Ontopolwa 38

Omolwashike tu na okukala tu hole Jesus?

NATU tye nduno owu li mowato tayi ningine. Mbela oto ka kala wa hala gumwe e ku hupithe?— Mbela ongiini ngele gumwe okwa yamba po omwenyo gwe e ku hupithe?— Shoka osho naanaa Jesus Kristus a ningi. Ngaashi twe shi ilongo mOntopolwa 37, okwa gandja po omwenyo gwe gu li iikulila opo tu vule okuhupithwa.

Dhoshili Jesus ihe tu hupitha kaatu se omeya. Okwe tu hupitha kushike? Mbela oto dhimbulukwa?— Okwe tu hupitha muulunde neso mboka atuhe twa thigulula kuAdam. Nonando aantu yamwe oya longa iinima iiwinayi noonkondo, Jesus okwa si wo nopeha lyawo. Mbela oto ka tula omwenyo gwoye moshiponga wu kambadhale wu hupithe aantu mboka haya longo iilonga iiwinayi?—

Ombiimbeli otayi ti: “Oshinima oshidhigu, omuntu gwontumba ngele ta si omolwomuyuuki. Eeno pamwe otashi vulika, omuntu gwontumba ta si omolwomuntu gumwe omwaanawa.” Ombiimbeli otayi yelitha kutya Jesus “okwa sile aakolokoshi.” Shoka osha kwatela mo aantu mboka ihaaya longele nokuli Kalunga. Ombiimbeli oya ti ishewe: “Kristus okwa si peha lyetu, manga twa li aalunde,” hatu longo iilonga iiwinayi.—Aaroma 5:6-8.

Mbela owu shi omuyapostoli gumwe ngoka a li ha ningi iinima iiwinayi noonkondo?— Omuyapostoli nguka okwa nyola a ti: ‘Jesus Kristus okwe ya muuyuni, a hupithe aalunde, nangame wo omulunde omunene ndi vule aalunde ayehe.’ Omuyapostoli ngoka a popi ngaaka oye Paulus. Okwa ti kutya okwa li ‘kee na oondunge’ nokwa kala miilonga “iiwinayi.”—1 Timoteus 1:15; Titus 3:3.

Kalunga ka li tuu e na ohole onene sho a tumu Omwana opo a sile aantu ya tya ngaaka! Kutha Ombiimbeli yoye e to lesha kombinga yohole yaKalunga muJohannes ontopolwa 3 ovelise 16: “Osho ngeyi Kalunga a kala e hole uuyuni [sha hala okutya, aantu mboka ya kala kombanda yevi], oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.”

Jesus okwa li e shi ulike kutya oku tu hole ngaashi He e tu hole. Otashi vulika to dhimbulukwa kutya mOntopolwa 30 yembo ndika, otwi ilonga shi na ko nasha nankene Jesus a li a mono iihuna muusiku mboka a kwatwa po. Okwa li a falwa kegumbo lyOmusaaseri Omukuluntu Kajafas opo a ka pangulwe. Oonzapo dhiifundja odha li dhe e twa mo opo dhi lundile Jesus naantu oya li ya dhenge Jesus noongonyo. Shoka osha ningwa sho Petrus i idhimbike Jesus. Ngashingeyi natu kale twa fa opo tu li sho Jesus ta pangulwa notu wete shoka tashi ningwapo.

Jesus okwa kala inaa kotha uusiku auhe. Uusiku mbono ka li ta pangulwa pauyuuki, nomolwaashono aasaaseri ya gongele nziya iilyo yompangu yopombanda yOshijuda e taye mu pangula ishewe. Ihe oya li natango ya lundile Jesus kutya ota sheke Kalunga.

Opo nduno aasaaseri oya mangitha po Jesus noye mu fala kuPilatus, omupangeli gwaRoma. Oya lombwele Pilatus taya ti: ‘Jesus oku li ompinge nepangelo. Oku na oku ka dhipagwa.’ Ihe Pilatus oku shi wete kutya aasaaseri oya li taya popi iifundja. Onkee ano, Pilatus okwe ya lombwele a ti: ‘Kandi wete sha sha puka nomulumentu nguka. Otandi mu mangulula.’ Ihe aasaaseri nayalwe oyi igidha ya ti: ‘Aawe, mu dhipaga!’

Konima yethimbo, Pilatus okwa li ta kambadhala okulombwela aantu kutya ota ka mangulula Jesus. Ihe aasaaseri oya ningitha engathithi opo lyi igidhe tali ti: ‘Ngele owe mu mangulula, nangoye owu li ompinge nepangelo. Mu dhipaga.’ Ongundu yaantu oya li tayi kudhile noonkondo. Mbela owu shi kutya Pilatus okwa li a ningi po shike?—

Pilatus okwi igandja kaantu e ta dhengitha Jesus noongola. Opo nduno okwe mu gandja kaakwiita opo ye ke mu alele komuti gomahepeko. Aakwiita oya zaleke Jesus oshishani shomakwega komutse noye mu sheke moku mu tsila oongolo. Opo nduno oye mu pe opaala onene e yi humbate noye mu fala pondje yoshilando kehala ha li ithanwa Oshala sholukwe. Oko nkoka ye mu alele komuti gwomahepeko, mokudhengela oomboha kiikaha ye nokoompadhi dhe. Oye gu dhike opo Jesus a kale e endjelela. Okwa li ta zi oombinzi nokwa li te ehama noonkondo.

Jesus ina sa pethimbo mpoka. Okwa kala owala e endjelela komuti hoka. Aasaaseri aakuluntu oya kala noku mu sheka naamboka ya piti po oya ti: ‘Ihupitha ano, ngele ongoye Omuna gwaKalunga, u ze ko komuti.’ Ihe Jesus okwa li e shi shoka He e mu tumu a longe. Jesus okwa li e shi shi kutya oku na okuyamba po omwenyo gwe gwa gwanenena opo tu vule okumona omwenyo gwaaluhe. Lwahugunina, potundi ontitatu yokomatango lwaampono, Jesus okwa li i igidha kuHe nokwa si.—Mateus 26:36–27:50; Markus 15:1; Lukas 22:39–23:46; Johannes 18:1–19:30.

Jesus ka li tuu a yooloka ko kuAdam. Adam ka li e hole Kalunga, molwaashoka ka li a vulika kuye. Adam ka li wo e tu hole, molwaashoka okwa li a yono, atuhe otwa valwa nuulunde. Ihe Jesus oku hole Kalunga nosho aantu ayehe. Okwa kala aluhe ha vulika kuKalunga nokwa gandja omwenyo gwe opo a kuthe po uudhigu mboka Adam e tu etele.

Mbela ou na ngaa olupandu lwoshinima oshiwanawa shoka Jesus e tu ningila?— Uuna to galikana kuKalunga, mbela oho mu pandula ngaa molwaashoka e tu pa Omwana?— Omuyapostoli Paulus okwa li e na olupandu lwaashoka Kristus e mu ningila. Paulus okwa li a nyola kutya Omwana gwaKalunga ‘oku hole ndje nokwa gandja omwenyo gwe molwandje.’ (Aagalati 2:20) Jesus okwa sile ngame nangoye. Okwa gandja omwenyo gwe gwa gwanenena opo tu vule okumona omwenyo gwaaluhe. Dhoshili, shika osho unene shi na oku tu inyengitha tu kale tu hole Jesus.

Omuyapostoli Paulus okwa nyolele kAakriste yomoshilando Korinto a ti: “Ohole yaKristus otayi tu pangele.” Ohole yaKristus oyi na oku tu pangela tu ninge shike? Mbela oto dhiladhila ngiini?— Ndhindhilika kutya Paulus okwa yamukula a ti: ‘Kristus okwa sile aantu ayehe, opo mboka ye na omwenyo kaayi ikalele we yo yene, ihe ya kalele nguka a si omolwawo.’—2Aakorinto 5:14,15.

Omomikalo dhini to vulu okuulika kutya oto nyanyudha Kristus?— Omukalo gumwe ogwo okutseyithila yalwe kombinga yaashoka wi ilonga kombinga ye. Nenge dhiladhila kwaashika: Otashi vulika wu li pokuma ongoye awike, mpoka meme gwoye nenge tate gwoye kee wete shoka to ningi, nenge mpoka kaapu na omuntu gulwe e ku wete. Mbela oto ka tala oopolohalama ko-TV nenge tashi vulika wu tale iinima ko-Internet mbyoka wu shi shi kutya itayi ka kala ya hokiwa kuJesus?— Dhimbulukwa kutya Jesus oku na omwenyo noha mono iinima ayihe mbyoka hatu ningi.

Etompelo lilwe molwaashoka tu na okukala tu hole Jesus olyo kutya otwa hala okuholela Jehova. Jesus okwa ti: “Tate oku hole ndje.” Mbela owu shi kutya omolwashike Jehova e hole Jesus nomolwashike natse tu na okukala tu hole Jesus?— Omolwaashoka Jesus okwa li e na ehalo lyokusa opo ehalo lyaKalunga li gwanithwe. (Johannes 10:17) Onkee ano, natu ninge shoka Ombiimbeli tayi tu lombwele: “Kambadhaleni ano okuholela Kalunga, oshoka one oyana aaholike. Okukalamwenyo kweni naku kale taku pangelwa kohole, ngashika Kristus a li e tu hole e ta gandja omwenyo gwe omolwetu.”—Aaefeso 5:1,2.

Opo wu kale wu na olupandu olunene lwokupandula Jesus naashoka e tu ningila, lesha Johannes 3:35; 15:9, 10; 1 Johannes 5:11,12.

[Omathano pepandja 199]

Jesus okwa li a mono iihuna yashike sho e tu gandjele omwenyo gwe?

[Ethano pepandja 200]

Oshike tu na okuninga opo tu ulike kutya otu hole Jesus?

[Ethano pepandja 201]

Olye ha vulu okumona ashihe shoka hatu ningi?