Ontopolwa 35

Mbela otatu vulu ngaa okuyumuka ngele twa si?

MBELA ngele twa si, Kalunga ota ka kala ngaa a hala oku tu yumudha?— Omulumentu omuyuuki Job okwa li i itaala kutya Kalunga okwa hala oku tu yumudha ngele twa si. Onkee ano, sho Job a li ta dhiladhila kutya oku li pokusa, okwa lombwele Kalunga a ti: “Oto ka ithana ndje notandi ku itaale.” Job okwa ti kutya Jehova Kalunga okwa yuulukwa nenge okwa halelela oku mu yumudha.—Job 14:14,15.

Jesus oku li naanaa ngaashi He, Jehova Kalunga. Jesus okwa hala oku tu kwathela. Sho omulumentu gumwe ngoka a li te ehama uuvu woshilundu e mu hehela a ti kutya “ngele owa hala okwaaludha ndje, oto shi vulu,” Jesus okwe mu yamukula a ti: ‘Onda hala.’ Jesus okwa li a aludha omulumentu nguka omunashilundu.—Markus 1:40-42.

Jesus okwi ilongo kuHe okukala e hole aanona. Methimbo lyonale, Jehova okwa li a longitha aapiya ye okuyumudha aanona poompito dhopaali. Elia okwa li i indile Jehova a yumudhe omwanamati gwomukiintu ngoka a li e mu yakula. Jehova okwa li e shi ningi. Jehova okwa li wo a longitha omupiya gwe Elisa a yumudhe okamati okashona.—1 Aakwaniilwa 17:17-24; 2 Aakwaniilwa 4:32-37.

Mbela itashi nyanyudha okutseya kutya Jehova oku tu hole noonkondo?— Ihe tu dhiladhila owala ngele tu na omwenyo. Ote ke tu dhimbulukwa wo ngele twa si. Jesus okwa ti kutya He oha tala ko oonakusa mboka e hole ye na omwenyo nando oya kale ya sa. (Lukas 20:38) Ombiimbeli otayi ti kutya ‘haeso nenge omwenyo, haambyoka yongaashingeyi nenge mbyoka tayi ke ya tayi vulu oku tu topola ko kohole yaKalunga.’—Aaroma 8:38,39.

Sho Jesus a li kombanda yevi okwa li e shi ulike kutya Jehova oha sile oshimpwiyu aanona. Dhimbulukwa kutya Jesus okwa li a longitha ethimbo opo a popye naanona kombinga yaKalunga. Ihe mbela owu shi shi ngaa kutya Kalunga okwa li a pe Jesus oonkondo a yumudhe aanona mboka ya sa?— Natu popye kombinga yaasho Jesus a li a yumudha okamwanakadhona komulumentu gwedhina Jairus koomvula12.

Jairus nomukulukadhi gwe nosho wo okanona kawo oya li ya kala popepi nefuta lyaGalilea. Esiku limwe okakadhona haka oka li take ehama unene, naJairus okwa li a mono kutya oke li pokusa. Jairus okwa li a dhiladhila kombinga yaJesus, omulumentu omukumithi ngoka a li u uvu kutya oha vulu okwaaludha aantu. Onkee ano, Jairus okwa yi e ke mu konge. Okwa adha Jesus ta longo aantu oyendji komunkulo gwefuta lyaGalilea.

Jairus okwa piti mokati kaantu e ta tsu oongolo poompadhi dhaJesus. Okwa lombwele Jesus a ti: ‘Okamwandje okakadhona otaka alukililwa. Otandi ku indile wu ye wu ka kwathele.’ Jesus okwa yi pamwe naJairus pethimbo opo tuu mpoka. Engathithi ndyoka lya li lye ya okumona Omulongi Omunene nalyo olya landula mo. Ihe manga ya li mondjila, aalumentu yamwe ya zi kegumbo lyaJairus oya lombwele Jairus ya ti: “Okamwoye okakadhona ka mana oondjenda. Oto monithile we shike Muhongi iihuna?”

Jesus okwa li u uvu shoka aalumentu ya popi. Okwa li e shi shi kutya Jairus okwa li e uvite ngiini omolwokusilwa okamwanakadhona ke hoka a li e na oko akeke. Onkee ano, Jesus okwe mu lombwele a ti: ‘Ino tila, itaala owala Kalunga, omumwoye ota aluka.’ Oya yi sigo okegumbo lyaJairus. Ookuume kuukwanegumbo waJairus oya li taya lili. Oya li yu uvite oluhodhi molweso lyakuume kawo ngoka omushona. Ihe Jesus okwa li e ya lombwele a ti: ‘Okanona inaka sa, ihe oka kotha.’

Sho Jesus a popi oohapu ndhika, aantu oya tameke okuyola molwaashoka oya li ye shi shi kutya okakadhona oka sa. Mbela sho to dhiladhila, omolwashike Jesus a ti kutya okakadhona oka kotha? Jesus okwa li a hala ya tseye kutya eso otali vulu okuyelekwa noomposi oondhigu. Okwa li a hala oku ya longa kutya koonkondo dhaKalunga, ota vulu okuyumudha oonakusa ngaashi naanaa tatu vulu okupendula omuntu a kotha.

Jesus okwa li a lombwele aantu ayehe ya ze mo megumbo lyaJairus e ta kala mo owala naayapostoli ye Petrus, Jakob naJohannes nosho wo he nayina yokanona. Opo ihe oya yi meni moka okanona ka li ka lala. Jesus okwa kwata okanona koshikaha nokwa ti kuko: “Munona, penduka po!” Mbalambala okakadhona oka penduka noka tameke okweenda. He nayina yokanona oya li ya nyanyukwa noonkondo.—Markus 5:21-24, 35-43; Lukas 8:40-42, 49-56.

Ngashingeyi dhiladhila kombinga yaashika. Molwaashoka Jesus okwa li a vulu okuyumudha okakadhona haka, mbela ita vulu wo okuyumudha yalwe?— Mbela oto dhiladhila kutya ote ke shi ninga ngaa shili?— Eeno, ote ke shi ninga. Jesus ye mwene okwa ti: “Ethimbo otali ya, uuna oonakusa ayehe mboka ye li moombila, taa ka uva ewi [lyandje]. Oyo notaa ka za mo moombila dhawo.”—Johannes 5:28,29.

Mbela oto dhiladhila kutya Jesus okwa hala okuyumudha aantu?— Oshiholelwa shimwe mOmbiimbeli otashi tu kwathele okuyamukula epulo ndyoka. Shoka sha li sha ningwa po esiku limwe popepi noshilando Nain oshu ulike nkene Jesus ha kala u uvite kombinga yaamboka haya kala ya nika oluhodhi pomafumviko.

Omukiintu gumwe okwa li ta yi pamwe nongundu yaantu taya ka fumvika omwanamati okuza muNain. Omukiintu ngoka okwa adhika opo a silwa omusamane gwe, ihe ngashingeyi okanona ke hoka ka li oko akeke e na oka si. Ka li tuu a yemata noonkondo! Aantu oyendji yomoshilando Nain oya li ye mu landula sho omudhimba gwomwanamati gwa li gwa humbatwa tagu falwa pondje yoshilando. Omukiintu okwa li ta lili noonkondo naantu kaya li taya vulu oku mu hekeleka.

Esiku ndyoka Jesus naalongwa ye oya adhika yu uka koshilando shaNain. Popepi nomweelo gwoshilando, oya tsakaneke po ongundu yaantu tayi ka fumvika omwanamati gwomukiintu nguka. Sho Jesus a mono omukiintu nguka ta lili, okwa li e mu etele ohenda nomutima gwe ogwa li gwi inyengithwa koluhodhi lwe olunene. Jesus okwa li a hala oku mu kwathela.

Onkee ano, Jesus okwa li a popi nomukiintu ngoka nondjaalela nonolukeno, shoka sha ningitha omukiintu ngoka a pulakene kuye, a ti: “Ino lila we.” Omikalo moka Jesus u ungaunga nomukiintu ngoka oya ningitha aantu ya kale ya hokwa oku mu tala. Sho Jesus a hedha popepi nomudhimba, oyendji oya li tayi ipula kutya ota ka ninga po shike. Jesus okwa li a lombwele omumati a ti: “Mugundjuka, otandi ku lombwele, penduka po!” Mbalambala omugundjuka okwa penduka po nokwa tameke okupopya.—Lukas 7:11-17.

Omukiintu nguka ka li tuu a nyanyukwa! Mbela oto ka kala wu uvite ngiini okumona ishewe oonakusa yetu aaholike?— Mbela shika itashi ulike kutya Jesus oku hole shili aantu nokwa hala oku ya kwathela?— Dhiladhila owala nkene tashi ka kala muuyuni uupe waKalunga sho tatu ka hambelela mboka ya yumuka.—2 Petrus 3:13; Ehololo 21:3,4.

Pethimbo mpoka yamwe yomaantu mboka taya ka yumudhwa, otu ya shi nale, mwa kwatelwa aanona. Otatu ka kala tu ya shi ngaashi naanaa Jairus a li e shi omwanakadhona ngoka a li a yumudhwa kuJesus. Yalwe mboka taya ka yumuka, oomboka ya sa oomvula omathele nenge omayovi dha ka pita. Ihe Kalunga ite ke ya dhimbwa nonando oya li ko oomvula dhonale.

Mbela kashi shi oshiwanawa okutseya kutya Jehova Kalunga nosho wo Omwana, Jesus, oye tu hole noonkondo?— Oya hala tu kale nomwenyo sigo aluhe, ihe haomvula owala dhontumba.

Lesha kombinga yOmanyolo ngoka taga popi kombinga yetegameno ekumithi li na ko nasha noonakusa, ndyoka lya popiwa mOmbiimbeli: Jesaja 25:8; Iilonga 24:15 nosho wo 1 Aakorinto 15:20-22.

[Omathano pepandja 182]

Jehova okwa li u ulike ngiini kutya oku hole aanona aashona?

[Ethano pepandja 184]

Oshike tatu ilongo shi na ko nasha naasho Jesus a li a yumudha okamwanakadhona kaJairus?

[Ethano pepandja 186]

Okuyumudhwa kwokanona komukiintu nguka hoka a li e na oko akeke otaku ulike shike?