Ontopolwa 27

Kalunga koye olye?

OMOLWASHIKE epulo ndika: Kalunga koye olye?, lya simana?— Omolwaashoka aantu ohaya galikana iikalunga yi ili noyi ili. (1 Aakorinto 8:5) Sho omuyapostoli Paulus a li a pewa oonkondo kuKalunga a aludhe omulumentu ngoka a valwa ihe ende, aantu oyi igidha taya ti: “Ookalunga oyi itula molupe lwaantu e taa kulukile kutse!” Aantu oya li ya hala okugalikana Paulus nakuume ke Barnabas. Oya li nokuli taya ti kutya Paulus oye Hermes nosho wo kutya Barnabas, oye Zeus, omadhina ngoka ga li giikalunga.

Ihe Paulus naBarnabas inaye etha aantu ye ya galikane. Oya zi mo mongundu yaantu e taye ya lombwele ya ti: ‘Itedhululeni, mu ethe iikalunga yaa na sho tayi kwathele e tamu gama kuKalunga omunamwenyo.’ (Iilonga 14:8-15) Olye ‘Kalunga omunamwenyo’ ngoka a shita iinima ayihe?— Eeno, oJehova, “Omupangeliawike kombanda yevi alihe.” Jesus okwa popi kutya Jehova oye “Kalunga awike kashili.” Onkee ano, olye mbela e na okugalikanwa?— OJehova owala.—Episalomi 83:18, NW; Johannes 17:3; Ehololo 4:11.

Aantu oyendji ohaya galikana iikalunga pehala lyokugalikana “Kalunga awike kashili.” Olundji ohaya galikana iinima mbyoka ya hongwa miiti, momamanya nenge miitenda. (Eksodus 32:4-7; Levitikus 26:1; Jesaja 44:14-17) Nokuli aalumentu naakiintu mboka ya simana omathimbo gamwe ohayi ithanwa iikalunga. Mbela oshi li ngaa mondjila oku ya pa esimaneko lya tya ngaaka?—

Konima sho Saulus a ningi omuyapostoli Paulus, okwa li a nyola ta ti: “Omadhiladhilo gawo oga pukithwa komuhindadhi, kalunga komuuyuni mbuka.” (2 Aakorinto 4:4) Olye kalunga kuuyuni mbuka?— Eeno, oSatana Ondiaboli. Satana okwa ningitha aantu ya kale taya galikana aantu ooyakwawo nosho wo iinima yilwe yi ili.

Sho Satana a li ta kambadhala a ningithe Jesus e mu tsile oongolo noku mu galikana, Jesus okwa li a lombwele Satana shike?— Okwe mu lombwele a ti: ‘Omuwa Kalunga koye oye awike u na oku mu galikana noye awike u na oku mu longela.’ (Mateus 4:10) Onkee ano, Jesus okwa li e shi yelitha nawa kutya Jehova oye awike e na okugalikanwa. Natu leshe kombinga yaalumentu yamwe aagundjuka mboka ya li ye shi kombinga yoshinima shika. Omadhina gawo, oShadrak, Meshak naAbednego.

Aahebeli mbaka aagundjuka oya li yomoshigwana shaKalunga Israeli noya li ya falwa muupongekwa kuBabiloni. Manga ya li muupongekwa moka, omukwaniilwa Nebukadnezzar okwa li i ihongele oshiyelekela shoshingoli oshinenene. Esiku limwe okwa gandja elombwelo kutya ngele iihikomwa oya tameke okuhikwa, kehe gumwe oku na okwiinyongamena oshiyelekela. Okwa londodha ta ti: “Shaa ngoka itee shi inyongamene, e shi simaneke, ote ku umbilwa mbalambala meziko lya hanya.” Mbela ando ongoye, ando owa ningi po shike?—

Olundji Shadrak, Meshak naAbednego oya kala nokuninga kehe shoka omukwaniilwa te ya lombwele ya ninge. Ihe oya li ya tindi oku shi ninga. Mbela owu shi kutya omolwashike?— Omolwaashoka oshipango shaKalunga otashi ti: ‘Ino kala u na ookalunga yalwe koshipala shandje. Ino ihongela oshiyelekela wu shi inyongamene.’ (Eksodus 20:3-5) Onkee ano, Shadrak, Meshak naAbednego oya vulika koshipango shaJehova pehala lyokuvulika kelombwelo lyomukwaniilwa.

Omukwaniilwa okwa geye noonkondo, onkee ano, okwa ti kutya aamati mboka yatatu Aahebeli naye etwe kuye. Okwe ya pula ta ti: ‘Odhoshili tuu kutya omwa tinda okusimaneka kalunga kandje? Otandi mu pe ompito natango. Shampa tuu mu uvu iihikomwa tayi hiki, nyongameni ne mu simaneke oshiyelekela. Ngele itamu shi ningi, nena otamu umbilwa meziko lyomulilo lya hanya. Mbela otamu dhiladhila kutya oku na kalunga ngoka ta vulu oku mú hupitha?’

Mbela aagundjuka mbaka oya li taya ka ninga po shike? Mbela ando ongoye, ando owa ningi po shike?— Oya ti komukwaniilwa: ‘Kalunga ngoka hatu longele ota vulu oku tu hupitha. Itatu inyongamene koshiyelekela shoye shoshingoli.’

Omukwaniilwa okwa li a geya noonkondo. Okwa lombwele aantu ye a ti: ‘Hanyekeni eziko li pupyale li vule shito luheyali’. Opo nduno okwa lombwele aalumentu aanankondo ya mange Shadrak, Meshak naAbednego e taye yu umbile meziko lyomulilo. Molwaashoka eziko olya li lya hanya noonkondo, aalumentu mboka ye yu umbile mo oya lungunithwa po komulilo. Ihe mbela oshike sha li sha ningilwa Aahebeli yatatu?

Shadrak, Meshak naAbednego oya gwile naanaa mokati komulilo. Ihe oyi itoola po. Kaya li ya mona oshiponga sha sha. Kaya li we ya mangwa. Mbela shoka oshe ende ngiini?— Omukwaniilwa okwo ontamene meziko lyomulilo, naashoka a mono osha li she mu tilitha. Okwa pula ta ti: ‘Inatu umbila nani aalumentu yatatu meziko?’ Aambala ye oye mu yamukula ya ti: “Eeno, osho twa ningi, Nkeyama.”

Opo nduno omukwaniilwa okwa ti: ‘Ondi wete aantu yane taa lyanga momulilo nomulilo itagu ya fike.’ Mbela owu shi kutya omuntu ngoka omutine olye?— Okwa li omuyengeli gwaJehova. Okwa gamene Aahebeli yatatu opo kaaya pye.

Onkee ano, sho omukwaniilwa a mono oshinima shika, okwe ya pomweelo gweziko e ti ithana ta ti: “Shadrak! Meshak! Abednego! Aamati yaKalunga gwokombandambanda! Zii mo.” Sho ya zi mo kehe gumwe okwa li e wete kutya inaya pya. Kaya li nokuli taya nika omulilo. Opo nduno omukwaniilwa okwa ti: ‘Tangeni Kalunga kaShadrak, Meshak naAbednego ngoka a tumu omuyengeli gwe nokwa hupitha aalumentu mbaka haye mu longele molwaashoka ya tindi okugalikana kalunga kalwe kee shi Kalunga kawo.’—Daniel ontopolwa3.

Otatu vulu okwiilonga oshilongwa mwaashoka sha li sha ningilwa aamati mbaka yatatu. Nokuli nokunena aantu ohaya galikana iiyelekela nenge iimenka. O-The Encyclopedia Americana otayi ti: “Epandela oli li oshinima oshiyapuki ngaashi owala omushigakano.” Iiyelekela otayi vulu okukala ya hongwa miiti, momamanya, miitenda nenge miilapi. Aalongwa yaJesus yopethimbo lyonale kaya li hayi inyongamene nokugalikana omupangeli gwaRoma naashoka osha li sha popiwa komunandjokonona Daniel P.Mannix kutya otashi vulu okuyelekanithwa “nokutinda okusaluta epandela nenge okweendulula egano li na ko nasha nokukala omudhiginini kepangelo.”

Mbela otashi ti sha ngaa kuKalunga ngele elongelokalunga oli na oshiyelekela sha longwa moshilapi, memanya nenge moshitenda?— Mbela otashi ka kala ngaa mondjila omupiya gwaJehova a galikane oshiyelekela shoka?— Shadrak, Meshak naAbednego kaya li ye shi ningi, na Jehova okwa li e ya nyanyukilwa. Ongiini mbela to vulu okuholela oshiholelwa shawo?—

Aalongeli yaJehova kaye na okugalikana omuntu nenge oshinima shontumba. Lesha kombinga yaashika muJosua 24:14, 15, 19-22; Jesaja 42:8; 1 Johannes 5:21 nEhololo 19:10.

[Ethano pepandja 143]

Omolwashike Paulus naBarnabas kaaya li ye etha aantu ye ya tsile oongolo?

[Ethano pepandja 144]

Omolwashike aalumentu mbaka yatatu itaayi inyongamene oshiyelekela?

[Ethano pepandja 145]

Ongiini Jehova a li a hupitha aapiya ye meziko lyomulilo?

[Omathano pepandja 146]

Iinima yini aantu haya simaneke kunena yi li iikalunga?