Popya iitya ya yela

Shoka Jesus a li a ningi

OKAVIDIO: Jesus okwa ulika kutya Tate yetu gwomegulu oku na ko nasha natse

1. Tala OKAVIDIO, nenge wu leshe Mateus 6:25-27. Opo ihe to yamukula omapulo taga landula:

1. Jesus okwe shi ulike ngiini kutya Jehova oku na ko nasha natse?

2. Nonando Jesus okwa li e shi iinima oyindji kombinga yoondhila, ongiini a longitha iitya ya yela sho a popi kombinga yadho? Omolwashike ngono gwa li omukalo dhingi gwokulonga aantu?

Oshike tatu ilongo koshiholelwa shaJesus?

2. Uuna tatu longo aantu tatu popi iitya ya yela nawa, aantu otaya ka dhimbulukwa shoka twe ya longa notashi ka guma omitima dhawo.

Holela Jesus

3. Ino popya iinima oyindji. Pehala lyokupopya okanima kehe hoka wu shi kombinga yoshikundathanwa, gandja owala eitulomo kuuyelele mboka wu li moshileshomwa shoka tamu konakona. Uuna wa pula omukonakoni epulo, tegelela neidhidhimiko e li yamukule. Ngele eyamukulo ke li shi, nenge a popi oshinima shoka kaashi li metsokumwe nomalongo gOmbiimbeli, longitha omapulo ga gwedhwa po wu mu kwathele opo a mone eyamukulo. Ngele omukonakoni gwoye enenedhiladhilo oku li uvite ko, nena puleni komeho.

4. Tungila kiinima mbyoka omukonakoni e shi nale, wu mu kwathele a uve ko mbyoka iipe. Pashiholelwa, manga inamu tameka oonkundathana kombinga yeyumuko, oto vulu okupula omukonakoni kutya oku shi shike shi na ko nasha nonkalo yoonakusa.

5. Longitha omathaneko taga opalele. Omanga inoo longitha ethaneko, ipula to ti:

1. ‘Mbela ethaneko ndino epu ngaa nokuuviwa ko?’

2. ‘Omukonakoni ote ke li uva ko ngaa nuupu?’

3. ‘Mbela otali ke mu kwathela ngaa a uve ko enenedhiladhilo, nenge pamwe ota ka dhimbulukwa owala ethaneko?’