Josia okwa li e hole Ompango yaKalunga

Sho Josia e na omimvo hetatu, okwa ningi omukwaniilwa gwaJuda. Oshigwana osha li hashi longele iikalunga pethimbo ndyoka nokuninga iinima yuumpulile. Sho Josia e na omimvo 16, okwa tameke okwiilonga nkene e na okulongela Jehova momukalo gu uka. Sho e na omimvo 20, okwa hanagula po iikalunga ayihe nosho wo ootempeli dhayo moshilongo ashihe. Sho Josia e na omimvo 26, okwa ningi omalongekidho, opo otempeli yaJehova yi opalekwe.

Omuyambi omukuluntu Hilkia okwa li a adha ondhingambo yOmpango yaJehova motempeli. Otashi vulika Ompango ndjoka oyo ndji ya li ya nyolwa kuMoses. Amushanga gwomukwaniilwa Josia, Shafan, okwe eta ondhingambo ndjoka yOmpango kuJosia. Shafan okwe yi lesha mokule. Sho Josia u uvu Ompango tayi leshwa, okwe shi mono kutya nani oshigwana osha kala itaashi vulika kuJehova uule womimvo odhindji. Omukwaniilwa Josia okwa lombwele Hilkia a ti: ‘Jehova okwe tu geela unene. Indeni mu ke mu pule kutya natu ninge shike.’ Jehova okwa yamukula okupitila momuhunganeki omukiintu, edhina lye Hulda a ti: ‘Aajuda oye ekelehi ndje. Otandi ke ya geela, ihe hapethimbo sho Josia e li omukwaniilwa, molwaashoka ye okwi ishonopeke.’

Sho omukwaniilwa Josia e shi uvu, okwa yi kotempeli, e ti ithana oshigwana shaJuda ashihe. Opo ihe okwe shi leshele Ompango yaJehova mokule. Josia noshigwana ashihe oyu uvaneke kutya kehe gumwe ota ka vulika kuJehova nomutima aguhe.

Oshigwana shaJuda osha kala uule womimvo odhindji itaashi dhana Opaasa. Sho Josia a lesha Ompango, okwe shi mono kutya Opaasa oya li yi na okukala hayi dhanwa omumvo kehe. Okwa lombwele oshigwana a ti: ‘Otu na okudhanena Jehova Opaasa.’ Okwa ningi omalongekidho opo pu ningwe omafikilondjambo ogendji. Okwa ningi wo omalongekidho aayimbi ya tameka okwiimba motempeli. Okuza mpono, oshigwana osha dhana Opaasa nosho wo Oshituthi shiikwiila inaayi ya efulika uule womasiku gaheyali. Okuza muuyuni womuhunganeki Samuel kaku dhanenwe Opaasa ya fa ndjika. Omukwaniilwa Josia okwa li e hole lela Ompango yaJehova. Mbela nangoye owu hole ngaa okwiilonga kombinga yaJehova?