Jehova okwa hogolola Josua

Konima sho Moses a wilike oshigwana shaIsraeli omimvo odhindji, okwa li e li pokusa. Jehova okwe mu lombwele a ti: ‘Hangoye to ka fala Aaisraeli mEvi lyEuvaneko. Ihe otandi ke li ku ulukila.’ Opo nduno Moses okwa pula Jehova a hogolole omuwiliki omupe ngoka ta ka tonatela oshigwana. Jehova okwa lombwele Moses a ti: ‘Inda kuJosua e to mu lombwele kutya oye ta ka fala oshigwana shaIsraeli mEvi lyEuvaneko.’

Moses okwa lombwele Aaisraeli kutya oku li pokusa nokwa ti kutya Jehova okwa hogolola Josua oye e ya fale mEvi lyEuvaneko. Moses okwa lombwele Josua a ti: ‘Ino tila. Jehova ote ke ku kwathela.’ Mbala konima yaashoka, Moses okwa londo kondungu yondundu Nebo, hoka Jehova e mu ulukile evi ndyoka u uvanekela Abraham, Isak naJakob. Moses okwa li e na omimvo 120, sho a si.

Jehova okwa lombwele Josua a ti: ‘Taaguluka omulonga gwaJordan, wu ye kuKaanan. Otandi ke ku kwatha ngaashi naanaa nda kwathele Moses. Kala aluhe ho lesha Ompango yandje esiku kehe. Ino tila, ihe kala wu na omukumo. Inda e to ningi ngaashi nde ku lombwela.’

Josua okwa tumu oondaadhi mbali koshilando Jeriko. Mehokololo tali landula otatu ki ilonga oshindji kombinga yaashoka sha ningwa ko. Sho oondaadhi dha galuka, odha kundaneke kutya olyo ethimbo ewanawa okuya muKaanan. Esiku lya landula, Josua okwa lombwele oshigwana shi dhikule po ontanda. Opo nduno okwa tumu aasaaseri ya fale oshikethahangano komulonga gwaJordan. Omulonga ogwa li tagu kunguluka omeya. Ihe sho ngaa oompadhi dhawo dha lyata momeya, omulonga ogwa mwena okukunguluka, nomeya oga pwine. Aasaaseri oye ende yu uka pokati komulonga gwa kukuta noya thikama ya tegelele oshigwana ashihe shaIsraeli shi taaguluke shi ye handiyaka yomulonga. Oshikumithalonga shika kasha li tuu tashi ya dhimbulukitha shoka Jehova a ningile pEfuta Etiligane!

Lwahugunina, konima yomimvo adhihe ndhoka, Aaisraeli osho ya thiki mEvi lyEuvaneko. Oya tungu omagumbo gawo niilando. Oya longo omapya, iitsambe yomiviinu nosho wo iikunino yiiyimati. Oshilongo shoka osha li hashi kunguluka omahini nomagadhi goonyushi.