Takamitha Aaprofeti Aafundja!
KONIMA sho aahokanathani Aabrasilia ya yi ya ka lale uusiku, oyu uvu aafuthi taa teya megumbo lyawo. Aahokanathani ye niwe kuumbanda oye shi pondola ya fadhuke po okupitila mekende lyondjugo e taye ki ithana opolisi. Ihe konima yaashono omukiintu okwa li e uvite nayi unene omolwoshiningomwa shoka noka li we ta vulu okukothela megumbo lyaandjawo. Okwa li e na okuya kegumbo lyayina.
Shaa ngoka egumbo lye lya teyelwe nenge a yugilwe komukalo gulwe gwi ili ote ku uva ko nkene ye a li u uvite. Oshiningomwa sha tya ngaaka otashi vulu okuuvitha omuntu nayi,ihe mupya munene, aantu oyendjiyendji otaa hepekwa komukalo nguka. Ihe opu na olupe lwuufuthi mboka wu na oshizemo sha kwata miiti noonkondo adhihe.
Olupe nduka lwuufuthi wa kwata miiti noonkondo oluni, naafuthi oyo oolye? Jesus Kristus okwe tu pe uuyelele u na ko nasha naashoka, sho a popi kombinga yethimbo lyetu a ti: “Otaku zi aaprofeti aafundja oyendji e taa pukitha oyendji.” (Mateus 24:11) Aaprofeti aafundja oyo aafuthi. Okomukalo guni mbela? Ohaa yaka shike? Uufuthi wawo ou na ko nasha nokuhunganeka kwawo. Opo tu uve ko nawanawa oshinima shika, otwa pumbwa tango okutseya kutya okuhunganeka oshike paMbimbeli.
Shoka Okuhunganeka Taku Ti
Ngele to dhiladhila kombinga yokuhunganeka, ngiika oshinima shotango shoka tashi ya momadhiladhilo goye osho okuhunganeka onakuyiwa. Shika osho naanaa sha li ombinga yiilonga yaaprofeti yaKalunga yonale, ihe hayo ya li iilonga yawo ya simana. Pashiholelwa, sho omuprofeti Hesekiel a li a lombwelwa memoniko a ‘hunganekele ombepo,’ ye okwa li owala e na okugandja elombwelo lya za kuKalunga. (Hesekiel 37:9, 10) Sho Jesus a li ta hokololithwa koshipala shaapristeli, oya li ye mu hiyile omayeye noye mu dhenge, naahepeki ye oye mu nyenkele taa ti: “Kristus, tu hunganekela, olye ngoka e ku dhenge”? Inaya pula Jesus e ya hunganekele onakuyiwa. Oye mu shongo e yu ulukile koonkondo dhaKalunga ngoka e mu dhenge.—Mateus 26:67, 68.
Dhoshili, enenedhiladhilo lyiitya yomelaka lyOmbimbeli lyopetameko mbyoka ya lundululwa oyo “okuhunganeka” nenge “ehunganeko” otali ti lelalela okutseyitha ompangela yaKalunga yi na ko nasha noshinima, nenge ngaashi embo lyIilonga yAayapostoli tali ti, okuhokolola “iilonga iinene yaKalunga.” (Iilonga 2:11) Aantu oyendji osho haa yugwa komukalo nguka kaaprofeti aafundja.
Ihe aaprofeti aafundja oyo oolye, noshike haa yaka? Okuyamukula epulo ndika, natu tale konima kondjokonona yoshigwana shaIsrael pethimbo lyaJeremia.