Oohapu dhaJehova odhi na omwenyo
Omanenedhiladhilo okuza mEmbo etitano lyOmapisalomi
AAYAMBA otashi vulika taya ti: “Aanona yetu aamati muugundjuka wawo naa fe iimeno tayi koko nawa. Aana yetu aakadhona naa fe oongudhi dhuulenga mombala. . . . Oonzi dhetu koohambo nadhi tane lwomayuvi omulongo.” Kakele kaashono, aayamba otashi vulika yi igidhe taya ti: “Oshigwana shi li ngeyi, oshi na elago.” Ihe mepingathano naashoka, omupisalomi okwa ti: “Oshigwana shi na OMUWA, oye Kalunga kasho, oshi na elago.” (Episalomi 144:12-15) Oshi li ngawo, molwaashoka Jehova oye Kalunga omunelago, nelago oli li oshipewa shaamboka haye mu longele. (1 Timoteus 1:11, OB-1954) Uushili mbuka owi iwetikile sha yela moshitopolwa shahugunina shomaimbilo ga nwethwa mo kuKalunga ngoka taga adhika mEpisalomi 107 sigo 150.
Embo etitano lyOmapisalomi otali tsu wo omuthindo omaukwatya gaJehova ge li dhingi, mwa kwatelwa esilohenda lye, uudhiginini we nuuwanawa we. Shi thike ngaa mpoka tatu uvu ko uuntu waJehova, opo ngaa pu thike ehalo lyetu lyokukala tu mu hole noku mu tila. Shika otashi tu etele wo elago. Etumwalaka ndyoka tatu adha mEmbo etitano lyOmapisalomi kali na tuu ongushu!—Aahebeli 4:12.
YE LI AANELAGO MOLWUUWANAWAHENDA WAJEHOVA
(Episalomi 107:1–119:176)
Aajuda mboka ya li ya galuka muupongekwa wuupika waBabilonia oya li yi imbi taya ti: “Naa pandule OMUWA [omolwesilohenda] lye nomolwiilonga iikumithi e yi ya ningile.” (Episalomi 107:8, 15, 21, 31) David okwa hambelele Kalunga ti imbi ta ti: “Uudhiginini woye otau adha sigo okeyalelo.” (Episalomi 108:4) Meimbilo lya landula ko okwa galikana ta ti: “OMUWA Kalunga kandje, kwatha ndje; hupitha ndje omolwesilohenda lyoye.” (Episalomi 109:18, 19, 26) Episalomi 110 otali hunganeke elelo lyopaMesiasa. Episalomi 111:10 otali ti: “Okutila OMUWA okwo ekota lyuunongo.” Episalomi lya landula ko otali popi kutya “omunelago oye ngoka ha simaneke OMUWA.”—Episalomi 112:1.
Episalomi 113 sigo 118 ohagi ithanwa Omapisalomi gaHallel, molwaashoka otage endulula omautumbulilo “Halleluja!” nenge “Hambeleleni OMUWA!” Pakupopya kwOmishnah, embo lyomethelemimvo etitatu moka mwa li mwa nyolwa omithigululwakalo dhopakana dhonale, omaimbilo ngoka oga li gi imbwa pOpaasa nopiituthi yokomumvo itatu yOshijuda. Episalomi ndyoka ele kOmapisalomi agehe noli li wo ontopolwa onde mOmbiimbeli ayihe, olyo Episalomi 119 ndyoka tali popi kutya oohapu dhaJehova nenge etumwalaka lye oli shi okusimanekwa.
Omapulo gopamanyolo taga yamukulwa:
109:23—David okwa li a hala okutya shike sho a ti: “Otandi kana po mbala ngaashi omuzile gwokomatango”? David okwa li ta hokolola pakatewo ta ti kutya oku uvite e li pokusa.—Episalomi 102:11.
110:1, 2—“Omuwa [gwaDavid],” Jesus Kristus, okwa li a ningi shike sho a li a kuutumba kolulyo lwaKalunga? Jesus konima yeyumuko lye okwa li a londo megulu nokwa li a tegelela e li kolulyo lwaKalunga sigo omo 1914 a tameke okupangela e li Omukwaniilwa. Pethimbo ndyoka, Jesus okwa li ta pangele aalanduli ye aagwayekwa, te ya wilike miilonga yokuuvitha noyokuninga aantu aalongwa nosho wo oku ya longekidhila oku ka pangela pamwe naye mUukwaniilwa we.—Mateus 24:14; 28:18-20; Lukas 22:28-30.
110:4—Onalye Jehova a gana ‘egano itaali lunduluka’? Egano ndika olyo ehangano ndyoka Jehova a ninga naJesus Kristus opo a kale e li Omukwaniilwa nOmusaaseri omukuluntu.—Lukas 22:29.
113:3—Omomukalo guni edhina lyaJehova li na okusimanekwa “okuza kuuzilo sigo okuuninginino”? Shika osha kwatela mo oshindji kaashi shi owala ongundu yoohandimwe mboka taya longele Kalunga esiku kehe. Oonte dhetango ohadhi minikile ombanda yevi ayihe okuza kepito lyetango kuuzilo sigo okuuninginino. Sha faathana, Jehova oha simanekwa kombanda yevi alihe. Shika itashi vulu okuningwa nopwaahe na oonkambadhala dhu unganekwa. Tu li Oonzapo dhaJehova, otu na uuthembahenda wa dhenga mbanda wokusimaneka Kalunga nokukutha ombinga nuulaadhi miilonga yokuuvitha Uukwaniilwa.
116:15—Ongiini shi li “kaashi shi oshipu momeho gOMUWA okutala omuntu gwe ta si”? Aalongeli yaJehova oye na ongushu onene kuye omolwaashoka ite ke etha ya se ye li ongundu. Ngele Jehova okwe etha oshinima shoka shi ningwe, ota ka kala a fa e vulike oonkondo kaatondi ye. Kakele kaashono, kapu na gumwe ta ka thigwa kombanda yevi a ye muuyuni uupe waKalunga.
119:71—“Okugeelwa [shoka tashi ti lelalela, “okumona iihuna,” NW]” oku na uuwanawa washike? Okumona iihuna otaku vulu oku tu longa okwiinekela lela muJehova, oku mu galikana twa mana mo nokukala tu li aalaadhi lela mokukonakona Ombiimbeli nokutula miilonga shoka tayi popi. Kakele kaashono, okwiinyenga kwetu shi na ko nasha nokumona iihuna otaku vulu okuholola okwaahagwanenena kwetu hoka taku vulu okulundululwa. Okumona iihuna itaku tu ningitha tu kwatele yalwe onkone ngele otatu etha ku tu zule.
119:164—Otashi ti shike okuhambelela Kalunga “luheyali mesiku”? Onomola heyali olundji ohayi ulike kokugwanenena. Onkee ano, omupisalomi ota ti kutya Jehova oye awike a gwana okuhambelelwa.
Iiyilongomwa kutse:
107:27-31. Uunkulungu wuuyuni itau ka “kwatha sha” ngele Armagedon te ya. (Ehololo 16:14, 16) Itau vulu okuhupitha omuntu nando ogumwe opo kaa hanagulwe po. Oomboka owala taya kongo ehupitho kuJehova taya ka kala nomwenyo opo ye ‘mu pandulile esilohenda lye.’
109:30, 31; 110:5. Omukwiita ngoka a homata egongamwele moshikaha shokolulyo olundji oha kala a pumbwa egameno lyoshikandekitho shoka shi li moshikaha shokolumoho. Pathaneko, Jehova oku li “kolulyo” lwaapiya ye oku ya kondjela. Kungeyi ohe ya gamene nohe ya kwathele, shoka shi li etompelo ewanawa kutse ‘oku mu pandula.’
113:4-9. Jehova oku li mombanda mokulekule onkee oha nyongama nokuli “a tale egulu.” Ihe oha yaalele oohepele, aathigona naakiintu ihaaya vala. Omuwa Omunamapangeloagehe Jehova omwiifupipiki nokwa hala aalongeli ye nayo ya kale ngawo.—Jakob 4:6.
114:3-7. Okutseya kombinga yiikumithalonga mbyoka Jehova a longela oshigwana she pEfuta Etiligane, pomulonga gwaJordan nopondundu Sinai oshi na oku tu inyengitha noonkondo. Aantu otaya thanekwa ‘kevi’ noye na okukala taya “kakama” pathaneko omolwOmuwa.
119:97-101. Okukala tu na oondunge, omayele neuvoko lyOohapu dhaKalunga otaku tu gamene kiiponga yopambepo.
119:105. Oohapu dhaKalunga odho onyeka yokoompadhi dhetu molwaashoka otadhi vulu oku tu kwathela nkene tu na okuungaunga nomaupyakadhi ngoka ge tu taalela kunena. Odhi li wo uuyelele wopathaneko mondjila yetu, molwaashoka otadhi popi elalakano lyaKalunga lyomonakuyiwa.
YA NYANYUKWA NONANDO OPU NA OONKALO OONDHIGU
(Episalomi 120:1–145:21)
Ongiini tatu vulu okutaalela omahepeko nokuhupa moonkalo oondhigu? Episalomi 120 sigo 134 otali gandja eyamukulo lya yela nawa kepulo ndika. Ohatu hupu muudhigu nohatu kala twa nyanyukwa molwaashoka ohatu kongo ekwatho kuJehova. Omapisalomi ngaka hagi ithanwa Ondundwilandjimbo, otashi vulika ga li gi imbwa sho Aaisraeli ya li taya yi kuJerusalem omolwoku ka dhana iituthi yawo yokomumvo.
Episalomi 135 ne-136 otali popi Jehova e li Omulongi gwaashoka tashi mu nyanyudha, a yooloka ko thiluthilu kiikalunga mbyoka kaayi na ekwatho lyasha. Episalomi 136 olya nyolwa nelalakano okwiimbwa aantu taya yamukulathana, oshitopolwa shahugunina shovelise kehe shi imbwe tashi yamukula shotango. Episalomi lya landula ko otali hokolola oonkalo dhAajuda ya nika oluhodhi muBabilonia mboka ya li ya hala okulongela Jehova muSioni. Episalomi 138 sigo 145 oga nyolwa kuDavid. Okwa li a hala ‘okupandula Jehova nomwenyo gwe aguhe.’ Omolwashike? Okwa ti: “Oshoka onda shitwa nuunkulungu.” (Episalomi 138:1; 139:14) Momapisalomi gatano ga landula ko, David okwa galikana Jehova e mu gamene kaantu aawinayi, e mu geele negeelo li li pauyuuki, e mu hupithe miikaha yaahepeki ye noku mu wilike meihumbato lye. Okwa li a tsu omuthindo kutya oshigwana shaJehova oshi na elago. (Episalomi 144:15) Konima David sho a popi te endulula uunene nuuwanawa waKalunga, okwa ti: “Nandi hambelele aluhe OMUWA; iishitwa ayihe nayi simaneke edhina lye eyapuki aluhe sigo aluhe.”—Episalomi 145:21.
Omapulo gopamanyolo taga yamukulwa:
122:3—Ongiini Jerusalem sha li oshilando “sha kwatekelwa kumwe”? (OB-1954) Omagumbo gomuJerusalem oga li ga tungwa ga kwatathana ngaashi sha li osho hashi ningwa pandjigilile miilando yonale. Molwaashoka oshilando osha li sha tungwa shi li mumwe, osha li oshipu oku shi gamena. Kakele kaashono, molwaashoka omagumbo oga li gi ili popepi lela, osha li tashi wapa kwaamboka ya kala moshilando opo ya vule okuyakulathana nokugamenathana. Shoka osha li tashi ulike uukumwe wopambepo womazimo 12 gaIsraeli uuna ga gongala pamwe omolwokulongela Kalunga.
123:2—Ethaneko li na ko nasha nomeho gaapiya otali ti shike? Aapiya naadhike ohaya tala kiipala yooyene noyaanyekadhi omolwomatompelo ge li gaali: lyotango, okumona kutya oya hala okuningilwa shike, netiyali, okugamenwa nokupewa shoka ya pumbwa monkalamwenyo. Sha faathana, ohatu tala kuJehova opo tu tseye kutya okwa hala tu ninge shike nosho wo okukala twa hokiwa kuye.
131:1-3—Ongiini David a li a ‘loteke omwenyo gwe noku gu ngungumaneka ngaashi okanona ka lala mekolo lyayina’? Ngaashi okanona haki ilongo okumona ehekeleko nosho wo embilipalelo miikaha yayina, David okwa li i ilongo okuloteka nokungungumaneka omwenyo gwe “ngaashi okanona ka lala mekolo lyayina.” Ngiini? Omokukala e na omutima kaagu na uuntsa nomokwaatalitha omeho ge kiinima mbyoka yopuule nosho wo okwaaitula mumbyoka iinene. Pehala lyokulalakanena esimano, David okwa li a zimina kutya okwa ngambekwa mwaashoka ta vulu okuninga e tu ulike eifupipiko. Oshi li pandunge oku mu holela, unene tuu ngele otu na uuthembahenda wontumba megongalo.
Iiyilongomwa kutse:
120:1, 2, 6, 7. Omalundilo nomasheko otayi vulu okweetela yalwe oluhodhi itaalu vulu okwiidhidhimikilwa. Okupangela elaka lyetu oko omukalo gumwe gwokuulika kutya otwa hala “ombili.”
120:3, 4. Ngele twa lundilwa ‘komukotokeli,’ otatu vulu okumona ehekeleko mokutseya kutya Jehova uupyakadhi ote ke u kandula po pethimbo lye. Aasheki otaya ka monithwa iihuna ‘kondjumbeta.’ Otaya ka pangulwa lela epangulo lya hanya ndyoka tali thanekwa ‘komakala ga hanya omulilo.’
127:1, 2. Moonkambadhala dhetu adhihe, otu na okukonga ewiliko kuJehova.
133:1-3. Uukumwe woshigwana shaJehova ohau ngungumaneke, ou li nawa nohau talaleke. Katu na oku u piyaganeka mokukala tatu kongo omapuko maamwatate, mokutamanana nenge mokunyenyeta nayo.
137:1, 5, 6. Aalongeli yaJehova mboka ya li muupongekwa oya li ye uvite ye na ekwatathano naSion, shoka sha li oshitopolwa shehangano lye lyokevi pethimbo ndyoka. Ongiini kombinga yetu? Mbela otwa kakatela nuudhiginini kehangano lyaJehova ndyoka ta longitha kunena?
138:2 (OB-1954). Jehova ota ka gwanitha omauvaneko ge agehe ngoka u uvaneka medhina lye pamukalo ngoka inaatu shi tegelela nando. Odhoshili kutya opu na omategameno omawanawa noonkondo ngoka twa tegelela.
139:1-6, 15, 16. Jehova oku shi iilonga yetu, omadhiladhilo getu naashoka tatu ka tumbula omanga inaatu shi popya. Oku tu shi manga inaatu valwa, manga iitopolwa yetu ayihe yolutu ya li itaayi vulu okuyoololwa. Ontseyo yaKalunga yoku tu tseya pauhandimwe otayi “kumitha unene.” Kashi hekeleka tuu okutseya kutya Jehova ina tseya owala oonkalo dhaashoka tashi tu makele, ihe oku shi wo iilanduliko mbyoka tayi ke tu adha.
139:7-12. Kehe ngaa mpoka tatu yi, kashi na nduno mbudhi kutya okokule shi thike peni, Jehova ota vulu oku tu kwathela.
139:17, 18. Mbela ontseyo yokutseya Jehova oye tu opalela? (Omayeletumbulo 2:10) Ngele osho, otwa mona othithiya yenyanyu ndjoka ihaayi pu. Omadhiladhilo gaJehova “ogendji ge vule ehekevi lyopefuta.” Otapu ka kala aluhe oshindji okwiilonga kombinga ye.
139:23, 24. Otu na okukala tu na ehalo opo Jehova a konakone omadhiladhilo getu gokomutima okumona ngele otu li “mondjila yu uka kekano,” sha hala okutya, okutala ngele otu na omadhiladhilo, omahalo nosho wo omagamo omawinayi noku tu kwathela tu ge ekelehi.
143:4-7. Ongiini mbela tatu vulu okwiidhidhimikila omaudhigu omanene? Omupisalomi ote tu lombwele shoka tu na okuninga: Okutedhatedha iilonga yaJehova, okukala tu na ko nasha niilonga ye noku mu galikana e tu kwathele.
“Halleluja!”
Omambo gane gotango gomapisalomi kehe limwe olya hula noohapu tadhi hambelele Jehova. (Episalomi 41:13; 72:19, 20; 89:52; 106:48) Embo lyahugunina (Episalomi 107 sigo 150) nalyo olya hula noohapu dha tya ngaaka. Episalomi 150:6 otali ti: “Shaa shoka shi na omwenyo, hambelela OMUWA! Halleluja!” Shoka otashi ka ningwa shili muuyuni uupe waKalunga.
Manga twa tegelela ethimbo ndyoka lyenyanyu, otu na omatompelo ogendji gokusimaneka Kalunga kashili nokusimaneka edhina lye. Ngele tatu dhiladhila kenyanyu ndyoka tu na ngashingeyi molwaashoka tu shi Jehova nokunyanyukilwa ekwatathano ewanawa naye, mbela itashi tu inyengitha tu mu simaneke nomitima dhu udha enyanyu?
[Ethano pepandja 31]
Iikumithalonga yaJehova iikumithi noonkondo
[Ethano pepandja 32]
Omadhiladhilo gaJehova “ogendji ge vule ehekevi lyopefuta”