Job okwa li a fimanekifa edina laJehova
“Edina lOmwene nali hambelelwe!” — JOB 1:21.
1. Olyelye tashi dulika a shanga embo laJob, nola shangwa naini?
MOSES okwa li e na omido 40 lwaapo eshi a li a ya Farao onhapo okudja muEgipti, nokwa ka kala muMidian. (Oil. 7:23) Fimbo Moses a li muMidian, otashi dulika a li a uda shi na sha nomaupyakadi oo Job a li a shakeneka, molwaashi Job okwa li ha kala moshilando shi li popepi naMidian shedina Us. Konima yomido donhumba, Moses noshiwana shaIsrael ova li ve uya popepi naUs, lwopexulilo lolweendo lavo mombuwa. Onghee hano, Moses otashi dulika a li a uda kombinga yokukalamwenyo kwaJob kwaxuuninwa. Ovajuda ova itavela kutya Moses oye a shanga embo laJob nokwe li shanga konima yefimbo lonhumba eshi Job a fya.
2. Omeenghedi dilipi embo laJob li li etwomukumo kovapiya vaJehova kunena?
2 Embo laJob otali pameke eitavelo lovapiya vaKalunga kunena. Ngahelipi mbela? Embo olo otali tu kwafele tu ude ko oiningwanima ya fimanenena oyo ya li ya ningwa meulu nosho yo omhata ya fimanenena i na sha nounamapangelo weshito alishe. Embo laJob otali tu kwafele tu ude ko nawa osho sha kwatelwa mokukala ovadiinini notali tu kwafele yo tu ude ko kutya omolwashike Jehova ha efa ovapiya vaye va mone oixuna omafimbo amwe. Kakele kaasho, embo laJob otali ulike kutya Satana Ondiaboli oku li Omutondi munene waJehova nosho yo wovanhu. Embo olo otali ulike yo kutya ovanhu inava wanenena otava dulu okukala ovadiinini kuJehova nonande ova hangwe komayeleko manene ngaashi ashike Job. Natu ka konakoneni oiningwanima imwe oyo ya hokololwa membo laJob.
Oudiinini waJob tau yelekwa kuSatana
3. Otu shii shike kombinga yaJob, nomolwashike Satana a li e mu ponokela?
3 Job okwa li oshipuna, a tumbala nokwa li e na eenghedi diwa. Job okwa li omuyandjimayele a fimana nokwa li ha kwafele eehepele. Ndele osho sha fimanenena oshosho kutya Job okwa li ha tila Kalunga. Job okwa popiwa mOmbibeli kutya okwa li omulumenhu oo “e he noshipo nomuyuki ta tila Kalunga ndee ta kukuma owii.” Okwa li a ponokelwa kuSatana Ondiaboli omolweliyandjo laye lometilokalunga, ndele hamolwaashi a li oshipuna ile molwaashi a li a tumbala. — Job 1:1; 29:7-16; 31:1.
4. Oudiinini oshike?
4 Etukulwa lotete lembo laJob otali tu hokololele kombinga yoshoongalele osho sha li sha ningwa meulu eshi ovaengeli va li va ongala koshipala shaJehova. Satana naye opo a li poshoongalele osho, nokwa li a lundila Job. (Lesha Job 1:6-11.) Nonande Satana okwa li a tumbula oiniwe yaJob poshoongalele osho, Satana okwa li a hala unene okushonga oudiinini waJob. “Oudiinini” otashi ti okukala omuyuki, uhe noshipo ile uhe na ombedi. PaMbibeli oshitya oudiinini otashi ti okuliyandjela Jehova nomutima aushe.
5. Satana okwa li a lundila Job ta ti ngahelipi?
5 Satana okwa li a lundila Job kutya ota longele ashike Kalunga omolwokulihola mwene, ndele hamolwaashi e li omudiinini kuKalunga. Satana okwa li yo a lundila Job ta ti kutya ota ka kala omudiinini kuJehova shimha ashike te mu nangeke noupuna note mu amene. Ndele opo Jehova a nyamukule elundilo olo laSatana, okwa li a efa Satana a ponokele omulumenhu omudiinini Job. Oshidjemo, moule ashike wefiku limwe, oimuna yaJob oya li ya va kwa po, ovapiya vaye novana vaye omulongo ova li va dipawa. (Job 1:13-19) Mbela Job okwa li e liyandja eshi Satana e mu ponokela? Ombibeli otai hokolola nghee Job a li e linyenga eshi a hangwa komaupyakadi. Job okwa ti: “Omwene okwa pele nge, nOmwene okwa kufa nge. Edina lOmwene nali hambelelwe!” — Job 1:21.
6. (a) Oshike sha li sha ningwa po poshoongalele shimwe vali osho sha li sha ningwa meulu? (b) Satana okwa li a kwatela mo vali oolyelye melundilo laye eshi a li a shonga oudiinini waJob?
6 Konima yefimbo, meulu omwa ka ningwa vali oshoongalele shimwe. Satana okwa li natango a lundila Job pomhito opo, a ti: “Oshipa omoshipa! Omunhu keshe osho e shi na, te shi yandjele omwenyo waye. Ndele shamha to nane eke loye u kume omakipa aye nombelela yaye, ye ote ke ku liteeka shili moipafi yoye!” Didilika kutya elundilo laSatana kala li ashike la yukifwa kuJob. Eshi Ondiaboli ya ti kutya, ‘Omunhu keshe osho e shi na, ote shi yandjele omwenyo waye,’ kaya li ashike tai popi shi na sha naJob, ndele oya li tai popi kombinga ‘yomunhu’ keshe oo ta longele Jehova. Konima yefimbo, Kalunga okwa li a efa Satana a etele Job omukifi uyahameka. (Job 2:1-8) Ndelenee okumona oixuna kwaJob hapo ashike kwa li kwa xulila opo.
Oshike hatu lihongo moshimoniwa shaJob?
7. Ongahelipi omukulukadi waJob nosho yo ovalumenhu ovo va li ve uya oku mu talela po va li va wedela ko koupyakadi waye?
7 Pehovelo eshi Job a li ta mono oixuna, omukulukadi waye naye okwa li a kumwa monghedi ya faafana. Omukulukadi waye naye okwa li a uda nai neenghono eshi a filwa ounona vaye naashi va kanifa oupuna wavo. Osha li yo shi nyemateka okutala omushamane waye ta hepekwa komukifi uyahameka. Omukulukadi waJob okwa li e mu pula nenyeme a ti: “Natango tuu to anyene mouyuki woye? Efa Kalunga u fye!” Opo nee, meumbo laJob omwe ke uya vali ovalumenhu vatatu, Elifas, Bildad naSofar, ovo va li ve uya oku mu hekeleka vati. Ndele ponhele yoku mu hekeleka, ovalumenhu ovo ova li tava tomhafana naye monghedi ya puka nomapopyo avo okwa li a ulika kutya vo “ovahekeleki vongaho.” Pashihopaenenwa, Bildad okwa li ta ti kutya ovana vaJob ova nyona nokungaho ova li ve na okufya. Elifas okwa ti kutya Job okwa li ta mono oixuna omolwomanyono aye onale. Okwa li nokuli ta tomhafana monghedi ya puka ta ti kutya Kalunga iha valula oudiinini wovapiya vaye. (Job 2:9, 11; 4:8; 8:4; 16:2; 22:2, 3) Job okwa li a kanyatela oudiinini waye momayeleko manene a tya ngaho. Oshoshili kutya Job okwa li a puka eshi a li e ‘litala ko omuyuki e dule Kalunga.’ (Job 32:2) Ndele nande ongaho, Job okwa li a kanyatela oudiinini waye momayeleko aeshe.
8. Elihu okwa tulila po ovo hava yandje omayele kunena oshihopaenenwa shiwa shilipi?
8 Elihu naye okwa li yo e uya okutalela po Job. Tete, Elihu okwa kala ta pwilikine eshi Job nookaume kaye vatatu va li tava tu eemhata. Nonande Elihu okwa li munini kovalumenhu aveshe ovo vane, okwa li a ulika kutya oku na ounongo muhapu e va dule. Okwa li a popya naJob nefimaneko. Elihu okwa li a pandula Job omolwouyuki waye, ashike okwa li yo a lombwela Job kutya okwa yukifa unene elitulemo la pitilila kouyuki waye. Opo nee Elihu okwa li a shilipaleka Job kutya okulongela Kalunga noudiinini ohaku eta alushe ouwa. (Lesha Job 36:1, 11.) Elihu ina tulila po tuu ovo hava yandje omayele kunena oshihopaenenwa shiwa! Okwa li e lididimika, a pwilikina nawa, a yandja olupandu apa sha pumbiwa nokwa li a yandja omayele taa tungu. — Job 32:6; 33:32.
9. Jehova okwa li a kwafela Job ngahelipi?
9 Hauxuuninwa, Job okwa li a kumwa neenghono eshi Jehova a li a popya naye. Ombibeli oya ti: “Omwene a nyamukula Job mokafudaela.” Jehova okwa li a pukulula Job moku mu pula omapulo a shikulafana nokwa li e shi ninga nonghenda ndele ka li e mu mbebeleka. Job okwa li a tambula ko omapukululo nehalo liwa, nokwa dimina epuko laye a ti: ‘Ame ongahoelela. Ohandi lidilulula mondwi nomomute.’ Konima eshi Jehova a li a popya naJob, okwa li a holola kutya okwa handukila ookaume kaJob vatatu molwaashi kava li va popya “eendjovo da yuka.” Job okwa li a pulwa kuJehova opo a ilikanene ookaume kaye ovo. Opo nee, “[Omwene] okwa alula oluhepo laJob, ye eshi a ilikanena ookaume kaye, nOmwene okwa alulile Job aishe, kwa li e i na noku i hapupalifa luvali.” — Job 38:1; 40:4; 42:6-10.
Mbela otu hole Jehova shi fike peni?
10. Omolwashike Jehova ine lipwililikila eshongo laSatana ile e mu hanaune po?
10 Jehova oye Omushiti noku li Omupangeli weshito alishe. Ndele mbela omolwashike Jehova ine lipwililikila ashike eshongo lOndiaboli? Kalunga okwa li e shi shii kutya omhata oyo Satana a li a etifa po kaya li tai ka kandulwa po ngeenge e i lipwililike ile ngeenge a hanauna po Satana. Ondiaboli oya li ya popya kutya omupiya waJehova omudiinini Job ita ka kanyatela oudiinini waye ngeenge okwa kanifa omaliko aye. Job okwa li a kanyatela oudiinini waye nonande okwa li ta yelekwa. Opo nee, Satana okwa li a popya kutya omunhu keshe ota ka efa po Kalunga ngeenge okwa yahamekwa kolutu. Nonande Job okwa li a mona oixuna, ka li a efa po oudiinini waye. Kungaho, Job okwa li a nyaneka pomutenya oipupulu yaSatana eshi a li a kanyatela oudiinini waye, nonande ka li a wanenena. Mbela ongahelipi shi na sha novapiya vaJehova vakwao?
11. Ongahelipi Jesus a li a ulika filufilu kutya omapopyo aSatana kae fi oshili?
11 Ngeenge omupiya waKalunga keshe okwa kanyatele oudiinini waye ngeenge ta yelekwa kuSatana, ngaho ota ulike kutya osho sha popiwa komutondi oo iha sholola kashi fi shoshili. Eshi Jesus a li e uya kombada yedu okwa li a ulika filufilu kutya Satana omunaipupulu. Ngaashi ashike tate yetu wotete, Adam, Jesus naye okwa li omunhu a wanenena. Jesus okwa li a ulika filufilu kutya Satana omunaipupulu nonokutya omapopyo aye kae fi oshili, eshi a kanyatela oudiinini waye fiyo omefyo. — Eh. 12:10.
12. Omupiya waJehova keshe oku na oufembanghenda nosho yo oshinakuwanifwa shashike?
12 Satana ota twikile natango okuyeleka ovapiya vaJehova. Keshe umwe womufye oku na oufembanghenda nosho yo oshinakuwanifwa shokuulika kutya ohatu longele Jehova noudiinini, molwaashi tu mu hole, ndele hamolwomatomheno okulihola mwene. Mbela ohatu tale ko ngahelipi oshinakuwanifwa sha tya ngaho? Oshi li oufembanghenda kufye okukala ovadiinini kuJehova. Otashi hekeleke yo okushiiva kutya Jehova ohe tu pe eenghono opo tu dule okulididimika noiha efa tu yelekwe neyeleko li dule eenghono detu, ngaashi ashike a li a ninga moshinima shaJob. — 1 Kor. 10:13.
Satana omutondi, omunashibofa nomushunimonima
13. Embo laJob otali yandje ouyelele ulipi u na sha naSatana?
13 Omishangwa dOshiheberi otadi yandje ouyelele muhapu kombinga yonghandangala oyo Satana ta dana mokushonga ounamapangelo waJehova nomokwaamuna ko ovanhu kuKalunga. Omishangwa dopaKriste dOshigreka otadi tu pe ouyelele muhapu u na sha nanghee Satana a kala ta pataneke ounamapangelo waJehova, pashihopaenenwa, embo lEhololo otali yelifa nghee Jehova ta ka yukipalifa ounamapangelo waye naashi ta ka hanauna po Satana fiyo alushe. Embo laJob ole tu kwafela tu shiive shihapu kombinga younashibofa waSatana. Satana ka li ha i koyoongalele yomeulu nelalakano loku ka fimaneka Jehova. Ndele okwa li ashike ha i ko nelalakano loku ka shindana nokwa li e na omalinyengotomheno mai. Pashihopaenenwa, konima eshi ngoo a lundila Job nokwa pewa epitikilo loku mu yeleka, “Satana okwa dja po koshipala shOmwene.” — Job 1:12; 2:7.
14. Satana okwa ulika kutya oku na oikala ya tya ngahelipi eshi a li a yeleka Job?
14 Embo laJob ola holola kutya Satana oku li omutondi wovanhu oo ehe na nande onghenda. Okudja poshoongalele osho sha popiwa muJob 1:6, fiyo opwaasho sha popiwa muJob 2:1, opa li pa pita efimbo inali tumbulwa kondadalunde eshi Job a li ta hepekwa neenghono. Molwaashi Job okwa li a kanyatela oudiinini waye eshi a li ta yelekwa, Jehova okwa li a dula okulombwela Satana ta ti: ‘Natango Job ota anyene mouyuki waye, nonande ove we mu shindila nge ndi mu nyone po, nande e he nombedi.’ Ndele nande ongaho, Satana ka li a dimina kutya omapopyo aye kae fi oshili. Ponhele yaasho, Satana okwa li a pula natango a pewe omhito opo a yeleke Job neyeleko limwe lidjuu. Kungaho, Ondiaboli oya li ya yeleka Job eshi a li oshipuna, naashi a li a hepa. Osho otashi ulike kutya Satana ke na nande onghenda novanhu ovo va hepa ile ovo va mona oixuna. Oku tonde ovapiya vaKalunga ovadiinini. (Job 2:3-5) Ndele nande ongaho, Job okwa li a ulika kutya Satana omunaipupulu eshi a li a kanyatela oudiinini waye.
15. Ovashunimonima ohava ulike ngahelipi kutya ove na oikala ya fa yaSatana?
15 Satana oye a ninga tete omushunimonima koishitwa aishe. Ovashunimonima vokunena navo ove na oikala ya fa yOndiaboli. Otashi dulika va kwatwe koikala yokukembaula oohandimwe meongalo, ovakulunhuongalo Ovakriste ile Olutuwiliki. Ovashunimonima vamwe ove li omhinge nokulongifwa kwedina laKalunga, Jehova. Inava hala yo okulihonga kombinga yaJehova ile oku mu longela. Ngaashi xe yavo, Satana, ovashunimonima ohava kendabala okuyahameka ovapiya vaKalunga ovadiinini. (Joh. 8:44) Itashi limbililike eshi ovapiya vaJehova hava henuka okweendafana novashunimonima. — 2 Joh. 10, 11.
Job okwa li a fimanekifa edina laJehova
16. Job okwa li a fimanekifa edina laJehova shi fike peni?
16 Job okwa li ha longifa edina laJehova nokwa li e li fimanekifa. Nokuli nokonima eshi Job a li a uda onghundana ii kutya ovana vaye ova fya, ka li a popila Kalunga mowii. Nonande Job okwa li a pa Kalunga oushima omolwokuhashiivasha eshi a kanifa oiniwe yaye, a filwa ovana vaye novapiya vaye, Job okwa li a fimanekifa edina laJehova. Lwanima, Job okwa li a popya meyeletumbulo laye limwe, a ti: “Tala, okutila Kalunga okwo ounongo. Nokukukuma owii okwo eendunge.” — Job 28:28.
17. Oshike sha li sha kwafela Job a kanyatele oudiinini waye?
17 Oshike sha li sha kwafela Job a kanyatele oudiinini waye? Osha yela kutya okwa hangwa nale e na ekwatafano lopofingo naJehova ofimbo a li ina hangwa komaupyakadi. Job okwa li a tokola toko okukala omudiinini, nonande katu shi shii ngeenge Job okwa li e shii kutya Satana okwa li ta shongo Jehova. Okwa ti: “Fiyo handi ka fuda mo omufudo wange, itandi ekeleshi po ouyuki wange.” (Job 27:5) Oshike sha li sha kwafela Job a kale e na ekwatafano lopofingo naKalunga? Nopehe na omalimbililo, Job okwa li a lenga osho a li a uda shi na sha nanghee Jehova a li a ungaunga nooxekulululwa ngaashi Abraham, Isak naJakob. Job okwa li yo a konakona eshito laJehova, nokungaho okwa li a dula okulihonga kombinga yomaukwatya mahapu aJehova. — Lesha Job 12:7-9, 13, 16.
18. (a) Job okwa li a ulika ngahelipi kutya oku na etilofimaneko lokutila Kalunga? (b) Omeenghedi dilipi hatu dulu okuhopaenena oshihopaenenwa shiwa shaJob?
18 Job okwa li e linyengifwa kwaasho e lihonga opo a dule okuhafifa Jehova. Job okwa li ha yambe alushe omayambo ta diladila kutya pamwe oukwaneumbo waye owa nyona ile kutya pamwe ova “sheka Kalunga momitima davo.” (Job 1:5) Job ka li a popila Jehova mowii, nokuli naashi a li ta hepekwa neenghono. (Job 10:12) Osho kashi fi tuu oshihopaenenwa sha denga mbada! Nafye otu na okulihonga alushe kombinga yaJehova nosho yo omalalakano aye opo tu mone eshiivo lashili. Otu na okukala tu na onghedindjikilile yokuninga oinima yopamhepo, ngaashi okukonakona Ombibeli, okukala pokwoongala, okwiilikana nosho yo okuudifa onghundana iwa. Kakele kaasho, otu na okuninga eenghendabala ngaashi hatu dulu tu twikile okukala hatu lombwele vamwe kombinga yedina laJehova. Ngaashi ashike Jehova a li a hafifwa koudiinini waJob, ovapiya vaJehova vokunena ohava hafifa omutima waye ngeenge navo tava kanyatele oudiinini wavo. Ohatu ka kundafana kombinga yaasho moshitukulwa tashi landula.
Oto dimbuluka?
• Omolwashike Job a li a ninga oshihakanwa shaSatana Ondiaboli?
• Job okwa li e lididimikila omayeleko elipi, nokwa li e linyenga ngahelipi kuo?
• Oshike tashi dulu oku tu kwafela tu kanyatele oudiinini wetu ngaashi Job?
• Oshike twe lihonga kombinga yaSatana membo laJob?
[Efano pepandja 12]
Omeenghalo dilipi oudiinini wetu tau dulu okuyelekwa?