Jesus ta kutitha aantu omayuvi

Manga Opaasa yomomumvo 32 E.N., inaayi thika, aayapostoli yaJesus oya adhika opo ya galuka molweendo lweuvitho. Molwaashono oya li ya vulwa, Jesus okwa yi nayo nowato koshilando shedhina Betsaida, ya ka thuwe po. Sho owato ye ya komunkulofuta, Jesus okwa mono ongundu onene yaantu ye ya landula. Nonando Jesus okwa li a hala okwiikalela naayapostoli ye, aantu okwe ya taamba ko nombili. Okwa aludha aavu yawo, nokwa tameke oku ya longa. Esiku alihe okwe ya longo kombinga yUukwaniilwa waKalunga. Sho kwa toko, aayapostoli ye oye ya kuye noya ti: ‘Aantu oye na okukala ya sa ondjala, ya laleka ya ye, ye ki ilandele iikulya.’

Jesus okwa ti: “Inashi opala, ya ye ngaaka. Ya peni iikulya.” Aayapostoli oye mu pula ya ti: ‘Owa hala tu ke ya landele iikwiila?’ Filippus gumwe gwomaayapostoli, okwa ti: ‘Nonando ando otwa li tu na iimaliwa oyindji, itatu vulu okulandela ongundu yi thike mpaka iikwiila ya gwana.’

Jesus okwe ya pula a ti: ‘Omu na po iikulya yi thike peni?’ Andreas okwa ti: ‘Mpaka otu na po iikwiila itano ayike noohi mbali, nokatu wete ye ya gwanena.’ Jesus okwa ti kuyo: ‘Yi eteni huka kungame.’ Jesus okwa lombwele aantu ya kuutumbe pomwiidhi, moongundu dho 50 nadhimwe odhe 100. Okwa kutha iikwiila noohi, e ta ligamene kegulu e ta galikana. Aalumentu 5 000 nosho wo aakiintu naanona oya li, e taya kuta. Konima sho ya mana, aayapostoli oya gongele iipambu ayihe mbyoka ya hupu po, opo pwaa hepe nando osha. Iipambu mbyoka oyu udha oontungwa 12. Oshikumithalonga shono kasha li tuu oshiwanawa!

Aantu oya li ya kumwa noonkondo noya li ya hala okuninga Jesus omukwaniilwa gwawo. Ihe Jesus okwa li e shi kutya halyo ethimbo lyaJehova lyoku mu ninga omukwaniilwa. Onkee ano, okwa thigi po ongundu yaantu, e ta lombwele aayapostoli ya ye handiyaka yEfuta lyaGalilea. Oya yi mowato, na Jesus okwa shuna kondundu oye awike. Omolwashike mbela? Okwa li a hala okugalikana kuHe. Kutya nduno Jesus okwa li ha kala i ipyakidhila shi thike peni, okwa li aluhe ha kongo ethimbo lyokugalikana.