Okamwanamati komuselekadhi ka yumuka

Pethimbo lyondjala, Jehova okwa li a lombwele Elia a ti: ‘Inda kuSarefat. Oto ka adha ko omuselekadhi ngoka te ke ku pa iikulya.’ Sho Elia a thiki posheelo shoshilando, okwa mono omuselekadhi ohepele ta tyaya iikuni. Okwe mu indile omeya. Manga te ke ga tala, Elia okwe mu igidha a ti: ‘Kwathela ndje wu etele ndje ko okapambu koshikwiila.’ Omuselekadhi okwe mu yamukula a ti: ‘Kandi na oshikwiila ando ndi ku pe. Ondi na owala okasila nuugadhi uushona wokuteleka okathima ketu nomumwandjemati.’ Elia okwe mu lombwele a ti: ‘Jehova oku uvaneka kutya ngele owa ningile ndje okakwiila, uusila nuugadhi itawu ka pwa mo sigo omvula ya loko.’

Omuselekadhi okwa yi kegumbo e ta ningile omupolofeti gwaJehova okakwiila. Ngaashi naanaa Jehova u uvaneke, omuselekadhi nomwanamati oya kala aluhe ye na iikulya pethimbo lyondjala. Uusila nuugadhi inawu pwa mo moluyo.

Opo nduno, opwa ningwa oshinima oshiwinayi noonkondo. Omwanamati gwomuselekadhi okwa kwatwa kuuvu e ta si. Omuselekadhi okwi indile Elia e mu kwathele. Elia okwa kutha omudhimba e te gu fala mondunda yopombanda megumbo lyomuselekadhi. Okwe gu langeke kombete ye e ta galikana ta ti: ‘Jehova, Kalunga kandje, galulila omumati nguka omwenyo.’ Mbela owu shi kutya omolwashike sha li tashi ka kala oshikumithi kuJehova oku shi ninga? Omolwaashoka okuza konale, kapu na nando ogumwe a yumudhilwe. Noshikwawo, omuselekadhi nguka nokamwanamati kaya li Aaisraeli.

Omumati okwa yumuka nokwa tameke okufudha. Elia okwa ti komuselekadhi: ‘Tala! Omumwoye oku na omwenyo.’ Omuselekadhi okwa li a nyanyukwa noonkondo e ta ti kuElia: ‘Ongoye shili omumati gwaKalunga. Ondi shi shi, molwaashoka oho popi owala shoka Jehova te ku lombwele.’