Rut naNaemi

Pethimbo muIsraeli mwa li ondjala, Omuisraeli gwedhina Naemi, okwa tembukile kuMoab pamwe nomusamane gwe noyanamati yaali. Konima yethimbo omusamane gwe okwa si. Oyanamati oya hokana aakadhona Aamoabi, Orpa naRut. Shiyemateka, konima yethimbo oyanamati yaNaemi nayo oya si.

Naemi sho u uvu kutya muIsraeli kamu na we ondjala, okwa tokola a shune kegumbo. Rut naOrpa oya yi pamwe naye, ihe manga ye li mela lyondjila, Naemi okwe ya lombwele a ti: ‘Omwa kala aakulukadhi aawanawa kaamwandjemati nokungame wo. Onda hala mu hokanwe natango, indeni kegumbo kuMoab.’ Aakiintu oye mu yamukula ya ti: ‘Otu ku hole! Otwa hala okuya nangoye.’ Naemi okwa tsikile oku ya lombwela ya shune. Hugunina, Orpa okwa shuna, ihe Rut okwa kala po. Naemi okwa lombwele Rut a ti: ‘Orpa okwa shuna koyaandjawo nokookalunga ke. Inda naye.’ Rut okwa ti: ‘Itandi ku thigi po. Aangandjoye otaa ka ninga aangandjetu, Kalunga koye ota ka kala Kalunga kandje.’ Mbela sho to dhiladhila Naemi okwa li u uvite ngiini sho Rut a ti ngawo?

Rut naNaemi oya thiki muIsraeli pethimbo lyaantu taya teya iishokelya. Esiku limwe, Rut okwa yi a ka pupule iilya mepya lyomulumentu gwedhina Boas, ngoka a li omwanamati gwaRahab. Boas oku uvu kutya Rut Omumoabi omudhiginini, ngoka a kala naNaemi. Okwa lombwele aaniilonga kaaya mane mo iilya mepya, opo Rut e ye a pupule mo.

Ongulohi ndjoka, Naemi okwa pula Rut a ti: ‘Owa teya mepya lyalye nena?’ Rut okwa ti: ‘Onda teya mepya lyomulumentu Boas.’ Naemi okwe mu lombwele a ti: ‘Boas omupambele gwomusamane gwandje. Tsikila okuteya mepya lye pamwe naakiintu aagundjuka. Oto ka kala wa gamenwa.’

Rut okwa tsikile okulonga mepya lyaBoas sigo eteyo lya pu. Boas okwa li a koneke kutya Rut oha longo nuudhiginini nokwa li omukiintu e li nawa noonkondo. Pethimbo ndyoka, ngele omulumentu a si inaa mona aanona yaamati, omupambele gwe oku na okuhokana po omuselekadhi. Onkee ano, Boas okwa hokana po Rut. Oya vala okanona kokamati kedhina Obed, ngoka a ka ninga hekulu yomukwaniilwa David. Ookuume kaNaemi oya li ya nyanyukwa. Oya lombwele Naemi ya ti: ‘Tango, Jehova okwe ku pe Rut, ngoka a kala nangoye nawa. Ngashingeyi okwe ku pe ishewe okatekulu. Jehova na hambelelwe.’