombwele omulumentu a ti: “Thikama, kutha ontala yoye, u ye kaandjeni.”

Sho Jesus a popi oohapu ndhoka, omulumentu okwa aluka. Omulumentu nguka ka li we oshilema. Okwa thikama kuye mwene e te ende. Aantu mboka ya li ya mono oshikumithalonga shika oya li ya kumwa noonkondo. Inaya mona nando onale oshikumithalonga ngaashi shoka. Oya hambelele Kalunga sho e ya pe Omulongi Omunene ngoka ta vulu okwaaludha aantu komauwehame gawo.—Markus 2:1-12.

Oshike tatu ilongo moshikumithalonga shika?— Otatu ilongo mo kutya Jesus oku na oonkondo okudhima po oondjo nokwaaludha mboka taye ehama. Ihe otatu ilongo mo wo oshinima shimwe sha simana noonkondo. Otatu ilongo mo kutya aantu ohaye ehama omolwuulunde.

Molwaashoka atuhe ohatu ehama omathimbo gamwe, mbela shika otashi ti kutya atuhe aalunde?— Eeno, Ombiimbeli otayi ti kutya atuhe otwa valwa nuulunde. Mbela owu shi kutya osha hala okutya shike okuvalwa nuulunde?— Otashi ti kutya otwa valwa inaatu gwanenena. Omathimbo gamwe ohatu ningi iinima ya puka nonando hasho twa hala. Mbela owu shi kutya oshe ende ngiini opo atuhe tu kale aalunde?—

Otwa valwa muulunde molwaashoka omuntu gwotango Adam ina vulika kuKalunga. Okwa li a yono sho a taaguluka ompango yaKalunga. Atuhe otwa thigulula uulunde kuAdam. Mbela owu shi kutya oshe ende ngiini opo tu thigulule uulunde kuye? Nandi shi ku fatululile momukalo moka to vulu oku shi uva ko nawa.

Otashi vulika wa li wa kwathele gumwe okuteleka oomboloto moshipana. Mbela oshike tashi ka ningilwa omboloto ngele oshipana shono oshi na embondokela? Mbela owu shi shi?— Embondokela ndyoka otali ka kala komboloto kehe ndjoka tayi ka telekwa moshipana shoka, hasho mbela?—

Adam ota yelekwa noshipana shoka, tse otatu yelekwa nomboloto. Okwa kala inaa gwanenena we sho a yono ompango yaKalunga. Kungawo, osha li sha fa a ninga embondokela. Sho a mono aanona, mbela oya li taya ka kala ya tya ngiini?— Aanona ye ayehe oya li taya ka kala ye na endhindhiliko lyokwaagwanenena.

Aanona oyendji ihaya valwa nendhindhiliko lyokwaagwanenena tali vulu okumonika. Ihaya valwa kaaye na omaako nenge omagulu. Ihe okwaagwanenena hoka ye na okwa kwata miiti notaku ya ningitha ya kale taye ehama nokonima yethimbo otayasi.

Dhoshili, aantu yamwe ohaye ehama olundji ye vule yalwe. Omolwashike shi li ngawo? Mbela omolwaashoka ya valwa ye na uulunde owundji?— Aawe, atuheni otwa valwa nuulunde wa faathana. Atuheni otwa valwa inaatu gwanenena. Onkee ano, mokweendela ko kwethimbo kehe gumwe ota ka kwatwa komukithi gwontumba. Nokuli naantu mboka haya kambadhala okuvulika koompango dhaKalunga naamboka ihaaya longo uuwinayi otaya vulu okukwatwa komikithi.

Ihe omolwashike yamwe haye ehama ye vulithe yalwe?— Opu na omatompelo ogendji. Otashi vulika omolwaashoka kaaye na iikulya ya gwana. Nenge tashi vulika haya li iikulya itaayi opalele. Otashi vulika haya li uuleke niikuki oyindji. Etompelo limwe olyo kutya otashi vulika haya kotha kwa toka unene noihaya kotha sha gwana. Nenge tashi vulika ihaaya zala oonguwo ndhoka tadhi vulu oku ya gamena kuutalala manga inaaya ya pondje. Omalutu gaantu yamwe kage na uukolele noihaga vulu okukondjitha omikithi nonando oya kambadhale okwiisila oshimpwiyu.

Mbela opu na ngaa ethimbo tatu ka kala itaatu ehama we? Mbela otatu ka manguluka ko ngaa kuulunde?— Jesus okwa li a ningile shike omulumentu ngoka a li oshilema?— Okwa li e mu dhimine po oondjo dhe nokwe mu aludha. Momukalo gwa tya ngaaka, Jesus oku ulike shoka ta ka ningila ayehe mboka taya kambadhala okulonga shoka shi li mondjila.

Ngele otatu ulike kutya inatu hala okuyona nonokutya otu tonde shoka oshiwinayi, Jesus ote tu aludha. Monakuyiwa ota ka kutha po okwaagwanenena hoka tu na. Shika ote ke shi ninga sho e li Omukwaniilwa gwUukwaniilwa waKalunga. Uulunde itawu ka kuthwa mo mutse auhe pethimbo limwe. Otashi ka kutha ethimbo opo wu kuthwe mo mutse. Opo nduno, ngele wa kuthwa po itatu ke ehama we. Atuhe otatu ka kala tu na uukolele wa gwanenena. Itashi ka kala tuu elaleko nuuyamba!

Omolwuuyelele owundji kombinga yankene uulunde wa guma kehe gumwe, lesha Job 14:4; Episalomi 51:5; Aaroma 3:23; 5:12; 6:23.

[Ethano pepandja 123]

Jesus okwa lombwele omusilombanda a ninge shike?

[Ethano pepandja 124]

Oshike tatu ilongo moshikumithalonga shika?

[Ethano pepandja 125]

Oshe ende ngiini opo atuhe tu ninge aalunde?

[Ethano pepandja 126]

Mbela uukolele wetu otawu ka kala ngiini uuna uulunde wetu wa kuthwa po?