Kornelius ta tililwa ombepo ondjapuki

MuKesarea omwa li omukuluntu gwetangakwiita lyaRoma a simana gwedhina Kornelius. Nonando ka li Omujuda, Aajuda oya li ye mu simaneka. Okwa ningi oshindji a kwathe oohepele naathigona. Okwa li i itaala muJehova nokwa li he mu galikana aluhe. Esiku limwe omuyengeli okwe ya kuye e te mu lombwele ta ti: ‘Kalunga oku uvu omagalikano goye. Ngashingeyi tuma aalumentu ya ye koshilando Joppa, ya ka tale omulumentu, edhina lye Petrus.’ Kornelius okwa tumu nziya aalumentu yatatu kuJoppa, shi li ookilometa 50 lwaampono kuumbugantu waKesarea.

Pethimbo opo tuu mpoka muJoppa, Petrus okwa mono emoniko. Okwa mono iinamwenyo mbyoka Aajuda inaaya pitikwa okulya noku uvu ewi tali mu lombwele e yi lye. Petrus okwa tindi ta ti: ‘Inandi lya nando onale oshinamwenyo sha nyata.’ Opo ihe ewi olya ti kuye: ‘Ino tya kutya iinamwenyo mbika oya nyata. Kalunga okwe yi yogola.’ Petrus okwa lombwelwa wo taku ti: ‘Posheelo opu na aalumentu yatatu. Inda nayo.’ Petrus okwa yi kosheelo e ta pula aalumentu kutya otaya kongo shike. Oye mu yamukula ya ti: ‘Otwa tumwa komukuluntu gwetangakwiita lyaRoma, Kornelius. Okwe ku ithana wu ye kegumbo lye kuKesarea.’ Petrus okwi ithana aalumentu megumbo nokwe ya pe omulalo. Esiku lya landula ko, okwa yi nayo kuKesarea, pamwe naamwahe ooyakwawo yomuJoppa.

Sho Kornelius a mono Petrus, okwa tsu oongolo. Ihe Petrus okwa ti: ‘Thikama, oshoka ngame omuntu owala ngaashi ngoye. Kalunga okwa lombwele ndje ndi ye kegumbo lyoye, nonando Aajuda ihaye ende momagumbo gaapagani. Ngashingeyi lombwela ndje kutya omolwashike wi ithana ndje.’

Kornelius okwa lombwele Petrus a ti: ‘Omasiku gane ga pita, onda li tandi galikana Kalunga, nomuyengeli okwa lombwele ndje ndi ku ithane. Tu kwathela wu tu longe oohapu dhaJehova.’ Petrus okwa ti: ‘Onda tseya kutya Kalunga ke na okatongo. Oha taamba ko kehe ngoka a hala oku mu longela.’ Petrus okwe ya longo iinima oyindji kombinga yaJesus. Opo nduno Kornelius naayehe mboka ya li naye, oya tililwa ombepo ondjapuki e taya ninginithwa.