Ontopolwa 43
Aamwameme oolye?
ESIKU limwe Omulongi Omunene okwa li a pula aalongwa ye epulo ekumithi a ti: “Meme naamwameme oolye?” (Mateus 12:48) Mbela oto vulu okuyamukula epulo ndyoka?— Otashi vulika wu shi kutya edhina lyayina yaJesus oMaria. Ihe mbela omadhina gaamwayinamati owu ga shi?— Mbela Jesus okwa li wo e na aamwayinakadhona?—
Ombiimbeli oya ti kutya aamwayinamati yaJesus omadhina gawo ogo “Jakob, Josef, Simon naJudas.” Jesus pethimbo lyokuuvitha kwe aamwayinakadhona oya li natango ye na omwenyo. Molwaashoka Jesus oye a li osheeli, aamwayina ayehe mboka oya li aashona kuye.—Mateus 13:55, 56; Lukas 1:34,35.
Mbela aamwayinamati yaJesus nayo oya li aalongwa ye?— Ombiimbeli oya ti kutya oya li “inaaye mu itaala” petameko. (Johannes 7:5) Ihe konima yethimbo, Jakob naJudas oya ningi aalongwa ye noya li nokuli ya nyola omambo gOmbiimbeli. Mbela owu shi kutya omambo geni ya nyola?— Eeno, embo lyaJakob nolyaJudas.
Nonando aamwayinakadhona yaJesus inaya tumbulwa mo mOmbiimbeli, otu shi kutya okwa li e na yaali. Ihe nonando ongawo, otashi vulika a li e na ye vulithe mpoka. Mbela aamwayinakadhona mbaka oya li ya ningi aalanduli ye?— Ombiimbeli inayi shi popya, onkee ano, katu shi shi. Ihe mbela owu shi kutya omolwashike Jesus a li a pula epulo kutya “meme naamwameme oolye?”— Natu ka tale kutya omolwashike.
Jesus okwa li ta longo aalongwa ye sho omuntu gumwe e mu piyaganeke ta ti: “Tala, nyoko naamwanyoko oya thikama pondje, taye ku kongo, ya hala, ya popye nangoye.” Onkee ano, Jesus okwa li a longitha ompito ndjika opo a longe aantu oshiilongomwa sha simana mokupula epulo ndika ehokithi a ti: “Meme naamwameme oolye?” Okwa ganeke oshikaha she kaalongwa ye e ta ti: “Tala, meme naamwameme oyo mbaka!”
Opo nduno Jesus okwe ya yelithile kutya okwa hala okutya shike, a ti: “Kehe tuu ngoka ta gwanitha ehalo lyaTate yomegulu, oye omumwameme omulumentu nomumwameme omukiintu nameme.” (Mateus 12:47-50) Shika otashi ulike kutya Jesus okwa li e na ekwatathano ewanawa naalongwa ye. Okwa li te tu longo kutya aalongwa ye kuye oya li ya fa lela aamwayinamati, aamwayinakadhona noya fa wo ooyina.
Pethimbo mpoka aamwayinamati yaJesus Jakob, Josef, Simon naJudas kaya li yi itaala kutya Jesus Omwana gwaKalunga. Kaya li yi itaala shoka omuyengeli Gabriel a li a lombwele yina. (Lukas 1:30-33) Onkee ano, otashi vulika ya li ye tonde Jesus. Kehe omuntu ngoka hu ungaunga namukwawo ngaaka ke shi shili omumwayina. Mbela owu shi omuntu ngoka e tonde omumwayina?—
Ombiimbeli otayi tu lombwele kombinga yaEsau naJakob nonkene Esau a li a geya noonkondo e ta popi ta ti: “Otii ka dhipaga omumwameme Jakob.” Yina yaEsau naJakob, Rebeka okwa li a tila noonkondo nokwa lombwele Jakob a ye ontuku opo Esau kee mu dhipage. (Genesis 27:41-46) Ihe konima yoomvula Esau okwa lundulula iikala ye, nokwa li nokuli a papatele Jakob noku mu thipa komilungu.—Genesis 33:4.
Konima yethimbo, Jakob okwa ka kala e na oyanamati 12. Ihe oyanamati aakuluntu yaJakob kaya li ye hole omumwayinamati omushona Josef. Oya li ye mu sila ondumbo molwaashoka okwa li e holike kuhe. Onkee ano, oye mu landitha po a ka ninge omupika kaantu mboka ya li haya landitha aapika mboka ya li taya yi kuEgipiti. Opo nduno oya li ya lombwele he kutya Josef okwa dhipagwa koshilikama. (Genesis 37:23-36) Mbela shoka kasha li ngaa oshinyanyalithi?—
Konima yethimbo, aamwahe yaJosef oya li yu uvitile nayi shoka ya ningi. Onkee ano, Josef okwe ya dhimine po. Mbela owu wete nkene Josef ta vulu okuyelekwa naJesus?— Aayapostoli yaJesus oya li ya fadhuka po sho Jesus a li muudhigu, na Petrus okwa li nokuli e mu idhimbike. Ngaashi naanaa Josef, Jesus naye okwe ya dhimine po ayehe.
Opwa li pu na aamati aamwayinathana Kain naAbel. Otatu vulu wo okwiilonga sha kuyo. Kalunga okwa li a mono momutima gwaKain kutya ka li e hole shili mumwayina. Onkee ano, Kalunga okwa lombwele Kain kutya na lundulule iikala ye. Ando Kain okwa li e hole Kalunga shili ando okwa pulakene kuye. Ihe ka li e mu hole. Esiku limwe Kain okwa lombwele Abel a ti: “Tu ye kelundu.” Abel okwa yi pamwe naKain. Manga ya li melundu moka oyo ayeke, okwa dhenge mumwayina noonkondo nokwe mu dhipaga.—Genesis 4:2-8.
Ombiimbeli otayi tu lombwele kutya opu na oshiilongomwa shi ikalekelwa shoka tu na okwiilonga sha musho. Mbela owu shi kutya oshike?— ‘Elaka ndyoka we li uvu okuza ketameko: Otse otu na okuholathana. Inatu kaleni twa fa Kain, ngoka a li ta longithwa komuhindadhi nokwa dhipaga po omumwayina.’ Onkee ano, aamwatate naamwameme oye na okukala ye holathane. Kaye na okukala ya fa Kain.—1Johannes 3:11,12.
Omolwashike oshiwinayi okukala twa fa Kain?— Omolwaashoka Ombiimbeli oya ti kutya ‘ota longithwa komuhindadhi,’ Satana Ondiaboli. Molwaashoka Kain okwa li a katuka ngaashi Ondiaboli, osha li owala sha fa Ondiaboli oyohe.
Mbela owu wete kutya omolwashike sha simana okukala wu hole aamwanyoko?— Ngele ku ya hole, mbela aanona yalye to ka kala to holele?— Aanona yOndiaboli. Ito ka kala wa hala okukala ngaaka, hasho mbela?— Ano ongiini to vulu okuulika kutya owa hala okukala okanona kaKalunga?— Omokukala wu hole aamwanyoko aamati naakadhona.
Ihe mbela ohole oshike?— Ohole oyo omaiyuvo gomuule ngoka hage tu ningitha tu kale twa hala okuningila yalwe iinima iiwanawa. Ohatu ulike kutya otu hole yalwe ngele hatu ungaunga nayo nawa nosho wo ngele hatu ya ningile iinima iiwanawa. Oolye aamwameme aamati naakadhona mboka tu na okukala tu hole?— Dhimbulukwa kutya Jesus okwa li a longo kutya oomboka ye li megongalo lyopaKriste.
Osha simana noonkondo tu kale tu hole aamwameme naamwatate yopaKriste.— Ombiimbeli oya ti: “Ngoka kee hole omumwayina, e mu wete, oye ita wapa okuhola Kalunga, kee mu wete.” (1Johannes 4:20, OB-1954) Onkee ano, itatu vulu okukala tu hole owala yamwe megongalo lyopaKriste. Otu na okukala tu hole aamwatate naamwameme ayehe. Jesus okwa ti: “Ngele omu holathane, nena aantu ayehe otaa ka dhimbulula kutya one aalongwa yandje.” (Johannes 13:35) Mbela owu hole ngaa aamwatate naamwameme ayehe?— Dhimbulukwa kutya ngele ku ya hole ito vulu wu kale wu hole Kalunga shili.
Ongiini tatu vulu okuulika kutya otu hole shili aamwatate naamwameme?— Ngele otu ya hole, itatu ka kala kokule nayo molwaashoka inaatu hala okupopya nayo. Otatu ka kala tu na ombili nayo ayehe. Otatu ka kala aluhe hatu ya longele uuwanawa notu na ehalo okupopya nayo. Uuna ye li muupyakadhi, otatu ke ya kwathela molwaashoka otu li shili uukwanegumbo uunene.
Ngele otu hole shili aamwatate naamwameme ayehe, otashi ulike shike?— Otashi ulike kutya otu li aalongwa yaJesus, Omulongi Omunene. Mbela hasho twa hala okukala ngaaka?—
Okuulukila aamwatate naamwameme ohole okwa kundathanwa wo mAagalati 6:10 nosho wo 1 Johannes 4:8, 21. Yanuna Ombiimbeli yoye e to lesha omanyolo ngaka.
[Ethano pepandja 223]
Oolye Jesus a yelitha kutya oyo aamwayinamati naamwayinakadhona?
[Ethano pepandja 224]
Oshiilongomwa shini tu na okwiilonga kwaashoka Kain a li a ningile Abel?
[Ethano pepandja 226]
Ongiini to vulu okuulika kutya owu hole omumwanyoko?