Eninginitho — oshitegelelwa shAakriste

1, 2. (a) Aavali yamwe Aakriste ohayi inyenge ngiini, uuna oyana ya hala okuninginithwa? (b) Omolwashike aaninginithwa haya pulwa ngele oyi iyapulila Jehova? (Tala kethano lyopetameko.)

AAVALI yamwe Aakriste, oya li ya tala okamwanakadhona Maria, ka thikama naaninginithwa ooyakwawo. Sho omupopi a pula omapulo gaali, Maria okwa yamukula mokule newi lya yela, nokonima okwa ninginithwa.

² Aavali Maria oya li ye mu nyanyukilwa, sho a ningi etokolo lyokwiiyapulila Jehova nokuninginithwa. Nonando ongawo, manga inaa ninginithwa, meme gwe okwa kala e na omaipulo. Okwa kala ti ipula ta ti: ‘Mbela Maria omushona unene nokuninginithwa? Mbela oku uvite ko ngaa kutya shoka ta ningi osha kwata miiti shi thike peni? Mbela itashi kala shi li nawa a tegelele manga?’ Aavali oyendji aanahole ohaya kala tayi ipula omapulo ngoka, uuna oyana ya hala okuninginithwa. (Omuuv. 5:5) Komeho gaayihe, okwiiyapulila Jehova nokuninginithwa oku li oonkatu dha simana monkalamwenyo yOmukriste. Tala oshimpungu: “Mbela owi iyapulila Jehova?”

3, 4. (a) Omuyapostoli Petrus oku ulike ngiini kutya eninginitho olya simana? (b) Omolwashike eninginitho tali vulu okuyelekanithwa nokutungwa kwonguluwato yopethimbo lyaNoa?

³ Omuyapostoli Petrus okwa yelekanitha eninginitho naNoa sho a li ta tungu onguluwato, a ti: “Omeya ngaka ogo efano tali ulike [eninginitho, NW] ndyoka tali mu hupitha.” (Lesha 1 Petrus 3:20, 21.) Onguluwato ndjoka Noa a li a tungu, oyu ulike lela kutya okwa li a hala okulonga ehalo lyaKalunga. Okwa li a gwanitha po nuudhiginini oshinakugwanithwa shoka a pewa kuJehova. Shoka Noa a ningi, oshe mu kwathele a hupithwe pamwe naanegumbo lye pethimbo lyEyelu. Mbela Petrus okwa li ta popi shike methaneko lye?

⁴ Noa okwa li u ulike kutya oku na eitaalo, sho a tungu onguluwato. Eninginitho ndyoka hali ningwa montaneho yaantu, ohali gandja wo uumbangi. Uumbangi wuni? Uumbangi kutya Omukriste okwi iyapulila Jehova pakankameno lyeitaalo meyumuko lyaKristus. Ngaashi Noa, Aakriste mboka yi iyapulila Kalunga ohaya vulika mokugwanitha po iilonga mbyoka e ya pa. Ngaashi Noa a hupile pethimbo lyEyelu, mboka aadhiginini ya ninginithwa nayo otaya ka hupa, sho uuyuni mbuka wa kolokosha tawu ka hulithwa po. (Mark. 13:10; Eh. 7:9, 10) Shika ohashi ningitha eiyapulo neninginitho yi kale ya simanenena. Omuntu ngoka ta kakadhala okuninginithwa, otii imbi ye mwene kaa ka mone omwenyo gwaaluhe.

5. Otatu ka kundathana shike moshitopolwa shino?

⁵ Opo tu tseye kutya eninginitho olya kwata miiti shi thike peni, otwa pumbwa okwiipula omapulo ngaka: Ombiimbeli otayi ti shike kombinga yeninginitho? Oonkatu dhini omuntu e na okukatuka, manga inaa ninginithwa? Omolwashike Aakriste ye na okukala ye shi kutya eninginitho olya simana shi thike peni, sho taya longo oyana naakonakoni yawo?

SHOKA OMBIIMBELI TAYI TI KOMBINGA YENINGINITHO

6, 7. (a) Yelitha kutya eninginitho lyaJohannes olya li li na ko nasha nashike. (b) Eninginitho lini lyi ikalekelwa Johannes a li a ningi?

⁶ Eninginitho lyotango ndyoka lya popiwa mOmbiimbeli, olya ningwa kuJohannes Omuninginithi. (Mat. 3:1-6) Mboka ya ninginithwa kuJohannes, oye shi ningi, yu ulike kutya oyi iyela ombedhi, omolwoondjo dhawo sho ya yono Ompango yaMoses. Ihe Johannes okwa li a pewa uuthembahenda wi ikalekelwa wokuninginitha Omwana gwaKalunga a gwanenena. Eninginitho lya simanenena ndyoka lya ningwa kuJohannes, kalya li li na ko nasha nokwiitedhulula. (Mat. 3:13-17) Molwaashoka Jesus ka li e na oondjo, ka li a pumbwa okwiitedhulula. (1 Pet. 2:22) Eninginitho lye olyu ulike kutya okwa hala okulonga ehalo lyaKalunga. — Heb. 10:7.

⁷ Pethimbo lyuukalele waJesus kombanda yevi, aalongwa ye nayo oya li ya ninginitha aantu. (Joh. 3:22; 4:1, 2) Aantu mboka nayo oya li yi iyele ombedhi omolwoondjo dhawo, sho ya yono Ompango yaMoses, ngaashi naanaa mboka ya ninginithwa kuJohannes. Nonando ongawo, konima yeso neyumuko lyaJesus, aalanduli ye oya li ye na okuninginithwa omolwetompelo lilwe.

8. (a) Konima sho Jesus a ninginithwa, okwa lombwele shike aalongwa ye? (b) Yelitha esimano lyokuninginithwa kwopaKriste.

⁸ Mo 33 E.N., Jesus omuyumudhwa, okwa li i ihololele ongundu yaalumentu ye vulithe po 500 nosho wo aakiintu naanona. Pompito mpoka otashi vulika opo a popi ta ti: ‘Indeni ano, ka ningeni aantu ayehe aalongwa yandje, mu ya ninginithe medhina lyaHe nolyOmwana nolyombepo ondjapuki, ne mu ya longe okudhiginina ayihe mbyoka nde yi mu lombwele.’ (Mat. 28:19, 20, yelekanitha NW; 1 Kor. 15:6) Osha fa shi li ngeyi kutya aalongwa yaJesus omathele opo ya li, sho Jesus a gandja elombwelo lyokuninga aantu aalongwa. Jesus oku ulike kutya eninginitho ndyoka otali ka kala oshitegelelwa kwaamboka ya hala okutaamba ko ondjoko yopaKriste yokukala omulongwa. (Mat. 11:29, 30) Kehe ngoka a hala okulongela Kalunga momukalo ngoka a hokwa, oku na okuzimina nokutaamba ko onkandangala ndjoka Jesus ta dhana mokugwanithwa po kwelalakano lyaJehova. Uuna e shi ningi, nena omuntu ngoka ota vulu okuninginithwa. Ndyoka olyo owala eninginitho lya hokiwa kuKalunga. Ombiimbeli oya gandja uumbangi owundji mboka tawu ulike kutya methelemimvo lyotango, aalongwa yaKristus aape, oya li yu uvite ko lela esimano lyokuninginithwa. Kaya li nando haya kakadhala okuninginithwa. — Iil. 2:41; 9:18; 16:14, 15, 32, 33.

INO KAKADHALA

9, 10. Oshike tatu ilongo kombinga yeninginitho lyomwiitedhululithwa Omuetiopia nolyomuyapostoli Paulus?

⁹ Lesha Iilonga 8:35, 36. Tala koshiholelwa shomwiitedhululithwa Omuetiopia, ngoka a li ta zi kuJerusalem hoka a li a ka galikana Kalunga. Filippus okwa li a lombwelwa komuyengeli, a ye komulumentu ngoka Omuetiopia, ‘e ke mu uvithile elaka etoye tali popi Jesus.’ Mbela Omuetiopia okwi inyenge ngiini? Shoka a ningi, osha gandja uunzapo wa yela wankene a pandula nomutima aguhe oshili ndjoka i ilongo. Okwa li a halelela okukala metsokumwe nelongekidho lyaJehova, nokwa ninginithwa inaapu kakadhalwa.

¹⁰ Oshiholelwa oshitiyali oshomulumentu Omujuda, ngoka a li ha hepeke Aakriste. Okwa li gwomoshigwana shoka shi iyapulila Kalunga. Ihe, Aajuda oya li ya kanitha ekwatathano lyawo lyi ikalekelwa naJehova. Nonando omulumentu ngoka okwa li a dhiginina omikalondjigilile dhelongelokalunga lyOshijuda, okwa li i ilongo sha shilwe sha simana. Okwa li i ihololelwa komuyumudhwa nomusimanekwa Jesus Kristus. Mbela okwi inyenge ngiini? Okwa taamba ko ekwatho lyomulongwa gwaKristus, Ananias. Shi na ko nasha nomulumentu ngoka, Ombiimbeli oya ti: “Nena oye okwa thikama e ta [ninginithwa, NW].” (Iil. 9:17, 18; Gal. 1:14) Osha yela kutya omulumentu ngoka Omujuda, oye a ka tseyika nawa omuyapostoli Paulus. Dhiladhila kutya sho i ilongo kombinga yonkandangala ndjoka Jesus ta dhana mokugwanithwa po kwelalakano lyaKalunga, okwa ninginithwa nopwaa na okukwatakwata. — Lesha Iilonga 22:12-16.

11. (a) Oshike hashi inyengitha aakonakonimbiimbeli kunena ya ninginithwe? (b) Ohashi tu gumu ngiini, uuna tu wete yalwe taya ninginithwa?

¹¹ Oshinima shoka osha faathana naakonakonimbiimbeli yokunena, kutya nduno aagundjuka nenge aakuluntu. Mboka ye na eitaalo noya pandula lela oshili yOmbiimbeli, ohaya kala ya halelela okwiiyapulila Kalunga nokuninginithwa. Oshipopiwa shaaninginithwa, ohashi kala aluhe sha simana piigongi iinene niishona. Oonzapo dhaJehova ohadhi kala dha nyanyukwa, uuna aakonakonimbiimbeli taya taamba ko oshili naasho taya ningi ehumokomeho sigo ya ninginithwa. Mbela aavali Aakriste ihaya kala tuu ya nyanyukwa okumona oyana ye li mokati kaamboka taya ninginithwa? Momumvo gwiilonga gwo 2017, aantu ye vulithe 284 000, mboka “ya hala” (NW) oku ka mona omwenyo gwaaluhe, oya li yu ulike montaneho okwiiyapulila kwawo Jehova okupitila mokuninginithwa momeya. (Iil. 13:48) Osha yela kutya aalongwa mboka aape oya li yu uvite ko kutya eninginitho oshitegelelwa kAakriste. Oonkantu dhini ya katuka sigo ya ninginithwa?

12. Oonkantu dhini omukonakonimbiimbeli e na okukatuka, manga inaa ninginithwa?

¹² Manga omukonakonimbiimbeli inaa ninginithwa, oku na okukala e na eitaalo lya kankamena kontseyo yashili kombinga yaKalunga, yelalakano Lye noyelongekidho Lye lyokuhupitha aantu. (1 Tim. 2:3-6) Eitaalo ndyoka ohali mu inyengitha e ethe po eihumbato ndyoka itaali nyanyudha Kalunga nokukala metsokumwe nomithikampango dhe dhuuyuuki. (Iil. 3:19) Osha yela kutya omuntu ita vulu okwiiyapulila Kalunga, manga ha kutha ombinga mukehe shoka tashi mu imbi okuya mUukwaniilwa waKalunga. (1 Kor. 6:9, 10) Ihe opwa pumbwa okuningwa oshindji kaashi shi owala okuvulika komithikampango dhaJehova dhopamikalo. Ngoka a hala okwiiyapulila Jehova nokuninginithwa, oku na okukala ha kala pokugongala noha kutha ombinga miilonga yokuuvitha mbyoka tayi hupitha oomwenyo noyokuninga aantu aalongwa. Jesus okwa ti kutya iilonga mbika otayi ka longwa kaalongwa ye yashili. (Iil. 1:8) Omukonakonimbiimbeli ota vulu owala okwiiyapulila Jehova okupitila megalikano lyopaumwene nokuninginithwa montaneho yaantu, uuna a katuka oonkantu ndhoka.

ELALAKANO LYAAKONAKONIMBIIMBELI

13. Omolwashike omuuvithi e na okukaleka momadhiladhilo kutya eninginitho oli li oshitegelelwa shopaKriste?

¹³ Sho tatu kwathele aanona yetu naakonakonimbiimbeli yetu ya katuke oonkantu dha simana, natu kaleke momadhiladhilo kutya mboka ya halelela okuninga aalanduli yaKristus yashili, oye na okuninginithwa. Ngele shoka otwe shi kaleke momadhiladhilo, otatu ka popya nayo momukalo tagu pondola. Otatu ka popya nayo poompito tadhi opalele kombinga yankene sha simana okwiiyapulila Jehova nokuninginithwa. Odhoshili kutya otwa hala aanona yetu naakonakonimbiimbeli yetu ya ninge ehumokomeho sigo ya ninginithwa.

14. Omolwashike kaatu na okuthiminika omuntu a ninginithwe?

¹⁴ Odhoshili kutya omuntu ina pumbwa okuthiminikwa kaavali, kwaangoka ta konakona naye nenge kugulwe megongalo a ninginithwe. Shoka Jehova ine shi hokwa. (1 Joh. 4:8) Pehala lyaashono, sho tatu ya longo oshili, otu na okutsa omuthindo esimano lyokukokeka ekwatathano lyawo naKalunga. Shoka tashi ki inyengitha omukonakonimbiimbeli a ninginithwe, okupandula ye mwene oshili ndjoka tashi zi komutima nokukala a hala okuhumbata ondjoko yaKristus, ano okuninga omulongwa gwe. — 2 Kor. 5:14, 15.

15, 16. (a) Mbela omuntu oku na okukala e na omimvo dhontumba, opo a kale a gwana okuninginithwa? Shi yelitha. (b) Omolwashike omukonakoni e na okuninginithwa e li Onzapo yaJehova, nonando okwa li a ninginithwa nale komalongelokalunga galwe?

¹⁵ Omuntu ina pumbwa okukala e na omimvo dhontumba kondandalunde, opo a kale a gwana okuninginithwa. Omukonakoni kehe okwi ili noha ningi ehumokomeho shi thike pokuvula kwe. Aantu oyendji ohaya ninginithwa aagundjuka nohaya tsikile okukala aadhiginini kuJehova. Omanga aakonakoni yalwe hayi ilongo oshili nokuninginithwa mepipi lyuukokele. Yamwe ohaye shi ningi ye na omimvo dhi vulithe 100.

¹⁶ Omukonakonimbiimbeli gumwe omukokele, okwa li a pula ngoka ha konakona naye ngele osha pumbiwa ngaa a ninginithwe natango, molwaashono okwa li a ninginithwa nale momalongelokalunga galwe omimvo dha ka pita. Onkee ano, oya tala omanyolo ngoka taga opalele mOmbiimbeli. Omukonakoni okwa mono kutya osha pumbiwa, nokonima okwa ninginithwa. Nonando okwa li e na omimvo 70 nasha, ka li nando u uvite kutya ina pumbwa okuninginithwa. Eeno, eninginitho lyashili olyi ikolelela kokutseya shili ehalo lyaJehova. Onkee ano, aakonakonimbiimbeli oye na okuninginithwa, nonando oya ninginithwa nale komalongelokalunga galwe. — Lesha Iilonga 19:3-5.

17. Esiku omuntu ta ninginithwa, oku na okudhiladhila kombinga yashike?

¹⁷ Uuna gumwe ta ninginithwa, ohali kala esiku linyanyudha kuye. Ohali kala wo ethimbo lyokudhiladhila muule kombinga yeiyapulo neninginitho. Opo omuntu a kale metsokumwe neiyapulo lye, oku na okulonga nuudhiginini. Nomolwaashono Jesus a yelekanitha okukala omulongwa gwe nondjoko. Aalongwa yaJesus ‘kaye na okwiikalela we yo yene, ihe oye na okukalela nguka a si molwawo nokwa yumudhwa molwawo.’ — 2 Kor. 5:15; Mat. 16:24.

18. Omapulo geni tatu ka kundathana moshitopolwa tashi landula?

¹⁸ Yina yaMaria okwa li e na omadhiladhilo ngoka, sho i ipula omapulo ngoka ga tumbulwa metetekelo. Ngele ngoye omuvali, otashi vulika wi ipulile ngeyi: ‘Mbela okamwandje oka gwana ngaa shili okuninginithwa? Mbela oke na ngaa ontseyo ya gwana, opo ki iyapulile Jehova? Ongiini kombinga yomalalakano ge na ko nasha nelongo noniilonga? Ongiini ngele oka ninginithwa e taka gwile meyono lya kwata miiti?’ Moshitopolwa tashi landula, otatu ka kundathana omapulo ngoka nokutala nkene aavali Aakriste taya vulu okukala netaloko li li pandjele kombinga yeninginitho.