Oshike tashi ku kwathele okuuva ko Ombiimbeli?
“IINIMA mbika ongoye we yi holeke aanongo naanamayele nowe yi hololele mboka ya fa uunona.” (Lukas 10:21) Oohapu ndhoka Jesus a li a lombwele He gwomegulu otadhi ulike kutya opo tu uve ko Ombiimbeli otu na okukala tu na iikala iiwanawa. Uunongo waJehova owa hololwa sho a gandja embo ndyoka tali vulu okuuviwa ko owala kaantu aaifupipiki mboka haya vulu okulongwa.
Koyendji yomutse oshidhigu okukala neifupipiko. Atuheni otwa thigulula iikala yokukala nuuntsa. Kakele kaashono, otu li ‘momasiku omahugunina,’ mokati kaantu mboka ‘yi ihole, aainomi noye na uuntsa.’ (2 Timoteus 3:1-4, yelekanitha OB-1954.) Iikala mbika otayi tu imbi tu uve ko Oohapu dhaKalunga. Mupyamunene, atuheni ohatu nwethwa mo momukalo gwontumba kaantu mboka tu li mokati kawo. Ongiini ano to vulu okukala niikala mbyoka ya pumbiwa okuuva ko Ombiimbeli?
Longekidha omutima nomadhiladhilo goye
Esra, omuwiliki gwonale gwoshigwana shaKalunga, okwa li “i igandjela okwiilonga ompango yOMUWA [nenge “a longekidha omutima gwe okukonakona ompango yaJehova,” NW].” (Esra 7:10) Opu na mbela omukalo gumwe ngoka tatu vulu okulongekidha omitima dhetu? Eeno. Otatu vulu okutameka mokukala tu na etaloko ewanawa li na ko nasha nOmanyolo. Omuyapostoli Paulus okwa li a nyolele Aakriste ooyakwawo a ti: “Sho twe mú etele oohapu dhaKalunga, omwe dhi uvu e tamu dhi taamba, hangaashi oohapu dhomuntu, ihe odhaKalunga, dho odho tuu shili.” (1 Aatessalonika 2:13) Nonando aantu oyo ya li ya longithwa okunyola Ombiimbeli, shoka ya nyola osha za kuJehova. Ngele tatu zimine uushili mbuka wa simanenena, otashi ke tu kwathela okutaamba ko shoka tatu lesha.—2 Timoteus 3:16.
Omukalo gulwe moka tatu vulu okulongekidha omitima dhetu, ogwo egalikano. Molwaashoka Ombiimbeli oya nwethwa mo kombepo ondjapuki, etumwalaka lyayo otali vulu okuuviwa ko kutse kekwatho lyombepo ndjoka. Otu na okupula ekwatho lya tya ngawo megalikano. Ndhindhilika nkene shoka sha li shi ipulwa komupisalomi ngoka a nyola a ti: “Fatululila ndje ompango yoye, ongame notandi yi dhiginine e tandi vulika kuyo nomwenyo aguhe.” (Episalomi 119:34) Inatu pumbwa okugalikana owala opo tu mone oondunge tu uve ko shoka sha nyolwa mOmbiimbeli ihe opo tu mone wo iikala yopamutima mbyoka tayi tu kwathele tu shi taambe ko. Opo tu uve ko Ombiimbeli, otwa pumbwa okukala hatu taamba ko shoka shoshili.
Manga to tedhatedha opo u kale niikala iiwanawa, tala nkene okukonakona Ombiimbeli taku vulu oku ku kwathela. Otu na omatompelo ogendji omawanawa molwokukonakona Oohapu dhaKalunga, ihe etompelo lya simanenena olyo kutya ohayi tu kwathele tu hedhe popepi naKalunga. (Jakob 4:8) Ngele tatu lesha nkene Jehova hi inyenge koonkalo dha yoolokathana, nkene ha pandula mboka ye mu hole nonkene hu ungaunga naamboka taye mu thigi po, otatu mono kutya ye omuntu a tya ngiini. Aluhe etompelo lya simana molwaashoka hatu lesha Ombiimbeli oli na okukala opo tu tseye Kalunga nawa nokungawo otatu koleke ekwatathano lyetu naye.
Iinima mbyoka tayi tu imbi okukala niikala iiwanawa
Mbela oshike tashi vulu oku tu imba okuuva ko Oohapu dhaKalunga? Oshinima shimwe shoka tashi vulu oku tu imba osho okukakatela uudhiginini mwaashoka kaashi na oshilonga. Pashiholelwa, otashi vulika u itaale omalongo nomadhiladhilo gaantu yontumba mboka wa simaneka unene. Ihe ongiini ngele aantu mboka ihaya dhiginine nenge ihaya simaneke oshili yOohapu dhaKalunga? Moonkalo dha tya ngawo, okuuva ko shoka Ombiimbeli tayi ti naanaa otaku vulu okukala eshongo. Onkee ano, Ombiimbeli otayi tu ladhipike tu konakone nawa shoka twa longwa.—1 Aatessalonika 5:21.
Yina yaJesus, Maria, okwa li a taalelwa keshongo lya tya ngaaka. Okwa li a putudhwa pamuthigululwakalo gwOshijuda. Okwa li a vulika nuudhiginini kOmpango ndjoka ya li ya pewa Moses nosha yela kutya okwa li ha yi kosinagoga. Konima yethimbo monkalamwenyo ye okwa li a mono kutya omukalo gwokulongela Kalunga ngoka aavali ye ye mu longa inagu taambwa ko we kuKalunga. Onkee ano Maria okwa li a taamba ko elongo lyaJesus nokwa li mokati kaamboka ya li iilyo yotango yegongalo lyopaKriste. (Iilonga 1:13, 14) Shika kasha li shu ulike ondhino okudhina aavali ye nenge omithigululwakalo dhawo, ihe pehala lyaashono osha li shu ulike ohole ye yokuhola Kalunga. Ngele otwa hala okumona mo uuwanawa mOmbiimbeli, otu na okuninga ngaashi Maria ngoka a li a pititha komeho uudhiginini kuKalunga monkalamwenyo ye.
Shiyemateka, aantu oyendji inaya simaneka oshili yOmbiimbeli. Yamwe oye wete shi li nawa okulandula omikalondjigilile dhopalongelokalunga ndhoka dha kankamena kiifundja. Yalwe ohayu ulike kutya oya dhina oshili mokupopya kwawo nomokukala kwawo. Onkee ano, okutaamba ko oshili yOmbiimbeli otaku pula eiyambo: Otaku vulu okweeta okwaahauvathana nookuume koye, aashiinda, aaniilonga ooyakweni nokuli nonuukwanegumbo woye. (Johannes 17:14) Nonando ongaaka, omunandunge Salomo okwa nyola a ti: “Ilandela oshili, ihe ino yi landitha po we.” (Omayeletumbulo 23:23) Ngele to dhiginine oshili, Jehova ote ke ku kwathela u uve ko Ombiimbeli.
Oshinima shilwe natango shoka tashi vulu okwiimba okuuva ko etumwalaka lyOmbiimbeli osho okukala inoo hala okutula miilonga shoka tayi ti. Jesus okwa li a lombwele aalongwa ye a ti: “Ne omwa pewa owino okutseya iiholekwa yOshilongo shegulu, ihe yalwe inaye yi pewa. Oshoka omitima dhaantu mbaka odha kukuta; ihaa uvu ko nawa . . . nomakutsi gawo gaa uve ko.” (Mateus 13:11, 15) Oyendji yomwaamboka Jesus a li u uvithile oya li inaaya hala okupulakena noinaaya hala okulundulula omikalo dhawo. Shoka inashi faathana tuu nomuhalithi ta kongo uuwe wo opala ngoka a popiwa kuJesus meyele! Sho a mono okawe kamwe ke na ondilo, omuhalithi okwa yi nziya nokwa landitha po ayihe e te ki ilandele. Okuuva ko oshili yOmbiimbeli nako oku na okukala oshinima shoka shi na ondilo kutse.—Mateus 13:45, 46.
Okukala ho vulu okulongwa oku li eshongo
Eshongo enenenene okuuva ko Ombiimbeli olyo okukala ho vulu okulongwa. Omuntu otashi vulika ta mono oshidhigu okutaamba omadhiladhilo omape ga za kugumwe ngoka e na ondondo yopevi pataloko lye. Ihe aayapostoli yaJesus Kristus oya li aantu “inaa longwa sha.” (Iilonga 4:13) Paulus okwe shi yelitha kutya omolwashike sho a nyola a ti: “Aamwameme, dhimbulukweni kutya omwa li mwa tya ngiini, Kalunga sho e mú ithana, mu ninge aakriste. Ngele tandi popi pantu, aashona yowala yomokati keni ya li aanongo nenge aanankondo nenge ya valekeka. Oshoka Kalunga oha hogolola shoka uuyuni tau shi tala kutya osha nika uugoya, opo aanongo ya sithwe ohoni.” (1 Aakorinto 1:26, 27) Ngele owa mono kutya oshidhigu okukala wi ifupipika ngele to longwa komuntu ngoka inaa longwa sha, dhimbulukwa kutya ye ota longithwa owala kuKalunga oku ku longa. Opu na mbela uuthemba uunene u vule mboka wokukala to longwa kuJehova, Omulongi gwetu Omunenenene?—Jesaja 30:20; 54:13.
Ondjayi yetangakwiita lyaSiria, Naeman okwa li gumwe ngoka a mono shi li eshongo okutaamba ko elombwelo ndyoka tali zi kugumwe ngoka e na ondondo yopevi. Sho a li a kongo gumwe ngoka ta vulu oku mu aludha kuuvu we woshilundu, okwa yi a ka mone omupolofeti gwaJehova, Elisa. Ihe omalombwelo gaKalunga ge na ko nasha nokwaaluka kwe oga li ga pewa Naeman okupitila mungoka a li omupiya gwowala. Osha li oshidhigu kuNaeman okutaamba neifupipiko etumwalaka ndika nosho wo omukalo moka lya gandjwa, nomolwaashoka tango okwa li a tindi okuvulika koohapu dhomupolofeti gwaKalunga. Konima yethimbo Naeman okwa li a lundulula iikala ye nokwa li a aluka. (2 Aakwaniilwa 5:9-14) Otwa taalelwa keshongo lya faathana ngele tatu ilongo Ombiimbeli. Otashi vulika tatu ilongo kutya opo tu kale twa aluka pambepo nopamikalo, otwa pumbwa okulundulula omikalo dhetu. Mbela otatu ka kala ngaa twi ifupipika opo tu ethe gumwe e tu longe shoka twa pumbwa okuninga? Oomboka owala ye na iikala hayi vulu okulongwa taya vulu okuuva ko Ombiimbeli.
Iikala iiwanawa oya li yu ulikwa komulumentu ngoka e na oonkondopangelo mepangelo lyaKandake, omunyekadhi gwAaetiopia. Okwa li ta shuna kuAfrika e li metemba lye sho omulongwa Filippus a matukile kuye nokupopya naye. Filippus okwa li a pula omulumentu ngoka ngele oku uvite ko tuu shoka ta lesha. Elenga olya yamukula lyi ifupipika lela lya ti: “Otandi vulu ngiini okuuva ko, ngele kape na ngoka ta fatululile ndje?” Sho omulumentu ngoka a li u uvu ko Oohapu dhaKalunga, okwa li a ninginithwa. Konima yaashoka, okwa ‘tsikile ondjila ye a nyanyukwa noonkondo.’—Iilonga 8:27-39.
Oyendji yomOonzapo dhaJehova kaye na oondondo dhopombanda. Oshiwike kehe ohadhi ningi omakonakonombiimbeli momagumbo gaantu ye vulithe pomamiliyona gahamano. Molwaashoka Ombiimbeli otayi longo aantu onkalamwenyo yi li dhingi, otayi yelitha etegameno awike lyashili kaantu notayi tu ulikile nkene tatu vulu okutseya nawa Kalunga, aantu omamiliyona oya mono kutya okukonakona Ombiimbeli nokuuva ko shoka tayi ti, otaku ye etele enyanyu enene. Oko oshinima shoka to vulu okunyanyukilwa.
[Ethano pepandja 7]
Naeman okwa li a mono oshidhigu okutaamba ko omalombwelo taga zi kungoka a li omupiya gwowala
[Ethano pepandja 7]
Okuuva ko Ombiimbeli otaku nyanyudha omitima dhetu