Shoka Jesus a longo aantu kombinga yUukwaniilwa waKalunga

‘Jesus okwe ende miilando nomomikunda noku uvitha onkundana ombwanawa yUukwaniilwa waKalunga.’—LUKAS 8:1, yelekanitha KB.

OTU hole okupopya kombinga yiinima mbyoka ya simana kutse. Jesus okwa ti kutya “shoka shu udhilila momutima, osho shoka okana take shi popi.” (Mateus 12:34) Ngele tatu tala kwaashoka Jesus a popi osha yela kutya Uukwaniilwa waKalunga owa simanenena kuye.

Uukwaniilwa waKalunga oshike? Uukwaniilwa owo epangelo ndyoka hali lelwa komukwaniilwa. Onkee ano, owu li epangelo ndyoka a dhika po. Jesus okwa popya unene kombinga yUukwaniilwa waKalunga nowo wa li ehuku lyetumwalaka lye. Uukwaniilwa mboka owa popiwa lwiikando 110 mOmavaangeli mOmbiimbeli yOshikwanyama. Jesus ina popya owala shoka a longo aantu naashoka Uukwaniilwa tawu ka ninga, ihe okwa li wo e shi tula miilonga.

Olye Omukwaniilwa gwUukwaniilwa mboka? Omukwaniilwa gwUukwaniilwa waKalunga ina hogololwa kaantu, ihe okuKalunga mwene. Jesus okwe shi holola sho a li ta longo aantu kutya oye a hogololwa kuKalunga a ninge Omukwaniilwa.

Jesus oku shi kutya Ombiimbeli oya hunganeka kutya Mesiasa omuuvanekwa ota ka pangela mUukwaniilwa waaluhe. (2 Samuel 7:12-14; Daniel 7:13, 14; Mateus 26:63, 64) Jesus okwe shi popi sha yela kutya oye Mesiasa ngoka u uvanekwa. Okwe shi zimine kutya oye Omukwaniilwa ngoka a hogololwa kuKalunga. (Johannes 4:25, 26) Oshe eleka sho Jesus a longitha uutumbulilo “Uukwaniilwa wandje” lwiikando.—Johannes 18:36.

Okwa longo wo aantu kutya opu na yamwe taya ka pangela pamwe naye. (Lukas 22:28-30) Okwe yi ithana “oshigunda oshishona,” molwaashoka omwaalu gwawo ogwa ngambekwa. Okwa ti kuyo: “Ho okwa hala oku mú pa [Uukwaniilwa, KB].” (Lukas 12:32) Embo lyahugunima mOmbiimbeli olye shi ulika kutya aantu 144 000 oyo taya ka kala ye na uuthembahenda woku ka pangela pamwe naKristus.—Ehololo 5:9, 10; 14:1.

Uukwaniilwa mboka owu li peni? Jesus okwa lombwele omupangeli Omuroma Pontius Pilatus a ti: “Uukwaniilwa wandje kawu shi womuuyuni mbuka.” (Johannes 18:36) Uukwaniilwa waKalunga mboka wu li miikaha yaKristus itawu ka kala wu na aapangeli yopantu. Jesus okwe shi popya lwiikando kutya Uukwaniilwa waKalunga owo “uukwaniilwa womegulu.”a (Mateus 4:17; 5:3, 10, 19, 20, KB) Onkee ano, Uukwaniilwa waKalunga owo epangelo lyomegulu.

Sho Jesus a li kevi okwa li i inekela kutya ota ka shuna megulu. Okwa lombwele mboka taya ka pangela pamwe naye kutya “otandi ke mú longekidhila ehala.”—Johannes 14:2, 3.

Uukwaniilwa otawu ka ninga shike? Jesus okwa longo aalanduli ye ya galikane kuKalunga taya ti: ‘Uukwaniilwa woye nawu ye, ehalo lyoye nali gwanithwe kombanda yevi wo ngaashi megulu.’ (Mateus 6:9, 10, yelekanitha KB.) Ehalo lyaKalunga ohali gwanithwa megulu. Elalakano lyaKalunga otali ka gwanithwa kombanda yevi okupitila mUukwaniilwa mboka. Opo shoka shi ningwe, Uukwaniilwa otawu ke etitha omalunduluko ogendji kevi.

Uukwaniilwa otawu ka ninga shike kombanda yevi? Jesus okwa longo aantu kutya Uukwaniilwa waKalunga otawu ka hulitha po uukolokoshi naamboka inaaya hala oku wu etha po. (Mateus 25:31-34, 46) Otawu ka hulitha po uulingilingi nuuwinayi woludhi kehe. Jesus okwa longo aantu kutya evi otali ka kala lyu udha “aaifupipiki,” aayuuki, aanamutimahenda, mboka “ya yela moomwenyo dhawo” nosho wo aanambili.—Mateus 5:5-9.

Mbela ooitaali mboka otaya ka kala kevi lya nyatekwa? Aawe. Jesus oku uvaneka kutya kohi yUukwaniilwa wakalunga evi otali ka lundululwa. Omulumentu ngoka a alelwa pamwe naye okwe mu indile a ti: “Jesus dhimbulukwa ndje, ngele wa thiki [muukwaniilwa woye].” Jesus okwe mu yamukula a ti: ‘Otandi ku lombwele, nena tuu ndjika oto ka kala pamwe nangame mOparadisa.’ (Lukas 23:42, 43, KB) Eeno, Uukwaniilwa waKalunga otawu ka lundululila evi moparadisa, ngaashi naanaa sha li moshikunino shaEden.

Uukwaniilwa otawu ka ningila aantu shike ishewe? Jesus inu uvaneka owala shoka Uukwaniilwa tawu ka ninga, ihe okwe shi ulike wo. Okwa aludha aantu oyendji pashikumithalonga, shoka sha li owala euliko lyaashoka ta ka ninga pakuudha monakuyiwa pethimbo lyepangelo lyUukwaniilwa we. Ehokololo lyEvaangeli otali ti: “Jesus okwe endagula muGalilea ashihe nokwe ya longo moosinagoga dhawo. Oye oku uvitha onkundana ombwanawa [yuukwaniilwa] nokwa panga uuvu kehe noshigombo kehe maantu.”—Mateus 4:23, KB.

Jesus okwa li a aludha omikithi dhi ili nodhi ili. Okwa “tonatitha omeho gomuntu a valwa omuposi.” (Johannes 9:1-7, 32, 33) Okwa aludha omulumentu ngoka a li a kanyata oshilundu moku mu guma nolukeno. (Markus 1:40-42) Sho “aantu ye eta kuye omulumentu ombolo ye iha popi,” oku ulike kutya ota vulu “okuthitulula omakutsi goombolo, naathitawi.”—Markus 7:31-37.

Omukwaniilwa ngoka a hogololwa kuKalunga oku na oonkondo okuhulitha po eso. Jesus okwa yumudha aasi lwiikando itatu mbyoka ya nyolwa mOmbiimbeli. Okwa yumudha omwanamati gwomuselekadhi, okakadhona koomvula 12 nosho wo kuume ke Lasarus.—Lukas 7:11-15; 8:41-55; Johannes 11:38-44.

Jesus okwa popi okupitila momuyapostoli Johannes omalaleko nuuyamba omakumithi ngoka taga ka ningilwa aapangelwa yUukwaniilwa a ti: “Ngashingeyi egumbo lyaKalunga oli li paantu! Oye ota ka kala pamwe nayo, notaa ka ninga aantu ye. Kalunga mwene ota ka kala pamwe nayo nota ka ninga Kalunga kawo. Oye ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.” (Ehololo 1:1; 21:3, 4) Dhiladhila owala kuuyuni mboka kaamu na oluhodhi, uuwehame nosho wo eso. Kungawo, egalikano kutya ehalo lyaKalunga nali gwanithwe kombanda yevi ngaashi megulu otali ka yamukulwa lelalela.

Uukwaniilwa waKalunga otawu ya uunake? Jesus okwa longo aantu kutya Uukwaniilwa we otawu ka tameka okupangela oshita nethimbo lyokukala po kwe nenge ‘lyokuya kwe.’ Okwa gandja ehunganeko lya yela nawa kutya uunake ta ka tameka okukala po mUukwaniilwa we. Ethimbo ndyoka otali ka ndhidhilikwa omolwomaupyakadhi ngoka taga ka kala kombanda yevi ngaashi iita, oondjala, omakakamo gevi nuulunde mboka tawu ka lunda pombanda. (Mateus 24:3, 7-12; Lukas 21:10, 11) Iinima mbyoka niikwawo oyindji mbyoka Jesus a hunganeka oya tameke okumonika unene mo 1914, omumvo moka Iita yotango yUuyuni ya tameka. Eeno, Jesus oku li Omukwaniilwa ta pangele. Masiku Uukwaniilwa waKalunga otawu ke ya notawu ka ningitha ehalo lyaKalunga li gwanithwe kombanda yevi.b

Uukwaniilwa waKalunga mboka tawu ya otawu ke ku ningila shike? Oshizemo otashi ka kala shi ikolelela kokupulakena kwoye ketumwalaka lyaJesus.

[Omanyolo gopevi]