Jehova ta hupitha Jehosafat

Omukwaniilwa gwaJuda, Jehosafat, okwa hanagula po iiyambelo yaBaal niikalunga mbyoka ya li moshilongo. Okwa li a hala aantu ya tseye iipango yaJehova. Jehosafat okwa ningi po shike? Okwa tumu aambala nAalevi muJuda ashihe ya ka longe aantu iipango yaJehova.

Iigwana yopuushinda oya li ya tila okuponokela Juda, molwaashoka oyi shi kutya Jehova oku li noshigwana she. Oye etele omukwaniilwa Jehosafat omagano. Mbela Aamoabi, Aayammoni pamwe nAaedom mboka yomoshitopolwa shaSeir oya ningi po shike? Oye ya okukondjitha Juda. Jehosafat okwa li e shi kutya okwa pumbwa ekwatho lyaJehova. Okwa gongele oshigwana ashihe aalumentu, aakiintu naanona muJerusalem. Okwa galikana montaneho yawo a ti: ‘Jehova ngele katu ku na itatu ka sindana molugodhi nduka. Otandi ku indile wu tu lombwele shoka tu na okuninga.’

Jehova okwa yamukula egalikano ndyoka, a ti: ‘Inamu tila, ngame otandi mu kwatha. Thikameni owala mwa tegelela, e tamu tala nkene tandi mu pe esindano.’ Jehova okwa li a ningi po shike a hupithe oshigwana she?

Ongula yesiku lya landula, Jehosafat okwa hogolola aayimbi, e te ya lombwele ye ende tayi imbi komeho getangakwiita lye. Oye ende okuza kuJerusalem sigo okuTekoa, kehala hoka taku ka kala olugodhi.

Sho aayimbi taya tanga Jehova mokule ya nyanyukwa, Jehova okwa kondjo a hupithe oshigwana she. Okwa vundakanitha Aayammoni nAamoabi noya pilukilathana molugodhi, e tayi idhipaga po thiluthilu ayehe. Jehova okwa gamene oshigwana shaJuda, aakwiita nosho wo aayambi. Sho aantu ayehe yomiilongo yopuushinda yu uvu shoka Jehova a ningi, oya li ye shi kutya ota gamene natango oshigwana she. Jehova oha hupitha ngiini oshigwana she? Ohe shi ningi momikalo odhindji. Ina pumbwa ekwatho lyaantu, opo e shi ninge.