Kokugongala kwetu kwopaKriste oto ka mona ko shike noto ka uva ko shike?

Aantu oyendji oye etha po okuya koongeleka molwaashoka ihaya mono ko ewiliko lyopambepo nenge ehekeleko. Omolwashike nduno wu na okuya kokugongala kwopaKriste hoka ku unganekwa kOonzapo dhaJehova? Oto ka adha ko shike?

Oto ka mona enyanyu okukala naantu ye na ohole noye na ko nasha nayalwe. Oomvula 1 900 lwaampono dha pita, Aakriste oya li yu unganekwa momagongalo noya li haya gongala pamwe opo ya longele Kalunga, ya konakone Ombiimbeli noya tsaathane omukumo. (Aahebeli 10:24, 25) Molwaashoka uuna ya gongala pamwe oya li haya kala mokati kaantu ye na ohole, oya li haya kala yu uvite kutya oye li nookuume kashili ano tu tye ye li naamwayina yopambepo. (2 Aatessalonika 1:3; 3 Johannes 14) Ohatu landula oshiholelwa shawo naashika ohashi tu ningitha tu kale tu na enyanyu ngaashi ndyoka ya li haya kala ye na.

Uuwanawa mboka hawu zi mokwiilonga okutula miilonga omakotampango gOmbiimbeli. Ngaashi sha li hashi ningwa pethimbo lyOmbiimbeli, nokunena aalumentu, aakiintu nosho wo aanona ohaya gongala pamwe. Aalongi mboka ya pyokoka ohaya longitha Ombiimbeli ye tu kwathele tu mone nkene tatu vulu okutula miilonga omakotampango gayo monkalamwenyo yetu. (Deuteronomium 31:12; Nehemia 8:8) Ayehe mboka ye li pokugongala otaya vulu okukutha ombinga moonkundathana nomokwiimba, shoka tashi tu pe ompito yokuhempulula etegameno lyetu lyopaKriste.—Aahebeli 10:23.

Okugongala ohaku nkondopaleke eitaalo lyetu. Omuyapostoli Paulus okwa li a lombwele egongalo limwe lyopethimbo lye a ti: ‘Onda hala noonkondo oku mú talela po, tu vule okutsaathana omukumo kombinga yeitaalo lyetweni atuheni.’ (Aaroma 1:11, 12) Molwaashoka pokugongala ohatu endathana nooitaali ooyakwetu, ohashi nkondopaleke eitaalo lyetu nohashi tu kwathele tu kale twa tokola toko tu kale nokukalamwenyo kwopaKriste.

Otatu ku hiya wu ye wu gongale pamwe natse pokugongala kwegongalo taku landula, wu imonene ko ngoye mwene. Oto ka yakulwa nawa. Ito ka pulwa wu fute sha pokugongala kehe, sha hala okutya ihapu umbwa ongalo.

• Okugongala kwetu kwegongalo ohaku ningwa pamulandu guni?

• Uuwanawa wuni tatu ka mona ngele otwa kala hatu yi kokugongala kwopaKriste?