Endulula iitsa mbyoka ya simana

Mbela oho kakadhala okudhimbulukwa shoka wa konakona? Atuheni omathimbo nomathimbo oshinima shono ohashi tu ningilwa. Oshike tashi vulu oku tu kwathela? Oku endulula iitsa mbyoka ya simana.

Sho to konakona, fudha po kashona opo wu ndhindhilike oshitsa shoka sha simanenena. Shoka osho omuyapostoli Paulus a ladhipike aamwatate naamwameme ya ninge, uuna taya lesha ontumwafo ye sho a ti: “Ehuku lyaashoka tatu popi olyo ndika.” (Heb. 8:1) Okwa li a kwathele aapulakeni ye ya uve ko shoka a hala okutya nankene sha kwatathana nakehe shimwe a li a popi.

Pashiholelwa, otashi vulika wu longithe ominute omulongo, pehulilo lyekonakono lyoye wu tedhatedhe koshitsa sha simana kombinga yaashoka wa lesha. Ngele ito dhimbulukwa shoka wa lesha, tala uupalanyolo nenge omatumbulo, unene tuu etumbulo lyotango lyokatendo kehe, ke ku kwathele wu dhimbulukwe. Ngele owa ilongo oshinima oshipe, kambadhala oku shi yelitha niitya yoye mwene. Ngele owa kambadhala okudhiladhila kombinga yaashoka wa lesha, otashi ka kala oshipu kungoye wu dhimbulukwe shoka wa lesha. Notashi ke ku kwathela wo wu uve ko nawa nkene to vulu oku shi tula miilonga.