Ontopolwa 45

Uukwaniilwa waKalunga oshike? Ongiini tatu ku ulika kutya otwa hala wu ye?

MBELA owu shi egalikano ndyoka Jesus a li a longo aalanduli ye?— Ngele ku li shi, otatu vulu oku li lesha pamwe mOmbiimbeli muMateus 6:9-13. Egalikano ndyoka oyendji haye li ithana Egalikano lyOMUWA, oli na oohapu tadhi ti: “Uukwaniilwa woye nawu ye.” (KB) Mbela owu shi kutya Uukwaniilwa waKalunga oshike?—

Omukwaniilwa oye omupangeli gwoshilongo nenge gwoshitopolwa shontumba. Epangelo lye ohali ithanwa uukwaniilwa. Miilongo yimwe, omupangeli gwoshilongo ohi ithanwa omupresidende. Omupangeli gwepangelo lyaKalunga ohi ithanwa lye?— Ohi ithanwa Omukwaniilwa. Ano osho molwaashoka epangelo lyaKalunga hali ithanwa Uukwaniilwa.

Mbela owu shi kutya Jehova Kalunga okwa hogolola lye a kale Omukwaniilwa gwepangelo lye?— Omwana, Jesus Kristus. Omolwashike Jesus e li omupangeli omwaanawa e vule aapangeli mboka haya hogololwa kaantu?— Omolwaashoka Jesus oku hole lela He, Jehova. Onkee ano, oha longo aluhe shoka shu uka.

Nalenale manga Jesus a li inaa valelwa muBetlehem, Ombiimbeli oya li ya hunganeke kombinga yokuvalwa kwe nosho wo kutya okwa li ta ka langekwa po kuKalunga a ninge Omupangeli. Natu leshe kombinga yaashika muJesaja 9:6,7, yelekanitha KB. Oovelise ndhoka otadhi ti: ‘Otwa valelwa omunona! Otwa pewa omumati nepangelo oli li komapepe ge. Ota lukwa Omukwaniilwa gwombili. epangalo lye kali na mpoka tali hulu po, noshilongo she otashi kala aluhe shi na ombili.’—

MEnyolo ndyoka, Jesus ngoka e li Omupangeli gwUukwaniilwa waKalunga okwa popiwa kutya oku li “Omukwaniilwa” noku li wo Omwana gwOmukwaniilwa Omunenenene, Jehova. Ihe Jehova okwa langeka po wo Jesus a kale Omukwaniilwa gwEpangelo lye ndyoka tali ka pangela kombanda yevi okuza megulu uule woomvula eyovi. (Ehololo 20:6) Konima sho Jesus a ninginithwa, okwa tameke “okuuvitha ta ti: ‘Itedhululeni, oshoka uukwaniilwa wegulu we ya popepi.’”—Mateus 4:17, yelekanithaKB.

Mbela sho to dhiladhila, omolwashike Jesus a ti kutya Uukwaniilwa owa hedha popepi?— Omolwaashoka Omukwaniilwa ngoka a li ta ka pangela konima yethimbo megulu, okwa li e li pamwe nayo. Osho molwaashoka Jesus a li a lombwele aantu a ti: “Uukwaniilwa waKalunga owu li mokati keni.” (Lukas 17:21, yelekanitha NW.) Mbela ito ka kala wa hala Omukwaniilwa gwUukwaniilwa waJehova a kale popepi lela nangoye to vulu nokuli noku mu guma?—

Lombwela ndje ano kutya iilonga yini ya simana Jesus a li e ya okulonga kombanda yevi?— Jesus okwa li a yamukula epulo ndyoka a ti: ‘Ondi na okuuvitha wo miilando yilwe onkundana ombwanawa yuukwaniilwa waKalunga oshoka osho naanaa shika Kalunga a tumu ndje, ndi shi ninge.’ (Lukas 4:43, NW) Jesus okwa li e shi kutya ita vulu okuuvitha oye awike. Mbela oto dhiladhila kutya okwa li a ningi po shike?—

Jesus okwa li a yi pamwe naantu yontumba miilonga yokuuvitha e te yu ulukile nkene ye na oku yi longa. Okwa li a dheula tango aantu 12 mboka a li a hogolola ya ninge aayapostoli ye. (Mateus 10:5,7) Ihe mbela Jesus okwa li a dheula owala aayapostoli ye okulonga iilonga mbika? Aawe, Ombiimbeli oya ti kutya Jesus okwa dheula wo aantu yalwe oyendji ya kale tayu uvitha. Konima yethimbo, okwa li a tumu aalongwa yalwe 70 ya ka longe ooyaali nooyaali. Mbela oya li ya longo aantu shike?— Jesus okwa ti: ‘Ya lombweleni kutya uukwaniilwa waKalunga owa hedha popepi nane.’ (Lukas 10:9, KB) Komukalo nguno aantu oyi ilongo kombinga yepangelo lyaKalunga.

Nalenale muIsraeli, aakwaniilwa aape oya li haya yi moshilando ya londa kokasinogona opo aantu ye ya mone. Shoka osho Jesus a li a ningi sho a li a ka talela po kuJerusalem oshikando shahugunina. Jesus oye a li ta ka ninga Omupangeli gwUukwaniilwa waKalunga. Mbela aantu oya li ngaa ya hala Jesus a ninge Omukwaniilwa gwawo?—

Sho Jesus a thiki moshilando a londa kokasinogona, aantu oyendji oya li ya tameke okuyala oonguwo dhawo mondjila komeho ge. Aantu yalwe oya li ya tete iiyale yomilunga noku yi tula mondjila. Kungawo oya li tayu ulike kutya oya hala Jesus a ninge Omukwaniilwa gwawo. Oya li ya tameke okwiigidha taya ti: “Omukwaniilwa ngoka te ya medhina lyOmuwa, na lalekwe nuuyamba kuKalunga!” Ihe hakehe gumwe a li a nyanyukwa. Dhoshili, aawiliki yamwe yomalongelokalunga oya li nokuli ya lombwele Jesus ya ti: “Muhongi, lombwela aalongwa yoye, ya mwene.”—Lukas 19:28-40.

Konima yomasiku gatano Jesus okwa kwatwa po nokwa falwa meni lyombala a ka pangulwe komupangeli, Pontius Pilatus. Aatondi yaJesus oya ti kutya Jesus oti iti kutya omukwaniilwa nonokutya oku li ompinge nepangelo lyaRoma. Onkee ano, Pilatus okwa pula Jesus kutya ota ti ngiini kombinga yaashoka aantu taya popi. Jesus oku ulike kutya ita kambadhala okukutha ko epangelo, sho a li a lombwele Pilatus a ti: “Uukwaniilwa wandje kau shi womuuyuni mbuka.”—Johannes 18:36.

Opo nduno Pilatus okwa yi pondje e ta lombwele aantu kutya ina mona Jesus ondjo. Ihe aantu kaya li ya hala Jesus a ninge Omukwaniilwa gwawo. Kaya li ya hala a mangululwe. (Johannes 18:37-40) Konima sho Pilatus a popi naJesus ishewe, okwa li e na uushili kutya Jesus ina ninga sha sha puka. Onkee ano, Pilatus konima yokufala Jesus pondje oshikando shahugunina, okwa ti: “Taleni, omukwaniilwa gweni oye nguka!” Ihe aantu oyi igidha ya ti: “Mu dhipaga, mu dhipaga! Mu alela!”

Pilatus okwe ya pula a ti: “Omwa hala, ndi alele omukwaniilwa gweni?” Aasaaseri aakuluntu oya yamukula ya ti: “Tse katu na omukwaniilwa a tya ngaaka, kakele komupangeli Omuroma.” Dhiladhila owala koshinima sha tya ngawo. Aasaaseri mboka aakolokoshi oya li ye shi pondola okunwetha mo aantu ya kale inaaya hala Jesus.—Johannes 19:1-16.

Onkalo kunena oya faathana naanaa naandjoka yopethimbo lyaJesus. Aantu oyendji inaya hala lela Jesus a kale Omukwaniilwa gwawo. Otashi vulika ya tye kutya oyi itaala Kalunga, ihe inaya hala okuvulika kwaashoka Kalunga nenge Kristus te ya lombwele. Oya hala ya kale ye na omapangelo gawo yene huka kombanda yevi.

Mbela tse otatu dhiladhila ngiini kombinga yaashika? Sho twi ilongo kombinga yUukwaniilwa waKalunga niinima ayihe iiwanawa mbyoka tawu ka ninga, mbela ohashi tu ningi tu kale tu uvite ngiini kombinga yaKalunga?— Otu kale tu mu hole, hasho mbela?— Ihe ongiini tatu vulu okuulukila Kalunga kutya otu mu hole notwa hala okupangelwa kUukwaniilwa we?—

Otatu vulu okuulukila Kalunga nkene tu uvite, mokulandula oshiholelwa shaJesus. Mbela Jesus okwa ninga po shike opo u ulike kutya oku hole Jehova?— Jesus okwa ti: “Ngame otandi longo aluhe shoka she mu opalela.” (Johannes 8:29) Eeno, Jesus okwe ya kombanda yevi ‘okulonga ehalo lyaKalunga’ nosho wo ‘okutsakanitha oshilonga shoka e mu pe.’ (Aahebeli 10:7; Johannes 4:34) Tala kwaashoka Jesus a li a ningi manga inaa tameka iilonga ye yokuuvitha.

Jesus okwa li a yi kuJohannes Omuninginithi komulonga gwaJordan. Konima sho ya yi momeya, Johannes okwa ninginitha Jesus kohi yomeya e te mu kutha ko. Mbela owu shi kutya omolwashike Johannes a ninginitha Jesus?—

Jesus oye a pula Johannes e mu ninginithe. Ihe otu shi shi ngiini kutya Kalunga okwa li a hala Jesus a ninginithwe?— Otu shi shi molwaashoka Jesus sho a zi momeya, oku uvu ewi lyaKalunga lya zi megulu lya ti: “Ongoye Omumwandje omuholike, onde ku hokwa.” Kalunga okwa li nokuli a tumu ombepo ye ondjapuki molupe lwonguti yi lambele kuJesus. Onkee ano, sho Jesus a ninginithwa, oku ulike kutya okwa hala okulongela Jehova onkalamwenyo ye ayihe.—Markus 1:9-11.

Ngoye ino koka natango. Ihe oshike to ka ninga ngele wa koko?— Mbela oto ka landula oshiholelwa shaJesus e to ninginithwa?— Owu na oku mu holela, molwaashoka Ombiimbeli oya ti kutya okwe tu thigila ‘oshiholelwa, opo tu landule ondjila ndjoka a li e yi ende.’ (1Petrus 2:21) Ngele wa ninginithwa, oto ku ulika kutya owa hala lela okupangelwa kUukwaniilwa waKalunga. Ihe ina shi gwana okukala owala wa ninginithwa.

Otwa pumbwa okukala hatu vulika mwaashihe shoka Jesus a longa aantu. Jesus okwa ti kutya katu na okukala “yomuuyuni.” Mbela otatu ka vulika ngaa kuye ngele otwa kala hatu kutha ombinga miinima yuuyuni? Jesus naayapostoli ye kaya li haya kutha ombinga miinima yomuuyuni. (Johannes 17:14) Mbela oya li owala haya ningi shike?— Oya li haya popi naantu yalwe kombinga yUukwaniilwa waKalunga. Iilonga mbyoka oyo ya li ya simanenena monkalamwenyo yawo. Mbela natse otatu vulu ngaa okuninga ngawo?— Eeno, otatu vulu ngele otwa mana mo shili uuna tatu galikana kutya Uukwaniilwa waKalunga nawuye.

Tala Omanyolo galwe ngoka tage tu ulukile kutya otatu vulu okuninga shike, opo tu ulike kutya otwa hala Uukwaniilwa waKalunga wu ye: Mateus 6:24-33; 24:14; 1 Johannes 2:15-17 nosho wo 5:3.

[Ethano pepandja 232]

Iilonga yini Jesus a li e ya okulonga kombanda yevi?

[Omathano pepandja 235]

Omolwashike aantu inaaya hala we Jesus a ninge Omukwaniilwa gwawo?

[Ethano pepandja 236]

Omolwashike Jesus a li a ninginithwa, nongiini Kalunga u ulike kutya okwa hokwa onkatu ndjoka Jesus a katuka?

[Omathano pepandja 237]

Opoompito dhini tatu vulu okulombwela yalwe shi na ko nasha nUukwaniilwa waKalunga?