Eendjovo daJehova odi na omwenyo

Omanenediladilo okudja membo laJob

TATEKULULULWA Job okwa li ha kala moshilongo shaUs, onhele oyo paife i li moshitukulwa hashi ifanwa Arabia. Pefimbo olo, Ovaisrael vahapu ova li muEgipti. Nonande Job ka li Omuisrael, okwa li omulongeli waJehova Kalunga. Ombibeli oya popya shi na sha naye, ya ti: “Kombada yedu kaku na nande umwe ngaashi ye: omulumenhu e he noshipo, nomuyuki ndee ta tila Kalunga ndee ta kukuma owii.” (Job 1:8) Job oku na okukala a li ko pokati kefimbo lovapiya vaJehova vavali va tongomana, sha hala kutya, pokati kefimbo lomona waJakob, Josef, nolomuprofeti Moses.

Moses, oo taku tiwa kutya oye a shanga embo laJob, otashi dulika a li a mona ouyelele u na sha naJob ofimbo a li oule womido 40 muMidian, osho sha li popepi naUs. Shi na sha noiningwanima yaxuuninwa yokukalamwenyo kwaJob, Moses otashi dulika a li e i uda ofimbo Ovaisrael va li popepi naUs, eshi va li ve li lwopexulilo lolweendo lavo lomombuwa lomido 40.a Oimoniwa yaJob oya shangwa monghedi ihokwifa neenghono, nomolwaasho embo laJob ola talika ko li li oshileshomwa sha denga mbada. Kakele kaasho, embo olo otali nyamukula omapulo ngaashi: Omolwashike ovayuki hava mono oixuna? Omolwashike Jehova a efa okumona oixuna ku kale po? Mbela ovanhu inava wanenena otava dulu ngoo okukanyatela oudiinini wavo kuKalunga? Etumwalaka olo li li membo laJob oli li oshitukulwa shEendjovo daKalunga da nwefwa mo, noli na omwenyo neenghono fiyo okunena. — Ovaheberi 4:12.

“EFIKU NDA DALWA, NALI KANE”

(Job 1:1–3:26)

Efiku limwe Satana okwa li ta popi moipafi yaKalunga, te mu twifa omhata shi na sha noudiinini waJob. Kalunga okwa li a efa Satana a yeleke Job nomayeleko a nyika oshiponga a landulafana. Ndele nande ongaho, Job okwa li a anya ‘okweefa po Kalunga.’ — Job 2:9.

Ookaume kaJob vatatu ova li ve uya oku “mu hekeleka.” (Job 2:11) Ova li ve li naye omutumba, ndele kava li tava popi, fiyo osheshi Job a hovela okupopya ta ti: “Efiku nda dalwa, nali kane.” (Job 3:3) Job okwa li a hala okukala ngeno “ngaashi ovana inava mona ouyelele,” ounona ovo va dalwa vehe na omwenyo. — Job 3:11, 16.

Omapulo opamishangwa taa nyamukulwa:

1:4 — Mbela ovana vaJob ova li hava dana omafiku omadalo? Hasho nandenande. Oshitya shOshiheberi osho sha tolokwa ‘efiku,’ muJob 1:4, naasho sha tokolwa “efiku lokudimbulukwa okudalwa,” muGenesis 40:20, oya yoolokafana; keshe shimwe oshi na eityo lasho li lili. Oshitya ‘efiku’ osho sha longifwa muJob 1:4 otashi ulike komukokomoko wefiku, okudja ongula fiyo okomatango. Ovanamati vaJob vaheyali ova li hava ningi oivilo yokuhafela pamwe momukokomoko womafiku aheyali a landulafana lumwe momudo; omonamati keshe okwa li ha longekidile ovamwaxe oitelekela keumbo laye “mefiku lolufo laye,” sha hala okutya, mefiku laye momukokomoko womafiku oo aheyali.

1:6; 2:1 — Oolyelye va li ve li ofika koshipala shaJehova? Mokati kaavo va li ve li ofika koshipala shaJehova omwa li Omona waYe ewifa, oo a ifanwa Ondjovo, nosho yo ‘ovanamati vaYe’ vakwao, sha hala kutya, ovaengeli ovadiinini nosho yo ovo ihava dulika, mwa kwatelwa naSatana Ondiaboli. (Johannes 1:1, 18) Satana neendemoni daye ova ka umbwa mo ashike meulu konima eshi Ouhamba waKalunga wa dikwa po mo 1914. (Ehololo 12:1-12) Mokweefa va holoke koshipala shaye, Jehova okwa li e shi ninga tashi shiiva opo eshongo neemhata odo da etifwa po kuSatana di shiivike koishitwa aishe yopamhepo.

1:7; 2:2 — Mbela Jehova okwa li a popya naSatana odikilila? Ombibeli itai yandje ouyelele muhapu shi na sha nanghee Jehova ha popi noishitwa yopamhepo. Ndele omuprofeti Mika okwa li a mona memoniko omweengeli ta popi odikilila naJehova. (1 Eehamba 22:14, 19-23) Onghee hano, oshi na oupu Jehova a li a popya naSatana odikilila.

1:21 — Omeityo lilipi Job a li ta dulu okushuna ‘medimo laina’? Molwaashi Jehova Kalunga okwa shitile omunhu okudja “mondwi yedu,” oshitya “meme” osha longifwa pafaneko movelishe oyo okuulika kedu. — Genesis 2:7.

2:9 — Omukainhu waJob okwa li monghalo yopamadiladilo ya tya ngahelipi eshi a li a lombwela Job kutya na efe po Kalunga a fye? Oukwaneumbo wavo owa li wa kanifa oiniwe yao. Omukainhu waJob okwa li ta yahama komwenyo okumona Job a nghundipala nota mono oixuna komukifi uyahameka. Ova li yo va filwa ovana vavo ovaholike. Otashi dulika omukainhu waJob a li a wililwa po neenghono komaupyakadi aeshe oo ndele ta dimbwa oshinima osho sha fimanenena monghalamwenyo — ekwatafano lavo naKalunga.

Oilihongomwa kufye:

1:8-11; 2:3-5. Ngaashi sha ulikwa moshimoniwa shaJob, okukanyatela oudiinini inaku kwatela mo ashike elihumbato liwa nokupopya kwa koshoka, ndele omunhu okwa pumbwa okukala nelinyengotomheno la yuka lokulongela Jehova.

1:21, 22. Mokukala ovadiinini kuJehova meenghalo diwa nosho yo dii, ohatu ulike kutya Satana omunaipupulu. — Omayeletumbulo 27:11.

2:9, 10. Ngaashi Job, otu na okudiinina eitavelo letu, nonande ovapambele vetu inava panda omalalakano etu opamhepo ile otave tu fininike tu efe po eitavelo letu.

2:13. Ookaume kaJob kava li va popya sha tashi hekeleke kombinga yaKalunga nomaudaneko aye, molwaashi kava li ve na etaleko lopakalunga.

‘ITANDI KA EKELASHI PO OUDIININI WANGE’

(Job 4:1–31:40)

Omapopyo ookaume kaJob vatatu otaa ulike kutya ova li tava diladila kutya Job oku na okukala a li a ninga oshinima shinyanyalifi nonokutya Kalunga okwa li te mu handukile sha kwata moiti omolwenyono olo. Elifas oye a li a kwatela komesho. Bildad okwa landula ko, ta popi eendjovo odo da li di uditife Job onya. Nokonima yaasho, Sofar okwa ka landula ko ta sheke Job neenghono.

Job ka li a tambula ko okutomhafana kwa puka kwookaume kaye ovo. Ndele molwaashi ka li e shii kutya omolwashike Kalunga e mu efa a mone oixuna, okwa li te liyukipalifa ye mwene sha pitilila. Ndele nande ongaho, Job okwa li e hole Kalunga, nomolwaasho a ti: “Fiyo handi ka fuda mo omufudo wange, itandi ekeleshi po ouyuki [ile “oudiinini,” NW] wange.” — Job 27:5.

Omapulo opamishangwa taa nyamukulwa:

7:1; 14:14 — Omautumbulilo ‘olwoodi’ nosho yo “omafiku aeshe oukwaita” okwa hala okutya shike? Molwaashi Job okwa li moupyakadi munene, okwa li a tala ko okukalamwenyo ku li olwoodi lidjuu ile la kwata moiti. (Job 10:17) Natango, Job okwa faafanifa efimbo olo omunhu e li moshovafi ofimbo a teelela enyumuko nomafiku omoukwaita, molwaashi omunhu ohai moshovafi a hala ile ina hala, ngaashi ashike ovanhu hava fininikilwa moukwaita.

7:9, 10; 10:21; 16:22 — Mbela omapopyo oo e li meevelishe odo otaa ulike kutya Job ka li a itavela menyumuko? Omapopyo aJob oo e li meevelishe odo oku na sha nonakwiiwa yaye i na sha naasho sha li tashi ka ningwa po okafimbo kaxupi ngeenge a fi. Okwa li a hala okutya shike mbela? Otashi dulika a li a hala okutya ngeenge okwa fi, ovanhu vopefimbo laye itava ka kala have mu mono vali. Oku shi talela mwaasho, konima ngeenge a fi, ka li ta ka alukila keumbo laye, molwaashi ka li ta ka kala e na omwenyo fiyo efimbo laKalunga lokunyumuna ovanhu la fika. Ile otashi dulika Job a li a hala okutya kape na omunhu ta dulu okudja mo moshovafi kuye mwene. Oushili oo kutya Job okwa li e na eteelelo li na sha nenyumuko lomonakwiiwa ou liwetikile muJob 14:13-15.

10:10 — Ongahelipi Jehova a li a ‘tilashi Job ngaashi omashini, ndele te mu pameke ngaashi omashini a ota’? Olo epopyo lopaitevo li na sha nanghee Job a li ta mewa moshidalelo shaina.

19:20 — Job okwa li a hala okutya shike eshi a ti kutya, “Ndi he na shimwe vali, oshama shange ashike”? Mokupopya kutya okwa li a fyaala po noshama shaye ashike, Job otashi dulika a li a hala okutya okwa fyaala po hamakasha.

Oilihongomwa kufye:

4:7, 8; 8:5, 6; 11:13-15. Katu na okweendelela okufika pexulifodiladilo kutya omunhu oo ta mono oixuna ota teya osho a kuna nonokutya ina hokiwa kuKalunga.

4:18, 19; 22:2, 3. Omayele etu oku na okukala e likolelela kEendjovo daKalunga, ndele hakomataleko etu vene. — 2 Timoteus 3:16.

10:1. Job okwa li a pofipalekwa kenyemato, nomolwaasho ka li a diladila shi na sha naasho sha li tashi mu etele lela oupyakadi. Katu na okukala twa nyemata ngeenge hatu mono oixuna, unene tuu eshi tu shii nawa omhata oyo ya kwatelwa mo mokumona oixuna kwovanhu.

14:7, 13-15; 19:25; 33:24. Ngeenge hatu yelekwa kuSatana, eteelelo lenyumuko otali dulu oku tu pameka.

16:5; 19:2. Eendjovo detu odi na okukala tadi tu vamwe omukumo noku va pameka, ndele haku va handukifa. — Omayeletumbulo 18:21.

22:5-7. Okuyandja omayele ile oushima kuvamwe tuhe na ouyelele we lixwa po kaku na ongushu yasha noitaku tungu.

27:2; 30:20, 21. Okukala omukanyateli woudiinini itaku pula omunhu a kale a wanenena. Job okwa li a nyona mokupa Kalunga oushima.

27:5. Job okwa li a kanyatela oudiinini waye molwaashi okwa li e hole Kalunga. Onghee hano, nafye natu kulikeni ohole yetu yokuhola Kalunga.

28:1-28. Ovanhu ove shii opo pe na omamona okedu. Ohava longifa ounghulungu wavo opo ve a fe mo medu, omo muhe wetike nokuli nokeedila odo hadi mono kokule. Ndele ounongo wopakalunga ohau di mokutila Jehova.

29:12-15. Otu na okukala hatu ulikile ouwanghenda ovo ve na omhumbwe, hatu shi ningi nehalo liwa.

31:1, 9-28. Job okwe tu tulila po oshihopaenenwa shiwa shi na sha nokuhenuka oikala tai kokele momilele, enyonohombo, onhondo, okuhenonghenda navamwe, ohole yokuhola omaliko nosho yo elongelo loikalunga.

‘OHANDI LIDILULULA MONDWI NOMOMUTE’

(Job 32:1–42:17)

Ofimbo Job a li ta popi nookaume kaye vatatu, omunyasha wedina Elihu okwa li po ta pwilikine keemhata davo nelidiiniko. Konima yefimbo, okwa ka ya mo ta popi neyombamo. Okwa li a pukulula Job nosho yo ookaume kaye vatatu ovo va li tave mu ula nai.

Konima eshi Elihu a mana okupopya, Jehova okwa li a nyamukula Job okupitila mokafudaela. Ina yelifila Job kutya omolwashike a li ta mono oixuna. Ndele mokupula omapulo a landulafana, okwa kwafela Job a mone kutya Ye oku na eenghono dikumwifi nonokutya Oye omunongo a shiya ko. Job okwa li a dimina kutya okwa li ta popi ehe na eshiivo nokwa ti: ‘Ohandi alula eendjovo dange, ndelenee paife handi lidilulula mondwi nomomute.’ (Job 42:6) Pexulilo lokuyelekwa kwaye, Job okwa li a nangekwa noupuna, omolwoudiinini waye.

Omapulo opamishangwa taa nyamukulwa:

32:1-3 — Elihu okwe uya po puJob efimbo peni? Molwaashi Elihu okwa uda omapopyo aeshe aJob nookaume kaye, oku na okukala a li e li omutumba popepi ofimbo Job ina hovela okupopya, fimbo a li a kalelwa oule womafiku aheyali kookaume kaye vatatu ovo va li itava popi. — Job 3:1, 2.

34:7 — Osha hala okutya ngahelipi eshi taku tiwa kutya Job kwa li a fa omulumenhu “ou ta nu okusheka Kalunga ngaashi omeva”? Ofimbo a li a wililwa po, Job okwa li a tala ko omasheko ookaume kaye vatatu a fa oye tava sheke, nonande paulelalela ova li tava sheke Kalunga. (Job 42:7) Kungaha, Job okwa li a fa ta nu omasheko, ngaashi omunhu ta hafele okunwa omeva.

Oilihongomwa kufye:

32:8, 9. Okukala omukulunhu hako lela haku ningifa omunhu a kale e na ounongo. Okukala omunongo otaku pula eudeko lEendjovo daKalunga nokuwilikwa komhepo yaye.

34:36. Oudiinini ohau ulikwa ngeenge omunhu ta ‘yelekwa fiyo okexulilo’ meenghedi di lili noku lili.

35:2. Elihu okwa li a pwilikina nawa nokumona ouyelele oo wa kwatelwa mo, ofimbo ina hovela okupopya. (Job 10:7; 16:7; 34:5) Ovakulunhuongalo Ovakriste ove na okupwilikina nawa, okumona ouyelele we lixwa po nokuuda ko oinima nawa, ofimbo inava yandja omayele. — Omayeletumbulo 18:13.

37:14; 38:1–39:30. Okudilonga koikumwifilonga yaJehova, oyo tai ulike eenghono nounongo waye, ohaku tu ningifa tu kale twe lininipika nohaku tu kwafele tu mone kutya okuyukipalifwa kwounamapangelo waye okwa fimanenena ku dule oinima yetu yopaumwene. — Mateus 6:9, 10.

40:1-4. Ngeenge hatu kwatwa keamo lokupa Omunaenghono adishe oushima, otu na ‘okutula omake etu komilungu,’ sha hala kutya, okulikwata komilungu.

40:15–41:34. Ongololo (ondjabameva) nosho yo ongadu kai fi tuu oinamwenyo i na eenghono! Opo tu lididimike moilonga yaKalunga, nafye otwa pumbwa eenghono okudja kuKalunga, Omushiti woinamwenyo oyo inaenghono. — Ovafilippi 4:13, NW.

42:1-6. Okuuda eendjovo daKalunga nokudimbulukifwa shi na sha nomauliko eenghono daye okwa li kwa kwafela Job a ‘tale Kalunga,’ sha hala kutya, a shiive oshili i na sha naye. (Job 19:26) Osho osha li sha kwafela Job a lundulule okudiladila kwaye. Ngeenge hatu pewa omapukululo opamishangwa, nafye otu na okukala hatu dimine noupu omapuko etu nokuninga omalunduluko.

Natu kaleni ‘nelididimiko ngaashi laJob’

Embo laJob ola ulika sha yela kutya Kalunga haye a etifa okumona oixuna kwovanhu, ndele okwa etifwa kuSatana. Okweefa kwaKalunga oukolokoshi u kale po kombada yedu otaku tu pe omhito yokuulika pauhandimwe kutya otwa ama kombinga ilipi momhata i na sha nounamapangelo waJehova nosho yo oudiinini wetu.

Ngaashi Job a li a yelekwa, aveshe ovo ve hole Jehova ove na okuyelekwa. Ehokololo laJob otali tu tu omukumo kutya nafye ohatu dulu okulididimika. Otali tu dimbulukifa yo kutya omaupyakadi etu itaa ka kala po fiyo alushe. Jakob 5:11 ota ti: “Elididimiko laJob [omwe] li uda, nomwa mona exulilo e li pewa kOmwene.” Jehova okwa li a nangeka noupuna Job omolwokukanyatela oudiinini waye. (Job 42:10-17) Eteelelo letu loku ka kala nomwenyo waalushe mOparadisa kombada yedu kali fi tuu eteelelo likumwifi! Onghee hano, ngaashi Job nafye natu kale twa tokola toko okukanyatela oudiinini wetu. — Ovaheberi 11:6.

[Eshangelo lopedu]

[Efano pepandja 32]

Oshike hatu lihongo ‘melididimiko laJob’?