Jehova oha wanifa po alushe omaudaneko aye

‘Kape na nande ondjovo imwe yomeendjovo adishe diwa Omwene Kalunga keni e i tonga ya kala inai wanifwa. Adishe ode mu wanifilwa.’ — JOSUA 23:14.

1. Josua okwa li omulumenhu a tya ngahelipi, nokwa li a ninga shike lwopexulilo longhalamwenyo yaye?

JOSUA okwa li ondjai yomatanga ovakwaita i na ondjungu, i na ouladi nokwa li yo e na eitavelo nomudiinini. Okwa li ha endafana naMoses nokwa li a hoololwa kuJehova a wilike oshiwana shaIsrael okudja mombuwa oyo ya li i tilifa noku shi twala medu li yadi omashini nomaadi eenyiki. Josua, oo a li a fimanekwa neenghono, okwa li a yandja oshipopiwa shaxuuninwa shitunhula kovakulunhu vaIsrael lwopexulilo longhalamwenyo yaye. Osha yela kutya oshipopiwa osho osha li sha pameka eitavelo lovapwilikini vaJosua, notashi dulu yo okupameka eitavelo letu.

2, 3. Ovaisrael ova li monghalo ya tya ngahelipi eshi Josua a li a popya novakulunhu vaIsrael, na Josua okwa ti shike?

² Kala nee ngeno wa fa u wete onghalo ei tai hokololwa mOmbibeli taku ti: “[Opa] pita efimbo lile Omwene eshi a pa Israel etulumuko kovatondadi vaye aveshe keembinga adishe, ndele Josua okwa kulupa nomafiku aye a ninga mahapu, Josua okwa ifana Israel ashishe, ovakulunhu vasho nomalenga asho, ovatokoli vasho novapashukili vasho, ndee ta ti kuvo: Ame nda kulupa, omafiku ange a ninga mahapu.” — Josua 23:1, 2.

³ Josua okwa li e li pokuwanifa omido 110, nokwa li ko pefimbo litunhula neenghono mondjokonona yoshiwana shaKalunga. Okwa li a mona nghee Jehova a li a longa oilonganghono nokwa wanifa po omaudaneko mahapu oo a li a udanekela oshiwana shaye. Nomolwaasho okwa li a popya nelineekelo filufilu a ti: ‘Nye mu nokushiiva nomutima weni aushe nomwenyo weni aushe nokutya, kape na nande ondjovo imwe yomeendjovo adishe diwa Omwene Kalunga keni e i tonga ya kala inai wanifwa. Adishe ode mu wanifilwa, kape na nande imwe inai wanifwa.’ — Josua 23:14.

4. Jehova okwa li a udanekela shike Ovaisrael?

⁴ Eendjovo daJehova dilipi da li da wanifwa pefimbo lokukalamwenyo kwaJosua? Natu ka konakoneni shi na sha nomaudaneko atatu oo Jehova a li a udanekela Ovaisrael. Lotete, Jehova okwa li a udaneka kutya ota ka mangulula oshiwana shaye moupika. Etivali, Jehova okwa li a udaneka kutya ota ka amena oshiwana shaye. Etitatu, Jehova okwa li a udaneka kutya ota ka fila oshisho oshiwana shaye. Jehova okwa udanekela yo oshiwana shaye shokunena omaudaneko a tya ngaho, notwa mona nghee omaudaneko oo taa wanifwa kunena. Ndele ofimbo inatu ka konakona shi na sha naasho Jehova ha ningile oshiwana shaye shokunena, natu ka konakone tete shi na sha noilonga oyo a li a longa pefimbo laJosua.

Jehova okwa li a wanifa po eudaneko laye li na sha nokumangulula oshiwana shaye

5, 6. Jehova okwa li a mangulula ngahelipi Ovaisrael muEgipti, naasho osha li sha ulika shike?

⁵ Eshi Ovaisrael va li va pula Jehova e va kwafe eshi va li moupika muEgipti, okwa li e va uda. (Exodus 2:23-25) Jehova okwa li a lombwela Moses poshixwa sha tema omundilo a ti: “Nde uya poshi, ndi va kulile mo meke lOvaegipti, nondi va twale medu linya, medu liwa nola mbwalangadja, medu li yadi omashini nomaadi eenyiki.” (Exodus 3:8) Kasha li tuu shihafifa kOvaisrael okumona nghee Jehova ta wanifa po eudaneko olo! Eshi Farao a li a anya okulekela Ovaisrael va dje mo muEgipti, Moses okwa li e mu lombwela kutya Kalunga ota ka shitukifa omeva aNil ohonde, naasho osho sha li sha ningwa. Omeva omomulonga waNil okwa li a shitukifwa ohonde, neeshi oda li da fila mo nokape na oo a li ta dulu okunwa omeva oo. (Exodus 7:14-21) Ndele nande ongaho, Farao okwa li a kukutika omutima waye, na Jehova okwa li a etela vali Ovaegipti omahandukilo omuwoi, kwa li he va lombwele komesho yefimbo osho a li ta ka ninga. (Exodus, etukulwa eti-8-12) Konima yehandukilo etimulongo olo la li la etifa efyo loiveli yOvaegipti, Farao okwa li a lombwela Ovaisrael va dje mo muEgipti, nOvaisrael ova li va ya shili. — Exodus 12:29-32.

⁶ Okumangululwa kwOvaisrael muEgipti okwa li kwe shi ninga tashi shiiva opo Jehova e va hoolole va kale oshiwana shaye. Osho osha li sha tumbalekifa Jehova e li Omuwanifi womaudaneko. Osha li yo sha ulika kutya Jehova omunene e dule oikalunga yoiwana. Eitavelo letu otali ka pamekwa ngeenge otwa lesha shi na sha nanghee Jehova a li a mangulula Ovaisrael okudja muEgipti. Kasha li tuu shihafifa kOvaisrael! Josua okwa li a shiiva kutya Jehova oye ‘Omukombadambada medu alishe.’ — Epsalme 83:19.

Jehova okwa li a wanifa po eudaneko laye li na sha nokwaamena oshiwana shaye

7. Jehova okwa li a amena ngahelipi Ovaisrael ketangakwaita laFarao?

⁷ Ongahelipi shi na sha neudaneko etivali olo kutya Jehova ota ka amena oshiwana shaye? Eudaneko olo ola li la kwatelwa meudaneko laJehova olo a li a udanekela Ovaisrael kutya ote ke va mangulula muEgipti noku va twala mEdu lEudaneko. Dimbuluka kutya Farao oo a li a handuka neenghono okwa li a shikula Ovaisrael netangakwaita laye enaenghono, ve na omatemba oita omafele. Nopehe na omalimbililo, Farao omulinenepeki okwa li e na elineekelo kutya ote ke va alula, unene tuu eshi Ovaisrael va li tava monika va fa va fitikininwa pokati keemhunda nefuta. Ndele Kalunga okwa li a katuka eenghatu opo a amene oshiwana shaye, a tula oluudi loshilemo pokati kOvaegipti nOvaisrael. Kombinga yOvaegipti okwa li omilaulu, ofimbo kombinga yOvaisrael kwa li ouyelele. Ofimbo oshilemo osho sha li sha kelela Ovaegipti vaha hange Ovaisrael, Moses okwa yelula onhaili yaye, opo nee omeva Efuta Litilyana okwa tukauka, nOvaisrael ova li va mona omhito yokutauluka poukukutu. Opo nee Jehova okwa ningifa omeva a ye kumwe ndele ta hanauna po filufilu etangakwaita enaenghono laFarao. Kungaho, okwa li a amena oshiwana shaye shiha hanaunwe po. — Exodus 14:19-28.

8. Ovaisrael ova li va amenwa ngahelipi (a) eshi va li mombuwa (b) eshi va li mEdu lEudaneko?

⁸ Konima eshi Ovaisrael va tauluka Efuta Litilyana, ova kala tava elaela medu olo la hokololwa kutya ‘ombuwa inene noya tilika mokati komayoka e noudiyo neendye, ombuwa ihe nomeva.’ (Deuteronomion 8:15) Jehova okwa li a amena Ovaisrael eshi va li tava ende mombuwa oyo. Mbela okwa li ngoo te ke va amena mEdu lEudaneko omo va li tava ka ya? Okwa li ve na okulwifa omatangakwaita omanaenghono Ovakanaan. Ndele nande ongaho, Jehova okwa li a lombwela Josua a ti: “Fikama hano, taulula Jordan, nye novanhu aveshe, mu ye moshilongo Ame ohandi ke shi pa ovana vaIsrael. Kape nomunhu ta dulu okulipopila [koshipala] shoye momafiku aeshe omokukala kwoye. Ngaashi Ame nda kala naMoses, osho Ame ohandi ka kala naave, Ame itandi ku efa ndee itandi ku fii po.” (Josua 1:2, 5) Eendjovo odo okwa li da wanifwa shili. Momukokomoko womido hamano lwaapo, Josua okwa li a finda eehamba 31 nokwa li a kwata ko oitukulwa inene yEdu lEudaneko. (Josua 12:7-24) Ovaisrael kava li tava dulu okufindana momalwoodi oo ngeno Jehova ka li e va amena.

Jehova okwa li a wanifa po eudaneko laye li na sha nokufila oshisho oshiwana shaye

9, 10. Jehova okwa li a fila oshisho ngahelipi oshiwana shaye ofimbo sha li mombuwa?

⁹ Paife natu tale keudaneko etitatu, olo kutya Jehova okwa li ta ka fila oshisho oshiwana shaye. Diva konima eshi Ovaisrael va li va mangululwa muEgipti, Kalunga okwa li e va udanekela a ti: “Ame ohandi ke mu lokifila omungome tau di keulu. Opo ovanhu tava dulu okupita mo [nokuliongelela] eendya defiku keshe.” Ngaashi ashike Kalunga a li e va udanekela, okwa li e va pa ‘omungome wa dja keulu.’ Ombibeli otai ti: “Ovaisrael eshi ve i mona . . . ova tongafana, tava ti: Eshi oshike hano?” Osha li omanna, omungome oo Jehova a li e va udanekela. — Exodus 16:4, 13-15.

¹⁰ Jehova okwa kala ta file oshisho Ovaisrael oule womido 40 odo va kala mombuwa, a kala te va pe oikulya nosho yo omeva. Okwa li nokuli a fya oshisho opo oikutu yavo iha kulupe neemhadi davo diha dinde. (Deuteronomion 8:3, 4) Jehova okwa li a mangulula, a amena nokufila oshisho oshiwana shaye ngaashi ashike a li a udaneka. Josua okwa li a mona nghee omaudaneko aeshe oo a li a wanifwa.

Nghee Jehova a mangulula oshiwana shaye shokunena

11. Oshike sha li sha ningwa po 1914, moBrooklyn, shaNew York, nosha li efimbo lashike?

¹¹ Jehova mbela oha mangulula ngoo oshiwana shaye kunena? Metitano ongula, 2 Oktoba 1914, Charles Taze Russell, oo a li omukwatelikomesho wOvakonakonimbibeli pefimbo opo, okwa li a ya monhele yokulila yaBetel koBrooklyn, shaNew York, ndele ta popifa nehafo a ti: “Mwa lele po amushe!” Ofimbo ina kala omutumba, okwa shiivifa nehafo a ti: “Omafimbo ovapaani okwa xula po; eehamba doiwana itadi ka pangela vali.” Efimbo ola li la fika opo Jehova Omunamapangelo aeshe a katuke eenghatu opo a mangulule oshiwana shaye nosho a li a ninga.

12. Jehova okwa li a mangulula oshiwana shaye mushike mo 1919, naasho osha li sha eta oidjemo ilipi?

¹² Konima ashike yomido nhano okudja eshi Charles Taze Russell a li a ninga eshiivifo olo, Jehova okwa li a mangulula oshiwana shaye okudja ‘muBabilon shinene,’ ouhamba wounyuni unaenghono womalongelokalunga oipupulu. (Ehololo 18:2) Vahapu vomufye katwa li po opo tu mone okumangululwa ku tunhula kwa tya ngaho. Ndele nande ongaho, oidjemo otu i wete filufilu. Jehova okwa tungulula elongelokalunga la koshoka nokwa hanganifa ovo va hala oku mu longela. Jehova okwa li a xunganeka shi na sha naasho okupitila momuprofeti Jesaja a ti: “Pomaxulilo omafiku omhunda yongulu yOmwene otai ka kala ya pamenena, koxulo yeemhunda adishe, ndele otaku tondokele oiwana aishe.” — Jesaja 2:2.

13. Ekulo lilipi wa mona tali ningwa mokati koshiwana shaJehova?

¹³ Eendjovo daJesaja oda li da wanifwa shili. Mo 1919, oshixupe shovavaekwa osha li sha hovela oshikonga shokuudifa nouladi mounyuni aushe, naasho osha li sha tumbalekifa elongelokalunga lashili. Mo 1930 nasha, osha li sha yela mo nawa kutya ‘eedi dimwe’ oda li tadi ongelwa di uye melongelokalunga la koshoka. (Johannes 10:16, OB-1986) Tete, ovalongelikalunga vashili ova li ashike omayovi, opo nee tava ningi omayovi omafele, nopaife ove li omamiliyona. Ovanhu ovo ova hokololwa memoniko olo la li la pewa omuyapostoli Johannes ve li ‘ongudu inene ya nyengana okuvalwa yomoiwana aishe nomomaludi aeshe nomovanhu aveshe nomomalaka aeshe.’ (Ehololo 7:9) Ekulo lilipi wa mona tali ningwa moshiwana shaJehova? Eendombwedi daJehova oda li ngapi kombada yedu eshi wa hovela okulihonga oshili? Ovo tava longele Jehova kunena ove dule po 6 700 000. Eshi Jehova a mangulula oshiwana shaye okudja muBabilon shinene, okwe shi ninga tashi shiiva opo pa kale ekulo likumwifi ngaashi olo tu wete tali ningwa mounyuni aushe kunena.

14. Jehova ota ka mangulula vali oshiwana shaye monghedi ilipi kunena?

¹⁴ Kalunga ota ka mangulula natango oshiwana shaye, emanguluko olo tali ka kwatela mo aveshe ovo ve li kombada yedu. Jehova ota ka ulika eenghono daye monghedi ikumwifi, eshi ta ka hanauna po aveshe ovo ve li omhinge naye nota ka mangulula oshiwana shaye noku shi twala mounyuni mupe omo tamu ka kala ouyuki. Itashi ka kala tuu shihafifa okumona nghee ovakolokoshi tava ka hanaunwa po nosho yo ehovelo lefimbo likumwifi mondjokonona aishe yovanhu! — Ehololo 21:1-4.

Nghee Jehova he tu amene kunena

15. Omolwashike oshiwana shaJehova shokunena sha pumbwa eameno laye?

¹⁵ Ngaashi twa dja nokukonakona, otwa mona kutya Ovaisrael vopefimbo laJosua ova li va pumbwa eameno laJehova. Mbela oshiwana shaJehova shokunena osha pumbwa ngoo eameno laye? Heeno osha pumbwa. Jesus okwa li a londwela ovashikuli vaye a ti: “Tave mu yandje okuhepekwa, ndee tave mu dipaa, nde tamu tondelwa edina lange koiwana aishe.” (Mateus 24:9) Oule womido da pita, Eendombwedi daJehova moilongo ihapu oda kala tadi patanekwa nokuhepekwa neenghono. Ndele nande ongaho, oshi liwetikile kutya Jehova ote di yambidida. (Ovaroma 8:31) Eendjovo daYe otadi tu shilipaleke kutya ‘oshilwifo keshe tashi hambulwa shi tu lwife,’ itashi ka dula okuxulifa po oilonga yetu yokuudifa Ouhamba noyokuninga ovanhu ovahongwa. — Jesaja 54:17.

16. Oumbangi ulipi wa mona oo tau ulike kutya Jehova oha amene oshiwana shaye?

¹⁶ Eendombwedi daJehova otadi ende tadi hapupala nonande odi tondike kounyuni. Paife odi li moilongo 236, naasho otashi yandje oumbangi kutya Jehova oku li pamwe nado shili note di amene kwaavo va hala oku di hanauna po nokumweneka oilonga yado. Mbela oto dimbuluka omadina ovanapolotika ovanaenghono nosho yo ovakwatelikomesho vomalongelokalunga ovo wa mona va li tava hepeke nonyanya oshiwana shaKalunga? Mbela ove li peni kunena? Vahapu vomuvo ova fya nale, ngaashi ashike Farao wopefimbo laMoses naJosua. Ongahelipi shi na sha novapiya vaKalunga vokunena ovo va fya ovadiinini? Onakwiiwa yavo oya amenwa, molwaashi ove li medimbuluko laJehova. Osha yela kutya Jehova oha amene shili oshiwana shaye ngaashi ashike a udaneka.

Nghee Jehova ha file oshisho oshiwana shaye kunena

17. Jehova okwa li a udaneka shike shi na sha neendja dopamhepo?

¹⁷ Jehova okwa li a fila oshisho oshiwana shaye shonale eshi sha li mombuwa, noha file yo oshisho oshiwana shaye shokunena. Ohatu kwafelwa tu ehene popepi naKalunga ‘komupiya omudiinini nomunaendunge.’ (Mateus 24:45) Otwa mona eshiivo lashili lokushiiva Kalunga olo la kala oshiholekwa oule womafelemido. Omweengeli umwe okwa li a lombwela Daniel a ti: “Mwenenena eendjovo edi, ndele hakifa omushangwa noshihakifo fiyo kefimbo lexulilo. Vahapu tave ke u konakona, [neshiivo lashili otali, NW] ka hapupala.” — Daniel 12:4.

18. Omolwashike taku dulu okutiwa kutya eshiivo lashili ola hapupala kunena?

¹⁸ Otu li paife pefimbo lexulilo, neshiivo lashili ola hapupala neenghono. Omhepo iyapuki oya kwafela ovanhu ovo ve hole oshili mounyuni aushe va mone eshiivo lashili lokushiiva Kalunga kashili nosho yo omalalakano aye. Eembibeli nosho yo oishangomwa yokukwafela ovanhu va ude ko eeshili di na ondilo odo di li mOmbibeli oi li apeshe mounyuni. Pashihopaenenwa, diladila shi na sha nouyelele oo u li moshishangomwa shokukonakonwa, Ombibeli otai hongo lela shike?a Amwe omomatukulwa embo olo oku na oipalanyole ngaashi: “Oshili kombinga yaKalunga oilipi?,” “Oonakufya ove li peni?,” “Ouhamba waKalunga oshike?” nosho yo “Omolwashike Kalunga a efa okumona oixuna ku kale po?” Ovanhu vahapu ova kala tave lipula shi na sha nomapulo a tya ngaho oule womido omayovi. Ndele paife otava dulu okumona omanyamukulo omapulo oo. Oule womafelemido, ovanhu vahapu ova kala vehe na eshiivo lOmbibeli, nOukwakriste owa kala tau hongo ovanhu omahongo oipupulu. Ndele nande ongaho, Eendjovo daKalunga oda tandavela notadi palula aveshe ovo va hala oku mu longela.

19. Omaudaneko elipi wa mona taa wanifwa, naasho oshe ku eta pexulifodiladilo lilipi?

¹⁹ Molwaashi otwa mona omaudaneko amwe aJehova taa wanifwa, ohatu dulu okutya: ‘Kape na nande ondjovo imwe yomeendjovo adishe diwa Omwene Kalunga ketu e i tonga ya kala inai wanifwa. Adishe ode tu wanifilwa, kape na nande imwe inai wanifwa.’ (Josua 23:14) Jehova oha mangulula, oha amene noha file oshisho ovapiya vaye. Mbela ope na limwe lomomaudaneko oo a udanekwa kuJehova inali wanifwa peufwafimbo lalo? Hasho nandenande! Onghee hano, natu kale twe lineekela filufilu momaudaneko aKalunga oo e li mEendjovo daye.

20. Omolwashike hatu dulu okuteelela onakwiiwa tu na elineekelo?

²⁰ Onakwiiwa yetu otai ka kala ya tya ngahelipi? Jehova okwa udaneka kutya vahapu vomufye otu na eteelelo loku ka kala kombada yedu olo tali ka lundululilwa moparadisa iwa, omanga vanini vomufye ve na eteelelo loku ka pangela pamwe naKristus meulu. Onghee hano, ohatu dulu okukala ovadiinini ngaashi Josua, kashi na nee mbudi kutya eteelelo letu olilipi, molwaashi eudaneko olo otali ka wanifwa. Opo nee ohatu ka diladila shi na sha nomaudaneko aeshe oo Jehova a li e tu udanekela, nohatu ka dula yo okutya ‘kape na nande ondjovo imwe inai wanifwa.’

[Eshangelo lopedu]

Oto dulu okuyelifa?

• Omaudaneko aJehova elipi Josua a li a mona taa wanifwa?

• Omaudaneko aKalunga elipi wa mona taa wanifwa?

• Elineekelo lilipi hatu dulu okukala tu na shi na sha neendjovo daKalunga?

[Efano pepandja 23]

Jehova okwa li a katuka eenghatu opo a mangulule oshiwana shaye

[Efano pepandja 23]

Jehova okwa li a amena ngahelipi oshiwana shaye pEfuta Litilyana?

[Efano pepandja 24]

Jehova okwa li a fila oshisho ngahelipi oshiwana shaye eshi sha li mombuwa?

[Omafano pepandja 25]

Jehova oha file oshisho oshiwana shaye shokunena