Enyanyu lyomUuyuni Auhe
“TALA, aamati yandje otaa kala nokuligolela enyanyu lyokomwenyo.” (Jesaja 65:14) Jehova okwa popitha omuprofeti gwe Jesaja oohapu ndhika, noohapu dhe odhi na egwanitho ekumithi ngiini mokati kOonzapo dhaJehova! Mbela omolwetompelo lini po dho dhi na enyanyu lyopamwenyo? Olyo euliko kutya yo otaa galikana Jehova Kalunga muukumwe umwe. Ye oye “Kalunga omunelago,” naamboka taye mu galikana, otaa ‘nyanyukwa muJehova.’ (1 Timoteus 1:11; Sakaria 10:7, NW) Eigandjo ndika li na enyanyu otali ya hanganitha ya ninge oshigwana shimwe omanga yo taa uvitha pamwe onkundana ombwanawa yUukwaniilwa notaa tanga Kalunga kawo muuyuni auhe.—Ehololo 7:9, 10.
‘Enyanyu Ndyoka Kaapu Na Ngoka Ta Vulu Oku Li Ya Kutha’
Dhoshili, kOonzapo dhaJehova euvitho lyedhina lyaKalunga nUukwaniilwa we olyo onzo yenyanyu tali kalelele. (Markus 13:10) Dho ohadhi pulakene koohapu dhomupsalmi sho ta ti: “Isimanekeleni edhina lye eyapuki, oomwenyo dhoonakukonga Omuwa nadhi nyanyukwe!”—Epsalmi 105:3.
Yo ohaa taaguluka olundji iipundukithi opo ya vule oku shi ninga. MuSpania Isidro okwi iyapulile Jehova, nokwa li a hala okupopya nayalwe kombinga Ye. Ihe ye okwa li omuhingi gwololi yomitsalo ngoka ihaa mono ethimbo, he ende omalweendo omale uusiku, nomutenya oha kotha. Isidro okwa li a hala u uvithile aahingi ooyakwawo yololi yomitsalo, ihe ongiini mbela a li ta vulu oku shi ninga?
Ye okwa tula okawayela mololi ye yomitsalo hoka ye a li ta vulu okulongitha okupopya naahingi yalwe. Ye okwa mono mbala okanala ndjoka hayi longithwa kashona, okanala 13, nokwa tokola oku yi longitha. Sho ye petameko a lombwele aahingi ooyakwawo yololi yomitsalo kutya yo otaa kundathana Ombimbeli mokawayela, dhoshili yo oya li inaaye shi hala naanaa. Ihe yamwe oya pulakene. Yalwe oyu uvu oshinima shino, naahingi yololi yomitsalo Aaspania mboka ya pulakene kokanala 13 oyi indjipala. Isidro opo a li u uvu kutya oku na gumwe ngoka a katuka oonkatu okutsikila nokukonakona kwe Ombimbeli.
MuItalia omulumentu oku uvu kombinga yOonzapo dhaJehova mokupitila moonkundathana ndhoka ye a li e na mombesa. Omukiintu gwe okwe dhi tsakanithithwa kukuume ke. Ayehe yaali oya konakona Ombimbeli noya li ye na ehalo enene okuhokololela yalwe iinima mbyoka yo yi ilongo. Yo oya li ye na ehalo enene opo omulumentu a tinde okuhumithwa komeho mehanganongeshefa lye, nomukiintu okwe etha po iilonga mbyoka hayi futu nawa opo ya longithe ethimbo olindji mwaashono okuhokololela yalwe onkundana ombwanawa yUukwaniilwa. Shika mbela osha li ngaa sha ti sha? Eeno, omulumentu ota ti: “Okuza sho twa mono ontseyo yoshili, ngame nomukiintu gwandje otwa nyanyukilwa enyanyu okukwathela aantu 20 okumona ontseyo yashili yompangela yaKalunga. Uuna ngame ongulohi tandi shuna kegumbo konima yokulonga kwandje miilonga yaJehova, ohandi kala ndu uvite nda vulwa. Ihe ondu uvite elago, nohandi pandula Jehova sho a pe ndje enyanyu ndyoka kaapu na ngoka ta vulu oku li kutha ndje.”
“Sigo Okooha dhUuyuni”
Mboka taa ningi oshigwana shaKalunga sha nyanyukwa, otaa holola uuladhi wa faathana shaampono yo ye li, nokuli “kooha dhuuyuni.” (Iilonga 1:8) Opu na omahala omashona ge li kokule ngaashi Greenland shokolundume. Ihe nonando ongeyi, omuntu oto adha ko okagongalo okashona, Hulissat, ke li ookilometa 320 okuza pOngonga yOpole yokOlundume, hoka ka thikama maantu 19. Yo ohayu uvitha onkundana ombwanawa ya faathana noyAaitalia mboka aahokanathani yaali, nomvula ya zi ko yo oya li ya nyanyukwa sho aantu yokuGreenland yaheyali yi ininginitha olyo endhindhiliko lyokwiiyapulila kwawo Jehova.
Ookilometa omayuvi ogendji okuza kuGreenland, kontuntu ya Mauritius ndjoka yi li popepi nomudhingoloko gwaekwator noyi li mEfuta enene lyaIndia, Anjinee ota nyanyukilwa enyanyu lya faathana. Anjinee okwa li a mono tango omaupyakadhi ogendji. MuMauritius omakugongala gopaKriste nokuuvitha montaneho kombinga yaKalunga inaku talika ko oko iilonga iiwanawa komukadhona inaa hokanwa a za mAahindu-India. Ihe Anjinee okwa kala i idhidhimika. Konima yoomvula omugoyi sho ye a tameke okulandula ondjila yopaKriste, ngashingeyi yamwe yomaakwanezimo lye nayo otaa konakona Ombimbeli.
Tse otu na wo okupopya kombinga yaEmilio, ngoka e li kokulekule muHonduras. Emilio oku uvu nkene ookuume yokiilonga taa kundathana Ombimbeli kiilonga nokwa pula ngele ye ota vulu okukwatelwa mo muyo. Ye ka li e shi okulesha, ihe okwa li e shi nyanyukilwa okupulakena kootekisti dhOmbimbeli sho tadhi leshwa. Sho ooshili dhopaKriste dha gumu omwenyo gwe, Emilio okwe etha omikalo dhe dhonkalamwenyo yokwaahenuuyogoki nokwa hulitha po okunwa sha pitilila. Oonzapo dhaJehova odhe mu longo okulesha nokunyola, nongashingeyi ye ota longo moshigwana shaKalunga sha nyanyukwa.
Ookilometa omayuvi okuza kuuningininolundume waHonduras meme Omueskimo muAlaska okwi ilongo oshili yopaKriste oyo tuu ndjoka. Omukulukadhi nguka okwa kala mondoolopa yi li kokule noonkondo, nekwatathano lye nOonzapo dhaJehova olya li owala okupitila mopoosa. Ano ye okwa konakona okupitila mopoosa, omapulo ge okwe ga pulwa moontumwafo nongashingeyi ye oha hokololele aashinda ye nuuladhi iinima mbyoka ye e shi. Opu na iimoniwa oyindjiyindji ya tya ngaaka. Muuyuni auhe aanamutimahenda otaa mbombolokele ‘mokulongela Jehova nenyanyu.’—Epsalmi 100:2, faathanitha NW.
‘Ne Omu Na Okukala Mu Holathane’
Sha shoka tashi hili aantu ayehe mbaka, osho ohole ndjoka yi li mokati koshigwana shaKalunga shoka sha nyanyukwa. Jesus okwa ti: “Opo mpoka ayehe taye mú dhimbulula, one aalongwa yandje, ngele mu holathane.” (Johannes 13:35) Ohole yopaKriste ohayi monika monkalamwenyo yesiku kehe yAakriste mbaka aayuki, na unene tuu pethimbo lyiiponga iinene.
Moshilongo shimwe shomuAfrika moka iilonga yOonzapo dhaJehova ya li yi indikwa, omwa li oshikukuta sha kwata miiti. Aantu omayuvi omulongo oya si, nomausita agehe goongombe oga si po. Ongiini nee mbela Oonzapo dha li dha kala nomwenyo? Omokulya omidhi dhiimeno noonkenya dhoshiyimati hashi ithanwa oavokado dha telekwa! Ihe onkalo yawo oya li ya hwepopala noonkondo sho Oonzapo miilongo yilwe dha mono epitikilo inaadhi shi tegelela kekwatho lyaKalunga opo ootona 25 dhiinima yokukwathela dhi tuminwe hoka. Dhoshili, iinima mbika okwa li ya tumwa metonatelo lyaakwiita okushilipaleka kutya yo otayi thikithwa ngaa nawa!
Oonzapo ndhoka dhomuAfrika odha li dha nyanyukwa shili noonkondo okumona euliko lyohole ndika tali zi kaamwayina, nodha mono egwanitho lyoohapu dhaJesaja: “Tala, oshikaha shOmuwa inaashi fupipala shokuhupitha, nomakutsi ge inaaga thita gokuuva.”—Jesaja 59:1.
Oshigwana Oshinambili
Aanamutimahenda otaa hilwa wo koshigwana shaKalunga shoka sha nyanyukwa molwashoka iilyo yasho oya thiga po oondjila dhuuyuni mbuka dhomahalo giita ‘nosha hambulula omagongamwele gasho omatemo.’ (Jesaja 2:4) MuEl Salvador megumbo lyagumwe ngoka a li omukwiita nale omwa li mu udha iidhimbulukitho yiinima mbyoka ye a li a ningi sho ye a li omukwiita. Ihe sho ye a tameke okukonakona Ombimbeli pamwe nOonzapo dhaJehova, ye okwa tameke okukala e na ohokwe yiinima yuunambili. Lwahugunina ye okwa halakanitha po iinima ayihe mbyoka ya li yi na sha niita megumbo lye nokwa tameke okulonga nuuladhi iilonga yeuvitho.
Sho aakwiita mboka taa kondjitha epangelo ya lala ondoolopa ye, ye okwa kwatwa—tashi vulika gumwe a li a ti kutya ye okwa li nale omukwiita. Ihe ye okwa yelitha kutya ye ke shi we omukwiita, ihe ogumwe gwomOonzapo dhaJehova. Aanashipotha oye mu lundile kutya ye oku na iilwitho megumbo lye, ihe sho mwa konakonwa inamu monika sha. Opo nduno omuwiliki gwaanashipotha okwa pulapula aashiinda kombinga ye. Shoka sha tiwa kwaayehe osha li: “Ohe endaenda owala nepandaanda nohu uvitha esiku kehe Ombimbeli.” Omulumentu okwe ethiwa. Pwaanomalimbililo, uuladhi we owe mu kwathele opo omwenyo gwe gu hupithwe.
Ehokololo okuza moshilongo shaAfrika otali hokolola kombinga yaakwiita yaali mboka ya konakona Ombimbeli nOonzapo dhaJehova. Gumwe okwa li a longele etanga lyoshilongo nagulwe okwa li a kondjele aanashipotha. Konima yethimbo ayehe yaali oya tokola ya ‘hambulule omagongamwele gawo omatemo.’ Noya laleke ya ze mo metanga. Sho ya kala pomakugongala gopaKriste oshikando shotango, omukwiita ngoka a li ta kondjitha epangelo okwa pula mukwawo: “Oto ningi shike mpano?” Ye okwa yamukula: “Ngoye nangoye oto ningi shike mpano?” Ehokololo otali hulithwa: “Opo nduno oyi idhingatele, nomahodhi oga li taga tondoka kenyanyu molwashoka yo ya li taa vulu okukwatathana mombili.” Pwaanomalimbililo, ayehe yaali mbaka ya li nale aakwiita oya galikana Kalunga: “Kalunga, Kalunga kehupitho lyandje, kutha ndje mondjo yombinzi, elaka lyandje noli na okuhambelela uuyuuki woye.”—Epsalmi 51:16.
‘Wa Tala Oluhepo Lwandje’
“Nyanyudha ndje pombanda, ndi nyanyukilwe esilohenda lyoye, sho wa tala oluhepo lwandje nowa dhimbulula uuwehame womwenyo gwandje.” (Epsalmi 31:8) Omupsalmi osho a galikana ngaaka, noyendji nena oya nyanyukwa molwashoka Oohapu dhaKalunga dhe ya kandulile po oluhepo lwawo. MuFulaanisa gumwe gwomOonzapo dhaJehova oha ningi ekonakono nomukiintu ngoka a hepekwa komukithi gwopamwenyo hagu ithanwa oskisofreni. Omukiintu nguka okwa kala ethimbo ele ta mono epango komutseyimwenyo, ihe inashi kwatha sha. Oshiwike shono konima sho a tameke ekonakono naye, omutseyimwenyo okwa pula: “Owu uvite ko ngaa shili shoka omukiintu nguka te ku fatululile mOmbimbeli?” Ano oshiwike sha landula ko Onzapo oya yi kondjugo yokukundathanena ye nomanga ye opo e li yo oya ningi Ekonakonombimbeli nomukiintu.
Konima yekonakono omutseyimwenyo okwa lombwele Onzapo: “Ngame oomvula adhihe onda kala nokuholola ohokwe melongelokalunga lyomupangwa gwandje, ihe onda ndhindhilike kutya kaku na elongelokalunga lya gandja eambidhidho lyashili. Ihe kombinga yoye oshi ili. Meme P—— ohe ya lwaali moshiwike omolwekwatho, noha futu ndje mwaashoka. Ihe nelongo lyoye lyOmbimbeli nepukululo lyoye ewanawa ngoye oto longo oshali iilonga iiwanawa yi vulithe yandje. Ye ota humu komeho nawa. Tsikila okuninga ngaaka, notandi ku shilipaleke kutya ngame otandi ku kwathele uuna we shi pumbwa.”
Ombimbeli otayi ti: “Aanelago aantu mboka ya tseya enyanyu. Jehova, yo ohaye ende muuyelele woshipala shoye. Esiku alihe ohaa nyanyukwa medhina lyoye.” (Epsalmi 89:15, 16, NW [89:16, 17, OB]) Kehe gumwe gwomOonzapo dhaJehova okwa tseya kutya epsalmi ndika olyoshili. Momakana gawo ohamu inyenge eigidho lyenyanyu muuyuni auhe taa tanga Jehova. Aantu otaa mbomboloka neindjipalo taa zi miigwana okutanga Kalunga pamwe nayo. Ano ngoye oto vulu okwiitula muyo nokumona kungoye mwene enyanyu ndyoka.
[Ethano pepandja 7]
Oonzapo dhaJehova muEuropa lyokUuzilo otadhi nyanyukilwa ngashingeyi okumanguluka kwadho okupe okumona nokukonakona “Oshungolangelo” momalaka gadho yene.