Shoka tashi eta enyanyu muukwanegumbo

Kala wa simaneka kuume koye kopandjokana

Willa okwa ti: “Uuna Rachel a geya, oha lili uule wethimbo. Ngele otwa kuutumba opo tu kundathane kombinga yaashoka she mu geyitha, oha kala e na olungwenye nenge a kale inaa hala okupopya nangame nokuli. Kapu na nando oshimwe tashi monika sha fa tashi pondola. Ohandi kala ndu uvite nda fa nda teka omukumo.”

Rachel okwa ti: “Ngele Will e ya kegumbo oha adha ndje tandi lili. Onda li handi kambadhala oku mu yelithila kutya omwolwashike nda li nda geya, ihe oha tete ndje melaka. Okwa lombwela ndje kutya oshinima shoka nda li tandi popi inashi kwata miiti nondi na owala oku shi dhimbwa. Naashoka osha li hashi geyitha ndje noonkondo.”

MBELA nangoye omathimbo gamwe oho kala wu uvite ngaashi Will nenge Rachel? Ayehe ohaya kala ya hala okupopya, ihe olundji ohaya kala owala ya geya. Omolwashike mbela?

Aalumentu naakiintu ohaya kundathana momukalo gwa yoolokathana noye na oompumbwe dha yoolokathana. Omukiintu otashi vulika ha kala a hala okupopya kombinga yomaiyuvo ge a manguluka note shi ningi olundji. Ihe mepingathano naashoka, aalumentu oyendji ohaya kambadhala okukaleka po ombili mokukandula po uupyakadhi mbalambala nokuyanda uupyakadhi owundji. Ihe ongiini tamu vulu okusinda omayooloko ga tya ngaaka nokukala hamu kundathana nomusamane nenge nomukulukadhi gwoye? Omokukala mwa simanekathana mondjokana yeni.

Omuntu ngoka a simaneka yalwe oha kala e ya lenga noha kambadhala okuuva ko omaiyuvo gawo. Otashi vulika wi ilonga okuza kuunona okusimaneka aantu mboka ye na oonkondopangelo nenge ontseyo yi vule yoye. Ihe oshi li eshongo okukala wa simaneka kuume koye kopandjokana molwaashoka owu wete kutya omu na konyala ondondo yi thike pamwe. Linda ngoka a kala mondjokana uule womimvo hetatu okwa ti: “Ondi shi kutya Phil oha pulakene neidhidhimiko nonondjaalela kaantu yamwe mboka haya popi naye. Onda li owala handi kala nda hala a kale e etela ndje ohenda.” Otashi vulika ho pulakene neidhidhimiko kookuume koye nosho wo nokuli nokaantu mboka kuu shi nale nohopopi nayo nesimaneko. Ihe mbela owu na ko ngaa nasha nakuume koye kopandjokana?

Okwaahenesimaneko ohaku ningitha iilyo yuukwanegumbo yi kale inaayi nyanyukwa nokweetitha oontamanana dha kwata miiti. Omupangeli gumwe omunandunge okwa ti: “Oshithima shomukaga pamwe nombili oshi vule egumbo lyu udha onyama yoontselela pamwe noontamanana.” (Omayeletumbulo 17:1) Ombiimbeli otayi lombwele aasamane ya kale ya simaneka aakulukadhi yawo. (1 Petrus 3:7) ‘Omukiintu’ wo “oku na okusimaneka omulumentu gwe.”—Aaefeso 5:33.

Mbela ongiini tamu vulu okukala hamu kundathana momukalo gwesimaneko? Natu ka taleni komayele gamwe taga longo ngoka ge li mOmbiimbeli.

Uuna kuume koye kopandjokana a hala mu kundathane

Eshongo ndyoka li li po: Aantu oyendji oye hole okupopya unene pehala lyokupulakena. Mbela nangoye osho wu li ngawo? Ombiimbeli oya ti kutya omugoya oye omuntu ngoka “ta yamukula manga inaa uva.” (Omayeletumbulo 18:13) Onkee ano, kala ho pulakena omanga inoo popya. Omolwashike mbela? Kara ngoka a kala mondjokana uule womimvo 26 okwa ti: “Kandi hole ngele omusamane gwandje ta kambadhala okukandula po uupyakadhi wandje meendelelo. Ina pumbwa nokuli a zimine nenge a popye kutya omolwashike uupyakadhi mboka wa holoka po. Onda hala owala a pulakene kungame noku uva ko omaiyuvo gandje.”

Mepingathano naashoka, aalumentu naakiintu yamwe ohaya popi nziya omadhiladhilo gawo nohaya kala yu uvite inaaya manguluka uuna ookuume kawo kopandjokana taye ya thiminike ya popye omaiyuvo gawo. Lorrie ngoka opo owala a hokanwa, okwa li a ndhindhilika kutya omusamane gwe iha popi nziya omaiyuvo ge. Okwa ti: “Onda li ndi na okwiidhidhimika nokutegelela a tameke okupopya kombinga yomaiyuvo ge.”

Ekandulopo lyuupyakadhi: Ngele ngoye nakuume koye kopandjokana omwa pumbwa okukundathana kombinga yoshinima shontumba shoka tashi vulu okweetitha okwaahauvathana, kundathaneni kombinga yoshinima shoka uuna amuhe mwangungumana nomwa thuwa. Ongiini ngele kuume koye kopandjokana oha kakadhala okutameka oonkundathana? Ndhindhilika kutya “omadhiladhilo momwenyo gwomulumentu ogo omeya omaleeleka, ihe omunandunge ote ga teke mo.” (Omayeletumbulo 20:5) Ngele to teke omeya momuthima neyemele we endelela unene, omeya otaga tika mo ogendji. Sha faathana, ngele owa thiminike kuume koye kopandjokana a popye, otashi vulika i igamene, ihe ito ka mona we ompito yokuuva shoka shi li momutima gwe. Pehala lyaashono, pula kuume koye kopandjokana omapulo nombili nonesimaneko nokwiidhidhimika ngele ita popi omaiyuvo ge mbala ngaashi wa tegelela.

Ngele kuume koye kopandjokana ta popi, ‘kala ho pulakene mbala, ho ikwata mokupopya ngoye iho geye mbala.’ (Jakob 1:19) Omupulakeni omwaanawa iha pulakene owala kwaashoka tashi popiwa ihe oha kambadhala okuuva ko omaiyuvo gomuntu. Uuna kuume koye kopandjokana ta popi, kambadhala okuuva ko omaiyuvo ge. Ota ka mona kutya owe mu simaneka nenge ino mu simaneka momukalo moka ngoye ho pulakene kuye.

Jesus okwe tu longa nkene tu na okupulakena. Pashiholelwa sho omulumentu gumwe ngoka a li te ehama e mu pula opo e mu kwathele, Jesus kali owala a kandula po uupyakadhi we pethimbo mpoka. Tango okwa li a pulakene keindilo lyomulumentu ngoka. Opo nduno okwa li a gumwa komutima kwaashoka a li u uvu nolwahugunina okwa a aludha omulumentu ngoka. (Markus 1:40-42) Ngele kuume koye kopandjokana ta popi, landula oshiholelwa shaJesus. Dhimbulukwa kutya otashi vulika owala a hala okuulukilwa olukeno, ihe ina hala okukandula po uupyakadhi meendelelo. Onkee ano, pulakena neitulomo. Kambadhala oku mu uvila ohenda. Opo nduno konima yaashoka, oto vulu oku mu kwathela. Mokuninga ngawo, oto ku ulika kutya owe mu simaneka.

KAMBADHALA OKUNINGA SHIKA: Ngele kuume koye kopandjokana a hala okupopya nangoye, yanda egamo lyokuyamukula mbalambala. Tegelela sigo a mana okupopya nowu uva ko nawa kutya okwa hala okupopya shike. Opo nduno mu pula to ti: “Mbela sho to tala onda li ngaa tandi pulakene shili kungoye?”

Uuna wa hala mu kundathane

Eshongo ndyoka li li po: Linda ngoka a popiwa metetekelo okwa ti: “Oopolohalama dhiiyolitha ndhoka hadhi kala ko-TV ohadhi ningitha iinima ngaashi okupopya nayi kombinga yakuume koye kopandjokana, okutukana nokusheka yi kale ya fa iiwanawa.” Yamwe oya putukila momagumbo moka haya popi nopwaahenesimaneko. Konima yethimbo ngele ye li mondjokana, ohaya mono oshidhigu okuyanda omikalo dha tya ngaaka momaukwanegumbo gawo. Ivy gwokoKanada okwa ti: “Onda putukila momudhingoloko moka okusheka, okuyayagana nosho wo okuluka yamwe iilukadhina kwa talika ko ku li oshinima shu uka.”

Ekandulopo lyuupyakadhi: Ngele to lombwele yamwe kombinga yakuume koye kopandjokana, ‘popya owala oohapu ndhoka oombwanawa tadhi tungu nodha pumbiwa, opo aapulakeni ye dhi hokwe.’ (Aaefeso 4:29) Popya kombinga ye momukalo moka tagu ningitha yalwe ya kale ye mu simaneka.

Ngele omu li one amuke nakuume koye kopandjokana, yanda egamo lyoku mu sheka nosho wo oku mu ithana iilukadhina. MuIsraeli shonale, Mikal okwa li a geyela omusamane gwe, omukwaniilwa David. Okwa li e mu sheke sho a popi kutya ohi ihumbata a fa “egoya.” Oohapu dhe odha li dhu uvitha nayi David, nodha li wo inaadhi hokiwa kuKalunga. (2 Samuel 6:20-23) Oshike tatu ilongo moshinima shoka? Ngele to popi nakuume koye kopandjokana, hogolola nawa oohapu dhoye nuukeka. (Aakolossa 4:6) Phil ngoka a kala mondjokana uule womimvo hetatu, okwa zimine kutya pokati ke nomukulukadhi gwe ohapu holoka natango okwaahauvathana. Okwa li wo e shi ndhindhilike kutya shoka ha popi omathimbo gamwe ohashi nayipaleke onkalo. Okwa ti: “Onde shi ndhindhilika kutya okukambadhala okuulika kutya ongoye wu li mondjila uuna pu na okwaahauvathana ohashi yono po owala ombili. Onda mona kutya ohashi kwatha noonkondo noshi na uuwanawa okukoleka ekwatathano lyetu.”

Omuselekadhi gumwe omunamimvo gwopethimbo lyonale okwa li a ladhipike iitenya ye ‘yi mone ehala lyevululuko kehe gumwe megumbo lyomulumentu gwe.’ (Rut 1:9, KB) Ngele omusamane nomukulukadhi gwe ohaya simanekathana, ohashi ningitha egumbo lyawo li kale “ehala lyevululuko.”

KAMBADHALA OKUNINGA SHIKA: Tulii po ethimbo nakuume koye kopandjokana opo mu kundathane omaetopo ngaka ge li kohi yoshipalanyolo shika. Pula kuume koye to ti: “Ngele tandi popi kombinga yoye montaneho ya yamwe, mbela oho kala wu wete wa dhinika? Omalunduluko geni tandi vulu okuninga opo ndi hwepopale?” Kehe gumwe na pulakene shili kumukwawo sho tamu lombwelathana omaiyuvo geni. Kambadhala okutula miilonga omaetopo ngoka wu uvu.

Zimina kutya omu na omataloko nuukwatya wa yoolokathana nakuume koye kopandjokana

Eshongo ndyoka li li po: Aaihokani yamwe mboka opo ya hokana oya thika pehulithodhiladhilo lya puka kutya sho Ombiimbeli ya ti kutya “omuntu gumwe,” oya hala okutya aaihokani oye na okukala ye na omataloko nenge uukwatya wa faathana. (Mateus 19:5) Ihe ohaya mono mbalambala kutya okudhiladhila kwa tya ngaaka kaku li paushili. Konima owala ngele ya hokana, ohaya kala olundji ye na oontamanana omolwomataloko nenge omaukwatya gawo ga yoolokathana. Linda okwa ti: “Eyooloko limwe ndyoka enene li li pokati ketu olyo ndyoka kutya Phil iha kala ti ipula unene ngaashi ngame. Omathimbo gamwe uuna tandi ipula nasha iha kala e na ko nasha, onkee ano, ihandi geye molwaashoka oha kala a fa kee na ko nasha ngaashi ngame.”

Ekandulopo lyuupyakadhi: Zimineni kutya omu na omataloko nuukwatya wa yooloka nokukala mwa simaneka omayooloko ngoka. Oku shi thaneka: Omeho goye ohaga dhana onkandangala ya yooloka ko kwaandjoka hayi dhanwa komakutsi; ihe nando ongawo, ohaga longele kumwe, opo wu vule okutaaguluka opate nopwaa na okumona oshiponga. Andrienne, ngoka a kala mondjokana konyala uule womimvo omilongo ndatu, okwa ti: “Ngame nomusamane gwandje ohatu taamba ko omataloko getu ga yoolokathana, shampa owala itaaga yono Oohapu dhaKalunga. Kakele kaashono, nonando otu li aaihokani, otu na omataloko ga yoolokathana.”

Ngele kuume koye kopandjokana oku na edhiladhilo nenge einyengotompelo lya yooloka ko kulyoye, ino gandja owala eitulomo kuuwanawa woye mwene. Kala wo wu na ko nasha nomaiyuvo gakuume koye. (Aafilippi 2:4) Kyle omusamane gwaAdrienne, okwa ti: “Omathimbo gamwe ihandi kala ndi uvite ko nawa omataloko gomukulukadhi gwandje nenge ndi tse kumwe nago. Ihe ohandi idhimbulukitha kutya ondi mu hole unene shi vulithe omataloko gandje. Uuna a nyanyukwa, nangame ohandi kala wo nda nyanyukwa shili.”

KAMBADHALA OKUNINGA SHIKA: Nyola omusholondondo gwiinima moka omataloko gakuume koye kopandjokana nenge omikalo dhe dhokuungaunga niinima dhi vule dhoye.—Aafilippi 2:3.

Esimaneko ohali kwathele aaihokani ya kale ya nyanyukwa shili nondjokana yawo ohayi kalelele. Linda okwa ti: “Esimaneko ohali ningitha aaihokani ya kale ya gwanenwa noyu uvite ya gamenwa. Osha simanenena okukokeka uukwatya mboka.”

[Enyolo lyopevi]

IPULA TO TI . . .

▪ Ongiini omataloko nuukwatya wakuume kandje kopandjokana mboka wa yooloka ko kuwandje we etela uukwanegumbo wetu uuwanawa?

▪ Omolwashike shi li nawa okutaamba ko omahogololo gakuume kandje kopandjokana ngele itaga yono omakotampango gOmbiimbeli?