Otwa pumbwa okukala neidhidhimiko muukalele
1. Jehova oku ulika ngiini eidhidhimiko lye mokuungaunga naantu?
1 Kalunga ohu ungaunga naantu neidhidhimiko. (Eks. 34:6; Eps. 106:41-45; 2 Pet. 3:9) Oshiholelwa shimwe sha dhenga mbanda shoka tashi ulike kutya ohi idhidhimikile aantu omolwohole ye oshi iwetikile miilonga yokuuvitha onkundana ombwanawa ndjoka tayi uvithwa muuyuni auhe. Jehova okwa kala nokuungaunga naantu konyala omimvo 2 000, noku li ta tsikile okweeta mboka ye na omitima dhu uka kuye. (Joh. 6:44) Ongiini tatu vulu oku mu holela muukalele wetu?
2. Ongiini tatu vulu okuulika eidhidhimiko uuna tatu longo moshitopolwa shetu?
2 Ngele tu li muukalele wegumbo negumbo: Ohatu holele eidhidhimiko lyaJehova ‘mokutsikila’ okuuvitha miitopolwa moka aantu kaaye na ohokwe. (Iil. 5:42) Ohatu idhidhimikile mboka kaaye na ko nasha netumwalaka lyetu, mboka taye tu sheke notaye tu pataneke muukalele. (Mark. 13:12, 13) Ohatu ulike wo eidhidhimiko sho tatu ningi oonkambadhala tadhi tsikile okutekela oombuto dhoshili, nokuli nonando oshidhigu okwaadha mboka ya li yu ulika ohokwe momagumbo.
3. Omolwashike twa pumbwa eidhidhimiko sho tatu ningi omaishunoko nosho wo omakonakonombiimbeli?
3 Ngele tatu ningi omakonakonombiimbeli: Ohashi pula eidhidhimiko okusila oshimpwiyu oshimeno. Otatu vulu oku shi tekela, ihe itatu vulu oku shi endelelitha shi koke. (Jak. 5:7) Sha faathana, okukoka kwopambepo ohaku endele ko okaenda nampadhi nosho wo onkatu nonkatu. (Mark. 4:28) Ohashi vulika shi kale oshidhigu kwaamboka hatu konakona nayo ya ze momalongelokalunga giifundja noye ethe po omikalondjigilile ndhoka kaadhi li pamanyolo. Katu na okukambadhala okuthiminika mboka hatu konakona nayo ya ninge omalunduluko nziya. Eidhidhimiko olya pumbiwa opo ombepo yaKalunga yi zule omutima gwomukonakoni mokweendela ko kwethimbo. — 1 Kor. 3:6, 7.
4. Eidhidhimiko otali tu kwathele ngiini tu uvithile aapambele yetu mboka kaaye sho ooitaali?
4 Ngele tatu uvithile aapambele mboka kaaye shi ooitaali: Nonando ohatu kala twa halelela aapambele yetu mboka kaaye shi ooitaali yi ilonge oshili, ohatu ulike eidhidhimiko mokukala twa tegelela ethimbo tali opalele opo tu yu uvithile, notu na okukala twa kotoka opo kaatu ya ndumbile uuyelele oundji. (Omuuv. 3:1, 7) Ihe eihumbato lyetu oli na okukala ewanawa, notu na okukala twi ilongekidha okupopila eitaalo lyetu tatu shi ningi nombili nonesimaneko. (1 Pet. 3:1, 16) Uukalele wetu otawu ka pondola lela ngele otu na eidhidhimiko notatu ka nyanyudha Tate yetu gwomegulu.