Ontopolwa 40

Ongiini tatu vulu okunyanyudha Kalunga?

MBELA oshike tatu vulu okuninga opo tu nyanyudhe Kalunga? Otatu vulu mbela oku mu pa sha?— Jehova ota ti: “Iithitukuti ayihe oyandje.” Okwa popi ishewe a ti: “Iisiliveli ayihe niingoli yomuuyuni auhe oyandje.” (Episalomi 24:1; 50:10; Haggai 2:8) Ihe opu na oshinima shimwe shoka tatu vulu oku mu pa. Mbela osho shike?—

Jehova okwe tu pitika tu hogolole ngele otatu mu longele nenge aawe. Jehova ihe tu kondjitha tu ninge shoka a hala. Natu kambadhale okuuva ko kutya omolwashike Kalunga e tu shita hatu vulu okuhogolola kutya otwa hala oku mu longela nenge aawe.

Otashi vulika wu shi kutya elobota oshike. Olyo eshina lya longwa hali ningi shaa shoka omuningi gwalyo a hala li ninge. Onkee ano, elobota itali vulu okutokola kulyo lyene kutya oli na okuninga shike. Jehova okwa li ta vulu oku tu shita twa fa omalobota. Okwa li ta vulu oku tu shita hatu vulu owala okuninga shoka a hala tu ninge. Ihe hasho e tu shita ngaaka. Mbela owu shi kutya omolwashike?— Uudhanitho wumwe owa longwa wa fa omalobota. Ngele owa sitelwa ohawu ningi owala shoka omuningi gwawo a hala wu ninge. Mbela owa mona ngaa nale okadhanitho ka fa mpoka?— Olundji aantu ohaya vulwa okudhana nokadhanitho hoka haka ningi owala iinima mbyoka ka sitelwa ka kale haka ningi. Kalunga ina hala tu vulike kuye molwaashoka twa fa omashina ngoka ga sitelwa ga kale tage mu longele. Jehova okwa hala tu mu longele nokuvulika kuye molwaashoka tu mu hole nomolwaashoka twa hala okuvulika kuye.

Mbela sho to dhiladhila, Tate gwetu gwomegulu oha kala u uvite ngiini ngele tatu vulika kuye?— Lombwela ndje kutya eihumbato lyoye ohali gumu ngiini aavali yoye?— Ombiimbeli otayi popi kutya omumati omunandunge “ota nyanyudha he,” ihe omumati omugoya “oye omukundu gwayina”. (Omayeletumbulo 10:1) Mbela owu shi ngaa kutya ngele wa ninga shoka aavali yoye ye ku pula wu ninge, ohaya kala ya nyanyukwa?— Ihe mbela ohaya kala yu uvite ngiini ngele ino vulika kuyo?—

Ngashingeyi natu dhiladhile kuTate gwetu gwomegulu, Jehova. Ohe tu lombwele kutya oshike tu na okuninga opo tu mu nyanyudhe. Kutha Ombiimbeli yoye e to pandja kOmayeletumbulo 27:11. Moka Kalunga ota popi natse ta ti: ‘Mumwandje, ninga oondunge, u nyanyudhe omwenyo gwandje, opo ndi wape okuyamukula ngoka ta sitha ndje ohoni.’ Mbela owu shi kutya okusitha ohoni otashi ti ngiini?— Omuntu otashi vulika a kale te ku sitha ohoni moku ku yola noku ku lombwela kutya ito vulu okuninga shoka wa ti kutya oto vulu okuninga. Mbela ongiini Satana a sitha Jehova ohoni?— Natu tale.

Dhimbulukwa kutya mOntopolwa 8 yembo ndika otwi ilongo mo kutya Satana okwa hala okukala a simanenena nosho wo kutya okwa hala aantu ayehe ya kale taya vulika kuye. Satana okwa popi kutya aantu ohaya longele Jehova molwaashoka owala te ke ya pa omwenyo gwaaluhe ngele oye shi ningi. Satana okwa li a pataneke Jehova sho a ningitha Adam naEva kaaya vulike kuYe. Satana okwa li a lombwele Kalunga a ti: ‘Aantu ohaye ku longele owala molwaashoka ho ya gamene. Pe ndje owala ompito notandi ningitha kehe gumwe e ku iteke po mbala.’

Dhoshili, oohapu ndhoka dhi li mokatendo ka tetekele itadhi adhika mOmbiimbeli dhi li naanaa ngaashi dhi li. Ihe ngele tatu lesha kombinga yomulumentu Job, osha yela kutya Satana okwa popya oshinima sha tya ngaaka kuKalunga. Satana okwa li ta patana kutya Job ita ka kala omudhiginini ngele okwa makelwa, omanga Jehova a li e na einekelo kutya Job ota ka kala omudhiginini. Natu pandje Oombiimbeli dhetu muJob ontopolwa 1 nonti-2 opo tu tale shoka sha li sha ningwapo.

Ndhindhilika kutya muJob ontopolwa 1 omwa nyolwa kutya Satana opo a li poshigongi shoka sha li sha ningwa megulu sho aayengeli ya li ya ka popya naJehova. Onkee ano, Jehova okwa pula Satana a ti: “Oto ziilile peni?” Satana okwa yamukula kutya okwa li te endagula nevi. Onkee ano, Jehova okwe mu pula a ti: ‘Ino mona omuntu gwandje Job ngoka ha longele ndje noha tondo uuwinayi?’—Job 1:6-8.

Pethimbo opo tuu mpoka Satana okwa tameke okupataneka Kalunga ta ti: ‘Job ohe ku longele owala molwaashoka ke na uupyakadhi washa. Ihe ngele ito mu gamene we no ku mu yambeka, ote ke ku iteka po.’ Onkee ano, Jehova okwa yamukula Satana a ti: ‘Eewa, oto vulu oku mu ningila shaashoka wa hala, ihe ino mu guma kolutu.’—Job 1:9-12.

Satana okwa ningi po shike?— Okwa li a longekidha aantu ya yake po oongombe nuusino e taya dhipaga po mboka haye dhi litha. Opo nduno olwaadhi olwa akula po oonzi naasita e talu ya dhipaga po ayehe. Konima yethimbo aantu oye ya nokuyaka po oongamelo noya dhipaga po aasita. Hugunina Satana okwe etitha ombepo yoshikungulu ndjoka ya hanagula po egumbo lyosheeli shaJob moka mwa li aanona ye ayehe omulongo noye ya dhipaga po ayehe. Nonando Job okwa li a ningilwa iinima ayihe mbyoka, ka li e etha po okulongela Jehova.—Job 1:13-22.

Sho Jehova a mono ishewe Satana, Jehova okwa popi kutya Job oku li natango omudhiginini. Satana okwa pataneke Kalunga a ti: ‘Ngele to gumu olutu lwe, nena ote ku sheke montaneho.’ Onkee ano, Jehova okwe etha Satana a gume olutu lwaJob, ihe okwe mu londodha kee mu dhipage.

Satana oku umbu Job iitumbuka olutu aluhe. Oya li tayi nika nayi nokapwa li pu na ngoka a hala okukala popepi naye. Nokuli nomukulukadhi gwe okwa li e mu lombwele a ti: “Sheka Kalunga, u se!” Aantu yamwe mboka ya li tayi iningi ya fa okuume kaJob oya li ye ya kuye e taye mu ningitha a kale a nika oluhodhi noonkondo sho ye mu ula kutya okwa yona sha kwata miiti sho a li a adhika komaupyakadhi ngoka. Nonando Job okwa li e etelwa omaupyakadhi agehe ngoka kuSatana nosho wo uuwehame, Job ine etha po okulongela Jehova nuudhiginini.—Job 2:1-13; 7:5; 19:13-20.

Mbela sho to dhiladhila Jehova okwa li u uvite ngiini omolwuudhiginini waJob?— Osha li she mu nyanyudha molwaashoka Jehova okwa li a vulu okulombwela Satana a ti: ‘Tala kuJob! Oha longele ndje molwaashoka a hala oku shi ninga.’ Mbela nangoye oto ka kala ngaashi Job, ngoka Jehova a li a vulu okupopya kutya oku li oshiholelwa shoka tashi ulike kutya Satana omuniifundja?— Dhoshili, oshi li uuthembahenda okugandja eyamukulo komalundilo gaSatana sho a ti kutya ota vulu okugamuna ko aantu kuJehova opo kaaye mu longele we. Jesus okwa li e shi tala ko lela shi li uuthembahenda.

Omulongi Omunene ka li e etha Satana e mu ningithe a longe shoka sha puka. Dhiladhila owala nkene oshiholelwa she sha li sha nyanyudha He! Jehova okwa li ta vulu okupopya kombinga yaJesus ta lombwele Satana ta ti: ‘Tala kOmumwandje! Okwa kala omudhiginini lela kungame molwaashoka oku hole ndje!’ Dhiladhila wo kenyanyu ndyoka Jesus a li e na mokunyanyudha omutima gwaHe. Omolwenyanyu ndyoka, okwi idhidhimikile nokuli eso komuti gwomahepeko.—Aahebeli 12:2.

Mbela owa hala okukala wa fa Omulongi gwetu Omunene nokunyanyudha Jehova?— Onkee ano, tsikila okwiilonga kombinga yaashoka Jehova a hala wu ninge noku mu nyanyudha moku shi ninga.

Lesha shoka Jesus a li a ningi opo a nyanyudhe Kalunga naashoka tse wo twa pumbwa okuninga mOmayeletumbulo 23:22-25; Johannes 5:30; 6:38; 8:28 nosho wo 2 Johannes 4.

[Ethano pepandja 207]

Omolwashike Kalunga inee tu shita twa fa elobota ndika?

[Ethano pepandja 208]

Ongiini to vulu okunyanyudha Jehova nosho wo aavali yoye?

[Ethano pepandja 209]

Satana okwa li a shongo Jehova ngiini sho Adam naEva ya yono?

[Ethano pepandja 210]

Job okwa li i idhidhimikile shike nomolwashike shika sha li sha nyanyudha Kalunga?