Kaleni mwe lilongekidila efiku laJehova

“Kaleni mwe lilongekida, osheshi Omona wOmunhu te uya efimbo tuu olo inamu mu teelela.”—MATEUS 24:44.

1. Omolwashike tu na okulipula nefiku laJehova?

OTALI ka kala efiku lolwoodi noupyuhandu, efiku loudjuu, lomilaulu nehanauno. “Efiku linene nolitilifa” laJehova otali ka hanga shili onghalelo ei yoinima youkolokoshi, ngaashi ashike Eyelu la hanauna po ounyuni woukolokoshi pefimbo laNoa. Otali ke uya shili. Ndelenee “[keshe] tuu ou ta ifana edina lOmwene, ye ota ka xupifwa.” (Joel 2:30-32; Amos 5:18-20) Kalunga ota ka hanauna po ovatondi vaye nokuxupifa oshiwana shaye. Omuprofeti Sefanja okwa popya neliudo kutya efimbo olo a li mulo ola endelela, a ti: “Efiku linene lOmwene oli li popepi! Heeno, popepi li li, ndee tali endelele okufika!” (Sefanja 1:14) Ndele onaini etokolo laKalunga tali ka wanifwa?

2, 3. Omolwashike sha fimanenena okukala twe lilongekidila efiku laJehova?

² Jesus okwa ti: “Efiku olo notundi oyo kaku na ou e i shii, nande ovaengeli vomeulu, ile Omona, oTate Oye aeke.” (Mateus 24:36) Molwaashi katu shii lelalela otundi oyo kutya onaini, osha fimanenena okupwilikina keendjovo domushangwa wetu womudo 2004, odo tadi ti: “Kaleni oupafi . . . Kaleni mwe lilongekida.”—Mateus 24:42, 44.

³ Mokuulika nghee ovo ve lilongekida tava ka xupifwa ombadilila ofimbo vamwe tava ka efuwa po, Jesus okwa ti: “Otaku ka kala ovalumenhu vavali mepya, umwe ota tambulwa, nomukwao ota fiwa po. Ovakainhu vavali tava [tu] koshini, umwe ota tambulwa, nomukwao ota fiwa po.” (Mateus 24:40, 41) Mbela ohatu ka hangika monghalo ya tya ngahelipi pauhandimwe pomhito oyo ya kwata moiti? Mbela ohatu ka kala twe lilongekida ile efiku olo otali ke tu hanga inatu lilongekida? Shihapu oshe likolelela keenghatu odo hatu katuka paife. Opo tu hangike twe lilongekidila efiku laJehova, otashi tu pula tu henuke oikala yonhumba oyo i li apeshe kunena nokukondja tu ha ye monghalo yopamhepo yonhumba nosho yo okuhenuka eenghedi dokukalamwenyo donhumba.

Henuka oikala yokuhenakonasha

4. Ovanhu vopefimbo laNoa okwa li ve na oikala ya tya ngahelipi?

⁴ Diladila shi na sha nefimbo laNoa. Ombibeli otai ti: “Meitavelo Noa, eshi a shiivifilwa inya inai monika natango, metilo liyapuki okwa tunga ongulu yomomeva, a xupife eumbo laye.” (Ovaheberi 11:7) Onguluwato oyo okwa li oshinima inashi monika nale nokwa li i liwetikile nawa. Kakele kaasho, Noa okwa li “omuudifi wouyuki.” (2 Petrus 2:5) Oilonga yokutunga nokuudifa kwaNoa inai linyengifa ovanhu vopefimbo laye va katuke eenghatu. Omolwashike mbela? Omolwaashi okwa li hava “li nohava nu, hava hombola nohava hombolifa.” Ovo Noa a udifila okwa li ve lipaka unene moinima yopaumwene nomomalihafifo nomolwaasho “inave shi shiiva, fiyo eyelu le uya nole va hanauna po aveshe.”—Mateus 24:38, 39.

5. Etaleko lovakalimo muSodom pefimbo laLot okwa li li li ngahelipi?

⁵ Okwa li sha faafana pefimbo laLot. Omishangwa otadi tu lombwele tadi ti: “Va kala hava li ndee hava nu, va landa novo va landifa, va twika nova tunga, ndelenee efiku olo Lot a dja mo muSodom, opa loka omundilo wosulfuri wa dja meulu, ndele owe va nyona po aveshe.” (Lukas 17:28, 29) Konima eshi ovaengeli va londwela Lot shi na sha nehanauno olo kwa li li li pokuuya, okwa lombwela oitenya yaye yovamati kombinga yaasho kwa li tashi ka ningwa po. Ndele pakutala kwavo, “oye ta popi omashendjo.”—Genesis 19:14.

6. Oikala ilipi tu na okuhenuka?

⁶ Ngaashi sha li pomafimbo aNoa naLot, “[osho] taku ningi yo [pokukala po, NW] kwOmona wOmunhu,” Jesus osho a ti. (Mateus 24:39; Lukas 17:30) Doshili, vahapu kunena ove na oikala yokuhenakonasha. Otu na okulungama tu ha nwefwe mo ketaleko la tya ngaho. Kape na sha osho sha puka nokuhafela okulya oikulya iwa nokunwa pandjele. Sha faafana, ohombo oi li elongekido laKalunga. Ndelenee ngeenge otwa lenge oinima oyo mokukalamwenyo kwetu fiyo osheshi oinima yopamhepo tai efiwa po, mbela kungaha otu li ngoo twe lilongekidila paumwene efiku litilifa laJehova?

7. Epulo la fimanenena lilipi tu na okulipula fimbo inatu lalakanena oshinima shonhumba, nomolwashike?

⁷ Omuyapostoli Paulus okwa ti: “Efimbo olo olixupi, onghee hano ava ve novakainhu, nava kale momafiku aa a xupa [ko], va fa kave va kwete.” (1 Ovakorinto 7:29-31) Oku na ashike efimbo la ngabekwa olo la fyaala ko opo tu mane oilonga yetu yokuudifa Ouhamba oyo twa pewa kuKalunga. (Mateus 24:14) Paulus okwa kumaida nokuli ovalihomboli va ha kale ve lipaka unene mokulipa elitulemo ndele oinima yOuhamba tai kala pondodo onhivali mokukalamwenyo kwavo. Osha yela kutya oikala yopamadiladilo oyo Paulus a li ta popile oi li mekondjifafano nokuhenakonasha. Jesus okwa ti: “Kongeni tete ouhamba waKalunga nouyuki waye.” (Mateus 6:33) Ngeenge hatu ningi etokolo keshe ile fimbo inatu lalakanena oshinima shonhumba, epulo la fimanenena olo tu na okulipula ololo kutya: ‘Osho otashi ka kuma ngahelipi okukaleka kwange oinima yOuhamba pondodo yotete mokukalamwenyo kwange?’

8. Ngeenge oinima yonghalamwenyo yakeshe efiku oyo unene hatu lipula nayo, oshike tu na okuninga po?

⁸ Ongahelipi ngeenge otwa didilika kutya otwa mangwa omboko koinima yonghalamwenyo yakeshe efiku fiyo oinima yopamhepo ya iwa moshipala? Mbela ope na eyooloko linini pokati konghedi yetu yokukalamwenyo naayo yovanhu vakwetu ovo ve he na eshiivo lashili lOmishangwa nokave fi ovaudifi vOuhamba? Ngeenge osho shi li ngaho, otwa pumbwa oku shi ilikanena. Jehova ota dulu oku tu ninga tu kale noikala yopamadiladilo ya yuka. (Ovaroma 15:5; Ovafilippi 3:15) Ota dulu oku tu kwafela tu kaleke oinima yOuhamba pondodo yotete, okuninga osho sha yuka nokuwanifa po oshinakuwanifwa shetu kuye.—Ovaroma 12:2; 2 Ovakorinto 13:7.

Kondjifa eemhofi dopamhepo

9. She likolelela kEhololo 16:14-16, omolwashike sha fimana okukondjifa eemhofi dopamhepo?

⁹ Exunganeko olo tali popi “oita mefiku linene laKalunga omunamapangelo aeshe” oyo tai uya puHarmagedon, otali londwele kutya vamwe otashi dulika itava ka kala oupafi. Omwene Jesus Kristus ota ti: “Tala, Ame ohandi uya ngaashi omulunga. Omunelao ou ha kala oupafi noha diinine oikutu yaye, a ha ende hamuhele, ohoni yaye i ha monike.” (Ehololo 16:14-16) Oikutu oyo ya popiwa apa otai ulike kwaasho tashi tu didilikifa tu li Ovakriste Eendombwedi daJehova. Osho osha kwatela mo oilonga yetu tu li ovaudifi vOuhamba nosho yo elihumbato letu lopaKriste. Ngeenge otwa i monghalo yokuhalonga sha oko taku yelekwa neemhofi, otashi dulika tu ka dulwe oukwatya wetu wopaKriste. Osho otashi fifa ohoni nosha nyika oshiponga. Otu na okukondja tu ha kwatwe keemhofi ile keloloko lopamhepo. Ongahelipi hatu dulu okukondjifa eamo la tya ngaho?

10. Omolwashike okulesha Ombibeli keshe efiku taku tu kwafele tu kale oupafi pamhepo?

¹⁰ Ombibeli oya divilika luhapu kutya otwa pumbwa okukala oupafi. Pashihopaenenwa, omahokololo Omavangeli otae tu dimbulukifa taa ti: “Kaleni oupafi” (Mateus 24:42; 25:13; Markus 13:35, 37); “kaleni mwe lilongekida” (Mateus 24:44); “kaleni mwa lungama, pashukeni” (Markus 13:33); “mu kale mwe lilongekida” (Lukas 12:40). Konima yokupopya kutya efiku laJehova otali ka hanga ounyuni ou ombadilila, omuyapostoli Paulus okwa ladipika ovaitaveli vakwao ta ti: “Inatu kofeni hano ngaashi venya vamwe, ndele tu pashukeni tu kale ovalidiliki.” (1 Ovatessaloniki 5:6) Membo laxuuninwa lOmbibeli, Kristus Jesus a fimanekwa okwa divilika okuuya neendelelo kwaye ta ti: “Ohandi uya diva.” (Ehololo 3:11; 22:7, 12, 20) Ovaprofeti vahapu Ovaheberi ova hokolola yo nokulondwela shi na sha nefiku linene letokolo laJehova. (Jesaja 2:12, 17; Jeremia 30:7; Joel 2:11; Sefanja 3:8) Okulesha Eendjovo daKalunga, Ombibeli efiku keshe nokudilonga kwaasho hatu lesha oshi li ekwafo linene mokukala tu li oupafi pamhepo.

11. Omolwashike ekonakonombibeli lopaumwene la fimanenena opo tu kale oupafi pamhepo?

¹¹ Heeno, itashi tu kaleke tuu oupafi pamhepo ngeenge hatu konakona noukeka paumwene Omishangwa hatu longifa oishangomwa oyo ya yandjwa ‘komupiya omudiinini nomunaendunge’ ya kanghamena kOmbibeli! (Mateus 24:45-47) Ndele opo ekonakono lopaumwene li ku etele ouwa, oli na okuningwa alushe pandjikilile. (Ovaheberi 5:14–6:3) Otu na okulya eendja dopamhepo pandjikilile. Okumona efimbo loku shi ninga otashi dulu okukala shi li eshongo momafimbo aa. (Ovaefeso 5:15, 16) Ndele nande ongaho, okulesha Ombibeli noishangomwa yopamishangwa ngeenge ashike she tu wapalela inashi wana. Ekonakono lopaumwene londjikilile ola fimanenena ngeenge otwa hala okukala twa ‘veluka meitavelo’ nokukala oupafi.—Titus 1:13.

12. Ongahelipi okwoongala kwopaKriste, oyoongalele inini naai ya kula tai tu kwafele tu kondjife eemhofi dopamhepo?

¹² Okwoongala kwopaKriste, oyoongalele inini naai ya kula nayo otai tu kwafele tu kondjife eemhofi dopamhepo. Ngahelipi mbela? Okupitila mehongo olo hatu mono. Mbela ihatu dimbulukifwa alushe shi na sha nokukala popepi kwefiku laJehova peemhito dokwoongala odo? Okwoongala kwopaKriste kwokoshivike ohaku tu pe yo eemhito opo “tu twafane omukumo mohole nomoilonga iwa.” Okutwaafana omukumo oko otaku tu kwafele tu kale oupafi pamhepo. Onghee itashi kumwifa eshi twa lombwelwa tu kale hatu kala pokwoongala alushe eshi hatu “mono efiku olo tali ehene popepi.”—Ovaheberi 10:24, 25.

13. Ongahelipi oukalele wopaKriste tau tu kwafele tu kale oupafi pamhepo?

¹³ Ohatu kwafelwa yo opo tu kale oupafi ngeenge hatu kufa ombinga nomutima aushe moukalele wopaKriste. Eenghedi diwa mbela dilipi nokukaleka momadiladilo omadidiliko efimbo nosho yo eityo lao shi he fi okulombwela vamwe kombinga yao? Nongeenge hatu mono ovo hatu konakona navo Ombibeli tava ningi exumokomesho nokukatuka metwokumwe naasho tave lihongo, ohashi tu kaleke unene neliudo kutya efimbo olo tu li mulo ola endelela. Omuyapostoli Petrus okwa ti: “Mangeni oiya yomadiladilo eni [nokukala oupafi filufilu, NW].” (1 Petrus 1:13) ‘Okukala alushe ovaladi moilonga yOmwene’ oshi li ouhaku muwa nokuhakula eemhofi dopamhepo.—1 Ovakorinto 15:58.

Henuka eenghedi dokukalamwenyo da nyika oshiponga pamhepo

14. Ngaashi sha hokololwa muLukas 21:34-36, Jesus okwa londwela shi na sha neenghedi dokukalamwenyo dilipi?

¹⁴ Mexunganeko laye linene li na sha nedidiliko lokukala po kwaye, Jesus okwa yandja natango elondwelo limwe. Okwa ti: “Lipashukileni, omitima deni di ha lolokifwe koitendele nokokukolwa nokoshisho shoipalwifa, efiku olo li he mu vakele ngaashi omwiyo, osheshi olo otali hange aveshe hava kala kombada yedu alishe. Pashukeni hano omafiku aeshe nokwiilikana, mu mone eenghono okuya onhapo ei aishe tai ka ningwa, nokukala ofika koshipala shOmona wOmunhu.” (Lukas 21:34-36) Jesus okwa hokolola mondjila eenghedi dokukalamwenyo odo ovanhu vahapu hava lalakanene: okulya sha pitilila, oukolwe nosho yo onghedi yokukalamwenyo oyo hai eta oisho ihapu.

15. Omolwashike tu na okuhenuka okulya nokunwa sha pitilila?

¹⁵ Okulya sha pitilila nokunwa unene itai tu kumwe nomafinamhango Ombibeli notu na oku i henuka. Ombibeli otai ti: “Ino kala mokati kaava hava finyuna omaviinyu, hamokati kaava va duka okulya ombelela.” (Omayeletumbulo 23:20) Ndele opo okulya nokunwa ku kale kwa nyika oshiponga inaku pumbwa okuya fiyo oposhitwa osho. Otai dulu okukofifa omunhu noku mu ninga omundede nonande ine uya fiyo oposhitwa osho. Eyeletumbulo lOmbibeli otali ti: “Omwenyo womundede tau haluka, ndelenee ita mono sha.” (Omayeletumbulo 13:4) Omunhu a tya ngaho otashi dulika a kale a hala okulonga ehalo laKalunga, ndelenee ehalo laye otali kala inali wanifwa omolwokuhenakonasha.

16. Ongahelipi hatu dulu okuhenuka okuwililwa po koisho i na sha noukwaneumbo?

¹⁶ Oisho ilipi Jesus a londwela kombinga yayo? Oya kwatela mo okukala noshisho shi na sha nomunhu ye mwene, okufila oshisho oukwaneumbo nosho tuu. Inashi nyika tuu oulai okweefa oinima oyo i tu wilile po! Jesus okwa pula ta ti: “Olyelye ou mokati keni, nande a kale e noshisho, ta dulu okuweda ko koule womafiku aye nande oludimbo limwe?” Okwa kumaida ovapwilikini vaye ta ti: “Inamu kala mu noshisho mu tye: Ohatu li shike? ndee: Hatu nu shike? ndee: Hatu djala shike? Osheshi eshi ashishe ovapaani tave shi kongo. Osheshi Xo yeni meulu oku shi shii mwa pumbwa ei aishe.” Okupitifa komesho oinima yOuhamba mokukalamwenyo kwetu nokukala nelineekelo kutya Jehova ote ke tu fila oshisho, otashi ka kaleka oisho kokule notashi ke tu kwafela tu kale oupafi.—Mateus 6:25-34.

17. Ongahelipi okulalakanena omaliko taku dulu okweeta oshisho?

¹⁷ Oisho otai dulu yo okuholoka po omolwohole yomaliko. Pashihopaenenwa, vamwe ohava ningi okukalamwenyo kwavo kwa kitakana mokukala tava lande oinima meendjo noitava dulu oku i futa. Vamwe ohava nanwa keemhangela dokumona oimaliwa mefimbo lixupi nosho yo kelongifo loimaliwa meengeshefa la nyika oshiponga. Vamwe ova ya momwiyo wokulalakanena oshimaliwa shihapu okupitila mehongo lopaunyuni. Doshili, omufika wonhumba wehongo otau dulu okukwafela omunhu a mone oilonga. Ndelenee oshoshili kutya vamwe mokulalakanena ehongo la wedwa po olo tali mane po efimbo, ove liyahameka vo vene pamhepo. Kai fi tuu onghalo ya nyika oshiponga okukala muyo eshi efiku laJehova tali ehene popepi! Ombibeli otai londwele tai ti: “Ava va hala okupunapala, otava wile momahongaulo nomomwiyo nomouhalu uhapu woulai nowoiponga, tau ninginifa ovanhu menyonauko nomekano.”—1 Timoteus 6:9.

18. Opo tu henuke okukokwa konghedi yokukalamwenyo yokuhola omaliko, ounghulungu ulipi tu na okukulika?

¹⁸ Oshinima sha fimana opo tu ha kokwe konghedi yokukalamwenyo yokuhola omaliko osho okukulika ounghulungu wokuyoolola pokati kaasho shi li mondjila naasho sha puka ngeenge hatu ningi omatokolo. Ounghulungu oo ohau kulikwa mokukala alushe hatu lipalula ‘neendya dopamhepo da pama daava va kula’ nosho yo ‘mokwiika okutongola ouwa nowii.’ (Ovaheberi 5:13, 14) Okushiiva “oinima oyo ya fimana unene” ngeenge hatu litulile po omalalakano nasho otashi ke tu amena tu ha ninge omahoololo a puka.—Ovafilippi 1:10, NW.

19. Ngeenge otwa didilike kutya ohatu longifa efimbo linini shi na sha noinima yopamhepo, oshike tu na okuninga po?

¹⁹ Onghedi yokukalamwenyo yokuhola omaliko otai dulu oku tu twikifa, oku tu ninga tu longife efimbo linini ile tu ha kale nande nefimbo loinima yopamhepo. Ongahelipi hatu dulu okulikonakona nokuhenuka okukokwa konghedi yokukalamwenyo ya tya ngaho? Otwa pumbwa okudiladila pamwe neilikano kutya ongahelipi nofiyo openi tu na okuninga okukalamwenyo kwetu ku kale paunafangwa. Ohamba Salomo yaIsrael shonale oya ti: “Eemhofi domulongi odo ditalala, nande ta li shinini ile shihapu; ndelenee oshipuna ta nyengwa okukofa molwouyadipuna washo.” (Omuudifi 5:11) Mbela okufila oshisho oiniwe yopamaliko inai pumbiwa ohaku mane po efimbo letu neenghono detu? Apa ngoo pe fike ouhapu woinima oyo tu na, opo ngoo pe fike omhumbwe yoku i kaleka po, oku i shilipaleka noku i amena. Otashi dulika mbela tashi ke tu etela ouwa mokuninga okukalamwenyo kwetu kwa nafangwa mokuninipika oiniwe yetu yonhumba?

Doshili, natu kale twe lilongekida

20, 21. (a) Eshilipaleko lilipi omuyapostoli Petrus te tu pe shi na sha nefiku laJehova? (b) Eengeda noilonga ilipi tu na okukala hatu wanifa po opo tu kale twe lilongekidila efiku laJehova?

²⁰ Efimbo okwa li la pwila po ounyuni wefimbo laNoa, notali ka pwila po yo onghalelo yoinima yopaife. Omuyapostoli Petrus okwe tu shilipaleka ta ti: “Efiku lOmwene otali ke uya ngaashi omulunga, opo tuu eulu tali nyonauka po [nomipwalakato] dinene noihovelitungifo otai dilukifwa komundjene, nedu noilongwanima otai lungwinine mo.” Kutya nee omaulu opafaneko—oo e li omapangelo makolokoshi—ile edu lopafaneko—olo li li ounhu oo wa tukuka ko kuKalunga—itai ka xupa moupyu wehandu linene laKalunga. Mokuulika nghee hatu dulu okukala twe lilongekidila efiku olo, Petrus okwa ti: “Hano oinima ei aishe ngenge tai hanauka ngaha, omu nokuhangika mwa tya ngahelipi [meengeda diyapuki nomoilonga yometilokalunga, NW], mokuteelela nokweendelelifa euyo lefiku laKalunga”!—2 Petrus 3:10-12.

²¹ Okukala kwetu alushe pokwoongala kwopaKriste nokukufa ombinga mokuudifa onghundana iwa oya kwatelwa meengeda nomoilonga yometilokalunga. Natu i longele Kalunga twe liyandja nomutima aushe ofimbo twa teelela nelidiiniko efiku laye linene. Natu ‘kendabaleni shili tu hangike kuye xuuninwa tu he nonyata notu he noshipo mombili.’—2 Petrus 3:14, yelekanifa NW.

Oto dimbuluka?

• Omolwashike tu na okulilongekidila efiku laJehova?

• Ngeenge otwa kwatwa omboko koinima yokukalamwenyo yakeshe efiku, oshike tu na okuninga po?

• Oshike tashi ke tu kwafela tu kondjife eemhofi dopamhepo?

• Eenghedi dokukalamwenyo da nyika oshiponga dilipi tu na okuhenuka, nongahelipi hatu dulu oku shi ninga?

[Efano pepandja 17]

Ovanhu vopefimbo laNoa kava li va shiiva ehanauno olo la li li li popepi—mbela ove ou shii kutya ehanauno oli li popepi?