Petrus ti idhimbike Jesus

Sho Jesus a li naayapostoli ye mondjugo yopombanda, okwe ya lombwele a ti: ‘Uusiku wonena amuhe otamu ka thiga ndje po.’ Petrus okwe mu yamukula a ti: ‘Ngame itandi ke ku thiga po, nando ayehe oye ku thige po.’ Jesus okwa lombwele Petrus a ti: ‘Ekondombolo manga inaali iga, oto ka popya lwiikando itatu kutya ku shi ndje.’

Sho aakwiita ya fala Jesus kegumbo lyaKajafas, oyendji yomaayapostoli oya adhika nale ya fadhuka po. Ihe yaali yomuyo oya landula ongundu yaantu moka a li. Gumwe gwomuyo oPetrus, nokwa yi pehale lyegumbo lyaKajafas e ta huhulukwa. Sho omukadhona gumwe omuyakuli gwomuyambi omukuluntu e mu mono ta huhulukwa, okwa ti: ‘Ondi ku shi. Nangoye owa li naJesus.’

Petrus okwa ti: ‘Aawe, kanda li naye. Kandi shi kutya oshike to popi nokuli.’ Manga Petrus u uka lwokosheelo shegumbo, omukadhona gulwe omuyakuli okwe mu mono nokwa lombwele ongundu yaantu a ti: ‘Omulumentu nguka naye okwa li naJesus.’ Petrus okwa ti: ‘Ngame Jesus kandi mu shi nokuli.’ Omulumentu gumwe okwa ti: ‘Nangoye gumwe gwomuyo. Okupopya kwoye okwe shi holola kutya nangoye owa za kuGalilea, ngaashi Jesus.’ Ihe Petrus okwa gana a ti: ‘Ngame kandi mu shi shili.’

Pethimbo opo tuu mpono ekondombolo olyi igi. Petrus okwa mono Jesus a punguluka e te mu tala. Petrus okwa dhimbulukwa oohapu dhaJesus nokwa yi pondje e ta lili nokulililila.

Pethimbo opo tuu mpono, oshigongi shaatokoli osha gongala megumbo lyaKajafas, shi pangule Jesus. Osha li sha tokola nale kutya otashi ka dhipaga Jesus, nongashingeyi otashi kongo etompelo lyoku shi ninga. Ihe inashi mu mona epuko lyasha. Lwahugunina, Kajafas okwa pula Jesus shu ukilila a ti: ‘Ngoye, Omuna gwaKalunga?’ Jesus okwa ti: ‘Eeno.’ Kajafas okwa ti: ‘Inatu pumbwa we uunzapo. Shika okutuka Kalunga!’ Ompangu oya tsu kumwe nasho ya ti: ‘Omulumentu nguka oku na okusa.’ Oye mu dhenge, oye mu hiyile omayeye moshipala, oya siikile oshipala she noye mu dhenge nomalupi, taya ti: ‘Ngele ngoye omupolofeti, tu lombwela kutya olye e ku dhenge.’

Pethimbo lyomutenya, oya fala Jesus koshigongi shaatokoli noye mu pula ishewe ya ti: ‘Ngoye Omuna gwaKalunga?’ Jesus okwa ti kuyo: ‘One tamu ti kutya ongame.’ Opo nduno oya ti kutya okwa tuka Kalunga noye mu fala kaandjaPontius Pilatus, omuleli gwaRoma. Oshike sha ka ningwa hoka? Natu taleni.