Ontopolwa 41

Aanona mboka ya li ya nyanyudha Kalunga

OKANONA keni kombanda yevi ka li ka nyanyudha Jehova noonkondo?— Omwanamati gwe, Jesus. Natu popye kombinga yiinima mbyoka Jesus a li a ningi opo a nyanyudhe He gwomegulu.

Jesus nuukwanegumbo waandjawo oya li haye ende olweendo lwomasiku gatatu lwaampono okuya kuJerusalem hoka kwa li otempeli yaJehova ombwanawa. Jesus otempeli ndjoka okwa li e yi ithana “egumbo lyaTate.” Ye nuukwanegumbo waandjawo oya li haya yi hoka omvula kehe ya ka dhane oshituthi shOpaasa.

Omumvo gumwe sho Jesus a li e na oomvula 12 uukwanegumbo waandjawo owa li wa yi molweendo konima yokudhana oshituthi shOpaasa wu shune kegumbo. Sho ya li ya kankama pehala mpoka taya lala aavali oya dhimbulula kutya Jesus ke mo mokati kaakwanezimo nookuume. Onkee ano, Maria naJoseph oya shuna mbalambala kuJerusalem opo ya ka konge Jesus. Mbela sho to dhiladhila openi naanaa a li?—

Oye mu adha motempeli ta pulakene kaalongihapu noku ya pula omapulo. Ngele ye mu pula sha okwa li e ya yamukula. Oya li ya kuminwa omayamukulo ge omawanawa. Mbela ngashingeyi owu wete kutya omolwashike Kalunga a li a nyanyukilwa Omwana?—

Dhoshili, sho Maria naJosef lwahugunina ya mono Jesus, oya li yu uvite nawa. Ihe Jesus ka li ti ipula nasha. Okwa li e shi shi kutya otempeli oyo ehala ewanawa okukala. Onkee ano, okwe ya pula a ti: “Kamu shi shi nani kutya ngame ondi na okukala [megumbo lyaTate, NW]?” Okwa li e shi shi kutya otempeli oyo egumbo lyaKalunga nokwa li e hole okukalamo.

Konima yaashono Maria naJosef oya kutha Jesus ngoka a li e na oomvula 12 e taya shuna naye kuNasaret. Mbela sho to dhiladhila Jesus okwa li hi ihumbatele ngiini naavali ye?— Ombiimbeli otayi popi kutya okwa ‘kala ha vulika kuyo.’ Mbela sho to dhiladhila shoka osha hala okutya shike?— Osha hala okutya okwa kala omuvuliki. Eeno, okwa li ha ningi shoka aavali ye taye mu lombwele, nokuli nando okwa pulwa a ka teke omeya komuthima.—Lukas 2:41-52, yelekanitha NW.

Onkee ano, dhiladhila kwaashika: Nonando Jesus okwa li a gwanenena, okwa li ha vulika kaavali ye mboka inaaya gwanenena. Mbela shika osha li ngaa sha nyanyudha Kalunga? Eeno, osho naanaa molwaashoka Oohapu dhaKalunga otadhi lombwele aanona tadhi ti: “Vulikeni kaakuluntu yeni.” (Aaefeso 6:1) Nangoye oto ka nyanyudha wo Kalunga ngele owa kala ho vulika kaavali yoye ngaashi Jesus a li ha ningi.

Omukalo gumwe moka to vulu okunyanyudha Kalunga ogwo okukala ho lombwele yalwe kombinga ye. Kunena aantu yamwe otashi vulika ya tye kutya aagundjuka hasho ye na okukala taya ningi ngaaka. Ihe sho aantu ya li taya kambadhala okukeelela aanona aashona kaaya ninge shika, Jesus okwa li a ti: “Inamu lesha nani nando lumwe, sho taku tiwa: ‘Momakana guunona noguuhanona owa longekidhile mo ehambelelo.’” (Mateus 21:16) Onkee ano, atuheni otatu vulu okulombwela yalwe kombinga yaJehova nokombinga yuuwanawa waKalunga ngele otwa hala shili oku shi ninga. Ngele tatu ningi ngaaka otatu nyanyudha Kalunga.

Openi hatu ilongele iinima kombinga yaKalunga mbyono tatu vulu okulombwela yalwe?— Opekonakonombiimbeli lyetu lyopegumbo. Ihe ohatu ilongo wo iinima oyindji pehala mpoka oshigwana shaKalunga hashi gongala opo shi konakone Ombiimbeli. Ongiini tatu vulu okudhimbulula aantu mboka ye li oshigwana shaKalunga?—

Aantu yamwe ohaya ningi shike ngele ya gongala? Mbela ohaya longo ngaa lela aantu shoka shi li mOmbiimbeli? Mbela ohaye yi lesha ngaa noku yi kundathana? Ohatu pulakene kuKalunga okupitila mOmbiimbeli— Pokugongala kwopaKriste opo hatu vulu okuuva shoka Kalunga ta ti, hasho mbela?— Ihe ongiini mbela ngele aantu oya ti kutya ku na okuvulika kwaashoka Ombiimbeli tayi ti? Mbela oto ka tya ngaa kutya aantu ya tya ngawo oye li oshigwana shaKalunga?—

Mpaka opu na oshinima shimwe ishewe shoka wu na okudhiladhila kombinga yasho. Ombiimbeli otayi ti kutya oshigwana shaKalunga otashi ka kala “egongalo lye mwene.” (Iilonga 15:14) Molwaashoka edhina lyaKalunga oJehova, otatu vulu okupula aantu ngele Jehova oKalunga kawo. Ngele oya ti aawe, opo nduno otu shi shi kutya yo kaaye shi oshigwana she. Oshigwana shaKalunga oshi na wo okukala hashi lombwele yalwe kombinga yUukwaniilwa waKalunga. Ohashi ulike wo kutya oshi hole Kalunga mokudhiginina iipango ye.—1 Johannes 5:3.

Onkee ano, ngele owu shi aantu mboka haya ningi iinima ayihe mbyoka, nena owu na okukala ho gongala pamwe nayo opo mu longele Kalunga. Owu na okukala ho pulakene nawa pokugongala huka nokugandja omayamukulo ngele omapulo taga pulwa. Shoka osho Jesus a li ha ningi sho a li megumbo lyaKalunga. Ngele owa kala ho ningi iinima mbika oto ka nyanyudha Kalunga ngaashi naanaa Jesus a li a ningi.

Mbela owu shi aanona yamwe ya popiwa mOmbiimbeli mboka ya li ya nyanyudha Kalunga?— Timoteus oku li oshiholelwa sha tongomana. He ka li i itaala muJehova. Ihe yina Eunike nayinakulu Loide, oya li yi itaala muJehova. Timoteus okwa li ha pulakene kuyo nokwa li hi ilongo kombinga yaJehova.

Sho Timoteus a koko, omuyapostoli Paulus okwa li a talele po oshilando moka a li a kala. Paulus okwa li a mono kutya Timoteus okwa hala lela okulongela Jehova. Onkee ano, okwa li a pula Timoteus a ye pamwe naye opo a ka longe oshindji miilonga yaKalunga. Kehe pamwe ya li ya yi oya li ya lombwele aantu kombinga yUukwaniilwa waKalunga nokombinga yaJesus.—Iilonga 16:1-5; 2 Timoteus 1:5; 3:14,15.

Ihe mbela iiholelwa ayihe yi li mOmbiimbeli oyaamati owala aagundjuka mboka ya li ya nyanyudha Kalunga?— Aawe, hasho nando. Dhiladhila kombinga yokakadhona okagundjuka Okaisraeli hoka ka li ka nyanyudha Kalunga. Pethimbo lyako Aasiria nAaisraeli kaya li ye holathane. Esiku limwe Aasiria oya li ya kondjo nAaisreli, Aasiria oya kwata po okakadhona Okaisraeli. Oka li ka falwa kegumbo lyaNaeman, ondjayi yetangakwiita lyAasiria. Megumbo moka oka ningi okapika komukulukadhi gwaNaeman.

Naeman okwa li e na uuvu woshilundu. Kapwa li pu na oondohotola tadhi vulu okwaaludha omukithi nguka. Ihe okakadhona okagundjuka Okaisraeli oka li ki itaala kutya gumwe gwomaapiya yaKalunga i ikalekelwa, omupolofeti ota vulu okukwathela Naeman. Dhoshili, Naeman nomukulukadhi gwe kaya li haya longele Jehova. Mbela okakadhona okagundjuka oka li take ke ya lombwela shoka ke shi? Mbela ando ongoye, ando owa ningi po shike?—

Onkee ano, okakadhona oka lombwele omukulukadhi ka ti: ‘Ando Naeman okwa li ta yi komupolofeti gwaJehova kuIsraeli, ando ota ka aluka kuuvu we woshilundu.’ Naeman okwa li a pulakene kokakadhona e ta yi komupolofeti gwaJehova. Sho a ningi shoka omupolofeti e mu lombwele a ninge, okwa aluka. Shika osha li sha ningitha Naeman a ninge omulongeli gwaKalunga kashili.—2 Aakwaniilwa 5:1-15.

Ngaashi okakadhona hoka ka li ka ningi, mbela nangoye owa hala okukwathela omuntu gwontumba i ilonge kombinga yaJehova nokombinga yaashoka ta vulu okuninga?— Oolye mbela to vulu okukwathela?— Eeno, petameko otashi vulika ya kale itaaya dhiladhila kutya oya pumbwa ekwatho. Ihe oto vulu okupopya nayo kombinga yiinima iiwanawa mbyoka Jehova ha ningi. Otashi vulika ya pulakene kungoye. Kala wu na uushili kutya shika otashi ka nyanyudha Kalunga.

Aagundjuka otaya vulu natango okutsuwa omukumo opo ya kale taya nyanyukilwa okulongela Kalunga mokulesha Episalomi 122:1; 148:12, 13; Omuuvithi 12:1; 1 Timoteus 4:12 nAahebeli 10:23-25.

[Omathano pepandja 213]

Ongiini okanona Jesus ka li ka nyanyudha Kalunga?

[Ethano pepandja 215]

Timoteus okwa li a hala okuninga shike nando he ka li omwiitaali?

[Ethano pepandja 216]

Ongiini okakadhona haka Okaisraeli ka li ka nyanyudha Kalunga?