Kalunga Ota Kala Natango I Idhidhimika Uule U Thike Peni?

OOMVULA dhi thike lwopo 3 000 dha piti, omulumentu omunamayele okwa nyola: “Omuntu ta pangele omukwawo noku mu pangelela oshiponga.” (Omuuvithi 8:9) Nokuza sho a popi oohapu ndhika, iinima inayi hwepopala nando. Mondjokonona ayihe aantu nenge oongundu dhaantu oya kala nokukutha ko epangelo kulimwe nalimwe, taya pangele aantu yalwe noku ya lila monomola. Jehova Kalunga okwa kala e shi idhidhimikila.

Jehova okwa kala i idhidhimika sho omapangelo ga tumu omamiliyona keso lyago miita noge etha okwaahenuuyuki okunene kwomahupilo. Nena, okwi idhidhimika natango sho omuntu ta hanagula po oshiyalo shoozone nokuyonagula ongandjombepo nefuta. Okumona evi ewanawa tali hanagulwa po nokudhimwa po kwiiheke niinamwenyo niimeno inaaku pumbiwa, inashi mu yemateka tuu!

Omolwashike Kalunga I Idhidhimika?

Eudhi lya nathangwa otali vulu oku tu kwathela okuyamukula epulo ndika. Dhiladhila shoka tashi ka adha ongeshefa ngele omulongi ota tsikile okuya a tokelwa. Mwene gwayo oku na okuninga po shike mbela? Okukatuka owala pauyuki otaku vulu oku mu ningitha opo a laleke omuniilonga mbalambala. Ihe otashi vulika a dhimbulukwe eyele lyOmbimbeli: “Onakutalonteni oye omuyamba gwomayele, nonakukehuka ta tumbile pombanda uugoya.” (Omayeletumbulo 14:29) Omayele otaga vulu oku mu tegelelitha manga inaa katuka onkatu. Otashi vulika a tokole okupititha po ethimbo opo gumwe i ili a vule okulongwa a pingene po omuniilonga ngoka opo ongeshefa kaayi vundakane.

Ota vulu wo okutegelela molwolukeno. Ota vulu okulondodha omuniilonga ngoka ha tokelwa okumona ngele okwa hala okulundulula. Ota vulu nokuli okupopya naye opo a tale ngele okutokelwa kwe kwaaluhe omolwuupyakadhi tau vulu okukandulwa po nenge omolwiikala iiwinayi mbyoka ihayi lunduluka. Nonando mwene gwongeshefa ota vulu okutokola okwiidhidhimika, okwiidhidhimika kwe otaku ka kala kwa ngambekwa. Omuniilonga oku na okulundulula eihumbato lye nenge oku na okuzimina kutya lwahugunina ota ka kanitha iilonga ye. Otashi ka kala owala oshiwanawa kongeshefa yo yene nokaaniilonga mboka haa dhiginine oompango.

Jehova Kalunga ohi idhidhimike konyala pamukalo gwa faathana okupititha po ethimbo ngele pwa yonwa sha opo a vule okukandula po omaupyakadhi gontumba komukalo gwuuyuki. Kakele kaashono, okwiidhidhimika kwe ohaku gandja ompito kaayoni opo ya lundulule oondjila dhawo nokumona omalaleko nuuyamba gaaluhe. Ano Ombimbeli otayi tu londodha twaaha uvile nayi okwiidhidhimika kwaKalunga. Pehala lyaashono yo otayi ti: “Ontalanteni yOmuwa gwetu yi taleni oyo ehupitho.”—2 Petrus 3:15.

Oshiholelwa shOkwiidhidhimika kwaKalunga

Jehova Kalunga okwa kala i idhidhimika manga Eyelu enene lyopethimbo lyaNoa inaali ya. Uuyuni wopethimbo ndyono owa li wu udha omuyonena nuukolokoshi owindji. Otatu lesha: “Omuwa sho a mono ko, uuwinayi waantu kombanda yevi wa koko . . . Omuwa okwa popi: Aantu nde ya umbu onda hala oku ya dhima po kombanda yevi.” (Genesis 6:5, 7) Eeno, pethimbo mpono Jehova okwa li ta dhiladhila ekandulopo ndyoka a li ta ka ninga hugunina okukandula po uupyakadhi wuukolokoshi: okudhima po aakolokoshi. Ihe ine shi ninga mbalambala. Omolwashike mbela?

Omolwashoka haayehe ya li aakolokoshi. Noa nuukwanegumbo we oya li aayuki koshipala shaKalunga. Jehova okwa kala a tegelela nokwiidhidhimika molwawo opo aantu aashona mboka aayuki ya vule okwiilongekidhila ehupitho lyawo. Okutegelela ethimbo ele hoka okwa pe wo Noa ompito okukala e li “omuuvithi guuyuuki” opo aakolokoshi mboka ya vule okukala ye na okathimbo okulundulula omikalo dhawo. Ombimbeli otayi ti: “Ontalanteni yaKalunga sho ye ya tegelelele opomasiku ngeyaka gaNoa, onguluwato sho ya hongwa, moka mwa hupile mo yamwe ayeke, aantu yahetatu ya hupithwa komeya.”—2 Petrus 2:5; 1 Petrus 3:20.

Molwashike Kalunga I Idhidhimika Nena

Nena, onkalo oya faathana. Uuyuni owu udha ishewe omuyonena. Ngaashi pethimbo lyaNoa, Kalunga okwa pangula nale uuyuni mbuka, mboka Ombimbeli tayi ti kutya owa “tsilikilwa esiku lyepangulo nolyehanagulo lyaantu aakaanakonashanakalunga.” (2 Petrus 3:7) Ngele sha ningwa, itapu ka kala we eyonagulo lyevi, ethininiko lyaankundi nenge okulongitha nayi oonkondo omolwolwiho.

Omolwashike nduno Kalunga inaa hanagula po nale aakolokoshi? Omolwashoka opwa li oompata ndhoka dha li dhi na okukandulwa po niinima ya simana mbyoka ya li yi na okulongekidhwa. Dhoshili, Jehova okwi ipyakidhila okweeta ekandulopo tali kalele okukandula po uupyakadhi wuukolokoshi, nolya kwatela mo iinima oyindji, mwa kwatelwa ehupitho lyaayuki okuza muupika womikithi neso.

Opo Jehova a adhe elalakano ndyoka lya tumbulwa hugunina, ye okwa li nompangela yokweeta po Omuhupithi ngoka a li ta ka futa ekulilo lyoondjo dhetu. Ombimbeli otayi ti kombinga ye: “Oshoka osho Kalunga kwa li e hole uuyuni, oye a gandja Epona lye, opo sha ngoka e mu itaale, kaa kane, ihe a mone omwenyo gwaaluhe.” (Johannes 3:16) Oomvula omayuvi odha li dha pumbiwa okulongekidhila Jesus ondjila opo a vule okuya nokuyamba omwenyo gwe omolwaantu. Ethimbo lyoomvula adhihe ndhono, Kalunga okwa kala i idhidhimika nohole. Ihe kalya li mbela esiloshimpwiyu ndyoka lya gwana okutegelelwa?

Jesus okwa gandja ekulilo kaantu konyala oomvula omayuvi gaali dha piti. Omolwashike nduno Kalunga i idhidhimika natango? Okutumbula owala etompelo limwe, eso lyaJesus olyu ulike etameko lyoshilonga oshinene shelongo. Aantu oya li ye na okutseyithilwa esiloshimpwiyu ndika lyohole nokupewa ompito oku li taamba ko nenge oku li ekelahi. Osha li sha pula ethimbo, ihe osha li ethimbo ndyoka lya longithwa nawa. Ombimbeli otayi ti: “Omuwa ina sa uunye okugwanitha euvaneko lye, ngaashi yamwe haa dhiladhila, okwa sa uunye aniwa, aawe, okwe mú tala onteni, oshoka ina hala, ku kane nando gumwe, aawe, ayehe yi itedhulule.”—2 Petrus 3:9.

Ompata Yi Na Sha nEpangelo

Oshinima shilwe sha simana osha li wo tashi ka pula ethimbo. Ompata yi na sha nepangelo lyomuntu oya li yi na okukandulwa po. Petameko aantu oya li kohi yepangelo lyaKalunga. Ihe moshikunino shaEden aakuluntu yetu yotango oye li pilamene. Oya hogolola okukala ya manguluka ko kuKalunga noya halele okwiipangela yo yene. (Genesis 3:1-5) Ihe omuntu ina shitwa lelalela i ipangele ye mwene. Omuprofeti Jeremia okwa nyola: “Eeno, Omuwa, ondi shi shi, oondjila dhomuntu ihadhi kala momapangelo ge mwene nenge moonkondo dhomulumentu te ende, ku uthe ando oonkatu dhe, e dhi fale kethikilo.”—Jeremia 10:23; Omayeletumbulo 20:24.

Nonando opwa holoka ompata yi na sha nepangelo, Jehova okwe etha neidhidhimiko pu pite ethimbo opo yi kandulwe po. Dhoshili, pasilohenda lye ye okwe ethele aantu uule woomvula omayuvi ya konakone omapangelo agehe ngoka taga dhiladhilwa kaantu. Oshilanduliko osha li mbela ngiini? Oshu ulike sha yela kutya kaku na epangelo lyomuntu tali vulu okukutha po omathininiko, okwaahenuuyuki nenge iiyeti yilwe yokwaahenelago.

Dhoshili, okutala kondjokonona yomuntu, opu na ngaa mbela ngoka ta vulu okutya shili kutya Kalunga ke shi omuyuki sho ta tseyitha ompangela ye yokukutha po omapangelo agehe gaantu noku ga pingena po nepangelo lye? Hasho nando! Dhoshili, tse otatu nyanyukilwa egwanitho lyehunganeko lyOmbimbeli ndika: “Ihe pomasiku gaakwaniilwa mbeyaka Kalunga ngoka gwomegulu ota ka dhika uukwaniilwa itau ka teka po sigo aluhe, nelelo lyawo itali ka gandjwa koshigwana shilwe. Ihe wo otau ka nyanyagula notau ka teyagula omaukwaniilwa agehe noku ga hulitha po, nowo wene tau kala sigo aluhe.”—Daniel 2:44, KB.

Omukwaniilwa gwomegulu gUukwaniilwa mboka oJesus omuyumudhwa. Osha pula ethimbo oku mu longekidhila ondondo ndjoka nosho wo okuhogolola aantu mboka taa ka pangela pamwe naye. Kalunga okwa kala ethimbo alihe ndyono i idhidhimika.

Mona Ngashingeyi Ekwatho mOkwiidhidhimika kwaKalunga

Nena, aantu omamiliyona miilongo yi thike lwopo 212 otaa mono ekwatho mokwiidhidhimika kwaKalunga. Yo oya hanganithwa mokuhala kwawo okuvulika kuKalunga nokulongela epangelo lye lyomegulu. Ngele ya gongala mIinyanga yawo yUukwaniilwa, yo ohayi ilongo nkene oshiwanawa okugwanitha omakotampango gOmbimbeli monkalamwenyo yawo. Ihaya kutha ombinga mopolotika ontopaguli yuuyuni mbuka, nonando yo otaa vulika komapangelo gopantu shampa tuu Kalunga mokwiidhidhimika kwe ta pitika omapangelo ngaka ga kale po.—Mateus 22:21; Aaroma 13:1-5.

Okulongela kumwe huka mokati kaantu oyendji ye thike mpono otaku yapula Jehova oye Ngoka ta vulu okweeta uukumwe mokati kaantu ye na ehalo lya manguluka, mboka yi ilonga okukala ye mu hole noya hala oku mu longela. Kapu na omalimbililo, ngoye owa tsakanena nale naantu mbaka ngele taa longo iilonga oyo tuu mbyoka Jesus a tameke ye mwene, oyo okuuvitha onkundana ombwanawa yUukwaniilwa waKalunga. Jesus okwa hunganeke oshitsa shopombanda shiilonga mbika sho a ti: “Evaangeli ndika [lyuukwaniilwa, KB] otali ku uvithilwa nuuyuni auhe, li ningile iigwana ayihe ehokololo; notaku ya ihe ehulilo.—Mateus 24:14.

Kaku Na We Ethimbo Ele!

Omauliko ge wetike otagu ulike kutya omalongekidho gepangelo lyaKalunga lyopauyuki okukutha po epangelo ndyoka hali pangele evi esiku kehe, oge li pokupwa. Konima sho Jesus a mana okuhokolola iilanduliko iinyanyalithi yokwaahapondola sha kwomapangelo gopantu ngoka tu wete pethelemimvo ndika, okwa ti: “Ngele tamu mono mbino ya ningwa, tseyeni uukwaniilwa waKalunga ou li popepi.”—Lukas 21:10, 11, 31, KB.

Masiku Kalunga ota ka dhima po aakolokoshi kevi. Opo nduno oohapu dhomupsalmi otadhi ka gwanithwa lelalela: “Aadhudhu otaa ka vudhwa mo sheke . . . Oku na okathimbo kowala, omukeenakonashanakalunga nokee po we; nonge to tala eha lye, okwa yi nale.” (Epsalmi 37:9, 10) Oto vulu mbela okudhiladhila nkene uuyuni waahe na uukolokoshi tau ka kala? Olye nduno ta ka wilika iinima yaantu? Ombimbeli otayi ti: “Omukwaniilwa [Jesus Kristus a zalekwa oshishani megulu] ta kala nokulela pauyuuki, nomalenga [aakalelipo ye aadhiginini mboka ya tulwa po kombanda yevi] taga ka pangulitha epangulo eyuuki. Iilonga yuuyuuki tau eta ombili, neliko lyuuyuuki evululuko nokukala kwaa na [ombudhi] sigo aluhe. Aantu yandje otaa ka kala momagumbo gombili, momagumbo geinekelo, pokuma, pwaa na nando [ombudhi].”—Jesaja 32:1, 17, 18.

Ano epangelo lyaKalunga lyomegulu otali ka dhima po oshizemo oshiwinayi shokuyona kwaantu notali ka hanganitha mboka ya tula etegameno lyawo muYe muukumwe waantu ya hangana. Ombimbeli otayi hokolola uukumwe mbuka e tayi ti: “Embungu otali kala poonzi, nongwe otayi kala ya lala puukombwena; ontana nonime ongundjuka nondumetana tadhi napele mumwe, nokamati okashona take dhi litha . . . Oyo itaa kala nokuningilathana uuwinayi nokuyona sha mevindundu lyandje alihe eyapuki, oshoka evi alihe otali kala lyu udha okutseya kwOmuwa, kwa fa omeya ga kala ga siikile efuta.”—Jesaja 11:6-9.

Oshizemo molwokwiidhidhimika kwaKalunga oshiwanawa ngiini! Ano pehala lyokunyenyeta nokutya kutya Kalunga okwa tegelele ethimbo lya pitilila, otu na okumona uuwanawa mokwiidhidhimika kwe mokuvulika kUukwaniilwa we. Ilonga mOmbimbeli kutya omithikampango dhe oshike noku dhi gwanitha. Hangana naamboka taa vulika kuye muukumwe. Opo nduno okwiidhidhimika kwaKalunga otaku ka kala ku ku nine oshilanduliko shomalaleko nuuyamba gaaluhe.