Okugongala otaku kwathele aagundjuka
1 Okakadhona koomvula omulongo nasha oka ti: “Omathimbo gamwe ohandi dhiladhila kutya aagundjuka otu li methimbo edhigu noonkondo monkalamwenyo. Otu li mokati kaantu mboka taya hondele, taya longitha iingangamithi notaya nu iikolitha sha pitilila.” Osho mbela nangoye to dhiladhila? Ngele osho, oshike mbela to dhiladhila osho tashi ke ku kwathela u kondjithe omanwethomo ngaka omawinayi? Owa pumbwa eitaalo, eitaalo lya kola kutya oondjila dhaJehova odhuuyuuki, oshoka nokaali po “itashi wapa oku mu nyanyudha.” (Heb. 11:6, NW) Okukala pokugongala kwegongalo otaku ke ku kwathela u koleke eitaalo lyoye lyopaKriste nosho wo etokolotoko lyoye okuyanda shoka oshiwinayi.
2 Okugongala otaku ku pe oshindji: Oshike mbela hashi ningi okulya pamwe nookuume koye kopothingo iikulya iiwanawa ku kale kunyanyudha? Kashi shi mbela iikulya iiwanawa pamwe nookuume aawanawa mombepo ya gundjila? Dhoshili, pokugongala kwetu ohatu vulu okunyanyukilwa sha oshiwanawa sha fa shoka, ihe omondunge yopambepo.
3 Iinima mbyoka hayi kundathanwa pokugongala otayi tungu, oya kwatela mo iinima mbyoka yi na ko nasha nomaupyakadhi gesiku kehe gonkalamwenyo nosho wo okukonakona omahunganeko gOmbimbeli omakumithi. Ohapu gandjwa elongo li na oshilonga ndyoka tali ku longo nkene u na okukala nonkalamwenyo ombwanawa kwaahe na we nonkene u na okutaalela omashongo ngoka tage ku tsakaneke. Ookuume mboka to mono pokugongala oye li dhingi shaampono, nongandjombepo yuupambepo oyihokitha noya gamenwa. (Eps. 133:1) Itashi kumitha ano sho omugundjuka gumwe a ti: “Ohandi yi kosikola esiku kehe, nohashi vulitha ndje. Ihe okugongala okwa fa othithiya yi li mombuga, moka handi talalekwa opo ndi vule okuya kosikola esiku tali landula.” Gulwe okwa ti: “Onda mono kutya okukala nekwatathano lyopothingo nayalwe mboka ye hole Jehova ohaku kwatha ndje ndi kale popepi naye.”
4 Okukala wi inyolitha mOsikola yUukalele woPauteokratika, oto ilongo okugongela uuyelele wopaMbimbeli, to u ningi oshipopiwa nopo nduno oto shi gandja momukalo gwoonkundathana mOshinyanga shUukwaniilwa komeho yaapulakeni. Itashi kwatha tuu okukala wa dheulwa okulonga nuukeka ooshili tadhi hupitha omwenyo dhomOohapu dhaKalunga! Openi mbela ishewe aagundjuka taya vulu okwiimonena elongo lya tya ngaaka li na ongushu?
5 Nkene to vulu okumona mo oshindji mokugongala: Opo u mone uuwanawa oundji mokugongala, opu na iinima itatu ya simana noonkondo ya kwatelwa mo. Mbika oyo oku ku ilongekidhila, okukutha ombinga muko nosho wo okutula miilonga shoka wi ilonga muko.
6 Ku ku ilongekidhila: Tula po ethimbolandulathano lyokwiilongekidhila okugongala pwaahe na okufaula. Ino pitika iilonga yosikola, iilonga yetata lyesiku, nenge omaipyakidhilo gomainyanyudho yi ku yuge ethimbo ndyoka wa pumbwa okukonakona manga kuyele shoka tashi ka kundathanwa pokugongala kehe. Otashi ku kwatha u kale u na elandulathano ewanawa. Tangotango, endela pamwe nelandulathano lyokulesha Ombimbeli lyokoshiwike lyOsikola yUukalele woPauteokratika. Otashi pula owala ominute dhontumba esiku kehe okulesha nokutedhatedha kombinga yoontopolwa ndhoka dha gandjwa. Itulila po ethimbo lyokwiilongekidhila Ekonakono lyEmbo lyomEgongalo nosho wo Ekonakono lyOshungonangelo. Yamwe shika ohaye shi ningi nokuli manga okugongala hoka ku na ko esiku limwe nenge gaali. Ngaashi tashi wapa, ninga sha faathana shi na ko nasha niitopolwa mbyoka ya longekidhilwa Okugongala kwoPailonga oshiwike kehe.
7 Kutha ombinga muko: Ombimbeli otayi ti kutya sho Jesus a li e na oomvula 12, okwa li a adhika potempeli, ta pulakene, ta pula omapulo nota gandja omayamukulo. (Luk. 2:46, 47) Noohapu dhimwe, okwa li e na mo ombinga yu udha. Oto ka kwathelwa unene kokugongala ngele to ningi oonkambadhala dhokukutha ombinga muko. — Omayel. 15:23.
8 Owa pumbwa okwiitula mo lelalela mwaashoka to longwa pokugongala. Omathimbo gamwe, okupulakena koshipopiwa okudhigu ku vule oku shi gandja. Omolwashike? Omadhiladhilo goye otashi vulika haga yaayaa ngele gumwe oye ta popi. Ongiini mbela shika to vulu oku shi kondjitha? Omokunyola omaidhimbulukitho. Nyola iitsa ya simana mbyoka wa hala okulongitha konahiya. Okunyola omaidhimbulukitho otaku ke ku kwathela u kaleke omadhiladhilo goye taga gandja eitulomo koprograma. Niishewe, konga omanyolo, nokulandula sho taga leshwa komupopi.
9 Kakele kaashono, shi ninga elalakano okukala nombinga moonkundathana kehe dhepulo neyamukulo pokugongala. Oto ka kwathelwa nokuli unene ngele to gandja omadhiladhilo ga dhindwa nawa gaashoka wa hala okupopya. Omayeletumbulo 15: 28 otaga ti: “Omwenyo gwomuyuuki tagu ipulapulile eyamukulo.”
10 Tula miilonga shoka to ilongo: Onkatu yahugunina oyo okushilipaleka kutya shoka to ilongo ‘otashi longo mungoye.’ (1 Tes. 2:13) Uuna to longitha iitsa iiwanawa mbyoka to ilongo pokugongala, oto ka hedha popepi naJehova Kalunga. Ota ka kala gwoshili kungoye, noto ka mona enyanyu enene nosho wo embilipalelo uuna to “ende moshili” e to yi ningi yoye mwene. — 3 Joh. 4.
11 Aamwatate naamwameme aagundjuka, ngele tamu ilongekidhile okugongala pwaahe na okufaula, tamu kutha ombinga muko e tamu tula miilonga shoka tamu ilongo, otamu ka nyanyukilwa thiluthilu okugongala. Ethimbo olyo tuu ndyoka, otamu ka mona uuwanawa auhe mboka tamu vulu okumona muko. Eitaalo lyeni otali ka kolekwa, osho wo etokolo lyeni okukala aadhiginini kuHo yeni gwomegulu, Jehova. — Eps. 145:18.