Mbela ohatu gandja ngaa eitulomo kiinima mbyoka ya nyolwa mOmbiimbeli?

1, 2. Omolwashike twa pumbwa okukonakona iiholelwa yaakwaniilwa yane yaJuda?

NGELE owa mono gumwe te ende mondjila e ta thenunuka e ti ihata po, mbela ngoye ito ke enda mo wa kotoka? Uuna tatu dhiladhila komapuko gayalwe, otashi vulika shi ke tu kwathele kaatu ninge omapuko ga faathana. Shika osho shi li ngawo shi na ko nasha nolweendo lwetu lwopambepo. Otatu vulu okwiilonga iiyilongomwa ya simana komapuko gayalwe, mwa kwatelwa ngoka ga popiwa mOmbiimbeli.

² Aakwaniilwa yane yaJuda mboka ya popiwa moshitopolwa sha zi ko oya li ya longele Jehova nomutima aguhe. Ihe nonando ongawo, oya li ya ningi omapuko gamwe ga kwata miiti. Oshike tatu ilongo kiiholelwa yawo, nongiini tatu vulu okuyanda omapuko gawo? Okutedhatedha kiiholelwa mbyoka otaku vulu oku tu kwathela tu mone uuwanawa miinima mbyoka ya nyolwa, opo yi tu longe sha. —  Lesha Aaroma 15:4.

OKWIINEKELA MUUNONGO WOPANTU OKWA NIKA OSHIPONGA

3-5. (a) Nonando Asa okwa li i inekela Jehova, uupyakadhi wuni wa li we mu taalela? (b) Omolwashike tashi vulika Asa a li i inekele maantu sho Baasha a matukile Juda?

³ Tango natu taleni koshiholelwa shaAsa tu mone nkene Oohapu dhaKalunga tadhi vulu okunwetha mo onkalamwenyo yetu. Asa okwa li i inekela muJehova sho Aaetiopia nenge Aasudani omamiliyona ya matukile Juda. Ihe okwa li a ndopa oku mu inekela sho omukwaniilwa Baasha gwaIsraeli a tameke okutungulula Rama, oshilando sha simana shi li popepi noongamba. (2 Ondjal. 16:1-3) Moshinima shika, Asa okwa li i inekela muunongo we mwene nokwa li a gandja ombumbo komukwaniilwa Benhadad gwaSiria, opo a ponokele Baasha. Mbela ondunge ye oya li ngaa ya pondola? Ombiimbeli otayi ti: “Omukwaniilwa Baasha sho u uvu shoka tashi ningwa po, okwa hulitha okukoleka Rama e te etha iilonga.” (2 Ondjal. 16:5) Ano Asa okwa li e wete a ninga etokolo lyomondjila.

⁴ Mbela Jehova okwa li u uvitile ngiini oshinima shoka Asa a ningi? Kalunga okwa li a tumu omupopikalelipo gwe Hanani a ka pukulule Asa ngoka a li ini inekela Jehova. (Lesha 2 Ondjalulo 16:7-9.) Hanani okwa ti: “Okuza nena oto ka kala aluhe to hingilwa iita.” Baasha okwe etha iilonga ye yokupangela. Opo ihe Asa naantu ye oya kala nokuhingilwa iita ethimbo alihe ndyoka a kala ta pangele.

⁵ Ngaashi twe shi mono moshitopolwa sha zi ko, Kalunga okwa li a konakona omutima gwaAsa nokwa li a mono kutya okwe mu inekela thiluthilu. (1 Aak. 15:14) Kalunga okwa li e wete kutya Asa ohe mu longele lela nuudhiginini noha gwanitha po iinakugwanithwa mbyoka e mu pa. Ihe nonando ongawo, natango okwa li a mono iilanduliko yomatokolo ge gaa li pandunge. Mbela oshike sha li sha ningitha Asa i inekele momukwaniilwa Benhadad nomuye mwene sho a li tu ungaunga naBaasha, pehala lyokwiinekela muJehova? Mbela okwa li ta dhiladhila kutya uunongo we nenge etangakwiita enankondo otali ke mu kwathela a sindane pehala lyokwiinekela Kalunga? Nenge otashi vulika a li a pulakene komayele ga puka gayalwe?

6. Oshike tatu ilongo kepuko lyaAsa? Shi thaneka.

⁶ Mbela ehokololo lyaAsa otali ke tu inyengitha ngaa tu konakone oonkantu dhetu? Uuna twa taalelwa kuupyakadhi mboka tawu monika wa fa uunene okuungaunga nawo, otashi vulika tu mone oshidhigu okwiinekela muJehova. Ihe mbela oshike tatu ka ninga po uuna tatu ungaunga nuupyakadhi uushona monkalamwenyo yakehe esiku? Mbela ohatu igameke koondunge dhopantu tu kambadhale oku wu kandula po kutse yene? Nenge ohatu kongo ngaa uuyelele mboka wa kankamena komithikapango dhOmbiimbeli, shono tashi ku ulika kutya otwi igameka kuJehova oye e wu kandule po? Pashiholelwa, pompito yimwe otashi vulika wu kale to patanekwa kuyaandjeni shi na ko nasha nokuya kokugongala nenge koshigongi. Otashi ka kala shi li nawa okupula Jehova e ku wilike noku ku kwathele wu mone kutya omukalo guni omwaanawa okuungaunga nonkalo ndjoka. Ongiini ngele owa kanitha iilonga, e tashi kala oshidhigu kungoye okumona yilwe? Uuna to popi naangoka a hala oku ku pa iilonga, mbela oto ke mu lombwela ngaa kutya oho yi kokugongala mokati koshiwike? Kutya nduno otatu iyadha muupyakadhi wa fa peni, otashi ka kala shi li nawa tu dhimbulukwe oohapu dhomupisalomi ngoka a ti: “Igandja kOmuwa; mu inekela, oye te ku kwatha.” —  Eps. 37:5.

EENDATHANO EWINAYI OTALI VULU OKU KU ETELA SHIKE?

7, 8. Jehosafat okwa li a ningi epuko lini, niilanduliko oya li yini? (Tala kethano lyopetameko.)

⁷ Ongiini kombinga yaJehosafat, omwanamati gwaAsa? Okwa li e na omaukwatya ogendji omawanawa. Jehosafat okwa li a longo uuwanawa, sho a kala i inekela muKalunga. Ihe nonando ongawo, okwa li a ningi omatokolo gaa li pandunge. Pashiholelwa, okwa li a hokanithitha omukwazimo lye nomukwazimo gwomukwaniilwa omukolokoshi Ahab, omukwaniilwa gwuukwaniilwa wokuumbangalantu. Nonando okwa li a londodhwa komuhunganeki Mikaia, Jehosafat okwa yi pamwe nomukwaniilwa Ahab kolugodhi ya ka kondjithe Aasiria. Jehosafat okonyala a dhipagelwe kolugodhi. Opo ihe okwa galukile kuJelusalem. (2 Ondjal. 18:1-32) Omuhunganeki Jehu okwe mu pula a ti: “Oto dhiladhila tuu kutya oshu uka okukwatha mboka aawinayi nokugama kumboka ye tonde Omuwa?” —  Lesha 2 Ondjalulo 19:1-3.

⁸ Mbela Jehosafat okwa li ngaa i ilongo mo sha mepuko lye? Nondando okwa li a tsikile okuulika uulaadhi mokukala a hala okunyanyudha Kalunga, otashi monika sha fa ini ilonga mo sha moshinima shaAhab nomoohapu dhelondodho dhaJehu. Jehosafat okwa li a ningi ishewe etokolo lyaa li pandunge sho a hangana nomwanamati gwaAhab, omukwaniilwa Ahasia, ngoka a li omutondi gwaKalunga. Jehosafat naAhasia oya li ya tungu oosikepa ndhoka dha li dha tekauka po inaadhi longa we shoka dha li dha tungilwa. —  2 Ondjal. 20:35-37.

9. Eendathanano lya puka otali vulu ngiini okutula onkalamwenyo yetu moshiponga?

⁹ Uuna tatu lesha omahokololo kombinga yaJehosafat otashi vulika ge tu inyengithe tu ikonakone. Ngiini mbela? Jehosafat okwa li lela omukwaniilwa omwaanawa. Okwa li a longo shoka shu uka, nokwa “longele Omuwa pankondo dhe adhihe.” (2 Ondjal. 22:9) Nonando ongawo, okwa li a mono iilanduliko omolweendathano lya puka. Dhiladhila keyeletumbulo ndika lya nwethwa mo tali ti: “Enda pamwe naanawino, u likole owino, ihe ngoka ta kala paagoya, ota likola uuwinayi.” (Omayel. 13:20) Kombinga yimwe, otashi vulika tu kambadhale okukwathela aantu mboka ye na ohokwe moshili. Jehosafat sho a panga uukuume wa pitilila naAhab, okonyala shi pule omwenyo gwe. Sha faathana, ngele otwa kala tu na uukuume wa pitilila naamboka ihaaya longele Jehova otashi tu tula moshiponga.

10. (a) Oshiilongomwa shini tatu ilongo kuJehosafat shi na ko nasha nokuya mondjokana? (b) Oshike tu na okukaleka momadhiladhilo uuna tatu endathana naantu ya puka?

¹⁰ Oshiilongomwa shini shi na oshilonga tatu vulu okwiilonga koshiholelwa shaJehosafat? Omukriste otashi vulika a tameke okukala e na ekwatathano lyopaihole nagumwe ngoka ihaa longele Jehova, ta dhiladhila kutya mokati koshigwana shaJehova ita mono mo kuume to opalele. Nenge tashi vulika a kale ta thiminikwa kaakwanezimo ihaaya longele Jehova a hokane nenge a hokanwe ‘manga anuwa inaa kulupila ko.’ Onkee ano, yamwe otashi vulika ya kale yu uvite ngaashi omumwameme gumwe ngoka a ti: “Omuntu okwa shitwa nehalo lyokukala pu na gumwe ngoka e mu hole nokwa hala okuya naye mondjokana.” Mbela Omukriste ota ka ninga po shike monkalo ndjono? Okukala ta dhiladhila kwaashoka sha ningilwa Jehosafat, otashi ke mu kwathela. Otashi ke mu kwathela a kale aluhe ta kongo ewiliko kuKalunga. (2 Ondjal. 18:4-6) Mbela oshike sha li sha ningwa po sho Jehosafat a tameke okweendathana naAhab, ngoka a li kee hole Jehova? Jehosafat okwa li e na okudhimbulukwa kutya Jehova oha tala mboka ye na omitima dhe mu inekela thiluthilu. Pethimbo lyetu wo “Omuwa ota tonatele uuyuni auhe” nokwi ilongekidha oku tu ‘nkondopaleka.’ (2 Ondjal. 16:9) Oku uvite ko onkalo yetu noku tu hole. Mbela owu na eitaalo kutya Kalunga ota ka gwanitha po oompumbwe dhoye momukalo tagu mbilipaleke dhokukala pu na gumwe ngoka e ku hole nokwa hala okuya nangoye mondjokana? Kala wu na uushili kutya ote ke yi gwanitha po.

INO ETHA OMUTIMA GWOYE GU KWATWE KUUNTSA

11, 12. (a) Hiskia okwa holola ngiini shoka sha li momutima gwe? (b) Omolwashike Kalunga inaa geela we Hiskia?

¹¹ Shoka tatu vulu okwiilonga kuHiskia osha kwatela mo omutima. Pompito yimwe, omukonakoni gwomitima okwa li a holola shoka shi li momutima gwaHiskia. (Lesha 2 Ondjalulo 32:31.) Sho Hiskia a li te ehamenene, Kalunga okwe mu pe endhindhiliko kutya ota ka aluka. Aakwaniilwa yaBabilonia oya tumu aatumwa ya ka pule kombinga yendhindhiliko ndyoka lyomunzile tagu shuna monima. (2 Aak. 20:8-13; 2 Ondjal. 32:24) Kalunga okwa holola shoka sha li momutima gwaHiskia, sho e mu ‘etha a ye nondjila ye mwene.’ Hiskia oku ulukile Aababilonia “uuyamba we.” Ano oonkantu dhaa li pandunge ndhoka a katuka odhu ulike ashihe shoka sha li momutima gwe.

¹² Ombiimbeli inayi tu lombwela shoka sha ningitha Hiskia a kale e na uuntsa. Mbela otashi vulika a kwatwa kuuntsa, molwaashoka a sindi Aayassur nenge sho a aludhwa kuKalunga pashikumithalonga? Mbela otashi vulika ‘omolwokuyambapala kwe unene nokusimanekwa kwaayehe’? Molwaashoka Hiskia okwa li a kwatwa kuuntsa, “ina pandula Omuwa” omolwiilonga iiwanawa ayihe mbyoka e mu ningile. Oshinima shoka kasha li tuu oshiwinayi noonkondo! Nonando Hiskia okwa li a nyanyudha Kalunga sho e mu longele nomutima aguhe, iikando yimwe okwa li e mu geyitha. Konima yethimbo ‘Hiskia okwi ifupipike’ onkee Kalunga ine mu geela we naantu ye. —  2 Ondjal. 32:25-27; Eps. 138:6.

13, 14. (a) Uunake tashi vulika Jehova ‘e tu ethe tu ye noondjila dhetu’? (b) Otatu ki inyenga ngiini uuna tatu pandulwa omolwoshininima shontumba shoka twa pondola?

¹³ Ongiini tatu vulu okumona uuwanawa mokulesha ehokololo lyaHiskia nokutedhatedha kulyo? Dhimbulukwa kutya uuntsa waHiskia owa tameke unene okukala wi iwetikile konima sho Jehova a sindanitha Sennakerib naasho a aludha uuvu waHiskia. Kombinga yetu, ngele otwa pondola okuninga oshinima shontumba, mbela shono otashi ti kutya Jehova ‘okwe tu etha tu ye noondjila dhetu,’ opo a tale shoka shi li momitima dhetu? Pashiholelwa, omumwatate otashi vulika i ilongekidha nuudhiginini oshipopiwa shoka ta ka gandja. Aantu oyendji otashi vulika ye mu pandule sho e shi gandja nawa. Mbela ote ki inyenga ngiini?

¹⁴ Uuna tatu pandulwa, onawa tu tule miilonga oohapu dhaJesus ndhoka tadhi ti: “Ano osho nane wo ngele omwa gwanitha owala ayihe mbyoka mwe yi lombwelwa, omu na okutya: ‘Otse [aapiya yowala, NW], sho twa longo owala shoka twa li tu na oku shi longa.’” (Luk. 17:10) Otatu vulu natango okwiilonga sha koshiholelwa shaHiskia. Iikala yuuntsa oye mu ningitha a kale ‘inaa pandula Omuwa,’ omolwiilonga iiwanawa ayihe mbyoka e mu ningile. Okutedhatedha kwaashoka Jehova e tu ningila otashi ke tu kwathela tu yande iikala mbyoka Jehova e tonde. Otatu vulu okukala tatu popi nolupandu iinima iiwanawa mbyoka Jehova e tu ningila. Okwe tu pa Oohapu dhe nombepo ye ondjapuki yi tu kwathele.

KALA WA KOTOKA UUNA TO NINGI OMATOKOLO

15, 16. Omolwashike Josia a kanitha egameno lyaKalunga nosho wo omwenyo gwe?

¹⁵ Hugunina, oshike tatu ilongo mwaashoka sha ningilwa omukwaniilwa Josia? Natu taleni kutya oshike she mu sinditha noshe mu dhipagitha. (Lesha 2 Ondjalulo 35:20-22.) Josia ‘okwa kambadhala okukeelela’ omukwaniilwa gwaEgipiti, Neko, nonando omukwaniilwa okwa li e mu lombwele kutya iita ta hingi kayi na sha naye. Ombiimbeli otayi ti kutya shoka Neko a popi ‘oKalunga e shi popi.’ Omolwashike nduno Josia a yi a ka kondje? Ombiimbeli inayi shi popya.

¹⁶ Ongiini Josia a li ta vulu okutseya kutya oohapu dhaNeko odha za kuJehova? Okwa li ta vulu okupula Jeremia, gumwe gwomaapolofeti aadhiginini. (2 Ondjal. 35:23, 25) Ihe kapu na shoka tashi ulike kutya okwe shi ninga. Oshikwawo, okwa li a yi kuKarkemish, a ka ‘kondjithe aatondi ye,’ ihe ka li ta ka kondjitha aantu yomuJerusalem. Onkee ano, edhina lyaKalunga ka lya li lya kwatelwa mo, oshoka Neko ka li nando a sheke Jehova nenge oshigwana she. Osha li lela epuko enene sho Josia a ka kondjitha Neko. Mbela moshinima muno owu wete mo shoka tatu vulu okutula miilonga? Uuna twa taalela uupyakadhi, oshi li nawa tu konakone kutya Jehova ota dhiladhila ngiini moshinima shontumba.

17. Uuna tu li muudhigu, ongiini tatu vulu okuyanda okuninga omapuko ngaashi ngoka ga ningwa kuJosia?

¹⁷ Uuna pwa holoka uupyakadhi, otu na okutala kutya omakotampango gOmbiimbeli geni ga kwatelwa mo, noku ga tula miilonga momukalo gu li pandjele. Poompito dhimwe, otatu vulu okupula omayele kaakuluntugongalo. Otashi vulika ye tu pe omayele kombinga yoshinima shoka tu shi nale notashi vulika nokuli twa konga uuyelele miileshomwa yetu. Otashi vulika pu na omakotampango galwe gOmbiimbeli ngoka twa pumbwa okutala, ngoka omukuluntugongalo tashi vulika e tu kwathele oku ga konakona. Pashiholelwa, omumwameme oku shi kutya oku na oshinakugwanithwa shokuuvitha onkundana ombwanawa. (Iil. 4:20) Natu tye ando okwa hala okuya miilonga yomomapya esiku lyontumba, ihe omusamane gwe ngoka kee shi omwiitaali okwa hala a kale megumbo. Omusamane gwe okwa ti kutya oya hula nale okukala pamwe, nokwa hala ya ninge sha pamwe ye li aaihokani. Omumwameme otashi vulika a tale omanyolo, ngaashi ngoka taga popi kombinga yokuvulika kuKalunga noyokuninga aantu aalongwa. (Mat. 28:19, 20; Iil. 5:29) Ihe oku na wo okudhiladhila kutya omukulukadhi oku na okukala ha vulika komusamane gwe noku na okukala e na ondjele. (Ef. 5:22-24; Fil. 4:5) Mbela omusamane gwe oku li ompinge thiluthilu nokuya kwe muukalele nenge okwa hala owala ya ninge oshinima shontumba esiku ndyono? Otwa pumbwa okukala tu na ondjele sho tatu longo ehalo lyaKalunga nokukala tu na eiyuvo lya yela.

LONGELA KALUNGA NOMUTIMA AGUHE E TO KALA WA NYANYUKWA

18. Ongiini to vulu okumona uuwanawa mokukonakona omahokololo gaakwaniilwa yane mboka ya kundathanwa moshitopolwa shino?

¹⁸ Tu li aantu inaatu gwanenena, natse omathimbo gamwe otu na ondjigilile yokuninga omapuko gamwe gomwaangoka ga ningwa kaakwaniilwa yane mboka twa kundathana. Otashi vulika (1) twi igameke koondunge dhetu yene, (2) tu kale tu na ookuume ya puka, (3) tu kwatwe kuuntsa nenge (4) tu ninge omatokolo inaatu dhiladhila tango kutya Kalunga ota dhiladhila ngiini. Ihashi nyanyudha tuu Jehova okumona uuwanawa mutse, ngaashi a li e wu mono maakwaniilwa mboka yane! Jehova oku shi wo kutya otu mu hole shi thike peni noku shi kutya otwa hala oku mu longela nuudhiginini. Okwe tu pa iiholelwa tayi tu londodha notayi tu kwathele tu yande okuninga omapuko ga kwata miiti. Natu dhiladhile kiiholelwa mbika yopaMbiimbeli nokuulika olupandu kuJehova ngoka e yi tu pa.