OSHITOPOLWA OSHI-2

Aaihokani kaleni mwi inekelathana

Markus 10:9 otayi ti: “Shono Kalunga e shi tula kumwe, inashi kuthwa kumwe komuntu.”

Jehova okwa hala tu kale ‘aainekelwa’ nosho wo aadhiginini. (Episalomi 15:2) Shika osha simana unene tuu mondjokana, molwaashoka ngele katu shi aadhiginini itatu ka kala twi inekelathana. Osha pumbiwa shili tu kale twi inekelathana, opo ohole yetu mondjokana yi koke nawa.

Oondjokana kunena odhi li monkugo yi na onkambe, molwaashoka aaihokani oyendji kaye shi aainekelwa kookuume kawo. Opo wu kaleke po ondjokana yoye, owu na okukala wa tokola toko okuninga iinima iyali tayi landula.

OSHINIMA SHO-1 KALA WA LENGA ONDJOKANA YENI

OMBIIMBELI OTAYI TI: ‘Kaleni mu nowino yokuyoolola iinima mbyoka yi na oshilonga.’ (Aafilippi 1:10) Ondjokana oyi li shimwe shomiinima mbyoka yi na oshilonga nosha simanenena monkalamwenyo. Onkee ano, otu na okukala twe yi lenga.

Jehova okwa hala wu kale wu hole kuume koye kopandjokana, opo mu ‘nyanyukilwe onkalamwenyo’ pamwe. (Omuuvithi 9:9) Okwe shi popya sha yela kutya ku na okuungaunga nomusamane gwoye nenge nomukulukadhi gwoye nuuhasha. Kaleni hamu kongo oompito mu nyanyukilwe pamwe. (1 Aakorinto 10:24) Shampa wu li nakuume koye kopandjokana na kale u uvite kutya okwa pumbiwa noku niwe naye lela.

Omusamane te etele omukulukadhi gwe otee; omusamane te ya megumbo a adha omukulukadhi gwe ta teleke

SHOKA WU NA OKUNINGA:

Kala pamwe ethimbo olindji nomuholike gwoye, nokugandja eitulomo lyi ikalekelwa kuye
Pehala lyokutya “ngame,” kala aluhe ho ti “tse”

Omusamane nomukulukadhi gwe ye li pamwe ya nyanyukwa

OSHINIMA OSHI-2 TONATELA OMUTIMA GWOYE

OMBIIMBELI OTAYI TI: “Okehe tuu ngoka ta tala omukiintu e mu haluka, oye okwe mu hondele momwenyo gwe.” (Mateus 5:28) Ngele omuntu oha kala ta dhiladhila iinima ya nika iipala, nena ke shi omudhiginini kukuume ke kopandjokana.

Jehova okwa ti kutya kehe gumwe na ‘tonatele omutima gwe.’ (Omayeletumbulo 4:23; Jeremia 17:9) Opo wu shi ninge, owa pumbwa okutonatela omeho goye, sha hala okutya, wu kale ho ga galula kaaga tale iinima iiwinayi. (Mateus 5:29, 30) Landula oshiholelwa shatatekululwa Job, ngoka a li a tokola toko momutima gwe, opo kaaha tale omukiintu e mu haluka. (Job 31:1) Kala wa tokola wa mana kutya ito ka tala nando omathano giipala. Iyageka okukala wu na ekwatathano lyopahole nomuntu ngoka kee shi omusamane gwoye nenge omukulukadhi gwoye.

Omusamane e na ethano lyomukulukadhi gwe poshitaafula she kiilonga

SHOKA WU NA OKUNINGA:

Kehe gumwe ni imonene ko ye mwene kutya ngoye omudhiginini thiluthilu kukuume koye kopandjokana
Kala wu na ko nasha nomaiyuvo gakuume koye, nokuhulitha po nziya ekwatathano kehe ndyoka hali ningitha kuume koye a kale inaa manguluka