OSHIILONGOMWA 55
Omuyengeli gwaJehova okwa li a gamene Hiskia
Epangelo enankondo lyaAssur olya li lya kwata ko uukwaniilwa womazimo omulongo gaIsraeli. Omukwaniilwa Sennakerib, gwaAssur, okwa li a hala ishewe okukwata ko uukwaniilwa womazimo gaali gaJuda. Okwa tameke ta kwata ko iilando yaJuda kooshimwe nooshimwe. Oshilando shoka a li a halelela unene, oJerusalem. Sennakerib ka li e shi kutya Jehova oye ta gamene Jerusalem.
Omukwaniilwa gwaJuda, Hiskia, okwa li a futu Sennakerib iimaliwa oyindji, opo kaa ponokele Jerusalem. Sennakerib okwa taamba iimaliwa mbyoka, ihe okwa ka tuma natango etangakwiita lye enankondo li ponokele Jerusalem. Aantu moshilando oya li ya tila. Omolwashike mbela? Aayassur oya li taye ende taya hedha popepi noshilando. Omukwaniilwa Hiskia okwa lombwele oshigwana a ti: ‘Inamu tila. Aayassur oye na oonkondo, ihe Jehova ote ke tu pa oonkondo dhi vule dhawo.’
Sennakerib okwa tumu elenga lye enene kuJerusalem li ka heke aantu yi igandje kAayassur. Elenga enene olya thikama kondje yoshilando tali igidha tali ti: ‘Jehova ite ke mu kwathela. Inamu fundjalekwa kuHiskia nenge e mu pukithe. Kapu na kalunga ta vulu oku mu hupitha miikaha yetu.’
Omukwaniilwa Hiskia okwa pula Jehova kutya na ninge po shike. Jehova okwe mu yamukula a ti: ‘Inamu tila shoka elenga enene tali ti. Sennakerib ite ke ya mo muJerusalem.’ Okuza mpono omukwaniilwa Sennakerib okwa li a tumine Hiskia oontumwafo tadhi ti: ‘Igandja kutse, Jehova ita vulu oku ku hupitha.’ Hiskia okwa galikana a ti: ‘Jehova Kalunga ketu tu hupitha, opo kehe gumwe a tseye kutya ongoye awike Kalunga kashili.’ Jehova okwe mu lombwele a ti: ‘Omukwaniilwa gwaAssur ite ya mo muJerusalem. Otandi popile oshilando shandje.’
Sennakerib okwa li e na uushili kutya ota ka kwata ko Jerusalem. Mbela Jehova okwa ningi po shike? Okwa tumu omuyengeli gumwe uusiku kontanda yAayassur. Omuyengeli okwa dhipaga aakwiita Aayassur 185 000. Omukwaniilwa Sennakerib okwa kanitha aakwiita ye aanankondo muusiku wumwe awuke. Onkee ano, okwa li e na okuya kegumbo a sindika molugodhi. Jehova okwa li a gamene Hiskia nosho wo Jerusalem, ngaashi owala e shi uvaneka. Andola omo wa li muJerusalem, mbela ando owa kala ngaa wi inekela muJehova?
“Omuyengeli gwOmuwa ota tonatele mboka haa vulika kOmuwa note ya hupitha moshiponga.” — Episalomi 34:7