OSHILESHWA 01
Mbela Ombiimbeli otayi vulu oku ku kwathela monkalamwenyo?
Konyala kehe gumwe gwomutse, ohi ipula kombinga yonkalamwenyo, yokumona iihuna, yeso nosho wo yonakuyiwa ye. Ohatu ipula wo niinima yakwalukehe, ngaashi kombinga yiilonga, opo tu mone iimaliwa tu isile oshimpwiyu. Ohatu ipula natango kombinga yaashoka tashi tu kwathele tu kale tu na ombili momagumbo. Aantu oyendji oya mona kutya Ombiimbeli otayi yamukula omapulo ga simanenena ngoka ye na. Otayi gandja wo omayele ngoka taga vulu oku ya kwathela esiku nesiku. Ombiimbeli otayi vulu okukwathela omuntu kehe.
1. Omapulo gamwe geni ga yamukulwa mOmbiimbeli?
Ombiimbeli oya yamukula omapulo ga simana ngaashi: Oshe ende ngiini, opo iinima yi na omwenyo yi ye po? Elalakano lyonkalamwenyo olyashike? Omolwashike aantu taya mono iihuna? Oshike hashi tu ningilwa ngele twa si? Ngele kehe gumwe okwa hala ombili, omolwashike miilongo oyindji mu na iita? Oshike tashi ka ningilwa evi monakuyiwa? Ombiimbeli otayi tu lombwele tu konge omayamukulo gomapulo ngoka. Aantu oyendji oya mona omayamukulo taga mbilipaleke.
2. Ombiimbeli otayi tu kwathele ngiini tu kale twa nyanyukwa monkalamwenyo?
Ombiimbeli oyi na omayele omawanawa. Pashiholelwa, otayi kwathele aanegumbo ya kale ye na ombili yashili. Oyi na omayele gaashoka tu na okuninga uuna twa gwililwa po kiimpwiyu yonkalamwenyo nosho wo shoka tu na okuninga, opo tu kale tu hole iilonga yetu. Embo ndika otali ku kwathele wu ilonge shoka Ombiimbeli tayi ti kombinga yiinima mbyoka. Oto ka mona wo uuyelele owundji sho tatu li kundathana. Oto ke shi zimina kutya ‘enyolo kehe [ndyoka li li mOmbiimbeli] oli na oshilonga.’ — 2 Timoteus 3:16.
Embo ndika kali shi Ombiimbeli, ihe otali ku kwathele wu konakone Ombiimbeli. Onkee ano, otatu ku ladhipike wu leshe omanyolo agehe ngoka ge etwa mo, opo ihe to ga yelekanitha naashoka to ilongo.
ILONGA OSHINDJI
Tala nkene Ombiimbeli ya kwathela yalwe, nkene to vulu okukala wu hole oku yi lesha nosho wo kutya omolwashike wa pumbwa okukwathelwa wu yi uve ko.
3. Ombiimbeli otayi vulu oku tu ulukila ondjila
Ombiimbeli oya fa olamba. Otayi vulu oku tu kwathela tu ninge omatokolo gomondjila notu mone shoka tashi ka ningwa komeho.
Lesha Episalomi 119:105, e tamu kundathana omapulo taga landula:
Omunyoli gwEpisalomi ndika okwa li a tala ko ngiini Ombiimbeli?
Ngoye Ombiimbeli owe yi tala ko ngiini?
4. Ombiimbeli otayi yamukula omapulo ngoka tu na
Omukulukadhi gumwe okwa ti kutya Ombiimbeli oya yamukula omapulo ngoka a kala ti ipula nago uule momimvo odhindji. Dhana OKAVIDIO, e tamu kundathana omapulo taga landula.
Omukulukadhi ngoka a popiwa mokavidio, okwa li e na omapulo geni?
Sho a konakona Ombiimbeli oshe mu kwathele ngiini?
Ombiimbeli otayi tu ladhipike tu kale hatu pula omapulo. Lesha Mateus 7:7, e tamu kundathana epulo tali landula:
Omapulo geni wu na ngoka Ombiimbeli tayi vulu okuyamukula?
5. Oshike tashi ku kwathele wu kale wu hole okulesha Ombiimbeli?
Aantu oyendji oye hole okulesha Ombiimbeli nohaya mono mo uuwanawa owundji. Dhana OKAVIDIO, e tamu kundathana omapulo taga landula.
Aagundjuka mboka ya popiwa mokavidio, oya li ngaa ye hole okulesha?
Nonando kaya li ye hole okulesha, omolwashike ngashingeyi ye hole okulesha Ombiimbeli?
Oohapu ndhoka dhi li mOmbiimbeli otadhi vulu oku tu hekeleka noku tu pa etegameno. Lesha Aaroma 15:4, e tamu kundathana epulo tali landula:
Mbela owu uvitile ngiini ehekeleko netegameno ndyoka li li mOmbiimbeli?
6. Opu na mboka taya vulu oku tu kwathela tu uve ko Ombiimbeli
Aantu oyendji oya mona kutya nonando ohaya lesha Ombiimbeli paumwene, ohashi ya kwathele unene ngele taye yi kundathana nayalwe. Lesha Iilonga 8:26-31, e tamu kundathana epulo tali landula:
Oshike tashi vulu oku tu kwathela tu uve ko Ombiimbeli? — Tala ovelise 30 no 31.
Omulumentu Omuetiopia okwa li a pumbwa ekwatho, opo u uve ko Omanyolo. Aantu oyendji kunena oya mona kutya ohashi kala ekwatho enene kuyo ngele taya kundathana Ombiimbeli nayalwe
AANTU YAMWE OHAYA TI: “Okukonakona Ombiimbeli emanopo lyethimbo.”
Ngoye oto ti ngiini? Omolwashike to tile ngawo?
OWI ILONGO SHIKE?
Ombiimbeli otayi tu pe omayele ngoka tage tu kwathele monkalamwenyo, otayi yamukula omapulo ga simana notayi pe aantu ehekeleko netegameno.
Omapulo geendululo
Omayele geni tatu adha mOmbiimbeli?
Omapulo gamwe geni ga yamukulwa mOmbiimbeli?
Oshike wa hala okwiilonga mOmbiimbeli?
UUYELELE WA GWEDHWA PO
Tala nkene omayele gOmbiimbeli taga vulu oku tu kwathela monkalamwenyo.
“Omalongo gOmbiimbeli oge na owino tayi kalelele” (Oshungolangelo No. 1 2018)
Tala nkene Ombiimbeli ya kwathele omulumentu ngoka a kala ta hepekwa komadhiladhilo gokwiikutha omwenyo okuza kuunona.
Konakona omayele ngoka Ombiimbeli tayi gandja kombinga yonkalamwenyo yomomagumbo.
“Iinima 12 mbyoka tayi kwathele aanegumbo ya pondole” (Penduka mo! No. 2 2018)
Tala nkene Ombiimbeli tayi kwathele aantu oyendji mboka ye na euvoko lya puka kombinga yaangoka ta pangele uuyuni.
Omolwashike wa pumbwa okukonakona Ombiimbeli? — Okavidio akehe (3:14)