Ombimbeli—Ondjapuki Mbela Shili?

AANTU yangapi mbela nena ya tala ko Ombimbeli oyo ondjapuki noyo Oohapu dhaKalunga? Methimbo ndika lyomalimbililo, oyendji otaa dhiladhila kutya kayi shi yoshinanena noitayi ti sha, noya limbililwa ngele yo ondjapuki tuu shili. Nokuli yamwe yomaawiliki yelongelokalunga lyUukwakriste otaa longo kutya Ombimbeli oyu udha omihapo noongano. Yo oya limbililwa ‘ngele omuntu omunandunge ota vulu ngaa okutsa kumwe neyelithilo lyondjokonona yOmbimbeli.’—The Interpreter’s Dictionary of the Bible, Oshitopolwa 2, epandja 611.

Aalongwantu ya simana otaa taandeleke omalimbililo kutya inashi uka okutya kutya Ombimbeli oyo Oohapu dhaKalunga. Gumwe okwa ti “ngele omuntu okwa hala okulongitha uutumbulilo Oohapu dhaKalunga, uutumbulilo wu uka kOmbimbeli otau ka kala Oohapu dhaIsrael, Oohapu dhayamwe yomAakriste ya simana yonale.” (The Bible in the Modern World, kuJames Barr) Ngoye oto dhiladhila mbela ngiini? Ombimbeli mbela Oohapu dhaKalunga? Ondjapuki mbela shili?

Olye A Nyola Ombimbeli?

Genesis, embo lyotango lyOmbimbeli, pamithigululwakalo ohaku tiwa kutya olya nyolwa kuMoses, Omuheberi ngoka a li ko lwopoomvula 3 500 dha piti. PaMbimbeli yo yene, aalumentu ye thike lwopo 40 yomomithika adhihe oyo ya kwathele okunyola oshihupe shOmanyolo, shoka sha fala sigo opegongelo lyomambo nenge iitopolwa 66 yOmbimbeli. Ihe aalumentu mbaka inayi itala ko yo yene oyo aanyoli yolela yOmbimbeli. Omunyoli gumwe okwa ti: “Enyolo kehe lya nyolwa koonkondo dhOmbepo yaKalunga.” (2 Timoteus 3:16) Gulwe okwa nyola kombinga yaanyoli yOmbimbeli: “Aantu oya popi ndhoka ye dhi pewa kuKalunga, Ombepo Ondjapuki sho e ya longitha.”—2 Petrus 1:21.

Shika otashi ningi aanyoli oohamushanga, mboka yu ukithwa nenge ya wilikwa kuKalunga. PaMbimbeli, olwindji omunyoli okwa li ha pitikwa a longithe iitya ye mwene mokunyola kwe uuyelele mboka a pewa kuKalunga. (Habakuk 2:2) Omolwashoka Ombimbeli ya nyolwa momikalo odhindji. Ihe okunyola okwa li aluhe kwa wilikwa kuKalunga.

Uushili kutya aanyoli mbaka otaa ti oya nwethwa mo kuKalunga, dhoshili itau ulike kuwo wene kutya Ombimbeli oyo etumwalaka lyopakalunga ndyoka Omushiti a pa aantu. Nonando ongaaka, ekonakono lyuukeka nokaali na okayoya lyembo lyo lyene oli na okuulika sha yela ngele Gwopombandambanda oye Omunyoli gwOmbimbeli nenge aawe. Ombimbeli mbela otayi gandja uunzapo kutya oya nyolwa kuKalunga? Otatu vulu mbela okupopya nuushili kutya Ombimbeli ondjapuki?