Hopaenena onheni yaJehova
“Omwene ina fya ounye okuwanifa eudaneko laye, . . . ndelenee ohe mu tale onheni.” — 2 PETRUS 3:9.
1. Oshali i na ondilo ihe fi okuyelekwa ilipi Jehova a hala okupa ovanhu?
JEHOVA okwa hala oku tu pa oshinima osho itatu dulu oku shi pewa komunhu nande oumwe. Oshinima osho oshihokwifa neenghono noshi na ondilo ihe fi okuyelekwa, ndele nande ongaho, itashi dulu okulandwa ile okulongelwa. Oshinima osho a hala oku tu pa osho oshali yomwenyo waalushe, osho kuvahapu vomufye tashi ka tya okukala nomwenyo waalushe moparadisa kombada yedu. (Johannes 3:16) Osho itashi ka kala tuu shihafifa! Itapa ka kala vali oinima oyo hai etifa oluhodi linene, ngaashi omashilafano, elongifo leenghono, oluhepo, ekaulonyanga, omikifi, nokuli nefyo itali ka kala po vali. Ovanhu otava ka kala mombili nove li moukumwe filufilu koshi yepangelo lopahole lOuhamba waKalunga. Otwa hala nokuhalelela Oparadisa ya tya ngaho! — Jesaja 9:5, 6; Ehololo 21:4, 5.
2. Omolwashike Jehova ina hanauna po natango ounyuni waSatana?
2 Jehova naye okwa teelela nehafo efimbo olo eshi ta ka ninga edu Oparadisa. Osho ote ke shi ninga, molwaashi oku hole ouyuki netokolo la yuka. (Epsalme 33:5) Ina hokwa ounyuni ou uhe na ko nasha nomafinamhango aye ouyuki nowa dina eenghonopangelo daye nohau hepeke yo oshiwana shaye. Ndele nande ongaho, ope na omatomheno a fimana molwaashi ina hanauna po natango ounyuni ou waSatana. Omatomheno oo okwa kwatela mo omhata i na sha nounamapangelo waKalunga. Jehova oha ulike oukwatya wonhumba uhokwifa eshi ta ungaunga nokukandula po omhata oyo, oukwatya wonheni, oo uhe niwe kovanhu vahapu kunena.
3. (a) Oshitya shOshigreka nosho yo shOshiheberi osho sha tolokwa “onheni” mOmbibeli otashi ti lelalela shike? (b) Omapulo elipi hatu ka kundafana moshitukulwa eshi?
3 Oshitya shOshigreka osho sha tolokwa “onheni” otashi ti lelalela “omhepo yelididimiko.” Peemhito dimwe osha tolokwa “okutala onheni” nosho yo “okulididimika.” Oshitya shOshigreka nosho yo shOshiheberi osho sha tolokwa “onheni” otashi yandje ediladilo lelididimiko nokuhahanduka diva. Ouwa ulipi hatu mono monheni yaJehova? Oshike hatu lihongo monheni nomelididimiko laJehova nosho yo lovapiya vaye ovadiinini? Otu shi shii ngahelipi kutya onheni yaJehova oi na ongaba? Natu konakoneni omapulo oo.
Onheni yaJehova
4. Omuyapostoli Petrus okwa shanga shike shi na sha nonheni yaJehova?
4 Omuyapostoli Petrus okwa shanga shi na sha nonheni yaJehova, a ti: “Ovaholike nye, eshi shimwe shi ha kale she mu holekwa nokutya, efiku limwe alike pOmwene li li ngaashi omido eyovi, nomido eyovi ongaashi efiku limwe alike. Omwene ina fya ounye okuwanifa eudaneko laye, ngaashi vamwe hava diladila nokutya, okwa fya ounye, vati, ndelenee ohe mu tale onheni, osheshi ina hala pa kane nande umwe, ndelenee aveshe ve lialulukile melidilululo.” (2 Petrus 3:8, 9) Natu didilikeni oitwa ivali oyo ya popiwa momushangwa oo, oyo tai dulu oku tu kwafela tu ude ko onheni yaJehova.
5. Ongahelipi onghedi oyo Jehova ha tale ko efimbo hai nwefa mo eenghatu daye?
5 Oshitwa shotete oshosho kutya Jehova iha tale ko efimbo monghedi oyo hatu li tale ko. Molwaashi ye oKalunga kaalushe, omido eyovi kuye odi li ngaashi efiku limwe. Iha imbwa ile a ulumikwe kefimbo, ndele osho itashi ti kutya oha ende kanini mokukatuka eenghatu. Molwaashi oku na ounongo uhe fi okuyelekwa, oku shii efimbo olo la wapala okukatuka eenghatu omolwouwa waavo va kwatelwa mo moshinima shonhumba noha teelele nelidiiniko fiyo efimbo olo la fika. Ndele nande ongaho, inatu fika nande pexulifodiladilo kutya Jehova ke na ko nasha nokumona oixuna kwovapiya vaye, molwaashi oku li Kalunga ‘kefilonghenda lomomutima’ noye ohole. (Lukas 1:78; 1 Johannes 4:8) Ota dulu okuxulifa po filufilu owii aushe oo wa etifwa kokweefa kwaye okumona oixuna ku kale po oule wokafimbo. — Epsalme 37:10.
6. Oshike osho tuhe na okufika pexulifodiladilo shi na sha naKalunga, nomolwashike?
6 Doshili, kashipu okuteelela oshinima osho wa halelela. (Omayeletumbulo 13:12) Omolwaasho, ngeenge ovanhu vamwe tava dopa okuwanifa po omaudaneko avo meendelelo, vamwe ohava fiki pexulifodiladilo kutya inava lalakanena oku a wanifa po. Itashi ka kala tuu sha nyika oulai okudiladila kutya Kalunga osho e li ngaho! Ngeenge otwa kala hatu diladila papuko kutya Kalunga okwa enda kanini omolwonheni yaye, mokweendela ko kwefimbo, ohatu dulu okukwatwa noupu komalimbililo noketekomukumo, naasho otashi dulu oku tu etela eemhofi dopamhepo. Ndele osho shinyikifa oluhodi unene oshosho kutya, otashi dulika tu pukifwe kovasheki, sha hala kutya, ovo vehe na eitavelo, ovo Petrus a li a londwela shi na sha navo kutya ohava sheke tava ti: “Eudaneko lealuko laye oli li peni? Osheshi nghee tuu ootatekulu va fya, oinima aishe oi li ngaashi ya kala pehovelo leshito.” — 2 Petrus 3:4.
7. Onheni yaJehova oya pambafana ngahelipi nokukala kwaye a hala ovanhu ve lidilulule?
7 Oshitwa oshitivali osho hatu dulu okulihonga meendjovo daPetrus oshosho kutya Jehova oha ulike onheni molwaashi okwa hala ovanhu aveshe ve lidilulule. Ovo tava anye nondudi okweefa po eendjila davo dii, ote ke va hanauna po. Ndele nande ongaho, Jehova iha hokwa efyo lovakolokoshi. Ponhele yaasho, oha kala a hafa ngeenge ovanhu tave lidilulula nokweefa po eendjila davo dii, ndele tava kala netimaumbwile lomwenyo waalushe. (Hesekiel 33:11) Nomolwaasho ota twikile okutala ovanhu onheni nokwa unganeka opo onghundana iwa i udifilwe ovanhu mounyuni aushe opo ovo tave i tambula ko va ka mone omwenyo waalushe.
8. Ongahelipi onheni yaKalunga i liwetikile monghedi oyo a li a ungaunga noshiwana shaIsrael?
8 Onheni yaKalunga oi liwetikile yo monghedi oyo a li a ungaunga naIsrael shonale. Okwa kala te lididimikile okuhadulika kwasho oule womafelemido. Okwa li e shi ladipika oikando noikando okupitila movaprofeti vaye a ti: “Lialulukeni keendjila deni inadi yuka, ndele diinineni oipango yange, neenghedimhango dange, pamhango oyo nde i pa ooxo, nayo nde i mu lombwelifa kovapiya vange, ovaprofeti, ovo nde mu tumina.” Mbela oshiwana osho osha li she linyenga ngahelipi? Shi nyikifa oluhodi, kasha li sha “pwilikina.” — 2 Eehamba 17:13, 14.
9. Ongahelipi Jesus a li a ulika onheni ya fa yaXe?
9 Hauxuuninwa, Jehova okwa li a tuma Omona waye kombada yedu, oo a li a kumaida Ovajuda lwoikando va alukile kuYe. Jesus okwa li a ulika filufilu onheni ya fa yaXe. Molwaashi okwa li e shii nawa kutya okwa li ta ka dipawa, okwa li a nyikila oluhodi Ovajuda, ndele ta ti: “Jerusalem, Jerusalem, ove ho dipaa ovaprofeti ndele ho dipaa nomamanya ava ve ku tuminwa, olungapi nda hala okwoongela ovamwoye, ngaashi oxuxwa hai ongele ouxuxwena vayo koshi yomavava ayo! Ndele onye inamu hala.” (Mateus 23:37) Eshi Jesus a popya eendjovo odo tadi kumu omutima, ka li ta popi a fa omupanguli omukwanyanya oo a hala okutokola vamwe, ndele okwe di popya ta kenukile ovanhu omolwonheni yaye. Ngaashi Xe womeulu, Jesus okwa li a hala ovanhu ve lidilulule opo vaha ka hanaunwe po. Vamwe ova li va dulika komalondwelo aJesus ndele tava xupu po eshi Jerusalem sha li sha hanaunwa po mo 70 O.P. — Lukas 21:20-22.
10. Ouwa ulipi twa mona monheni yaKalunga?
10 Onheni yaKalunga kai kumwifa tuu! Nonande ondjokonona yovanhu oya ulika kutya ovanhu ova kala ihava dulika, Jehova okwa efa ovanhu omamiliyona va mone omhito yoku mu shiiva nova kale ve na eteelelo lexupifo. Petrus okwa li a shangela Ovakriste vakwao a ti: “[Onhalanheni] yOmwene wetu i taleni oyo exupifo leni.” (2 Petrus 3:15) Mbela inatu hafa eshi Jehova e tu pa omhito yoku ka xupifwa omolwonheni yaye? Mbela katu na okwiilikana opo Jehova a twikile oku tu tala onheni eshi hatu mu longele efiku keshe? — Mateus 6:12.
11. Okukala tu udite ko onheni yaJehova otashi tu linyengifa tu ninge shike?
11 Ngeenge otu udite ko kutya omolwashike Jehova ha tale ovanhu onheni, otashi tu kwafele tu teelele nelidiiniko exupifo olo ta ka eta noitatu ka fika nandenande pexulifodiladilo kutya okwa enda kanini mokuwanifa omaudaneko aye. (Omaimbilokemo 3:26) Ofimbo hatu twikile okwiilikana opo Ouhamba waKalunga u uye, otu na elineekelo kutya Kalunga oku shii efimbo olo la wapala nokunyamukula eilikano olo. Natango, otwe linyengifwa tu hopaenene onheni yaJehova mokuungaunga kwetu novamwatate nosho yo ovo hatu udifile. Nafye inatu hala omunhu nande oumwe a ka hanaunwe po, ndele otwa hala ve lidilulule nova kale yo ve na etimaumbwile lomwenyo waalushe. — 1 Timoteus 2:3, 4.
Elididimiko lovaprofeti
12, 13. Metwokumwe naJakob 5:10, ongahelipi omuprofeti Jesaja a pondola mokuulika elididimiko?
12 Fiyo opapa, otwa konakona shi na sha nonheni yaJehova, notwa kwafelwa tu i ude ko nawa notu kulike oukwatya oo. Kashipu kovanhu inatu wanenena okukulika onheni, ndele nande ongaho, ohatu dulu oku i kulika. Ohatu dulu okulihonga koihopaenenwa yovapiya vaKalunga vonale. Omuhongwa Jakob okwa shanga a ti: “Ovamwatate, hopaeleleni ovaprofeti ovo va popya medina lOmwene mokuhumbata oudjuu nomokulididimika.” (Jakob 5:10) Otashi hekeleke notashi tu omukumo okushiiva kutya opa li ovo va pondola omaupyakadi a faafana naao hatu shakeneke.
13 Pashihopaenenwa, omuprofeti Jesaja okwa li a pumbwa elididimiko moilonga yaye e li omuprofeti. Jehova okwa li e mu lombwela a ti: “Inda u ka lombwele oshiwana eshi u tye : Okuuda ohamu udu ko, nye kamu udite ko, nokumona ohamu mono ko, nye itamu koneke sha. Kukutika omutima woshiwana eshi, fitika omatwi asho, twikifa omesho asho, opo shi ha mone ko nomesho asho, shi ha ude ko [nomatwi] asho, shi ha koneke komutima washo, opo shi he lidilulule noshi ha velulwe.” (Jesaja 6:9, 10) Nonande oshiwana osho kasha li sha pwilikina keendjovo odo, Jesaja okwa li a udifa nelididimiko omatumwalaka aJehova omalondwelo oule womido 46 lwaapo. Sha faafana, onheni otai ke tu kwafela tu lididimike moilonga yetu yokuudifa onghundana iwa, nonande ovanhu vahapu itava pwilikine.
14, 15. Oshike sha li sha kwafela Jeremia a finde omaupyakadi nosho yo etekomukumo?
14 Eshi ovaprofeti va li tava wanifa po oukalele wavo, kava li ashike hava shakeneke ovanhu ovo ihava pwilikine, ndele ova li yo hava hepekwa. Jeremia okwa li a tulwa meti, a idililwa “modolongo” nokwa li yo a ekelwa mondungu. (Jeremia 20:2; 37:15; 38:6) Okwa li a hepekwa koshiwana osho kwa li a hala okukwafela. Ndele nande ongaho, Jeremia ka li a handuka noka li e va alulila owii. Okwa li e lididimikila oinima ya tya ngaho oule womido omilongo.
15 Omahepeko nomasheko kaa li a shololifa Jeremia, noitae ke tu shololifa kunena. Ndele nande ongaho, omafimbo amwe otashi dulika tu teke omukumo. Jeremia naye okwa li a teka omukumo, nomolwaasho a shanga a ti: “Ondjovo yOmwene oya tukifa nge noya shekifa nge omutenya aushe. Ndelenee . . . nda tya: Ame inandi hala vali oku mu diladila noinandi hala vali okupopya medina laye.” Oshike sha li sha ningwa po konima yaasho? Mbela Jeremia okwa li a efa po okuudifa? Okwa twikila okupopya a ti: “Opo nee momutima wange omwa fa mwa xwama omundilo [weendjovo daKalunga] tau xwike wa kwatelelwa momakipa ange. Ame onda hetekela oku u lididimikila fiyo nda loloka, ndelenee nda nyengwa.” (Jeremia 20:8, 9) Didilika kutya eshi Jeremia a li a yandja elitulemo komasheko oshiwana, okwa li a kanifa ehafo laye. Ndele eshi a li a dilonga shi na sha nouwa nosho yo efimano letumwalaka laKalunga, okwa ka kala va li a hafa. Kakele kaasho, Jehova okwa li pamwe naJeremia ngaashi “omuladi omunaenghono,” te mu pameke opo a udife eendjovo daYe nouladi. — Jeremia 20:11.
16. Oshike tashi dulu oku tu kwafela tuha kanife ehafo letu moilonga yokuudifa onghundana iwa?
16 Mbela omuprofeti Jeremia okwa li a hafela oilonga yaye yokuudifa? Osho naanaa! Okwa lombwela Jehova a ti: “Eendjovo doye oda hanga nge, ame onde di lya nde di pona. Ndele eendjovo doye oda li kuame enyaku nehafo lomomutima wange, osheshi ame nda lukilwa edina loye, Omwene.” (Jeremia 15:16) Jeremia okwa li a hafela oufembanghenda waye wokukalela po Kalunga kashili nokuudifa eendjovo daYe. Nafye ohatu dulu okukala twa hafela oufembanghenda wetu wokukalela po Kalunga nokuudifa onghundana iwa. Natango, ohatu kala twa hafa okumona ovanhu vahapu mounyuni tava tambula ko etumwalaka lOuhamba, tave lidilulula nokweenda mondjila oyo tai twala komwenyo waalushe, ngaashi ovaengeli navo hava kala va hafa. — Lukas 15:10.
“Elididimiko laJob”
17, 18. Omonghedi ilipi Job a li e lididimika, nohauxuuninwa oshike sha li sha ningwa po?
17 Konima yokupopya shi na sha novaprofeti, omuhongwa Jakob okwa shanga a ti: “Elididimiko laJob [omwe] li uda, nomwa mona exulilo e li pewa kOmwene, osheshi Omwene Oye omunalukeno nomunamutimanghenda.” (Jakob 5:11) Oshitya shOshigreka osho sha tolokwa “elididimiko” momushangwa oo nosho yo osho sha tolokwa ‘okulididimika’ movelishe 10, oi na omaityo e li li popepi, ndele oya yoolokafana kanini. Mokuulika keyooloko olo li li pokati koitya oyo ivali, omuhongwanhu umwe okwa shanga a ti: “Shotete otashi ulike kelididimiko olo hatu ulike ngeenge hatu hepekwa, shaxuuninwa otashi ulike kokulididimika neyombamo omolweenghalo didjuu odo tu li mudo.”
18 Job okwa li a pita meenghalo didjuu neenghono. Okwa li a kanifa omaliko aye, a filwa ovana vaye nokwa li a kwatwa komukifi uyahameka. Okwa li yo e lididimika eshi a li ta lundilwa kutya Jehova okwe mu handukila nomolwaasho a li ta mono oixuna. Molwaashi Job okwa li moudjuu munene, okwa li a kema shi na sha nonghalo yaye nokwa li nokuli a popya kutya ye omuyuki e dule Kalunga. (Job 35:2) Ndele nande ongaho, Job ka li a kanifa eitavelo laye noka li a efa po oudiinini waye. Ka li e liteeka Kalunga, ngaashi Satana a li a popya kutya osho ta ka ninga. (Job 1:11, 21) Hauxuuninwa, oshike sha ka ningwa po? Jehova okwa li a “nangeka noupuna okukalamwenyo kwaxuuninwa kwaJob noupuna uhapu u dule winya wopehovelo.” (Job 42:12) Okwa li e mu alulila oukolele waye, a hapupalifa oupuna waye luvali nokwa li e mu nangeka noupuna a kale nonghalamwenyo ile noihafifa pamwe novaholike vaye. Okulididimika noudiinini kwaJob okwa li yo kwe mu dulifa a shiive nawa omaukwatya aJehova.
19. Oshike hatu lihongo melididimiko laJob?
19 Oshike hatu lihongo melididimiko laJob? Ngaashi Job, nafye otashi dulika tu kwatwe komikifi ile tu ye momaudjuu onhumba. Otashi dulika tu kale tuhe udite ko kutya omolwashike Jehova ta efa tu pite meyeleko lonhumba. Ndele nande ongaho, natu kale twa shilipalekwa kutya ngeenge otwa kala ovadiinini, ohatu ka nangekwa noupuna. Jehova ota ka yandja ondjabi kwaavo tave mu kongo va mana mo. (Ovaheberi 11:6) Jesus okwa ti: “Ou te lididimike fiyo exulilo, oye ta xupifwa.” — Mateus 10:22; 24:13.
“Efiku lOmwene otali ke uya”
20. Omolwashike hatu dulu okukala noushili kutya efiku laJehova otali ke uya?
20 Nonande Jehova oha tale ovanhu onheni, oku li yo omuyuki nomolwaasho ita ka efa oukolokoshi u kale po fiyo alushe. Onheni yaye oi na ongaba. Petrus okwa shanga a ti: ‘Ounyuni winya wonale Kalunga ine u fya eenghoto.’ Okwa li a hanauna po neyelu ounyuni oo wovahenakalunga, ndele Noa noukwaneumbo waye ova li va xupifwa. Jehova okwa li yo a hanauna po Sodom naGomorra, e i xwika po filufilu. Oiningwanima oyo oi li “edidiliko lokulondwela ovalunde” kunena. Onghee hano, ohatu dulu okukala noushili kutya: ‘Efiku lOmwene otali ke uya.’ — 2 Petrus 2:5, 6; 3:10.
21. Ongahelipi hatu dulu okuulika onheni nosho yo elididimiko, noshike hatu ka kundafaneni moshitukulwa tashi landula?
21 Onghee hano, natu hopaeneneni onheni yaJehova mokukwafela vamwe ve lidilulule opo va ka xupifwe. Natu hopaeneneni yo ovaprofeti mokuudifa onghundana iwa nelididimiko, nonande ope na ovanhu ovo itava pwilikine. Natango, natu hopaeneneni Job mokulididimikila omayeleko, nokungaha, ohatu dulu okukala noushili kutya Jehova ote ke tu nangeka noupuna ngeenge otwa kanyatele oudiinini wetu. Otu na omatomheno mahapu okuhafela oukalele wetu, unene tuu eshi tu wetu nghee Jehova ta nangeke noupuna eenghendabala doshiwana shaye dokuudifa onghundana iwa mounyuni aushe. Osho otashi ka kundafanwa moshitukulwa tashi landula.
Oto dimbuluka?
• Omolwashike Jehova ha tale ovanhu onheni?
• Oshike hatu lihongo melididimiko lovaprofeti?
• Job okwa li e lididimika ngahelipi, nohauxuuninwa oshike sha ka ningwa po?
• Otu shi shii ngahelipi kutya onheni yaJehova oi na ongaba?
[Efano pepandja 15]
Jesus okwa li a ulika filufilu onheni ya fa yaXe
[Efano pepandja 16]
Jehova okwa li a nangeka noupuna ngahelipi Jeremia omolwelididimiko laye?
[Efano pepandja 17]
Jehova okwa li a nangeka noupuna ngahelipi Job omolwelididimiko laye?