Job okwa li omulumenhu omulididimiki nomudiinini
“Ove wa didilika tuu omupiya wange Job? Osheshi kombada yedu kaku na nande umwe ngaashi ye: omulumenhu e he noshipo, nomuyuki ndee ta tila Kalunga ndee ta kukuma owii.” — JOB 1:8.
1, 2. (a) Job okwa li a hangwa ombadilila komaupyakadi a kwata moiti elipi? (b) Hokolola kutya Job okwa li e na onghalamwenyo ya tya ngahelipi fimbo a li i na hangwa komaupyakadi.
OPA LI omulumenhu umwe oo a li e na keshe shimwe, a li oshipuna, a li a tumbala, e na oukolele muwa nokwa li e na oukwaneumbo wa hafa. Ombadilila, okwa ka hangwa komaupyakadi a kwata moiti oikando itatu ya landulafana. Okwa li a kanifa oiniwe yaye. Ovana vaye aveshe ova li va dipawa koshikungulu shinene shomhepo. Konima yaasho, okwa li a kwatwa komukifi woidinda tau nghundipaleke nokwa li ta yahama neenghono. Omulumenhu oo okwa li Job, oo ta dana onghandangala mehokololo olo li li membo lOmbibeli la lukilwa edina laye. — Job etukulwa 1 neti-2.
2 Job okwa li a kema a ti: “Akutu, ngeno ndi kale ngaashi nda li meehani doshito nale.” (Job 3:3; 29:2) Mbela olyelye womufye iha dimbuluka omafiku mawa onale ngeenge a hangwa koudjuu wonhumba? Job okwa li omuyuki nokwa li a fa a amenwa koiponga. Okwa li a fimanekwa kovanenenhu nova li hava pula omayele kuye. (Job 29:5-11) Okwa li oshipuna ndele okwa li e na ondjele shi na sha noimaliwa. (Job 31:24, 25, 28) Okwa li ha kwafele ovafiyekadi neefiye odo da li moluhepo. (Job 29:12-16) Okwa li yo omudiinini kukaume kaye kopahombo. — Job 31:1, 9, 11.
3. Jehova okwa li a tala ko ngahelipi Job?
3 Job okwa li omulumenhu ehe na oshipo molwaashi okwa li ha longele Kalunga. Jehova okwa ti: “Kombada yedu kaku na nande umwe ngaashi ye: omulumenhu e he noshipo, nomuyuki ndee ta tila Kalunga ndee ta kukuma owii.” (Job 1:1, 8) Nonande omaupyakadi okwa li a nyona po onghalamwenyo yaye youdjeko, kaa li e mu ningifa a efe po oudiinini waye wopaenghedi. Okwa li a kanifa oinima aishe oyo a li e na nokwa li ta ehama nokunyika oluhodi.
4. Omolwashike shi na ouwa okukonakona shi na sha nokuyelekwa kwaJob?
4 Osha yela kutya Job haye aeke womovapiya vaKalunga a li a mona oixuna omolwomaupyakadi a kwata moiti. Ovakriste vahapu kunena ohava hangwa komaupyakadi a fa oo kwa li a hanga Job. Nomolwaasho twa pumbwa okukonakona omapulo avali aa taa landula apa: Ongahelipi okukonakona shi na sha nokuyelekwa kwaJob taku dulu oku tu kwafela ngeenge hatu hangwa komaupyakadi a kwata moiti? Nongahelipi tashi tu kwafele tu kale hatu udile ovo tava mono oixuna oukwao wananghali?
Omhata i na sha noudiinini nosho yo okuyelekwa kwoudiinini waJob
5. Satana okwa ti kutya Job okwa li ta longele Jehova omolwelinyengotomheno lilipi?
5 Onghalo yaJob oya li ye likalekelwa, molwaashi ka li e shii kutya Ondiaboli oyo ya li ya tula momalimbililo omalinyengotomheno aye e na sha nokulongela Kalunga. Eshi Jehova a li a popya shi na sha nomaukwatya mawa aJob mokwoongala oko kwa li kwa ningwa meulu, Satana okwa ti: “Ove mwene, ndi shii, we mu amena keembinga adishe neumbo laye naaishe e i kwete”? Kungaha, Satana okwa li a hala lela okutya Job okwa li ashike ta longele Kalunga omolwokulihola mwene, naasho osha kwatela mo ovapiya vaKalunga aveshe. Satana okwa li a lombwela Kalunga a ti: “Nana eke loye u kume aishe e i kwete: ye ote ke ku liteeka shili moipafi yoye.” — Job 1:8-11.
6. Satana okwa pendula omhata ya fimana ilipi?
6 Omhata oyo oya fimana, molwaashi Satana okwa tula momalimbililo onghedi yaJehova yokupangela. Mbela Jehova ota dulu ngoo shili okupangela eshito alishe nohole? Ile pamwe ote shi ningi ashike omolwokulihola mwene ngaashi Satana a popya? Jehova okwa li a efa Ondiaboli i yeleke Job, molwaashi okwa li e na elineekelo kutya Job ita ka efa po oudiinini waye. Onghee hano, Satana oye lela a li a etela Job omaupyakadi. Eshi Satana a li ina pondola meenghendabala daye dotete dokuteya po oudiinini waJob, okwe ke mu tumina omukifi uyahama. Ondiaboli oya popya oipupulu ya ti: “Oshipa omoshipa! Omunhu keshe osho e shi na, te shi yandjele omwenyo waye.” — Job 2:4.
7. Omeenghedi dilipi ovapiya vaKalunga kunena hava hangwa komayeleko ngaashi oo a li a shakenekwa kuJob?
7 Nonande Ovakriste vahapu kunena inava mona oixuna ngaashi Job, ohava hangika komaupyakadi amwe e lili. Vahapu ohava hangwa komahepeko nosho yo komaupyakadi omoukwaneumbo. Omaupyakadi e na sha nouxupilo nosho yo okuhenoukolele otai dulu okunyemateka omunhu. Vamwe ova kanifa eemwenyo davo omolweitavelo lavo. Ndele inatu diladila nande kutya Satana oye ha etifa kondadalunde omaupyakadi aeshe oo hae tu hange, molwaashi omaupyakadi amwe otaa dulu okweetifwa komapuko etu ile kokuhawanenena kwetu. (Ovagalati 6:7) Atusheni ohatu dulu yo okweetelwa ounghundi wopalutu koukulupe nosho yo koiponga yopaushitwe. Ombibeli otai yelifa nawa kutya Jehova iha amene ovapiya vaye pashikumwifilonga komaupyakadi oo kunena. — Omuudifi 9:11, yelekanifa NW.
8. Satana oha longifa ngahelipi omaupyakadi oo hae tu hange?
8 Ndele nande ongaho, Satana ota dulu okulongifa omaupyakadi oo hatu shakeneke opo a nyone po eitavelo letu. Pashihopaenenwa, omuyapostoli Paulus okwa popya kutya okwa li ta mono oixuna ‘kekiya mombelela, omwengeli waSatana te mu hepeke.’ (2 Ovakorinto 12:7) Kashi na nee mbudi kutya ekiya mombelela olo ola li oupyakadi wopalutu, pashihopaenenwa, okuhamona ko nawa ile ouyahame umwe u lili, Paulus okwa li e shii kutya Satana ota dulu okulongifa oupyakadi waye nosho yo enyemato olo wa etifa opo a nyone po ehafo laPaulus noku teye po oudiinini waye. (Omayeletumbulo 24:10) Kunena, Satana ota dulu okulongifa oilyo yomaukwaneumbo, ovanafikola vakwetu ile nokuli omapangelo ookanyamukulwa opo va hepeke ovapiya vaJehova meenghedi di lili noku lili.
9. Omolwashike tuhe na okukala twa kumwa unene ngeenge hatu hangwa komaupyakadi ile komahepeko?
9 Ongahelipi hatu dulu okuungaunga nomupondo nomaupyakadi oo hatu shakeneke? Omokukala hatu a tale ko e li omhito yokuulika kutya otu hole shili Jehova nosho yo kutya ohatu dulika filufilu kounamapangelo waye. (Jakob 1:2-4) Kashi na nee mbudi kutya oshike tashi tu etele omaupyakadi, okukala tu shii kutya osha fimana okukala omudiinini kuKalunga otashi tu kwafele tu kale twa pama pamhepo. Omuyapostoli Petrus okwa shangela Ovakriste a ti: “Ovaholike, inamu kuminwa oupyu ou mu li mo woku mu [yeleka], wa foshinima inashi monika nale.” (1 Petrus 4:12) Paulus okwa ti: “Aveshe ovo va hala okukala metilokalunga muKristus Jesus, otava ka hepekwa.” (2 Timoteus 3:12) Satana ota twikile okutula momalimbililo oudiinini wEendombwedi daJehova, ngaashi a li a ninga shi na sha naJob. Ombibeli otai ulike sha yela kutya Satana ota ponokele neenghono oshiwana shaKalunga momafiku aa axuuninwa. — Ehololo 12:9, 17.
Job ka li e shii kutya omolwashike a li ta mono oixuna nokwa li a pewa omayele a puka
10. Oshike osho Job a li ina shiiva eshi a li ta mono oixuna?
10 Eshi Job a li ta mono oixuna ka li e shii kutya olyelye a li te i etifa, ndele fye katu na okukala monghalo ya fa yaye. Job okwa li a fika pexulifodiladilo la puka eshi a ti: “Omwene okwa pele nge, nOmwene okwa kufa nge.” (Job 1:21) Otashi dulika Satana a li a kendabala nelalakano okuningifa Job a diladile kutya Kalunga oye a li e mu etela omaupyakadi.
11. Hokolola kutya Job okwa li e linyenga ngahelipi eshi a li ta mono oixuna.
11 Job okwa li a teka omukumo neenghono, ndele nande ongaho ka li a sheka Kalunga, ngaashi omukainhu waye a li e mu ladipika e mu sheke. (Job 2:9, 10) Okwa ti: ‘Ovahenakalunga otava monika va fa ve li nawa ve dule nge.’ (Job 21:7-9) Otashi dulika yo a li e lipula kutya: ‘Omolwashike Kalunga a handukila nge?’ Omafimbo amwe okwa li ashike ha kala a hala okufya. Okwa kema a ti: “Akutu, ngeno u holeke nge moshovafi, heeno, u holeke nge fiyo ehandu loye la lota.” — Job 14:13.
12, 13. Omapopyo ookaume kaJob vatatu okwa li e mu kuma ngahelipi?
12 Job okwa li e na ookaume kaye vatatu ovo va li ve mu talela po, va li ngeno ve uya ve “mu pendule noku mu hekeleka.” (Job 2:11) Ndele ponhele yaasho, ova li “ovahekeleki vongaho.” (Job 16:2) Job okwa li ta dulu okukala a hekelekwa mokulombwela ookaume kaye omaupyakadi aye, ndele ova li ashike ve mu ningifa a kale a ngwangwana nokwa nyemata neenghono. — Job 19:2; 26:2.
13 Oshi li pandunge okufika pexulifodiladilo kutya Job otashi dulika a li e lipula kutya: ‘Omolwashike handi ningilwa oinima ya tya ngaho? Mbela onda ninga shike opo ndi hangike komaupyakadi aeshe aa?’ Ookaume kaye ova li ve mu pa omayelifilo taa pukifa filufilu. Ova li ve mu lundila kutya oye mwene e lietela omaupyakadi omolwokunyona sha kwata moiti. Elifas okwa li e mu pula a ti: “Olyelye a nyonauka po, ngenge e he noshipo?” Okwa weda ko a ti: “Osho nde shi tala, nokutya ovo hava pulula osho inashi yuka, ndee hava kunu ehanauno, ovo tave li teya yo.” — Job 4:7, 8.
14. Omolwashike tuhe na okufika pexulifodiladilo meendelelo kutya omunhu wonhumba ota mono oixuna omolwelihumbato laye lii?
14 Oshoshili kutya omaupyakadi otaa dulu okuholoka po ngeenge otwa kunu pambelela ponhele yokukuna pamhepo. (Ovagalati 6:7, 8) Molwaashi otu li yo monghalelo ei, omaupyakadi otaa dulu okuholoka po kashi na nee mbudi kutya ohatu lihumbata ngahelipi. Natango, kashi fi shoshili kutya ovanhu ovo vehe na ondjo ova lya olusha lokuhahangika komaupyakadi. Jesus Kristus oo a li ‘ehe na oshipo nokwa yoololwa movalunde,’ okwa li a fya efyo tali udifa omunhu omwenyo munyenye komuti womahepeko. Omuyapostoli Jakob naye okwa dipawa omolweitavelo laye. (Ovaheberi 7:26; Oilonga 12:1, 2) Okutomhafana kwa puka kwaElifas nosho yo kwookaume kaye vavali okwa li kwe linyengifa Job a popile edina laye liwa nosho yo ouyuki waye. Natango, omalundilo avo manyanyalifi kutya Job okwa li ta mono oixuna omolwokunyona kwaye okwa li a kuma etaleko laye li na sha nouyuki waKalunga. — Job 34:5; 35:2.
Natu konge ekwafo ngeenge twa hangwa komaudjuu
15. Oshike tashi ke tu kwafela ngeenge twa shakeneka omaupyakadi?
15 Oshike hatu lihongo moshimoniwa shaJob? Omaupyakadi a kwata moiti, omikifi nosho yo omahepeko otashi dulika i kale ya fa tai ningwa shihe li pauyuki. Ovanhu vamwe otava monika va fa ihava hangwa komaupyakadi mahapu a tya ngaho. (Epsalme 73:3-12) Efimbo nefimbo, otwa pumbwa okulipula omapulo aa a fimana: ‘Mbela ohole yange yokuhola Kalunga otai linyengifa nge ndi mu longele, kashi nee mbudi kutya oshike tashi ningwa po? Mbela onda halelela okupa Jehova omhito a ‘nyamukule omulundili’ waye?’ (Omayeletumbulo 27:11; Mateus 22:37) Inatu efa nandenande omapopyo oulai avamwe e tu ningife tu kale twa limbililwa Tate yetu womeulu. Omukriste umwe omudiinini, oo a li ta mono oixuna koudu woshinamenena oule womido dihapu, okwa ti: “Ondi shi shii kutya keshe osho Jehova a efa shi ningwe, ohandi dulu oku shi tambula ko. Ondi shi shii kutya ota ka pameka nge, ngaashi he shi ningi alushe.”
16. Eendjovo daKalunga ohadi kwafele ngahelipi ovo ve li momaudjuu?
16 Fye otu shii omakoto oo Satana ha longifa tu dule Job. Ombibeli otai ti: “Omakoto aye otu a shii,” sha hala kutya, eemhangela daye dii. (2 Ovakorinto 2:11) Natango, otu na ounongo muhapu oo tau dulu oku tu kwafela. Ombibeli oi na omahokololo mahapu ovalumenhu novakainhu ovadiinini ovo va li ve lididimikila omaupyakadi e lili noku lili. Omuyapostoli Paulus, oo a li a mona oixuna e dule Ovakriste vahapu, okwa shanga a ti: “Keshe eshi sha shangwa nale, osha shangelwa elongo letu, opo tu kale tu neteelelo hali di melididimiko nomehekeleko lomomishangwa.” (Ovaroma 15:4) Ondombwedi imwe yokuEuropa, oyo ya li moukwatwa omolweitavelo layo pefimbo loita itivali younyuni, oya li ya yandja po oikulya yayo yomafiku atatu opo i pewe Ombibeli. Oya ti: “Onda li nda mona ouwa omolwokukumaana po oikulya yange nOmbibeli. Nonande onda li handi kala nda fya ondjala yopalutu, onda li nda mona eendja dopamhepo odo da li da kwafela nge ndi kale nda pama nosho yo vakwetu fimbo twa li momafimbo oo madjuu omayeleko. Ondi na natango Ombibeli oyo fiyo okunena.”
17. Omafiloshisho aKalunga elipi taa dulu oku tu kwafela tu lididimike?
17 Kakele kehekeleko olo hatu mono okudja mOmishangwa, otu na yo oikwafifo ihapu yokukonakona Ombibeli oyo tai yandje omayele opandunge e na sha nokuungaunga nomaupyakadi. Ngeenge owa tale mo-Watch Tower Publications Index, oto dulu okumona mo oimoniwa yOvakriste vakweni ovo va li momayeleko a faafana naao oye. (1 Petrus 5:9) Otashi kwafa yo okukundafana omaupyakadi oye novakulunhuongalo ovo ve na onghenda ile nOvakriste vamwe va pyokoka. Komesho yaaishe, oto dulu okukonga ekwafo laJehova nosho yo lomhepo yaye iyapuki okupitila meilikano. Paulus okwa li a kondjifa ngahelipi ‘omahepeko’ aSatana? Omokulineekela meenghono daKalunga. (2 Ovakorinto 12:9, 10) Okwa shanga a ti: “Aishe ohandi i dulu [omolwaau, NW] ta pameke nge.” — Ovafilippi 4:13.
18. Ongahelipi Ovakriste vakwetu tava dulu okukala etwomukumo lashili kufye?
18 Ekwafo opo li li, ndele ino ongaonga nandenande oku li konga. Omayeletumbulo otaa ti: “Ngenge wa monika wa fya ounye, efiku [loudjuu, OB-1986] eenghono doye tadi ka ninipala.” (Omayeletumbulo 24:10) Ngaashi ashike eehedi hadi dulu okulya omiti deumbo ndele tadi u po, etekomukumo nalo otali dulu okuteya po oudiinini wOmukriste. Opo tu kelele oshiponga sha tya ngaho, Jehova ohe tu pe ekwafo okupitila movaitaveli vakwetu. Omweengeli umwe okwa li a holokela Jesus moufiku oo a li a kwatwa, ndele te mu pameke. (Lukas 22:43) Eshi Paulus a li tai kuRoma e li onghwatwa, “okwa pandula Kalunga nokwa ladipalekwa” eshi a li a shakena novamwatate pomalandifilo okuApiForum nokuTres-Taberne. (Oilonga 28:15) Ondombwedi imwe yokoNdowishi otai dimbuluka natango ekwafo olo ya li ya mona eshi ya li ya fika pokamba yeenghwate yaRavensbrück i li omunyasha noya tila. Oya ti: “Omukriste mukwetu umwe okwa shakeneka nge ndele ta hambelele nge nohole. Omumwameme vali umwe omudiinini okwa kala ta file nge oshisho ndele ta ningi meme wopamhepo.”
Kaleni ‘ovadiinini’
19. Oshike sha li sha kwafela Job a kondjife eenghendabala daSatana?
19 Jehova okwa popya kutya Job okwa li omulumenhu oo a li a “kanyatela oudiinini waye.” (Job 2:3, NW) Nonande Job okwa li a teka omukumo noka li e shii kutya omolwashike a li ta mono oixuna, ka li nande a tengauka shi na sha nomhata ya fimanenena i na sha noudiinini. Okwa li a anya filufilu okweefa po oudiinini waye. Okwa ti: “Fiyo handi ka fuda mo omufudo wange, itandi ekeleshi po ouyuki wange.” — Job 27:5.
20. Omolwashike sha fimana okulididimika?
20 Okukala twa tokola toko ngaashi Job otashi ke tu kwafela tu kanyatele oudiinini wetu meenghalo keshe, kutya nee ongeenge hatu yelekwa, hatu patanekwa ile twa hangwa komaupyakadi. Jesus okwa li a lombwela eongalo lokuSmirna a ti: “Ino tila oyo tai ke ku hepeka. Tala, ondiaboli otai idilile vamwe vomunye modolongo, mu yelekwe, ndele otamu ka monifwa oudjuu [omafininiko] omafiku omulongo. Diinina fiyo kefyo, Ame nohandi ku pe oshishani shomwenyo.” — Ehololo 2:10.
21, 22. Eshiivo lilipi tali dulu oku tu kwafela ngeenge hatu lididimikile omaudjuu?
21 Mounyuni ou tau pangelwa kuSatana, elididimiko letu noudiinini wetu otau ka yelekwa. Ndele nande ongaho, Jesus okwe tu shilipaleka kutya katu na okukala twa tila shi na sha nonakwiiwa, ndele osho sha fimana okukala ashike ovadiinini. Paulus okwa ti: “Oudjuu ou wetu oupu wepakumo,” ofimbo ondjabi oyo Jehova e tu udanekela ile “efimano” ‘olinene la wana nolaalushe.’ (2 Ovakorinto 4:17, 18) Nokuli noudjuu waJob owa li wopokafimbo moku u yelekanifa nomido dihapu odo a kala a hafa ofimbo a li ina yelekwa nosho yo konima yokuyelekwa kwaye. — Job 42:16.
22 Natango, omafimbo amwe otashi dulika tu kale momayeleko taa twikile notashi dulika tu kale tu wete itatu dulu okulididimikila okumona oixuna. Moshitukulwa tashi landula, ohatu ka konakona oilihongomwa imwe i na sha nelididimiko moshimoniwa shaJob. Ohatu ke lihonga yo nghee hatu dulu okupameka vamwe ovo ve li momaudjuu.
Oto nyamukula ngahelipi?
• Satana okwa li a pendula omhata ya fimana ilipi shi na sha noudiinini waJob?
• Omolwashike tuhe na okukala twa kumwa unene ngeenge hatu hangwa komaupyakadi?
• Jehova ohe tu kwafele ngahelipi tu lididimike?
[Efano pepandja 15]
Okukonga omauyelele, okupopya nOvakriste va pyokoka nosho yo okwiilikana kuJehova tashi di komutima otai dulu oku tu kwafela tu lididimike