OSHITSA 14

Yelitha nawa ehuku lyoshipopiwa shoye

Aahebeli 8:1

SHOKA WU NA OKUNINGA: Kwathela aapulakeni ya landule nuupu sho to gandja oshipopiwa. Yelitha nawa nkene ehuku nenge oshitsa kehe sha simana sha pambathana naashoka wa hala aapulakeni yoye ya likole mo. Yelitha wo nkene sha pambathana noshipalanyolo shoshipopiwa shoye.

NKENE WU NA OKU SHI NINGA:

Kala wu na elalakano. Tala ngele oshipopiwa shoye otashi gandja uuyelele, otashi tompo aapulakeni nenge otashi ya ladhipike ya ninge sha. Uuna we shi ningi, gandja oshipopiwa shoye momukalo tagu opalele. Shilipaleka kutya iitsa ayihe mbyoka ya simana, oto yi popi momukalo ngoka tagu ku kwathele wu adhe elalakano lyoshipopiwa shoye.

Ipula to ti: ‘Omapulo geni tashi vulika aapulakeni yandje ya kale ye na kombinga yaashoka tandi popi? Ngele onde ya pe omayamukulo, omapulo geni ga gwedhwa po tashi vulika ya pule?’ Konima yaashono, tula iitsa yoye melandulathano ngaashi aapulakeni tashi vulika ya dhiladhile, opo ya vule okulandula noya uve ko nawa. Kungawo, uuyelele mboka to ya pe otawu ka ningina momitima dhawo.
Tsa omuthindo enenedhiladhilo lyoshipopiwa shoye. Opo oshipopiwa shoye shi kale tashi ende po nawa, kala to tsu omuthindo iitsa ya simana nenge wu longithe iitya mbyoka tayi ziminathana sho to shi gandja.
Iitsa ya simana nayi kale ya yela noyi uvitike. Hogolola owala iitsa ya simana mbyoka ya pamba oshipalanyolo shoshipopiwa shoye nosho wo mbyoka tayi longo sha aapulakeni. Shi ninga meni lyethimbo ndyoka wa pewa. Ino pumbwa okupopya iitsa oyindji. Onkee ano, popya owala iitsa ya eleka. Oshitsa kehe nashi popiwe sha yela nawa. Fudha po kashona poshitsa kehe. Oohapu dhoye nadhi kale tadhi kunguluka nawa, uuna to zi kedhiladhilo limwe to taagulukile kekwawo.

Oto vulu okupopya iitsa ya simana moshipopiwa shoye petameko lela, opo aapulakeni yoye ya vule okweendela pamwe nangoye. Oto vulu wo oku shi ninga pehulilo, wu kwathele aapulakeni ya dhimbulukwe nuupu oshipopiwa shoye.