Jehova “aantu ayehe ohe ya tala ye thike pamwe”

Mbela opu na esiku limwe wa ningilwe okatongo? Mbela opu na esiku limwe wa ningile eindilo lyontumba e tali tindwa, wa li wa hala okulongelwa sha e to shi tindilwa nenge wu ungaungilwe nangoye nondhino omolwolwaala lwoshipa shoye, omuhoko gwoye nenge molwondondo yoye? Ngele osho, hangoye awike. Ihe opu na onkundana ombwanawa kutya nando iinima ya tya ngaaka oyi li apuhe kombanda yevi, ihayi ningwa mo megulu. Omuyapostoli Petrus okwa popi e na uushili kutya “Kalunga aantu ayehe ohe ya tala ye thike pamwe.”—Lesha Iilonga 10:34, 35.

Oohapu ndhoka Petrus okwe dhi popile megumbo lyaKornelius ngoka kee shi Omujuda moka a li inaa tegelelwa a ye mo. Petrus ngoka a li Omujuda okwa li ko pethimbo Aajuda ya li ya tala ko mboka kaaye shi Aajuda ya nyata nokaya li haye endathana nayo. Petrus okwa li ta kongo nduno shike megumbo lyaKornelius? Okwa li mo, shaashi Jehova Kalunga oye a longekidha ya tsakanene. Petrus okwa li a mono emoniko moka Kalunga a li e mu lombwele a ti: “Shaa shoka Kalunga e shi yapula, ito vulu oku shi tala kutya oshi na oshidhila.” Esiku lya tetekele Kornelius naye okwa li a mono emoniko moka omuyengeli a li e mu lombwele i ithanithe Petrus. (Iilonga 10:1-15) Sho Petrus a dhimbulula kutya Jehova oye ta dhana onkandangala moshinima shika, ka li a mwena.

Okwa popi a ti: “Ngame ngashingeyi onde shi tseya kutya Kalunga aantu ayehe ohe ya tala ye thike pamwe.” (Iilonga 10:34) Oshitya ontondo nenge ‘okutala aantu kaaye thike pamwe’ mOshigreka otashi ti lelalela “okutala aantu kiipala.” (The Kingdom Interlinear Translation of the Greek Scriptures) Omulongwantu gumwe okwe shi yelitha a ti: “Otashi popi kombinga yomupanguli ngoka manga inaa tokola ha tala omuntu tango koshipala opo a tokole ngele oku na ondjo nenge hasho shi ikolelela keholokopo lye.” Kalunga iha tala aantu ye vule yakwawo molwomuhoko, oshigwana, ondondo nenge eholokopo lyawo lyokombanda.

Pehala lyaashono, Jehova oha tala momutima. (1 Samuel 16:7; Omayeletumbulo 21:2) Petrus okwa ti ishewe: “Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” (Iilonga 10:35) Okutila Jehova otashi ti oku mu simaneka, okukala we mu inekela nokuyanda kehe shimwe shoka itaashi mu nyanyudha. Okulonga uuyuuki osha kwatela mo okulonga shoka shu uka momeho gaKalunga. Jehova oha hokwa omuntu ngoka e na etilosimaneko hali zi komutima ndyoka hali mu inyengitha a longe shoka shu uka.—Deuteronomium 10:12, 13.

Ngele opu na esiku wa ningilwe okatongo nenge okayoya, oohapu dhaPetrus ndhoka a popi kombinga yaKalunga otadhi tu tsu omukumo. Jehova oye ha nanene aantu yomiigwana ayihe kelongelokalunga lyashili. (Johannes 6:44; Iilonga 17:26, 27) Oha pulakene noha yamukula omagalikano gaalongeli ye kutya nduno oyomomuhoko guni, oyomoshigwana shini nenge oye na ondondo yini. (1 Aakwaniilwa 8:41-43) Otatu vulu okukala tu na uushili kutya sho Jehova te tu tala okuza megulu oku wete owala omuhoko gumwe, sha hala okutya, omuhoko gwaantu. Mbela owi inyengithwa wu kale wa hala okwiilonga kombinga yaKalunga nguka kee na okatongo?