Oshigwana Sha Nyanyukwa
OSHIGWANA sha nyanyukwa! Mbela ehokololo ndika otali opalele ngaa kukehe oshigwana shi li muuntu nena? Mbela kehe oshigwana otashi vulu ngaa okutya kutya sho osha kutha po ekuni, iilonga yomuyonena, oluhepo, enyateko, omikithi tadhi nkundipaleke, enyokomo lyoopolotika, nuutondwe wopamalongelokalunga? Mbela kehe oshigwana ohashi gandja ngaa etegameno lyashili kutya sho otashi ka adha elalakano lya tya ngaaka? Nandonando!
Onkalo mbela muuyuni auhe oyi li ngiini? Mikhail Gorbachev, omupresidente gwa USSR, omvula ya za ko mo 16 gaJuli okwa tile: “Tse otatu laleke ethimbo limwe lyomakwatathano gopaigwana notatu katukile kulilwe, ndyono pakudhiladhila kwandje olyo tali ka kala ethimbo lyombili oyindji notayi kalelele.” Ihe oshifo Time shopethimbo olyo tuu ndyoka osha kundaneke kutya Iilongohangano oyu ukitha natango omitse dhiitopi yopakerna 120 kuMoskou, moka kehe shimwe shomoshilando moka tashi ka mbugalekwa thiluthilu. Nopwaanomalimbililo, oSoviet Union oyi ilongekidhila olugodhi naanaa ngaashi yo. Molwashoka iilyo yi ili noyi ili yomIigwanahangano oya tseya nkene iilwitho yopakerna hayi ndulukwa, itashi eta nando enyanyu okutengeneka kutya olye te ku umba tango.
Oshigwana Sha Nyanyukwa Shili
Mondjokonona omwa li oshikando shimwe—oomvula 3 500 lwaampono dha piti po—oshigwana sha nyanyukwa shili. Osha li Israel shonale. Sho Kalunga a mangulula oshigwana shoka methiminiko lyaEgipiti, sho oshi imbi ondjimbosindano yeligolo pamwe naMoses, nosha li sha nyanyukwa sho sha vulika kuKalunga kasho nOmuhupithi gwasho.—Eksodus 15:1-21; Deuteronomiun 28:1, 2, 15, 47.
Melelo lyaSalomo “Aajuda nAaisrael oya li ko oyendjiyendji ye thike pehekevi lyopefuta, ya li ya kuta noya nyanyukwa.” Olya li ethimbo lyenyanyu enene, ndyoka lya adha oshitsa shopombanda nedhiko lyaashoka tashi vulika sha li etungo ewanawa noonkondo mondjokonona ayihe, otempeli yokugalikanena Jehova muJerusalem.—1 Aakwaniilwa 4:20; 6:11-14.
Oshigwana Sha Nyanyukwa shoNena
Israel shonale osha li sha thaneke oshigwana shonena. Oshini po mbela? OIsrael mbela shopapolotika shokUuzilo woPokati? Iikundaneki yoonkundana otayi ulike kutya oshigwana shoka tashi kondjo kashi na nando enyanyu. Mbela shoka osho aniwa Iigwanahangano osha li ngaa she etele iilongo mbyoka yi li iilyo yasho enyanyu lyashili? Aawe, enyanyu lyashili itali vulu okwaadhika nando opamwe mokati kiigwana yonena yoopolotika. Olwiho, enyokomo nokwaahena uumoshili oyo tayi pangele, nomiilongo oyindji kaantu yowala oshi li ekondjo edhigu okukala nomwenyo.—Omayeletumbulo 28:15; 29:2.
Ihe nena oku na oshigwana oshindhindhilikwedhi shoka sha nyanyukwa unene noonkondo. Kashi shi shopapolotika, oshoka Omuwiliki gwasho, Jesus Kristus, okwa popya kombinga yoshigwana she a ti: ‘Ne kamu shi yomuuyuni.’ (Johannes 15:19) Iigwanahangano oya hangana owala medhina, omanga oshigwana sha nyanyukwa tashi hili aayambidhidhi mboka ye hole ombili ‘maapagani ayehe nomiilongo ayihe nomiigwana ayihe nomomalaka agehe.’ (Ehololo 7:4, 9) Oshigwana ngashingeyi oshi na aakalimo ye vulithe pomamiliyona gane lwaampono, mboka oyendji ye vule konyala 60 dhomiilongo mbyoka yi li iilyo yo UN yi thike po 160. Omalaka gi ili nogi ili gaantu mboka omamiliyona gane oge thike po 200 lwaampono; ihe nonando ongeyi yo ayehe ohaa popi “elaka lya yogoka” limwe alike.—Sefanja 3:9, NW.
Oshikumithi mbela okuuva kutya oongundu dhopaigwana dhi ili nodhi ili odhindji dhi thike mpono ohadhi popi elaka limwe? Hasho nando, molwashoka elaka ndika ehanganithi olya kwatela mo etumwalaka lyUukwaniilwa waKalunga wuuyuki mboka tau ya. Oshigwana shika sha nyanyukwa otashi zi “kooha dhuuyuni” nosha tseyika muuyuni auhe osho ‘Oonzapo dhaJehova.’ (Jesaja 43:5-7, 10, NW; Sakaria 8:23) Oto ke ya adha konyala shaa mpono kombanda yevi.
MuJesaja 2:2-4 omuprofeti gwaKalunga ota hokolola ongundu yaantu ndyoka tayi mbomboloka okuza miigwana ayihe mokutya: “Ileni, tu ka londeni kondundu yOmuwa, omongulu yaKalunga kaJakob, oye e tu longe okutseya oondjila dhe, tse tu ende nomapola ge.” Yo otaa hiya yalwe nuuladhi ya longwe kuJehova mokupitila mOohapu dhe, Ombimbeli, opo yo ya vule okwiilonga okulonga ehalo lye. Oshigwana shimwe shika otashi landula ondjila yombili yashili, molwashoka aantu yasho ‘oya hambululula nale omagongamwele gawo omatemo nomagonga gawo iimwitho; noihayi ilongo we iita.’ Dhoshili, oshigwana sha nyanyukwa noonkondo!
Ngoye oto vulu wo okunyanyukilwa enyanyu ndika. Ngoye oto vulu okwiilonga kombinga yesiku tali endelele uuna Omukwaniilwa, Jesus Kristus, ta ka hanagula po aantu aanyateki nomapangelo nota ka ningulula Oparadisa kombanda yevi. (Daniel 2:44; Mateus 6:9, 10) Oonzapo dhaJehova otadhi mono nokuli ngashingeyi enyanyu enene miilonga yadho, dhi li oshigwana sha hangana shili, oyo okulongekidha omalongekidho omolwethimbo ndyoka lyeadhimo lyombili yashili, ngaashi omapandja taga landula taga ka ulika.