Okuninginithwa “mEdhina”
EKONAKONO lyoodokumende dhonale omayuvi dhopapilusa dhopauyuni ndhoka dha adhika mehekevi lyaEgipiti petameko lyethelemimvo ndika, olundji otali gandja uuyelele wa simana wOmanyolo gopaKriste gOshigreka. Ngiini? Mokutala komukalo ngoka iitya yontumba ya longithwa, otatu mono euvoko lyolelalela lyiitya oyo tuu mbika melongitho lyayo lyOmishangwa.
Oshiholelwa shimwe osho okulongitha kwaJesus “medhina lya” sho a lombwelele aalongwa ye manga inaa ya megulu: “Indeni ano, ka ningeni aantu ayehe aalongwa yandje noku ya [“ninginitha,” NW] medhina lyaTate nolyOmwana nolyOmbepo Ondjapuki.” Jesus okwa li a hala okutya shike?—Mateus 28:19.
Aalongwantu oya mono kutya momanyolo gopauyuni uutumbulilo “medhina lya,” nenge “medhina” (Kingdom Interlinear) owa longithwa okuulika kokufuta “olekenenga yagumwe.” Omuprofesa gwuuteolohi ndohotola G. Adolf Deissmann, okwi itaala kutya okutala kuunzapo wopapilusa, “ondungedhiladhilo yopekota . . . yuutumbulilo okuninginitha medhina lyOmuwa nenge okwiitaala medhina lyOmwana gwaKalunga, oyo kutya eninginitho nenge eitaalo otashi ti kutya tse otwa ninga twaKalunga nenge twOmwana gwaKalunga.”—Edhingulonyolo lyaDeissmann.
Oshi li nawa okudhiladhila kutya uutumbulilo wa faathana owa longithwa kAajuda yopethimbo lyaJesus, ngaashi tashi yelithwa moTheological Dictionary of the New Testament: “Okupita etanda kwomwiitedhululithwa ohaku ningwa . . . ‘medhina lyomwiitedhululithwa’ oku mu taambela meitaalo lyAajuda. Epito lyetanda ndika ohali ningwa . . . ‘medhina lyondjuvanena,’ oku mu taambela mondjuvanena.” Ano ekwatathano ohali ya po okupitila mulyo naangono kee shi Omujuda ota ningi omwiitedhululithwa e li mepangelo lyondjuvanena.
Ano kOmukriste, eninginitho ndyoka hali landula eiyapulo ohali eta ekwatathano lyopothingo naJehova Kalunga, Omwana Jesus Kristus nombepo ondjapuki. Omwiitedhululi ota taamba ko oonkondopangelo dhaayehe yaali momikalo dhonkalamwenyo ye ompe. Tala nkene shi li shoshili, shi na ko nasha nakehe gumwe gwomwaambaka yatatu ya tumbulwa.
Mokuzimina oonkondo dhaKalunga, otatu hedha popepi naye notatu ningi ekwatathano naye. (Aaheberi 12:9, OB-1986; Jakob 4:7, 8) Otatu ningi eliko lyaKalunga tu li aapiya ye, twa landwa nekuliloyambo lyaJesus Kristus. (1 Aakorinto 3:23; 6:20) Omuyapostoli Paulus okwa lombwelele wo Aakriste yomethelemimvo lyotango kutya oyaJesus Kristus, hayaalumentu mboka tashi vulika oyo ye ye etele oshili. (1 Aakorinto 1:12, 13; 7:23; faathanitha Mateus 16:24.) Okuninginithwa medhina lyOmwana otashi ti okutaamba ko oshili ndjika nokutaamba ko Jesus e li “ondjila yoshili nomwenyo.”—Johannes 14:6.
Ombepo ondjapuki oya simanenena wo ngele twa hala ekwatathano lyu uka naJehova naJesus Kristus. Okuninginithwa medhina lyombepo ondjapuki otaku ulike kutya tse otwa taamba ko oshilonga shombepo mokweendathana kwaKalunga natse. Otu na okutokola okulandula ewiliko lyayo nokatu na oku yi dhina nenge okukatuka itaatu tsu kumwe nayo noku yi imba yi longe okupitila mutse. (Aaefeso 4:30; 1 Aatessalonika 5:19) Uukwatya wombepo waa shi wopantu itau eta nando uupyakadhi shi na ko nasha nelongitho neityo lyayo, ngaashi naanaa okulongitha “medhina lyeuvaneno” inaaku eta uupyakadhi meitaalo lyAajuda.
Omolwashono ngele tatu igandja notatu ninginithwa, tu na okugalikana nokudhiladhila shoka ekwatathano lyetu epe lya kwatela mo. Otashi pula okuvulika kehalo lyaKalunga okupitila mombepo ondjapuki, ngaashi shu ulikwa koshiholelwa shaJesus Kristus nesiloshimpwiyu lyekuliloyambo lye, opo u iyuthe kevuliko ndika okupitila mombepo ondjapuki ndjoka tayi wilike aapiya yaKalunga ayehe mohole nomuukumwe muuyuni auhe.