Jesus ta longo iikumithalonga oyindji

Jesus okwe ya kombanda yevi u uvithile aantu onkundana ombwanawa yUukwaniilwa waKalunga. Opo Jehova u ulike shoka Jesus ta ka ninga e li Omukwaniilwa, okwe mu pe ombepo ondjapuki, opo a longe iikumithalonga. Jesus okwa li ta vulu okwaaludha uuvu kehe. Kehe mpoka a yi, aavu oye ya okukonga ekwatho kuye nokwe ya aludha ayehe. Aaposi oya mono ko, aathitamatsi oya thituluka, iilema oye ende naamboka ye niwe koompwidhuli, oya mangululwa ko kudho. Nokuli nonando oya gumu owala oongenge dhonguwo ye, oya aluka. Aantu oya li ya landula Jesus kehe mpoka a yi. Ine ya tidhila kokule, nuuna a li a hala okwiikalela.

Oshikando shimwe, aantu oye etele omulumentu omusilombanda kegumbo hoka Jesus a li. Ihe megumbo omwa li mu udha noonkondo, onkene kaya li taya vulu okuya mo. Oyu ulula ombululu kombanda yondunda noya kulukithile kuJesus ontala hoka kwa li kwa lala omusilombanda. Opo ihe Jesus okwa lombwele omulumentu ngoka a ti: ‘Thikama ngoye wu ende.’ Sho omulumentu a thikama, aantu oya li ya kumwa.

Oshikando shilwe, sho Jesus e ya momukunda gumwe, aalumentu aanashilundu omulongo oya thikama kokule naye noyi igidha ya ti: ‘Jesus, tu kwathela!’ Pethimbo mpoka, aanashilundu kaya li ya pitikwa okuhedha popepi naantu. Jesus okwa lombwele aalumentu mboka ya ye kotempeli, ngaashi Ompango yaJehova ya popya kutya aanashilundu osho ye na okuninga, ngele ya aludhwa. Manga ye li mondjila taya yi, oya aluka. Sho omunashilundu gumwe a mono kutya okwa aludhwa, okwa galuka a pandule Jesus nokwa hambelele Kalunga. Gumwe owala gwomaalumentu mboka omulongo, a pandula Jesus.

Omukiintu gumwe ngoka a kala te ehama uule womimvo 12, okwa li a halelela okwaaludhwa. Okwe ya konima yaJesus mongundu yaantu e ta gumu koongenge dhonguwo ye. Mbalambala okwa aluka. Sho shoka sha ningwa, Jesus okwa pula a ti: “Olye a gumu ndje?” Omukiintu okwa li a tila, ihe okwe ya kuJesus nokwe mu lombwele oshili. Jesus okwe mu hekeleke a ti: ‘Mumwandje, inda nombili.’

Omukuluntu gwosinagoga, Jairus, okwa li i indile Jesus a ti: ‘Ila kegumbo lyandje! Okamwandjekadhona otake ehamenene.’ Manga Jesus inaa thika kegumbo lyaJairus, omukadhona okwa si. Sho Jesus a thiki ko, okwa mono aantu oyendji taya lili pamwe naanegumbo. Jesus okwe ya lombwele a ti: ‘Inamu lila, omukadhona okwa kotha owala.’ Opo nduno okwa kwata omukadhona koshikaha nokwa ti: “Mumwandje penduka po!” Omukadhona okwa kuutumba nziya, na Jesus okwa lombwele aavali ye, ye mu pe iikulya. Dhiladhila owala nkene aavali ya li yu uvite!