Oohapu dhaJehova odhi na omwenyo
Omanenedhiladhilo okuza membo etitatu netine lyOmapisalomi
OMUPISALOMI okwa pula Kalunga a ti: “Esilohenda lyoye ohali tumbulwa tuu mombila, nenge mehala lyehanagulo ohamu popiwa tuu uudhiginini woye?” (Episalomi 88:11) Osha yela kutya hasho. Itatu vulu okutanga Jehova ngele katu na omwenyo. Omaganohenda gomwenyo oge na oku tu inyengitha opo tu tange Jehova, molwaashoka oku mu tanga oko taku ningitha onkalamwenyo yetu yi kale tayi ti sha.
Embo etitatu netine lyOmapisalomi olya thikama po mEpisalomi 73 sigo 106 notali tu pe omatompelo ogendji gokutanga Omushiti gwetu nokusimaneka edhina lye. Ngele tatu kala nokutedhatedha kOmapisalomi ngaaka, olupandu lwetu okupandula “oohapu dhaKalunga” otalu ka kala lwomuule notashi ka tamununa mo nokuhwepopaleka oohapu dhetu dhoku mu tanga. (Aahebeli 4:12) Natu yanuneni tango kembo etitatu lyOmapisalomi (Episalomi 73-89) tu na ohokwe onene.
“OSHO OPALELA NDJE OKUKALA POPEPI NAKALUNGA”
(Episalomi 73:1–89:52)
Episalomi 73 sigo 83 olya nyolwa kuAsaf nenge kugumwe gwomaanegumbo lye. Episalomi 73 otali yelitha shoka sha li sha kwathele Asaf kaa falafalwe komadhiladhilo ga puka. Okwa li a thiki pehulithodhiladhilo li li mondjila. Okwa li i imbi ta ti: “Osho opalela ndje okukala popepi naKalunga.” (Episalomi 73:28) Episalomi 74 ndyoka lya landula ko oli li elilagano omolwehanagulo lyaJerusalem. Episalomi 75, 76 neti-77 otali hokolola Jehova e li Omupanguli omuuyuuki, Omuhupithi gwaaifupipiki nOmuuvi gwomagalikano. Episalomi 78 otali endulula ondjokonona yonale yAaisraeli okuza pethimbo lyaMoses sigo opethimbo lyaDavid. Episalomi 79 otali hokolola kombinga yelilagano omolwehanagulo lyotempeli. Episalomi 80 otali popi kombinga yegalikano omolwetungululo lyoshigwana shaKalunga. Episalomi 81 otali popi kombinga yekumagidho okukumagidha Aaisraeli ya kale haya vulika kuJehova. Episalomi 82 neti-83 oge li omagalikano okugalikana Kalunga a pangule aapanguli aakaanuuyuuki naatondi yoshigwana she.
Oyana yaKora oyi imbi taya ti: “Omwenyo gwandje otagu yuulukwa okuya motempeli yOMUWA.” (Episalomi 84:2) Episalomi 85 otali popi shi na ko nasha nokupula Kalunga a laleke nuuyamba mboka ya galuka muupika. Episalomi olyo tuu ndyoka otali tsu omuthindo kutya omayambeko gopambepo oge na oshilonga ge vule ngoka gopanyama. MEpisalomi 86, David okwa li a pula Kalunga e mu gamene noku mu longe. Episalomi 87 olyo eimbilo tali tanga Sion naamboka ya valelwa musho, nEpisalomi 88 oli li egalikano kuJehova. Uuwanawahenda waJehova ngaashi wa popiwa mehangano ndyoka a li a ningi naDavid owa tsuwa omuthindo mEpisalomi 89, ndyoka lya nyolwa kuEtan, ngoka tashi vulika a li gumwe gwomaalumentu yane aanandunge, mboka ya li ko pethimbo lyaSalomo.—1 Aakwaniilwa 4:31.
Omapulo gopamanyolo taga yamukulwa:
73:9—Omomukalo guni aakolokoshi taya “sheke Kalunga e li megulu; taa tumbula omalombwelo guuntsa kaakali kombanda yevi?” Molwaashoka aakolokoshi inaya simaneka mboka ye li megulu nenge mboka ye li kombanda yevi, ohaya sheke Kalunga nomilungu dhawo. Ohaya lundile wo aantu ooyakwawo.
74:13, 14—Uunake Jehova a ‘nyanyagula omitse dhiilyani yomomeya nokuteta ko omitse dhevovo’? “[Farao] omukwaniilwa gwaEgipiti” oye ti ithanwa “ngandu ngoye omuhaluthi u li momulonga Niili.” (Hesekiel 29:3) Evovo otali thaneke “aanankondo yaFarao.” (Episalomi 74:14, enyolo lyopevi mo-NW) Okunyanyagula omitse dhawo otashi vulika tashi ulike kokusindwa kwaFarao netanga lye sho Jehova a hupitha Aaisraeli okuza muupika muEgipiti.
75:5, 6,11, OB-1954—Uutumbulilo “olwiinga” otau thaneke shike? Ooniga dhoshinamwenyo odhi li oshikondjitho shi na oonkondo. Onkee ano uutumbulilo “olwiinga” otau ulike pathaneko koonkondo nenge komatha. Jehova okwa li a tumbile pombanda ooniga dhoshigwana she noku shi tumbaleka, ihe okwa li a ‘keke po ooniga dhaalunde.’ Otatu londodhwa opo twaaha ‘tumbile pombanda ooniga dhetu,’ sha hala okutya, katu na okukala tu na iikala yuuntsa nenge yeinenepeko. Molwaashoka Jehova oye ha tumbaleke omuntu, uuthembahenda wokukala niinakugwanithwa megongalo otu na oku wu tala ko wa za kuye.—Episalomi 75:7.
76:10—Ongiini “ondjahi yaantu” tayi ka hulila mokusimaneka Jehova? Uuna Kalunga te etha aantu ye tu geele molwaashoka tu li aapiya ye, otashi vulika shi ete iizemo iiwanawa. Uudhigu kehe mboka tatu mono otau vulu oku tu dheula momukalo gwontumba. Jehova ohe etha tu mone iihuna uule owala wokathimbo kontumba opo shi tu dheule. (1 Petrus 5:10) ‘Mboka taa hupu miita, otaya ka pandula Kalunga.’ Ongiini ngele tatu mono iihuna sigo omeso? Shika nasho otashi vulu okusimanekitha Jehova molwaashoka mboka taye tu mono tatu idhidhimike nuudhiginini otashi vulika nayo ya tameke okusimaneka Kalunga.
78:24, 25—Omolwashike omanna ga li hagi ithanwa “iikulya yokegulu” nosho wo “iikulya yaayengeli”? Omautumbulilo ngoka inaga hala lela okutya omanna oga li iikulya yaayengeli. Oga li gi ithanwa “iikulya yokegulu” molwaashoka oga za megulu. (Episalomi 105:40) Molwaashoka aayengeli oye li megulu, uutumbulilo “iikulya yaayengeli” otau ti kutya iikulya mbyoka oya li ya gandjwa kuKalunga ngoka e li megulu. (Episalomi 11:4) Jehova okwa li wo a longitha aayengeli ya pe Aaisraeli omanna.
82:1, 6—Oolye tayi ithanwa “ookalunga” nosho wo “aana yaanguka gwokombandambanda”? Omautumbulilo agehe ngoka gaali otagu ulike kaapanguli yopantu muIsraeli. Shika oshi li she eleka molwaashoka oya li aapopikalelipo naakalelipo yaKalunga.—Johannes 10:33-36.
83:3, OB-1954—‘Okuyelutha omutse kwomuntu’ otashi ulike shike? Otashi ulike kokukala wi ilongekidha okulongitha oonkondo dhoye nenge okukatuka onkatu; olundji ohashi ulike kokupataneka nokokukondja nenge kokuthininika yalwe.
Iiyilongomwa kutse:
73:2-5, 18-20, 25, 28. Katu na okusila ondumbo uulinawa waakaanakalunga nokutaamba ko omikalo dhawo dhokwaanakalunga. Aakanakalunga oye li pokuma pu na omuthenu. Osha yela kutya otaye ku ‘undulilwa meyonuuko.’ Kakele kaashono, molwaashoka uukwaanakalunga itau vulu okukuthwa mo maapangeli yopantu inaaya gwanenena, oonkambadhala dhetu dhoku wu kutha mo otadhi ka kala dhosima. Oshi li pandunge ngele tatu kondjitha okwaanakalunga ngaashi Asaf ‘mokukala popepi naKalunga’ nomokukala tu na ekwatathano lyopothingo naye.
73:3, 6, 8, 27. Otu na okukala twa kotokela einenepeko, uuntsa, okusheka nokuningilila mo yalwe. Otu na okukala twe yi kotokela, nokuli nonando okukala nuukwatya mboka otashi monika sha fa shi li oshinima oshiwanawa.
73:15-17. Uuna twa limbilikwa kusha, katu na okulombwela kehe gumwe oshinima shoka she tu limbilika. Okupopya ‘oohapu dha tya ngaaka’ otaku ka teya owala yalwe omukumo. Opo tu pondole omadhiladhilo ga tya ngaaka, otu na okukala hatu tedhatedha nawa shi na ko nasha nago nokukala hatu endathana nooitaali ooyakwetu.—Omayeletumbulo 18:1.
73:21-24, OB-1954. Okukala ‘nomwenyo gwa geya’ molwaashoka tu wete aakanakalunga ya fa ye li nawa otaku faathanithwa nokwiinyenga kwiiyamakuti kaayi na oondunge. Okugeya kwa tya ngaaka kaku li pandunge molwaashoka okwa kankamena owala komaiyuvo getu yene. Pehala lyaashono, otu na okuwilikwa komayele gaJehova, tu na einekelo kutya ote ke tu ‘kwata koshikaha shetu shokolulyo’ noku tu yambidhidha. Natango Jehova ‘ote ke tu taamba mesimano lye,’ sha hala okutya, otatu ka kala tu na ekwatathano lyopothingo naye.
77:6. Opo tu kale hatu dhiladhila kooshili dhopambepo, otu na okukonga ethimbo lyoku dhi konakona noku dhi tedhatedha. Inashi simana tuu noonkondo okukala hatu kongo ethimbo lyeimweneneno lyoku shi ninga monkalamwenyo yetu!
79:9. Jehova oha pulakene komagalikano getu, unene tuu ngele oge na ko nasha nokusimanekitha edhina lye.
81:13, 16. Okupulakena kewi lyaJehova nokweenda moondjila dhe otashi tu etele omayambeko ogendji.—Omayeletumbulo 10:22.
82:2, 5, OB-1954. Okwaahenuuyuuki ohaku yono po ‘omikanka dhevi.’ Sha hala kutya, iilonga yokwaahenuuyuuki ohayi piyaganeke onkalonawa yuulipamwe waantu.
84:1-4, 10-12. Okusimaneka kwaapisalomi ehala lyokugalikanena Jehova nosho wo okunyanyukilwa uuthembahenda wawo wiilonga oshi li oshiholelwa kutse.
86:5. Inatu pandula tuu sho Jehova he tu “dhimine po”! Oha tala mboka tayi itedhulula opo e ya sile ohenda e ya dhimine po.
87:5, 6. Mbela mboka taya ka kala nomwenyo mOparadisa kombanda yevi otaya ka kala ngaa ye shi omadhina gaamboka ya yumudhilwa omwenyo gwomegulu? Oovelise ndhika otadhi shi ulike kutya oshi li tashi vulika.
88:13, 14. Ngele egalikano lyetu kombinga yuupyakadhi wontumba inali yamukulwa mbala, otashi vulika Jehova a hala tu ulike kutya otwa hala lela shoka tatu mu indile.
“MU PANDULENI NE MU SIMANEKE EDHINA LYE”
(Episalomi 90:1–106:48)
Tala omatompelo gi ili nogi ili gokutanga Jehova ngoka ga tumbulwa mEpisalomi 90-106. MEpisalomi 90, Moses ota ningi ekondjithathano pokati kokukala po ‘kwomukwaniilwa gwaaluhe’ nonkalamwenyo yaantu ofupi. (1 Timoteus 1:17) Moses ota popi Jehova mEpisalomi 91:2 e li Omugameni gwe sho ta ti: “Ongoye omupopili nomugameni gwandje.” Omapisalomi gontumba ga landula ko otaga popi omaukwatya gaKalunga omawanawa, omadhiladhilo ge ge li dhingi nosho wo iilongankumwe ye. Omaimbilo gatatu gOmapisalomi oga tameka noohapu tadhi ti kutya “OMUWA oye omukwaniilwa.” (Episalomi 93:1; 97:1; 99:1) Sho omupisalomi ta popi Jehova e li Omushiti gwetu, ote tu hiya opo tu ‘mu pandule notu simaneke edhina lye.’—Episalomi 100:4.
Omupangeli ngoka ha tila Jehova oku na okupangela ngiini aapangelwa ye? Episalomi 101, ndyoka lya nyolwa komukwaniilwa David, otali gandja eyamukulo. Episalomi tali landula ko otali tu lombwele kutya Jehova “ota ka uva omagalikano gomapongo noita ka dhina omaindilo gago.” (Episalomi 102:17) Episalomi 103 otali gandja eitulomo kesilohenda nokontalanteni yaJehova. Mokupopya iinima oyindji mbyoka Kalunga a shita kombanda yevi, omupisalomi okwa popi mokule ta ti: “OMUWA, owa shiti iinima oyindji! Tala, nkene wa shiti ayihe noondunge!” (Episalomi 104:24) Omaimbilo gaali gahugunina, Episalomi 105 ne-106, gomembo etine lyomapisalomi otaga tanga Jehova molwiilongankumwe ye.—Episalomi 105:2, 5; 106:7, 22.
Omapulo gopamanyolo taga yamukulwa:
91:1, 2—‘Egameno lyOmunankondoawike’ oshike nongiini tatu vulu ‘okukala mo?’ Egameno lyOmunankondondoawike ndyoka otali ulike kegameno lyopambepo nenge konkalo yokugamenwa kiiponga yopambepo. Egameno ndyoka ohali monika owala kwaamboka yi inekela Kalunga, ihe hakwaamboka inaaye mu inekela. Tse otwa ninga Jehova egameno nepopilongulu lyetu mokukala tatu mu tanga e li Omupangeli gweshito alihe nomokuuvitha onkundana ombwanawa yUukwaniilwa. Otu uvite twa gamenwa pambepo molwaashoka Jehova oku na aluhe ehalo oku tu kwathela.
92:12—Omomukalo guni aayuuki taya “ka koka ya fa omilunga”? Omulunga ogwa tseyika nawa omolwokwiima kwago. Omuuyuuki okwa fa omulunga molwaashoka oku li omuunashili momeho gaJehova noha kala ti imike “iiyimati iiwanawa” mbyoka ya kwatela mo iilonga iiwanawa.—Mateus 7:17-20.
Iiyilongomwa kutse:
90:7, 8, 13, 14. Omayono getu ohaga teya po aluhe ekwatathano lyetu naKalunga kashili. Itatu vulu oku mu holeka omayono getu. Ihe ngele otatu iyele ombedhi shili e tatu etha ondjila yetu ya puka, Jehova ota ka kala ishewe e tu hokwa,‘e te tu ulukile esilohenda lye.’
90:10, 12, yelekanitha OB-1954. Molwaashoka onkalamwenyo ofupi, otu na “okuyalula omasiku getu.” Ngiini mbela? Omokukala tu na “omwenyo gu na oondunge” nenge okukala tu na oondunge opo omasiku getu ngoka ga hupu ko twaahe ga hepithe ihe tu ga longithe momukalo ngoka tagu nyanyudha Jehova. Shika otashi pula tu pitithe iinima yopambepo komeho nokulongitha ethimbo lyetu noondunge.—Aaefeso 5:15, 16; Aafilippi 1:10.
90:17. Oshi li shu uka okugalikana opo Jehova a ‘koleke iilonga yiikaha yetu’ nokuyambeke oonkambadhala dhetu ngele tu li miilonga yuukalele.
92:14, 15. Ngele aakulupe ya kala aakonakoni yOohapu dhaKalunga aalaadhi nohaye endathana aluhe noshigwana she, otaya tsikile okukala ya ‘hapa noya ziza,’ sha hala okutya, otaya kala ye na oonkondo dhopambepo, nokukala ye li eliko li na ongushu megongalo.
94:19. Kutya nduno “iimpwiyu” yetu oye etithwa koshike, okulesha nokutedhatedha kombinga ‘yehekeleko’ ndyoka tali adhika mOmbiimbeli otashi ke tu hekeleka.
95:7, 8. Okupulakena komayele gopamanyolo, okugandja eitulomo kugo nokukala tu na ehalo okuvulika kugo otashi ke tu kwathela twaaha kukutike oomwenyo dhetu.—Aahebeli 3:7, 8.
106:36, 37. Oovelise ndhika otadhi ulike kutya okusimaneka iimenka oku na ekwatathano nokuyambela oompwidhuli. Shika otashi ulike kutya omuntu ngoka ha simaneke iikalunga ota vulu okunwethwa mo koompwidhuli. Ombiimbeli otayi tu ladhipike tayi ti: “Yandeni iikalunga.”—1 Johannes 5:21.
‘Hambeleleni OMUWA!’
Omaimbilo gatatu gahugunina (Episalomi 104, 105, 106) gomembo etine lyomapisalomi otaga hulitha nekumagidho tali ti: “Halleluja!” nenge ‘Hambeleleni OMUWA!’ Episalomi 106 olya tameka wo nekumagidho ndyoka. (Episalomi 104:35; 105:45; 106:1, 48) Oshoshili kutya uutumbulilo mbuka “halleluja!” nenge ‘hambeleleni OMUWA!’ otau holoka iikando oyindji membo lyOmapisalomi okuza pe-90 sigo 106.
Otu na omatompelo ogendji gokuhambelela Jehova. Episalomi 73 sigo 106 otage tu pe oshindji shoka tu na okudhiladhila kusho, notagu udhitha oomwenyo dhetu olupandu okupandula Tate yetu gwomegulu. Ngele tatu dhiladhila kwaashihe shoka e tu ningila naashoka te ke tu ningila monakuyiwa, mbela itashi tu inyengitha tu ‘hambelele OMUWA’ noonkondo dhetu adhihe?
[Ethano pepandja 8]
Ngaashi Asaf, otatu vulu okukondjitha okwaahenakalunga ‘mokukala popepi naKalunga’
[Ethano pepandja 9]
Farao okwa li a sindika pEfuta Etiligane
[Ethano pepandja 9]
Ou shi kutya omolwashike omanna ga li hagi ithanwa “iikulya yaayengeli”?
[Ethano pepandja 11]
Oshike tashi tu kwathele okukutha po “iimpwiyu” yetu?