Mbela owa hokwa “omhango yaJehova”?

1. Omolwashike tu udite elao tu li ovapiya vaJehova?

JEHOVA ohe tu yambidida noku tu nangeka noupuna tu li ovapiya vaye ovadiinini. Doshili, ohatu shakeneke omayeleko mahapu. Ndelenee otu na yo elao lashili. Osho itashi kumwifa molwaashi ohatu longele ‘Kalunga omunelao,’ nomhepo yaye iyapuki ohai etifa ehafo momitima detu. (1 Timoteus 1:11, OB-1954; Ovagalati 5:22) Ehafo olo onghalo yokukala tu udite elao lashili olo hali di mokuteelela ile mokumona sha shiwa. Nodoshili kutya Tate yetu womeulu ohe tu pe oipewa iwa. (Jakob 1:17) Nomolwaasho itashi kumwifa eshi tu udite elao!

2. Omapsalme elipi hatu ka kundafana?

² Okukala omunelao okwa divilikwa neenghono membo lOmapsalme. Pashihopaenenwa, osho osho naanaa shi li ngaho mEpsalme 1 neti-2. Ovashikuli vaJesus Kristus vonale ova ulika kohamba yaIsrael David i li omushangi wepsalme etivali. (Oilonga 4:25, 26) Omushangi wepsalme lotete oo ina tumbulwa kedina, okwa hovela eimbilo laye la nwefwa mo neendjovo edi tadi ti: “Omulumenhu omunelao [oye oo] iha ende pamhangela [yovahenakalunga].” (Epsalme 1:1) Moshitukulwa eshi nosho yo osho tashi landula, natu tale nghee Epsalme 1 neti-2 tali tu pe etomheno lokuhafa.

Oshiholekwa shelao

3. PaPsalme 1:1, omatomheno amwe molwaashi omutilikalunga e li omunelao oelipi?

³ Epsalme 1 otali holola kutya omolwashike omutilikalunga e li omunelao. Mokuyandja omatomheno amwe okukala omunelao a tya ngaho, omupsalme okwa imba a ti: “Omulumenhu omunelao [oye oo] iha ende pamhangela [yovahenakalunga], ndee iha lyata mondjila yovalunde, ndele iha kala omutumba mongudu yovasheki.”—Epsalme 1:1.

4. Onghatu i shii okuhopaenenwa ilipi Sakaria naElisabet va katuka?

⁴ Opo tu kale ovanelao shili, otu na okukala metwokumwe noiteelelwa yaJehova youyuki. Sakaria naElisabet ovo va li ve na oufembanghenda uhafifa wokuninga ovadali vaJohannes Omuninginifi, “ova li ovayuki koshipala shaKalunga nokweenda moipango aishe nomeenghedi dOmwene, ndele va li ve he na oshipo.” (Lukas 1:5, 6) Ohatu dulu okukala ovanelao ngeenge otwa katuka onghatu ya faafana nokwaanya filufilu ‘okweenda pamhangela yovahenakalunga’ ile okuwilikwa komayele avo e he fi opakalunga.

5. Oshike tashi dulu oku tu kwafela tu henuke okweenda “mondjila yovalunde”?

⁵ Ngeenge otwa ekeleshi okudiladila kwovahenakalunga, itatu ka “lyata mondjila yovalunde.” Doshili, itatu ka kala nande opo hava kala luhapu—peenhele domalihafifo a nyata ile mai. Ongahelipi ngeenge ohatu yelekwa tu limbwange mumwe novalunde melihumbato lavo li he li pamishangwa? Otu na hano okwiilikana Kalunga e tu kwafele tu katuke metwokumwe neendjovo domuyapostoli Paulus odo tadi ti: “Inamu humbata ondjoko imwe pamwe naava ve he neitavelo; osheshi ouyuki ou noukumwe washike nouhenouyuki? Ile ouyelele ou nekwatafano lashike nomulaulu?” (2 Ovakorinto 6:14) Ngeenge otwe lineekela Kalunga notu “nomitima da yela,” ohatu ka ekelashi omhepo nosho yo onghedi yokukalamwenyo yovalunde nohatu ka kala tu na omalinyengotomheno nomahalo a yuka pamwe ‘neitavelo li he noihelele.’—Mateus 5:8; 1 Timoteus 1:5.

6. Omolwashike tu na okulungamena ovasheki?

⁶ Opo tu hafife Jehova, katu na nande ‘okukala omutumba mongudu yovasheki.’ Vamwe ohava sheke etilokalunga lo vene, ndele ‘momafiku aa axuuninwa,’ ovo va li nale Ovakriste ndele ova ninga ovashunimonima, luhapu ovo unene hava sheke nodino inene. Omuyapostoli Petrus okwa londwela ovaitaveli vakwao a ti: “Ovaholike, . . . kaleni mu shi shii tetetete nokutya, momafiku axuuninwa otamu ka holoka ovasheki tava shekaula, ovo otava endifwa kouhalu wavo vene, ndee tava ti: Eudaneko lealuko laye oli li peni? Osheshi nghee tuu ootatekulu va fya, oinima aishe oi li ngaashi ya kala pehovelo leshito.” (2 Petrus 3:1-4) Ngeenge itatu “kala omutumba mongudu yovasheki,” nandenande, ohatu ka henuka oshiponga osho tashi ke va hanga.—Omayeletumbulo 1:22-27.

7. Omolwashike tu na okupwilikina kEpsalme 1:1?

⁷ Ngeenge itatu pwilikine keendjovo dEpsalme 1 dopehovelo, ohatu dulu okukanifa oupamhepo wetu oo twa mona mokukonakona Omishangwa. Doshili, ohatu dulu okunaipala neenghono. Okunaipala oko otaku dulu okuhovela ngeenge otwa shikula omayele ovahenakalunga. Opo nee otashi dulika tu kale hatu endafana navo pandjikilile. Konima yefimbo otashi dulika tu ninge nokuli ovashunimonima, tu he na eitavelo nohatu sheke. Osha yela kutya oukaume novahenakalunga otau dulu okukulika mufye omhepo youhenakalunga notau dulu okunyona po ekwatafano letu naJehova Kalunga. (1 Ovakorinto 15:33; Jakob 4:4) Inatu efa nandenande osho shi tu ningilwe!

8. Oshike tashi ke tu kwafela tu kaleke oinima yopamhepo momadiladilo?

⁸ Eilikano otali tu kwafele tu kaleke oinima yopamhepo momadiladilo notu henuke eendafano novahenakalunga. Paulus okwa shanga a ti: “Kaleni mu he na nande oshisho shasha, ndelenee oufyoona weni u shiivifileni Kalunga momailikano nomomaindilo pamwe nomapandulo, nombili yaKalunga ei i dule eendunge adishe, otai ka amena omitima deni nomadiladilo eni muKristus Jesus.” Omuyapostoli okwa ladipika shi na sha nokudiladila oinima oyo yoshili, ya fimana, ya yuka, ya koshoka, i holike, i netumbalo liwa, eenghedi diwa ile oyo i shi okupandulwa. (Ovafilippi 4:6-8) Natu katukeni metwokumwe nomayele aPaulus noinatu endeni nande mondjila imwe novahenakalunga.

9. Nonande ohatu ekeleshi oilonga youkolokoshi, ongahelipi hatu kendabala okukwafela ovanhu vomaludi aeshe?

⁹ Nonande ohatu ekeleshi oilonga youkolokoshi, ohatu yandje nelungi oundombwedi kuvamwe, nokuli ngaashi omuyapostoli Paulus a popya nomupangeli Omuroma Feliks kombinga ‘youyuki nelidiliko netokolo olo li nokuuya.’ (Oilonga 24:24, 25; Ovakolossi 4:6) Ohatu udifile ovanhu vomaludi aeshe onghundana iwa yOuhamba nohatu ungaunga navo monghedi iwa. Otu na elineekelo kutya ‘ovo ve na oikala iwa kombinga yomwenyo waalushe’ otava ka ninga ovaitaveli notava ka hokwa omhango yaKalunga.—Oilonga 13:48, NW.

Oha hokwa omhango yaJehova

10. Oshike tashi ke tu kwafela tu findile momadiladilo etu nomomitima detu osho hatu lesha fimbo hatu ningi ekonakono lopaumwene?

¹⁰ Shi na sha nomulumenhu omunelao, omupsalme okwa weda ko a ti: “Ha hokwa omhango [yaJehova] noku i [lesha nondaka yopedu] omutenya noufiku.” (Epsalme 1:2, yelekanifa NW.) Tu li ovapiya vaKalunga, otwa ‘hokwa omhango yaye.’ Ngeenge otashi shiiva, fimbo hatu ningi ekonakono lopaumwene nokudilonga, ohatu dulu okulesha “nondaka yopedu,” sha hala okutya hatu tumbula eendjovo. Okuninga ngaho ngeenge hatu lesha oshitukulwa keshe shOmishangwa otashi ke tu kwafela tu findile momadiladilo etu nomomitima detu osho hatu lesha.

11. Omolwashike tu na okulesha Ombibeli “omutenya noufiku”?

¹¹ “Omupiya omudiinini nomunaendunge” okwe tu ladipika tu leshe Ombibeli efiku keshe. (Mateus 24:45) Molwaashi otu na ehalo linene okushiiva nawa etumwalaka laJehova kovanhu aveshe, ohatu ningi nawa ngeenge hatu lesha Ombibeli “omutenya noufiku”—doshili, nokuli nongeenge itatu dulu okukofa omolwomatomheno onhumba. Petrus okwe tu ladipika a ti: “[Haleni] shili ongaashi ouhanana omashini aa omeendjovo inamu ya sha, opo mu kule keenghono dao, mu xupifwe.” (1 Petrus 2:1, 2) Mbela ou na ohokwe yokulesha Ombibeli keshe efiku nokudilonga Eendjovo daKalunga nomalalakano aye oufiku? Omupsalme osho kwa li ha ningi.—Epsalme 63:7.

12. Oshike osho hatu ka ninga ngeenge otwa hokwa omhango yaJehova?

¹² Okukala kwetu ovanelao fiyo alushe okwe likolelela kokukala twa hokwa omhango yaKalunga. Omhango oya wanenena noiyuki nope na ondjabi inene moku i diinina. (Epsalme 19:8-12) Omuhongwa Jakob okwa shanga a ti: “Ou ta tale nokukonakona momhango ei ya wana yemanguluko ndee ta kala mo, ye e he fi omupwilikini ha dimbwa, ndelenee omuwanifi shili, oye ta kala omunelao mokulonga kwaye.” (Jakob 1:25) Ngeenge otwa hokwa shili omhango yaJehova, kape na efiku tali ka pita po inatu yandja elitulemo koinima yopamhepo. Doshili, ohatu ke linyengifwa tu ‘konakone oinima yomoule yaKalunga’ nokupitifa komesho oinima yOuhamba mokukalamwenyo kwetu.—1 Ovakorinto 2:10-13, NW; Mateus 6:33.

Ota kala ngaashi omuti

13-15. Omeityo lilipi hatu dulu okukala ngaashi omuti wa twikwa podjo yomeva mahapu?

¹³ Natango mokuhepaulula omuyuki, omupsalme okwa ti: “Ota ka kala ngaashi omuti, ou wa twikwa pomatondokelo omeva ndee tau imifa oiimati yao pefimbo lao, nomafo ao ihaa lembe, naashishe eshi ta ningi, osha fewa.” (Epsalme 1:3) Ngaashi ashike ovanhu aveshe vakwetu inava wanenena, nafye ovo hatu longele Jehova ohatu shakeneke omaudjuu mokukalamwenyo. (Job 14:1) Otashi dulika tu hangike komahepeko nokomayeleko e lili noku lili shi na sha neitavelo letu. (Mateus 5:10-12) Ndele kekwafo laKalunga, ohatu dulu okulididimikila omayeleko oo nomupondo, ngaashi ashike omuti wa kola hau pondola oikungulu yeemhepo dinenenene.

¹⁴ Omuti oo wa twikwa pomatondokelo omeva aalushe, ihau lembe pefimbo loluteni ile loshikukuta. Ngeenge otu li ovatilikalunga, eenghono detu otadi tu dilile kOdjo yaalushe—Jehova Kalunga. Paulus okwa pula ekwafo kuKalunga nokwa li ta dulu okutya: “Aishe ohandi i dulu omolwaau [Jehova] ta pameke nge.” (Ovafilippi 4:13, NW) Ngeenge ohatu wilikwa nokupamekwa pamhepo komhepo iyapuki yaJehova, itatu ka lemba ndele hatu kala itatu imike oiimati ile tu fye pamhepo. Ohatu imike oiimati moilonga yaKalunga nohatu ulike yo oiimati yomhepo yaye.—Jeremia 17:7, 8; Ovagalati 5:22.

¹⁵ Mokulongifa olupe loshitya shOshiheberi sha tolokwa “ngaashi,” omupsalme ota longifa efaafanifo. Ota faafanifa oinima ivali oyo ya yoolokafana, nonande oi na oukwatya wonhumba oo wa faafana. Ovanhu ova yooloka ko komiti, ndele ewapalo lomuti wa twikwa podjo yomeva mahapu osha yela kutya osha dimbulukifa omupsalme ehepuluko lopamhepo laavo va “hokwa omhango yaJehova.” Ngeenge otwa kala twa hokwa omhango yaKalunga, omafiku etu otaa dulu okukala ngaashi omiti. Doshili, ohatu dulu okukala nomwenyo fiyo alushe.—Johannes 17:3.

16. Omolwashike nongahelipi ‘aishe oyo hatu ningi ya fewa’?

¹⁶ Eshi hatu twikile nonghatu ya yuka, Jehova ote tu kwafele tu lididimikile omayeleko nomaudjuu. Otwa hafa nohatu imike oiimati moilonga yaKalunga. (Mateus 13:23; Lukas 8:15) ‘Aishe oyo hatu ningi oya fewa’ molwaashi elalakano letu linene olo okulonga ehalo laJehova. Molwaashi omalalakano aye ohaa pondola alushe notwa hokwa oipango yaye, ohatu hepuluka pamhepo. (Genesis 39:23; Josua 1:7, 8; Jesaja 55:11) Naasho osho hashi kala ngaho nonande ohatu shakeneke omaupyakadi.—Epsalme 112:1-3; 3 Johannes 2.

Ovahenakalunga otava monika va fa va hepuluka

17, 18. (a) Omupsalme okwa faafanifa omuhenakalunga nashike? (b) Nokuli nande ovahenakalunga ova hepuluka pamaliko, omolwashike ve he na eameno tali kalelele?

¹⁷ Kape na tuu eyooloko pokati konghalo yovahenakalunga naayo yovayuki! Ovahenakalunga otashi dulika va monike va fa va hepuluka pamaliko oule wokafimbo, ndele inava hepuluka pamhepo. Osho oshi liwetikile meendjovo domupsalme eshi a weda ko a ti: “Ava ve he na Kalunga hasho ve li ngaho, ndelenee vo va fa oshipepelungu, tashi i omhepo. Onghee ovahenakalunga metokolo itava ka kanghama mo, novalunde itava kala mo meongalo lovayuki.” (Epsalme 1:4, 5) Didilika kutya omupsalme okwa ti: “Ava ve he na Kalunga hasho ve li ngaho.” Okwa hala okutya inava fa ovatilikalunga, ovo va faafanifwa metetekelo nomiti tadi kalelele nohadi imi oiimati.

¹⁸ Nokuli nande ovahenakalunga ova hepuluka pamaliko, kave na eameno tali kalelele. (Epsalme 37:16; 73:3, 12) Ova fa omulumenhu oshipuna welai oo Jesus a tumbula mefaneko limwe eshi kwa li a pulwa a tokole oshinima shi na sha nefyuululo. Jesus okwa lombwela ovo va li po a ti: “Pashukeni onye mu lungame keshe tuu olwisho, osheshi omwenyo womunhu ihau xupifwa kouhapu weliko laye.” Jesus okwa yelifa oshitwa osho mokupopya efaneko li na sha nepya loshipuna shonhumba olo kwa li la dala nawa nomolwaasho osha diladila okuhanauna po omaanda asho nokutunga amwe manene opo shi dule okutuvikila mo emona lasho alishe. Opo nee osha diladila okulya nokunwa nokunyakukwa. Ndele Kalunga okwa ti: “Elai ove, oufiku tuu ou wonena omwenyo woye oto u kufwa, hano aishe ei we i likola otai ningi yalyelye?” Opo a divilike oshitwa shaye, Jesus okwa weda ko ta ti: “Hano osho ou te lilikolele emona, ye ke na oupuna puKalunga, ta ningwa.”—Lukas 12:13-21.

19, 20. (a) Hokolola onghedi yonale yokuxwa nokuyela oilya yomuIsrael shonale. (b) Omolwashike ovahenakalunga va faafanifwa nolungu?

¹⁹ Ovahenakalunga kave na “oupuna puKalunga.” Onghee hano, kave na eameno lasha nekanghameno, ongaashi ashike olungu, oupeta ovo hava kala va uvika eemuma doilya. MuIsrael shonale, konima eshi oilya ya teywa okwa li hai twalwa koshipale, onhele ya lalakana ndele oya londa. Omatemba okuxwa e na omamanya a honga ile omayoo oitenda koshi, okwa li haa endifwa kombada yoilya taa nanwa koinamwenyo opo omitwe doilya di teyaulwe neemuma di dje mo molungu. Opo nee oshixupulo shokuyela okwa li hashi longifwa okuyela oilya momhepo. (Jesaja 30:24) Eemuma ohadi wile pedu loshipale, ofimbo oiti hai pepelwa komunghulo, lo olungu ohali pepelwashi komhepo. (Rut 3:2) Konima yaasho eshi oilya ya fifwa opo oumanya noukuma va kufwe mo, okwa li hai kala ya fika okutuvikilwa ile okutuwa. (Lukas 22:31) Ndele efimbo olo olungu ola kana po nalenale.

²⁰ Ngaashi ashike eemuma doilya hadi wile pedu ndee tadi tuvikilwa ofimbo olungu hali pepwa po, osho tuu novayuki otava ka kala po ofimbo ovahenakalunga tava ka kombololwa po. Onghee otwa hafa shili eshi ovakolokoshi ovo mafiku tava ka kana po fiyo alushe. Eshi tava ka kala ve he po vali, ovanhu ovo va hokwa omhango yaJehova otava ka nangekwa noupuna munene. Doshili, ovanhu ovaduliki xuuninwa otava ka mona oshali tai di kuKalunga yomwenyo waalushe.—Mateus 25:34-46; Ovaroma 6:23.

“Ondjila yovayuki” ya nangekwa noupuna

21. Ongahelipi Jehova ha ‘shiiva ovayuki’?

²¹ Epsalme lotete otali xulifa neendjovo edi tadi ti: “Osheshi ondjila yovayuki Omwene oku i shii; ndelenee ondjila yovahenakalunga otai hanauka po.” (Epsalme 1:6) Ongahelipi Kalunga ha ‘shiiva ovayuki’? Ngeenge ohatu twikile nonghatu ya yuka, ohatu dulu okukala noushili kutya Tate yetu womeulu ota tale okukalamwenyo kwetu kwopakalunga note tu tale ko tu li ovapiya vaye e va hokwa. Nafye ohatu dulu notu na okuundulila oisho yetu aishe kuye tu na elineekelo kutya ote tu file oshisho shili.—Hesekiel 34:11; 1 Petrus 5:6, 7.

22, 23. Oshike tashi ka ningilwa ovahenakalunga nosho yo ovayuki?

²² “Ondjila yovayuki” otai kala po fiyo alushe, ofimbo ovahenakalunga ovo va kolonda tava ka kana po omolwetokolo laJehova lidjuu. ‘Nondjila’ yavo ile onghedi yavo yokukalamwenyo otai ka xula po pamwe navo. Ohatu dulu okukala nelineekelo mewanifo leendjovo daDavid tadi ti: “Ngenge pa pita okafimbo kaningholi, omuhenakalunga ita kala po vali, nonganga to talaatala onhele yaye, ke po vali nande. Ndelenee ovananheni vo otava ka fyuulula edu, ndee tava ka hafela ombili inene. Ovayuki, vo otava ka fyuulula [edu, OB-1986], ndee tava kala mo alushe.”—Epsalme 37:10, 11, 29.

²³ Itatu ka kala tuu tu udite elao ngeenge twa mono oufembanghenda wokukala meduparadisa eshi ovahenekalunga tava ka kala ve he po vali! Opo nee ovananheni novayuki otava ka hafela ombili yashili molwaashi otava ka kala alushe va hokwa “omhango yaJehova.” Ndelenee fimbo osho inashi ningwa, “omhangela [yaJehova, NW]” oi na okuwanifwa. (Epsalme 2:7a) Oshitukulwa tashi landula otashi ke tu kwafela tu shiive kutya omhangela oyo oilipi notai ka tya shike kufye nosho yo kovanhu aveshe.

Oto nyamukula ngahelipi?

• Omolwashike omutilikalunga e li omunelao?

• Oshike tashi ulike kutya otwa hokwa omhango yaJehova?

• Ongahelipi omunhu ta dulu okukala a fa omuti oo hau mono omeva a wana?

• Ongahelipi ondjila yovayuki ya yooloka ko kwaayo yovahenakalunga?

[Efano pepandja 9]

Omailikano otae tu kwafele tu henuke eendafano novahenakalunga